Неомврія въ 26 день. Служба св. новомученику Георгію Хіосянину.

Въ предъидущей статьѣ, помѣщенъ нами переводъ жизнеописанія и мученичества новаго мученика Георгія, пострадавшаго вь г. Кидоніяхъ (на островѣ Критѣ) отъ Турокъ въ 1807 году. Теперь мы предлагаемъ вниманію читателей самую службу, или богослужебное послѣдованіе, составленное, по-видимому, на Аѳонѣ, въ честь помянутаго Святаго. Служба написана неизвѣстнымъ авторомъ на старомъ греческомъ языкѣ – такъ называемой святоотеческой эпохи. Переводъ сдѣланъ не на русскій, а на церковнославянскій языкъ, потому что на этомъ послѣднемъ языкѣ легче выдерживались идіотизмы подлиника, а кромѣ того открывалось близкое сходство этой, неизвѣстной у насъ службы со всѣми существующими у насъ службами древнимь святымъ – по самой разстановкѣ словъ. Подобные пріемы употреблялись и древними переводчиками нашего богослуженія съ греч. языка.

Неомврія въ 26 день.

Память творимъ святаго славнаго новомученика Георгія Хіосянина, пострадавшаго въ лѣто отъ Рожд. Х. 1807 г. въ Богохранимомъ градѣ Кидоніяхъ.

Вечеръ на «Господи возвахъ»... ставимъ стиховъ 8 и поемъ стихиры подобны.

Гласъ 1. Небесныхъ чиновъ...

Днесь, руками плещущи, свѣтлоторжествуетъ градь Кидоніи, и свѣтится весь, память совершающи пѣсненно, Георгія мученика, его-же произрастивъ Хіосъ въ даръ тому принесе страданіемъ.

На судищи сталъ еси, мучениче Георгіе, Бога проповѣдуя Спасителя міру: егда же прещенія и истязанія мучителей не устрашиша тя, въ темницу связанъ вверженъ былъ еси, Христа умоляя.

Пріидите празднолюбцы вси, очистивше страсти и добродѣтелей божественныхъ лучами просвѣтившеся, воспоимъ достойно мученика честная страданія, въ вѣрѣ бо чистѣй подвизався, чистыхъ пѣвцовъ требуетъ.

Уязвляему мученіи тѣлу твоему мучениче и точеніи кровей окропляему, наслажденіе превеліе и радость имѣти показался еси мучителемь, и его же отверглся еси нуждею томимъ, сего, яко Бога, проповѣдалъ еси.

Егда пріиде часъ отшествія твоего на мѣстѣ осужденія, тогда колѣна твоя преклонивъ, жженію и убійству самаго себе предалъ еси, земля же Кидоній твердая обагрися кровми твоими.

Яко жертва благоугодная приносимъ заколеніемъ Творцу, взывалъ еси Треблаженне: Владыко, Христе мой! пріими и мене, Тебе ради раздробляема, людемъ же града Кидоніи, молю, даждь обильно милости Твоя.

Слава, гл. 4-й.

Любовію уязвленъ Георгіе, Жениха умнаго, естества силы преодолѣлъ еси, и исполнь благодати бывъ, человѣческій весь отверглъ еси страхъ: ты бо душу нехотящую отрѣшитися тѣдесе слитіемъ естественнымъ, крѣпостію же дарованною тебѣ отъ всѣхъ Бога пренебрегшую сіе, тую положилъ еси: сего ради мечми мучителей нещадно сѣчено{1} бысть и глава отдѣлися, выя же, яко класъ горестно пожнеся: твоя же адамантова крѣпкая душа непреста чредою воспѣвати пѣсни Богу, сего умоляющи. Его же и нынѣ, всехвальне мучениче Христа Бога, со ангелы предстоя моли непрестанно, благодать обрѣсти и милость въ день судный вѣрно совершающимъ всечестную память твою.

И нынѣ Богородиченъ,

Прокименъ дне, чтенія мученич.

На литіи самогласны, гл. 1.

Страдальцевъ ревнителя и единомысленна мученникомъ, похваленіе Хіоса и Кидоній преизящное украшеніе, новоизрастшій цвѣтъ рая таинственнаго, благовонія исполнивши Христову церковь и къ наслажденію своихь многообразныхъ уханій днесь созвавши всѣхъ благочестивыхъ соборы, Георгія новомученика вѣрніи ублажимъ; сей бо по благочестію ратовавъ, терпѣливно подъять знаменія побѣды и предстоитъ вѣнценосецъ Христу подвигоположнику, моляся о душахъ нашихъ.

Гласъ 2.

Заколеніемь твоимъ вся благочестивыя освѣтивъ, на высоту небесную преселился еси, страдальче, да покажеши вѣрнымъ толико побѣдительны Христомученики. Въ немощи бо плоти, мужествомъ хвалящася{2} врага, яко врабія играюща, удобь низлагають. Но и насъ твоихь пѣвцовъ, лукаваго веліара свобождая востаній, заступи новомучениче, въ день судный.

Слава, гл. 2.

Егда твоего отъ земли преселенія, Георгіе мучениче, божественнымъ мановеніемъ время наста, тогда потщался еси отложити дебелость плоти твоея и прейти безпрепятія тѣснѣйшій путь. Сего ради земную скинію страданіемь утончивъ, легокъ, яко окриленъ, къ чертогамъ небеснымъ востеклъ еси и мучениковъ привелся еси чиностояніемъ. Тѣмъ-же и мы, молимь тя, не престай мучениче, твоими ходатайствы Троицу умоляя, свобождати варварскаго мучительства почитающихъ тя.

И нынѣ: Богородице ты еси лоза...

На стиховнѣ стих. подобны, гл. 2. Егда отъ древа тя мертва...

О блаженныя твоея души, сподобишіяся стати съ чинми ангеловъ, ужасно окрестъ стоящихъ престола Владыки, держащаго вѣнцы неувядимы, ими же вѣнча твою священную главу, яко на судищи представъ терпѣливно подвизался ecи, да низложиши противнаго.

Стих. Праведникъ яко финиксь процвѣтетъ.

Отлучился еси чувственнѣ рабовъ, цѣлующихъ вѣрою твою честную главу, Хіосче, взявшую побѣды на противныя горнія и дольнія, воевавшія на тя уязвленіи мучителей, всѣмъ же вѣрнымъ молящимся и восхваляющимъ тя, дарующую заступленіе божественное.

Стих. Насажденъ въ дому Господни.

Не остави сирыхъ, опрятавшихъ блаженно тѣло твое со тщаніемъ, раку мощей твоихъ лобызающихъ усердно, сущихъ на земли и плавающихъ, дальнихъ и ближнихъ и бдящихъ ти въ честнѣмъ храмѣ твоемъ, еже совершити пѣнія и прославити ревностно память твою, Божественне Гооргіе.

Слава, гл. 4-й.

Веселятся о Господѣ Кидоніяне вси, память твою совершающе, Хіосче Георгіе: мнятъ бо праведно мзду пріяти отъ Бога и вѣнецъ, яко въ вѣцѣхъ варварскихъ Еллины постави мудры, проповѣдатели ревностны Трисолнечняго единаго Божества; его же молиши о душахъ нашихъ.

И нынѣ. Все упованіе мое...

Отпустительн. гл. 1. Камени запечатану...

Множество Кидоніямъ въ пѣснѣхъ восхвалимъ нашего согражданина и Хіоса похвалу, вѣры поборника теплаго, Георгія оружинка крѣпка: сплетеся бо противнику мужественно и сего порази. Тѣмъ же на небесѣхъ вѣнценосецъ мученикомъ свеселится и намъ умилостивляетъ Единаго Человѣколюбца.

И нынѣ: Гавріилу вѣщавшу Тебѣ Дѣво...

На утрени, по перв. стихологіи. Сѣдаленъ, гл. 1. Гробь Твой Спасе...

Новаго страдальца и оружинка Господня, вѣнцы умными увяземъ вси Георгія славнаго и тому возопіимъ: сохрани любимѣйшій славящій тя градъ и душамъ нашимъ грѣховъ разрѣшеніе молитвами твоими даруй.

Слава, тойжде: И нынѣ.

Богородиченъ.

Дѣва воистину, прежде рождества Дѣво, дѣва воистину въ рождествѣ, Дѣво, дѣва приснодѣвственная по рождествѣ пребыла еси: и Дѣву тя исповѣдуемъ, Дѣво и Тобою, Дѣво, уповаемъ спастися, дѣвъ величаніе.

По 2-й стихолог. Сѣдаленъ, гл. 3-й. Краснѣйшую...

Егда любовію, яже бо Господу твоему явѣ уязвился еси мучениче Георгіе, тогда потщался еси паки притещи съ плачемъ къ Тому жде, его же отверглся еси: егда же судищу беззаконныхъ предсталъ еси, тогда мерзкое нечестіе оплевалъ еси и мечемъ усѣченъ въ главу твою, молишися о душахъ нашихъ.

Слава, тойжде: И нынѣ.

Богородиченъ.

Тронъ всезлатый Царя и рай цвѣтущь явилася еси Богородице всепѣтая, Бога бо во чревѣ Твоемь поносивши, облагоухаеши насъ божественными благодатьми: тѣмже вси тя истинно Божію Матерь проповѣдуемъ всегда и величаемъ.

По поліелеи, Сѣдаленъ, гл. 4. Вознесыйся на крестъ волею...

Краснѣйшее прозябеніе Хіоса, прежде младо суще увядшее, нечестія зноемъ страшнымъ сожжено, се нынѣ процвѣте благочестія цвѣтъ, кровію страданій напоено обильно и благовонія исполни насъ, его же по достоянію почтимъ пѣсньми.

Слава, тойжде: И нынѣ.

Богородиченъ.

Нечистыхъ помысловъ моихъ множества и скверныхъ мыслей тучи – кто изрещи возможетъ, Пречистая; востанія же безплотныхъ враговъ моихъ и сихъ злобу – кто исповѣсть; но Твоею молитвою, Благая, сихъ всѣхъ свобожденіе мнѣ даруй.

Канонъ святаго, гл. 4.

Пѣснь 1. Колесницегонителя Фараона погрузи...

Троице святая и единице пребожественная, свѣтодѣтельный источниче, изъ него же всякое даяніе благо исходитъ, просвѣти сердце мое, еже пѣти достойно иже за тя пострадавшаго, мученика новаго Георгія.

Георгія послѣдователь бывъ, мучениче Георгiе, побѣдоносца, егоже и стезями бодренно шествовалъ еси и пострадалъ еси за Христа терпѣливѣйше, сего и славы сподобился еси.

Въ Хіосѣ рожденный первѣе, еже по плоти, се нынѣ во градѣ Кидоніяхъ пострада и родися отъ Духа мученіемъ. Тѣмже достойно пѣсньми сего праздновати потщимся.

Богородиченъ.

Еже Богородицу Тя проповѣдити, Пречистая, всякія ереси отгнаніе приноситъ. Плоть бо бывшаго неизмѣнно родила еси, сущаго естествомъ, Богородительнице, превышша{3} твари, Слово Божіе вѣчное.

Пѣснь 3. Утверждей въ началѣ...

Мучениковъ подражателя и страдальца Господня по достоянію вѣрніи сошедшеся празднуимъ свѣтло, Георгія мученика, иже во градѣ семъ за Христа пострадавшаго.

Совершающихъ лѣтнѣ честный твой праздникъ отъ всякихъ искушеній и бѣдь сохрани насъ неврежденныхъ о новомучениче, яко имѣяй смолящагося тебѣ великаго явѣ Георгія{4}.

Жезлъ, израстившій Христа, цвѣтъ же нетлѣнія и златую кадильницу вси вѣмы Тя, Чистая, божественнаго существа угль носящую въ объятіяхъ, Дѣво Богоблагодатнѣйшая.

Сѣдаленъ, гл. 1. Собезначальное слово...

Ангеловъ чины вси удивишася, человѣковъ множество изумися и полчище супостатъ безплотныхъ ужасеся, егда мучителемъ представъ и Христа исповѣдая, раздражилъ еси я, аки звѣри, тѣло твое нещадно разтерзати, мучениче Георгіе.

Слава тойжде.

И нынѣ. Богородиченъ.

Многообразнѣ, Дѣво, Христа прогнѣвахъ, мыслію и словомъ, дѣлы же и дѣяніи, и боюся еже тамо страшнаго судища, но предваривши скоро, страшныхъ свободи мя Твоего молитвенника, Матернею твоею молитвою и къ Богу предстательствомъ Богородительнице.

Пѣснь 4. Ты моя крѣпость, Господи...

Тебе воистину велика предстателя Господь намъ всѣмъ явѣ дарова, купно съ храбрымъ же и мудрымъ божественнымъ Георгіемъ, о новомучениче Георгіе! тѣмже градъ сей отъ всякія нужды, взываемъ, молитвами твоими сохрани.

Ты воистину Хіоса прозябеніе былъ еси, но градъ сей стяжа тя велика защитника и тепла предстателя, яко въ немъ пострадавша, и по Господѣ, яко агнца заколенна, Его же намъ умилостиви святе!

Пріидите множество все вѣрныхъ мучениколюбивое, прославленіе новаго мученика совершимъ псалмопѣніи, вси въ томъ духовнѣ радующеся; зане праведнику нѣкоему похваляему, людіе, по писанію, возвеселятся.

Богородиченъ.

Отъ Давидскаго царскаго сродства израстивши Всецаря, и еже прежде вѣкъ изъ Отца Слово, несказанно и паче ума возсіявшее родила еси Дѣво. Тѣмъ же Богородицу Тя и яко матерь Творца славимъ.

Пѣснь 5. Вскую мя отринулъ еси..

Да вѣчныхъ истинно благъ наслѣдникъ будеши, непощадѣлъ еси твоего тѣла блаженіе Георгіе, но съ тѣмъ купно и душу усердно погубилъ еси, якоже Христосъ прежде изрече.

Мученикомъ былъ еси непреборимъ славне спострадатель и мученичества равночестенъ вѣнецъ взялъ еси. Отонюдуже Троицѣ предстоя съ ними, блаженне, молися о насъ, воспѣвающихъ тя.

Отечества былъ еси ревностію отложникъ, богомудре Георгіе, да улучиши еже погубилъ еси Божественное крещеніе, въ неже и одѣялся еси Божественнымъ промышленіемъ Господа, чрезъ мученіе новострадальче.

Богородиченъ.

Воинства выншихъ, Пресвятая, силъ Тя ублажаютъ, роди же вси человѣковъ достойно славатъ: Тобою бо единою сущіи на земли небеснымъ совокупльшеся поемъ рождество Твое.

Пѣснь 6. Очисти мя Спасе...

Изъ Хіоса произшедъ, блаженне, Христовъ служитель былъ еси, Его же въ Христополѣ, явѣ, младъ сый отверглся еси, Томужде паки, послѣжде, въ Кидоніяхъ подчинился еси страданіемъ.

Аще и отверглся еси первѣе, увы! Христа во младости; въ возрастъ же пришедъ паки исповѣдалъ еси и Сего яко, Сына вся могущаго спасти Бога проповѣдалъ еси.

Яко имѣяй дерзновеніе ко Христу Человѣколюбцу, за сего заколенный яко агнецъ святе, за чтущій тя градъ моли, еже свободися всякія тѣсноты.

Богородиченъ.

Еже звати Тя, во истину душъ есть очищеніе и помысловъ скверныхъ отраженіе и лукавыхъ прогоненіе демоновъ, Богородице Приснодѣво.

Кондакъ, гл. 3. Дѣва днесь...

Яко агнецъ не злобивъ къ заколенію веденъ, выю подъ мечь преклонилъ еси волею. Свыше Вѣнцедатель вѣнчаетъ главу твою, множество же Кидоніянъ, свѣтоносяще, совершаютъ память твою, Хіосче мужественне Георгіе.

Подобенъ.

Зареносное возсія, въ вѣцѣхъ послѣднихъ честное страданіе твое, Георгіе новомучениче, вся просвѣщающее православныя, вѣрою же и любовію къ тебѣ приходящія и усердно взывающія: Христе, Ты еси мучениковъ веселіе.

Икосъ.

Пріидите вси вѣршіи, Христова новаго мученика Георгія въ пѣніихъ и пѣснѣхъ духовныхъ празднуимъ, и свѣтло возвеличимъ: сей бо именитый, бывъ въ дѣтствѣмъ возрастѣ, понуждень, отвержеся, увы, Христа, обаче не пребысть въ невѣріи яко разуменъ, но познавъ свою прелесть, живяше православнѣ, мудрствуя наша дѣя христіански: оклеветанъ же отъ нѣкоего яко отступникъ, ведеся ко истязанію и не восхотѣвъ открещися благочестія, усѣченъ бысть во главу. Сего ради ангелы возвесели, демоны посрами и вся воздвиже звати: Христе, Ты еси мучениковъ радованіе.

Пѣснь 7. Божія снисхожденія...

Во главу усѣченъ былъ еси, яко агнецъ за Христа Бога, и мучениковъ пріялъ еси мзду, имените, боголюбленія, и съ ними радуяся вопіеши: благословенъ Богъ отецъ нашихъ.

Всяческая презрѣлъ еси житейская сладкая, всечестне, и плоть твою купно же и міра и міродержителя. Нынѣ же взываеши непрестанно ко Господу: благословенъ Богъ отецъ нашихъ.

Христа исповѣдалъ еси предъ всѣми человѣки, сего ради Той тя предъ Отцомъ Небеснымъ исповѣсть, предстоящимъ ти ангеломъ, яко же Самъ Спасъ изрече прежде.

Богородиченъ.

Нынѣ вся исполнишася свѣта божественнаго Тобою Всечистая: явилабося еси дверь, ею же Богъ міру совокупися, просвѣщая зовущихъ вѣрою: бдагосдовенъ Богъ отецъ нашихъ.

Пѣснь 8. Седмерицею пещь...

Священныя останки твои лежатъ во градѣ Кидоніяхъ, въ немже и подвизался еси и умерщвленъ еси во Христѣ и вѣнцемъ увязыся еси мученичества: и нынѣ со дерзновеніемъ молимся непрестанно о совершающихъ священную память твою.

Великій въ мученицѣхъ, вѣрныхъ теплѣйшій, Побѣдоносецъ, старѣйшій же Георгій, радостно призва тя нынѣ яко соименна въ домъ свой, превелій и божественный, въ немже и положено бысть священное твое тѣло, да купно молите за весь міръ.

За насъ не престаните умоляти Человѣколюбца святіи Георгіи славніи, терпѣливомудрая божественная двоице! Да милосердъ будетъ всѣмъ намъ, иже пѣсненно въ веселіи совершающимъ божественную, честную же и святую память вашу, и да всѣхъ помилуетъ, яко единъ Милостивый.

Богородиченъ.

Иныя помощи, развѣ тебе Владычице, не вѣмь, заступленія къ Богу развѣ Тебе не обрѣтехъ, помилуй мя Пречистая, погибающаго отъ скверныхъ дѣлъ моихъ и спаси мя зовуща: радуйся благословенная, радуйся препрославленная во вся вѣки.

Пѣснь 9. Ужасеся о семъ небо...

Ангеловъ воинства изумишася и демоновъ полчища вострепеташа, яко самаго себе предалъ еси волею убійству и умертвился еси святе: тѣмъ же вси мы въ радованіи славимъ непрестанно укрѣпльшаго тя Христа, благосердаго Бога нашего.

Радуйся и ты, граде Кидоніянъ, и веселися бодренно духомъ, яко въ тебѣ умертвися мученикъ за Христа и освятился еси весь кровьми того священными: тѣмъ же и благохвали сего и прослави яко за тя выну молящася.

Память твою священную совершающе, молимъ вси раби твои, къ рацѣ мощей твоихъ святыхъ по долгу притекающія непрестанно и лобызающія умильно спаси отъ всякаго демонскаго возстанія и мирь намъ утверди.

Богородиченъ.

Всѣхъ Царя и Творца заченши Дѣво поносила еси: и нынѣ се яко царица одесную сего выну предстоиши: тѣмъ же молю Тя шуія части свободи мя въ часъ суда и деснымъ овцамъ сочини.

Экзапостиларій. Жены услышите...

Рака мощей твоихъ, трапезу подвиговъ твоихъ учредивши нынѣ, Георгіе, всѣхъ зоветъ къ наслажденію: сего ради купно веселимся и вѣрно молимъ: стани стражъ рабовъ твоихъ и неусыпень благочестія предстатель и заступникъ.

Другій. Крестъ хранитель...

Христосъ ми утѣшеніе въ печалѣхъ, Христосъ ми ослабленіе въ мукахъ, Христосъ ми воздаяній уготованныхъ мученикамъ дарователь: тѣмъ же мечемъ да усѣчется глава – взываше.

Богородиченъ.

Дѣва еси Ты по естеству – прежде рождества, Дѣва паче естества въ рождествѣ паки, Дѣва паче ума сохранилася есм Владычице: тѣмъ же дѣвы, твоя рабыни, соблюди отъ всѣхъ страстей.

На хвалитѣхъ, гл. 1. Небесныхъ чиновъ...

Соимененъ бывъ иже древле великомученику, Георгіе преблеженне, подвижниче храбромудренне, пострадалъ еси законно за Христа въ мужествѣ душевнемъ, взирая на воздаянія мукъ и мзду подвига.

Свѣтоначальныя Тройцы нынѣ озаряемь лучами умными, новомучениче Господень Георгіе, молися за ны любовію совершающія твою присночестную память и пѣсньми хвалящія подвиги твоя.

Страданій поприще добрѣ прешедъ, усѣченъ во главу подвигоносче Господень, прочее готовится тебѣ на небеси вѣнецъ неувядаемъ, его же дарствитъ ти Георгіе Христосъ, въ день испытанія.

Слава, гл. 2.

Въ небесныхъ обителѣхь, Хіосче Георгіе, съ чинми святыхъ духъ твой во вѣки радуется: свѣтло же и всесвященныя твои останки, въ веси Кидонійстѣй хранимыя чтутся, и повсюду честное имя твое поется, и славится Христосъ, прославляяй того славящія.

H нынѣ. Все упованіе мое...

Славословіе Великое и отпустъ.

На литургіи пѣснь 3 и 6. Апостолъ и Евангеліе великаго Георгія.

Киноникъ{5}; Въ память...

Величанія.

Славенъ въ мученицѣхъ именитый Георгій показася древнимъ, ты же въ нынѣшнихъ Георгіе новый, одиноименне Тому и сожителю, тѣмже тя вси почитаемъ.

Благоговѣйно священнымь мощамъ твоимъ покланяющихся, мучениче, непрестай сохраняти святыми твоими молитвами, яже къ Богу, новомучениковъ похвало, божественне Георгіе.

 

«Прибавленія къ Воронежскимъ Епархіальнымъ Вѣдомостямъ». 1873. № 1. С. 9-17; № 5. С. 160-163.

 

1 Сѣчено, очевидно, тѣло... Неладная разстановка словъ и въ подлинникѣ... Пер.

2 Τὸν ἐπ' ἀνδρεία καυχώμενον ἐχθρὸν. Это выраженіе въ прежнихъ службахъ нашихъ переводилось: намужество разливающася врага.

3 Τὸν ἐπέκεινα φύσει.

4 У Греческихъ пѣснописцевъ чаще, нежели у нашихъ, при восхваленіи новаго святаго похваляется соименный святый древній.

5 Киноникъ – причастный стихъ. Ред.




«Благотворительность содержит жизнь».
Святитель Григорий Нисский (Слово 1)

Рубрики:

Популярное: