Служба иже во святыхъ отцу нашему преподобному Паисію Величковскому, старцу Молдавскому, благодатному молитвеннику Іисусову.
НА ВЕЛИ́ЦѢЙ ВЕЧЕ́РНИ,
Стихологису́емъ Блаже́нъ му́жъ.., 1-й антифо́нъ.
На Го́споди воззва́хъ.., стихи́ры на 8, гла́съ 4. Подо́бенъ: Да́лъ еси́ зна́меніе.
Отъ ю́ности, о́тче Паи́сіе,* кра́сная мíра преоби́дѣвъ,* возжелѣ́лъ еси́ Бо́гу угоди́ти* непоро́чнымъ житіе́мъ и́ноческимъ.* Тѣ́мже рачи́тель бы́лъ еси́ смире́нія и послуша́нія,* нищеты́ и долготерпѣ́нія,* и чистѣ́йшія любве́,* непреста́нною моли́твою Бо́гу присвоя́яся* и отъ Него́ вѣнча́яся свѣ́тло.
Я́ко благочести́ваго іере́йскаго ко́рене* пречестна́я о́трасль,* Паи́сіе блаже́нне, яви́лся еси́.* Отъ ю́ности бо возлюби́въ сло́во Бо́жіе* и въ тишинѣ́ ду́ха своего́* умудри́въ у́мъ святы́хъ оте́цъ писа́ньми,* обрѣ́лъ еси́ свѣ́тлый спасе́нія пу́ть,* и́мже дости́глъ еси́* оби́тели Ца́рствія небе́снаго.
Оте́чествія удали́лся еси́,* преподо́бне о́тче Паи́сіе,* оста́вивъ до́мъ ма́тере твоея́;* уче́ніе же су́етное вѣ́ка сего́ презрѣ́въ,* обрѣ́лъ еси́ му́дрость неувяда́ющую* въ житіи́ и́ночестѣмъ,* я́ко пчела́ цвѣ́ты слове́съ оте́ческихъ облета́я* и ме́дъ уче́нія боже́ственнаго принося́,* и́мже пита́еши чту́щія па́мять твою.
Въ земли́ не скры́лъ еси́* тебѣ́ да́ннаго свы́ше* отъ Боже́ственныя благода́ти тала́нта,* но пре́далъ еси́* и мно́гимъ инѣ́мъ незави́стно,* бога́тно же Боже́ственныхъ даро́въ,* и́мже причасти́лся еси́,* я́ко вѣ́ренъ строи́тель,* яви́лся еси́ наслѣ́дникъ Бо́жій, Паи́сіе.
Напита́лъ еси́ а́лчущія пра́вды* пи́щею небе́сною,* хлѣ́бъ бо а́нгельскій* бы́сть сло́во твое́, Паи́сіе,* изыма́я отъ плѣне́нія грѣхо́внаго* ду́ши ча́дъ твои́хъ* и ко Христу́ тѣ́хъ приводя́.* Тѣ́мже тя́ сла́вимъ, вопію́ще:* моли́ спасти́ся душа́мъ на́шимъ.
И́ны стихи́ры, гла́съ то́йже. Подо́бенъ: Зва́нный свы́ше.
Зва́нъ бы́въ свы́ше,* а не отъ человѣ́къ,* на высоту́ добродѣ́телей возше́лъ еси́, о́тче Паи́сіе, мона́шески:* уча́, наказу́я и вразумля́я* не пренебрега́ти богоуго́днаго пути́,* преда́ннаго отъ святы́хъ оте́цъ,* и́хже житію́ ревну́я, поревнова́лъ еси́,* о́бразъ же бла́гъ всѣ́мъ бы́въ,* подъя́лъ еси́ бѣды́ и по́двиги* терпѣ́ніемъ мно́зѣмъ и любо́вію,* да всѣ́мъ о́ный пу́ть увѣ́риши,* свидѣ́тельствуя о не́мъ и отъ Боже́ственныхъ Писа́ній.
Иску́сный вра́чь душа́мъ бы́лъ еси́,* зѣло́ бо ле́гкимъ врачева́ніемъ,* о́тче на́шъ Паи́сіе,* врачева́лъ еси́ приходя́щія къ тебѣ́,* не укоря́я тѣ́хъ о неду́зѣ,* но терпѣ́ніемъ и сострада́ніемъ* въ се́рдцѣ влага́я,* е́же отвраща́тися о́наго вре́да,* соверше́нно исцѣля́лъ еси́ и́хъ,* ра́достныхъ же и ми́рныхъ отпуска́лъ еси́,* я́ко небоя́зненно всѣ́мъ притека́ти, о́тче,* ко врачевству́ твоему́.
Подо́бни мнѣ́ быва́йте,* я́коже а́зъ Христу́, –* учи́лъ еси́ ученики́ своя́ словесы́* па́че дѣ́лы богоуго́дными,* преподо́бне о́тче.* Вдохни́ ре́вность въ сердца́ на́ша подража́ти ти́,* да сподо́битъ на́съ всѣ́хъ* преблагíй Влады́ка тобо́ю получи́ти* отъ Него́ на судѣ́ ми́лость,* я́ко и на́мъ вку́пѣ съ тобо́ю* и со всѣ́ми святы́ми* сла́вити Христа́ Бо́га во вѣ́ки.
Сла́ва, гла́съ 6:
Совокупи́лся еси́ со безпло́тными во́инствы, и преподо́бнымъ лико́мъ сочета́лся еси́, и со избра́нными всѣ́ми лику́еши, прича́щся и́стиннымъ обоже́ніемъ и безсме́ртною, о́тче, жи́знію. Съ ни́миже о ста́дѣ твое́мъ непреста́нно твоего́ Влады́ку моли́.
И ны́нѣ, догма́тикъ, гла́съ то́йже:
Кто́ Тебе́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.
Вхо́дъ, проки́менъ дне́, и чте́нія три́:
Прему́дрости Соломо́ни чте́ніе. Глава́ 3.
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе – сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́ни чте́ніе. Глава́ 5.
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе – рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ – су́дъ нелицемѣ́ренъ. Пріи́метъ щи́тъ непобѣди́мый – преподо́біе, поостри́тъ же напра́сный гнѣ́въ – во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
Прему́дрости Соломо́ни чте́ніе. Глава́ 4.
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости – житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
На литíи стихи́ра хра́ма, та́же преподо́бному, гла́съ 3:
Въ тебѣ́, о́тче Паи́сіе, сло́во паде́ на до́брую зе́млю и плоды́ даде́ стори́чныя, я́же любве́ къ Бо́гу и къ бли́жнему по Христо́вымъ за́повѣдемъ, та́кожде и у́мныя моли́твы о́бразъ яви́лъ еси́ на́мъ. Тѣ́мже не отве́ржи на́съ, восхваля́ющихъ твоя́ сла́вная исправле́нія.
Сла́ва, гла́съ 2:
Весе́ліемъ, преподо́бне, съ чи́нми святы́хъ Бо́гу предстои́ши, я́же та́мо весе́лія и ра́дости насыща́яся. Сподо́би и на́съ та́мошняя ра́дованія получи́ти, да веселя́щеся, тебе́ велича́емъ, о́тче Паи́сіе.
И ны́нѣ, богоро́диченъ, гла́съ то́йже:
Все́ упова́ніе мое́ на Тя́ возлага́ю, Ма́ти Бо́жія, сохрани́ мя́ подъ кро́вомъ Твои́мъ.
На стихо́внѣ стихи́ры, гла́съ 2. Подо́бенъ: Кíими похва́льными.
Кíя похва́льныя по́чести* принесе́мъ Паи́сію?* Преиспещре́нному дѣя́нми* и изоби́льному благода́тьми,* богосія́нна свѣтоли́тія* мече́мъ посѣ́кшему страсте́й стремле́нія,* столпу́, боговидѣ́нми сія́ющу,* воздержа́нія свѣти́льнику,* на свѣ́щницѣ душе́внѣмъ зарю́ испуща́ющу Бо́жія велѣ́нія,* всѣ́мъ жи́знь даю́щаго.
Сти́хъ: Честна́ предъ Го́сподемъ* сме́рть преподо́бныхъ Его́.
Кíими похва́льными вѣнцы́* Паи́сія вѣнча́емъ словесы́?* Свяще́ннаго тече́нія ревни́теля,* небе́снымъ уче́ніемъ взя́таго* боговидѣ́нія крилы́ боже́ственными,* столпа́ смире́нія необори́маго,* стѣ́ну разсужде́нія непоколеби́мую,* нра́вомъ украше́нія честно́е благолѣ́піе,* о ча́дѣхъ свои́хъ Христа́ Бо́га моля́щаго,* еди́наго Благосе́рдаго.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
У́тро присносвѣ́тлое,* преподо́бне, показа́лся еси́,* луча́ми благода́тными;* страсте́й мгло́ю ослѣпѣва́ющихъ* приве́лъ еси́ къ Свѣ́ту невече́рнему,* о́тче Паи́сіе богому́дре.* Отню́дуже, я́ко возрасти́вша тала́нтъ,* душа́мъ тя́ цѣли́теля Христо́съ предлага́етъ,* неисцѣ́льнымъ стру́помъ согни́вшимъ,* мече́мъ слове́съ посѣка́юща* и здра́віе при́сно* и спасе́ніе всѣ́мъ подаю́ща.
Сла́ва, гла́съ 6:
Человѣ́че Бо́жій и вѣ́рный ра́бе, слуго́ Госпо́день, му́жу жела́ній, сосу́де избра́нный, сто́лпе и утвержде́ніе Це́ркве, Ца́рствія наслѣ́дниче, не премолчи́, вопія́ за ны́ ко Го́споду.
И ны́нѣ, богоро́диченъ, гла́съ то́йже:
Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.
Тропа́рь, гла́съ 1:
Паи́сіе о́тче, Руси́ утѣше́ніе, Аѳо́на сла́во и Молда́віи похвало́, и́же писа́ньми богодохнове́нными напоя́яй на́съ при́сно отъ исто́чникъ и́стины и спасе́нія, ны́нѣ на небесѣ́хъ предстоя́ Христу́ Бо́гу, моли́ спасти́ся душа́мъ на́шимъ.
Сла́ва, и ны́нѣ, богоро́диченъ:
Гавріи́лу вѣща́вшу Тебѣ́, Дѣ́во, – ра́дуйся! – со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́. Сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ рождество́мъ Твои́мъ.
НА У́ТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.
По 1-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.
Еди́ною въ лѣ́то исхожда́ше изъ ке́лліи своея́ преподо́бный Паи́сій и обзира́ше селе́нія ученико́въ свои́хъ, ѣ́здя посѣща́я и назна́менуя коего́ждо и́хъ ке́ллію, со́лнцу заходя́щу, и со слеза́ми моля́шеся, вруча́я и́хъ Бо́гу, и глаго́ля: Го́споди сохрани́ сіе́ ма́лое ста́до отъ волко́въ, гу́бящихъ е́. (Дважды)
Сла́ва, и ны́нѣ, богоро́диченъ:
Богоро́дице Дѣ́во, ро́ждшая Сло́во, па́че сло́ва, Зижди́теля Твоего́, Того́ моли́ при́сно съ преподо́бнымъ Паи́сіемъ сохрани́ти ста́до Твое́ отъ волко́въ, гу́бящихъ е́.
По 2-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.
Вре́мени бы́вшу лю́таго гоне́нія, и кимва́ломъ возгласи́вшимъ, – ага́ряне предъ враты́ монасты́рскими, – изше́лъ еси́ изъ ке́лліи твоея́, о́тче Паи́сіе, и ста́лъ еси́ предъ це́рковію, собра́вшимся къ тебѣ́ и ча́домъ твои́мъ, а́ки птенце́мъ до ко́коша своего́, гото́въ бы́лъ еси́, я́ко а́гнецъ, на заколе́ніе. (Дважды)
Сла́ва и ны́нѣ, богоро́диченъ:
Мно́зи борю́щіи мя́ отъ высоты́, въ болѣ́зни оскудѣ́ жи́знь моя́, понро́хъ въ про́пасть прегрѣше́ній; спаси́ мя́, Влады́чице, не пре́зри мене́, Предста́тельницу бо Тя́ непобѣ́дну и́мамъ.
Поліеле́й и велича́ніе:
Ублажа́емъ тя́, преподо́бне о́тче Паи́сіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.
Псало́мъ избра́нный: Терпя́ потерпѣ́хъ Го́спода, и вня́тъ ми́...
По поліеле́и сѣда́ленъ, гла́съ 1. Подо́бенъ: Гро́бъ Тво́й, Спа́се.
Вре́мя на́шего весе́лія и натрижне́нія наста́, въ не́мже пріе́млемъ страсте́й разрѣше́нія да́ръ, я́ко бо сто́лпъ о́гненъ яви́ся преподо́бный Паи́сій, попаля́ющь беззако́ннующихъ главы́, вѣ́рныхъ же просвѣща́ющь ду́ши уче́нми богоразу́мія и въ Боже́ственный гра́дъ, го́рній Іерусали́мъ, я́ко друга́го Изра́иля вводя́щь, я́ко учени́къ Бо́жія благода́ти. (Дважды)
Сла́ва, и ны́нѣ, богоро́диченъ:
Я́ко Всенепоро́чная Невѣ́сто Творцу́, я́ко неискусому́жная Ма́ти Изба́вителю, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и Вы́шняго прича́стія сподо́би и Свѣ́та невече́рняго моли́твами Твои́ми.
Степе́нна, 1-й антифо́нъ 4-го гла́са.
Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́.
Сти́хъ: Что́ возда́мъ Го́сподеви о всѣ́хъ, я́же воздаде́ ми́?
Ева́нгеліе отъ Матѳе́я, зача́ло 43.
По 50-мъ псалмѣ́ стихи́ра, гла́съ 6:
Преподо́бне о́тче, да́ръ Бо́гу избра́нъ са́мъ себе́ прине́слъ еси́, поуче́ніе боже́ственно, коне́чное смире́ніе, сокруше́ніе серде́чное, трезве́ніе и милосе́рдіе, и́стинное безстра́стіе и моли́тву стяжа́въ; сія́ обнови́теля дре́вняго и́ночества и сто́лпъ тя́ показа́ша свѣтови́днѣйшій.
Кано́нъ Богоро́дицы, со ирмосо́мъ, на 6, гла́съ 8: Во́ду проше́дъ... и преподо́бнаго два́ кано́на на 8.
Кано́нъ преподо́бнаго Паи́сія, гла́съ 3.
Пѣ́снь 1.
Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.
Сло́ве Бо́жій, свѣтозаре́ніемъ Свята́го Твоего́ Ду́ха, мра́чному уму́ моему́ свѣтоно́сную лучу́ низпосли́ и сло́во ми́ вдохни́ восхвали́ти, его́же Са́мъ избра́лъ и прія́лъ еси́, ве́рхъ оте́цъ, свѣтоза́рнаго Паи́сія.
Плотска́го жела́нія, преподо́бне, отве́ргся, го́рдость возненави́дѣлъ еси́; смире́ніемъ же и нището́ю обогати́вся, превысо́кая дости́глъ еси́ святы́хъ жили́ща.
Возше́лъ еси́ на высоту́ безстра́стія, вше́лъ еси́ во мра́къ боговидѣ́нія, прія́лъ еси́ въ се́рдцѣ твое́мъ Боже́ственный зако́нъ, и́мже укрѣ́плься, свѣти́льникъ пресвѣ́телъ мона́шествующихъ, преподо́бне, бы́лъ еси́.
Богоро́диченъ: О, Свѣ́та Прія́телище, Богора́дованная Влады́чице, преподо́бнымъ всѣ́мъ Похвало́! Спаси́ ны́ отъ бѣ́дъ, и обстоя́ній, и скорбе́й, воспѣва́ющія Тя́, Многопѣ́тую.
И́нъ кано́нъ свята́го, гла́съ 8.
Пѣ́снь 1.
Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.
Стадонача́льниче Бо́жіихъ дворо́въ, и́ноковъ чреды́ наставля́я ко огра́дѣ небе́снѣй, ра́дуйся, о́тче Паи́сіе преподо́бне, сѣ́мя бо твое́ бы́сть, я́ко звѣ́зды неле́стныя, свѣтоводя́щія концы́ земли́ Россíйскія.
Просвѣще́нія ума́ въ моли́твѣ серде́чнѣй взыску́я, пости́глъ еси́ сокрове́нную глубину́ святы́хъ Писа́ній, сія́ даде́ ти́ Бо́гъ, я́ко крилѣ́ голуби́нѣ, да полети́ши дѣя́ніемъ и почíеши въ видѣ́ніи.
Утро возсія́лъ еси́ на́мъ, свѣ́тлыми добродѣ́тели просвѣще́ніи, на́ша мы́сли просвѣща́я при́сно. Тѣ́мже твою́ свѣтоно́сную дне́сь, о́тче Паи́сіе, соверша́емъ па́мять.
Богоро́диченъ: Ра́дуйся у́ме, облиста́яй Боже́ственными сія́нми, заре́ мо́лнійная, освѣти́вшая земли́ концы́, и́стинное зла́та блиста́ніе, Вседо́брая и Пренепоро́чная, Свѣ́тъ Невече́рній вѣ́рнымъ облиста́вши.
Пѣ́снь 3.
Ирмо́съ: Непло́дная душе́ и безча́дная, стяжи́ пло́дъ благосла́вный, веселя́щися, возопíй: утверди́хся Тобо́ю, Бо́же, нѣ́сть свя́тъ, нѣ́сть пра́веденъ, па́че Тебе́, Го́споди.
Въ горѣ́ Аѳо́нстѣй всели́лся еси́, вели́кому Иліи́ подо́бяся проро́ку, въ Карми́лѣ обита́вшу. Та́ко и ты́, преподо́бне, въ молча́ніи радостотво́рномъ о́гнь къ огню́ прилага́лъ еси́, видѣ́ніи Боже́ственными осіява́емь.
Въ трудѣ́хъ, не́мощехъ, тѣснота́хъ и кра́йнемъ лише́ніи бѣ́ житіе́ твое́, о́тче, е́же на Святѣ́й горѣ́, отону́дуже стяжа́лъ еси́ Ду́ха Свята́го, положи́въ основа́ніе смире́нія.
Помышля́я себе́ су́ща пра́хъ и пе́пелъ, преклоня́лъ еси́ разу́мная колѣ́на се́рдца твоего́ предъ вели́чествомъ сла́вы Бо́жія, прося́ просвѣще́нія ума́ твоего́, николи́же, о́тче, возмни́въ себе́ дости́гша, но при́сно за́дняя забыва́я и любо́вію Боже́ственною вперя́яся.
Богоро́диченъ: Стра́сти души́ моея́ исцѣли́, возраста́ющія ми́ преокая́нно, по́мыслъ просвѣти́, дале́че отгоня́щи тму́, Чи́стая, де́моновъ, оскорбля́ющихъ мя́ и всегда́ сѣ́ти дѣ́лающихъ ми́.
Инъ.
Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.
Во́зрастъ духо́вный не отъ лѣ́тъ исчета́ется, сѣди́на же е́сть му́дрость и́стинная. Тѣ́мже во млады́хъ лѣ́тѣхъ су́ща му́жа соверше́нна, о́тче Паи́сіе, устроя́етъ тя́ Госпо́дь ста́рца изря́днѣйша.
Стопы́ своя́ напра́вивъ по словеси́ Госпо́дню, прише́лъ еси́ въ богоспаса́емую зе́млю Молда́віи, и та́мо насѣ́явъ до́брыя сѣ́мена пустынолю́бнаго житія́, возрасти́лъ еси́ свяще́нный вертогра́дъ учени́къ твои́хъ, и́же простре́ о́трасли своя́ во вся́ концы́ Россíйскія земли́.
Вели́кому въ добродѣ́телехъ поревнова́лъ еси́ Паи́сію и сего́ духо́вно стопа́мъ возслѣ́дуя, воздержа́ніемъ, преподо́бне, верхо́венъ яви́лся еси́ и о́бразъ ста́ду твоему́.
Богоро́диченъ: Му́дрость Бо́жія Ѵпоста́сная изъ Тебе́, Чи́стая, роди́ся, и зловѣ́рныя мудрецы́ потреби́, и умудри́ мно́жество мона́шествующихъ и преподо́бныхъ, воспѣва́ти благода́тію: Благослове́нная, Я́же Бо́га пло́тію ро́ждшая.
Сѣда́ленъ, гла́съ 8. Подо́бенъ: Прему́дрости.
Отъ ю́ности вся́ оста́вль мірска́я, усе́рдно послѣ́довалъ еси́ Зва́вшему тя́, преподо́бне, и на ра́мо взе́мъ Кре́стъ Го́спода твоего́, въ постѣ́хъ, о́тче, тѣ́ло изнури́лъ еси́, тѣ́мъ и па́стыря тя́ Свои́мъ овца́мъ до́брѣ устроя́етъ всеблагíй Госпо́дь, Паи́сіе блаже́нне. Моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́.
И́нъ сѣда́ленъ, гла́съ 8. Подо́бенъ то́йже.
О́тче блаже́нне Паи́сіе, въ моли́твахъ и въ бдѣ́ніихъ, тѣ́ло съ душе́ю Го́сподеви чи́сто предста́вилъ еси́, и отту́ду жили́ще и до́мъ Ду́ха Пресвята́го бы́лъ еси́. Тѣ́мже, я́ко преподо́бнымъ сожи́тель и пра́веднымъ, вѣне́цъ отъ руки́ Госпо́дни досто́йно прія́лъ еси́. Его́же моли́, прегрѣше́ній оставле́ніе дарова́ти, чту́щимъ любо́вію святу́ю па́мять твою́.
Сла́ва, и ны́нѣ, богоро́диченъ:
Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, о́гнь бо всели́ся въ Тя́ Божества́, и я́ко младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.
Пѣ́снь 4.
Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.
Съ усе́рдіемъ те́плымъ, о́тче, стра́нствовалъ еси́, ища́ учи́телей вѣ́рныхъ житія́ и́ноческаго, но обрѣ́лъ еси́ и собра́лъ еси́ кри́ны се́льныя: святы́хъ оте́цъ писа́нія, испуща́ющія благоуха́нія му́дрости неле́стныя.
Богодохнове́нный а́вва Дороѳе́й бѣ́ наста́вникъ тво́й въ нача́лѣ пути́ и́ноческаго, его́же кни́жному науче́нію отъ ю́ности поревнова́въ, сохрани́лъ еси́ за́повѣди его́ да́же до лѣ́тъ ста́рости твоея́.
Возлюби́лъ еси́, преподо́бне, вся́ отцы́ святы́я, и писа́нія и́хъ изслѣ́довавъ, извлека́лъ еси́, я́ко пчела́, некта́ръ сла́достный, науче́ніе свяще́нное, перелива́я сіе́ въ твоя́ медото́чная наставле́нія во услажде́ніе ча́дъ твои́хъ.
Богоро́диченъ: Еди́ну голуби́цу чи́сту Тя́ Жени́хъ мы́сленный обрѣ́те, Всенепоро́чная, кри́нъ благово́ннѣйшій, цвѣ́тъ прекра́снѣйшій и свѣтоно́сенъ черто́гъ, Невѣ́сту приведе́. Тѣ́мже Тя́, Дѣ́ву, пое́мъ и превозно́симъ во вся́ вѣ́ки.
Инъ.
Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.
Добро́та Жениха́ твоего́ распали́ любо́вь въ се́рдцѣ твое́мъ, е́же трезви́тися и бо́дрствовати, да не вни́деши въ напа́сть. Уче́ніе сіе́ оста́вилъ еси́ на́мъ – Добротолю́біе, писа́нія святы́хъ оте́цъ.
О́тче святы́й, напра́ви на́съ на пу́ть спасе́нія, поне́же мы́, имѣ́я тя́ о́бразъ къ подража́нію, та́кожде святы́хъ оте́цъ писа́нія, не испра́влены есмы́.
Въ кни́зѣ живо́тнѣй написа́лся еси́ досто́йно, напи́санная вся́ сконча́въ въ боже́ственныхъ кни́гахъ. Тѣ́мже вопію́ ти́: рукописа́ніе, о́тче, зо́лъ мои́хъ, твои́ми расто́ргни ко Всеви́дцу Бо́гу мольба́ми.
Богоро́диченъ: Стопа́мъ послѣ́дуя собо́ръ преподо́бныхъ, изъ чре́ва Твоего́ Возсія́вшему неизрече́ннымъ Рождество́мъ, Дѣ́во Ма́ти, съ небе́сными ли́ки сочта́ся, съ ни́миже моли́ся и испроси́ на́мъ очище́ніе, чту́щимъ Тя́.
Пѣ́снь 5.
Ирмо́съ: Къ Тебѣ́ у́тренюю, всѣ́хъ Творцу́, преиму́щему вся́къ у́мъ мíрови: зане́ свѣ́тъ повелѣ́нія Твоя́, въ ни́хже наста́ви мя́.
Отъ ю́ности сса́въ добродѣ́тель, воздержа́нія болѣ́зньми и по́ты по́стными въ му́жа дости́глъ еси́ и мѣ́ру духо́вную во́зраста Христо́ва.
Обновле́ніе вну́тренняго человѣ́ка и свобо́ду стяжа́лъ еси́, о́тче преподо́бне, прилѣпля́яся Бо́гу въ моли́твѣ, вы́ну глаго́ля: Го́споди Іису́се Христе́, поми́луй мя́ грѣ́шнаго.
Боже́ственный ра́зумъ, о́тче, стяжа́въ, и́мже пра́во разумѣва́я, я́ко зѣ́ницу о́ка храня́ше Правосла́вныя вѣ́ры догма́ты, та́же Ева́нгелія преда́нія, еще́ же святы́хъ апо́столъ и оте́цъ.
Богоро́диченъ: Не раздѣля́юще соедине́нная, ниже́ слива́юще, Еди́наго Христа́ сла́вимъ, изъ Тебе́ воплоще́ннаго Сло́ва, зову́ще: благослове́нъ еси́ въ хра́мѣ сла́вы Твоея́, Го́споди.
Инъ.
Ирмо́съ: Отъ но́щи невѣ́дѣнія по душелови́тельному пути́ при́сно блудя́щаго, свѣ́томъ ра́зума Твоего́, Го́споди, преднаставля́я мя́, на стезю́ за́повѣдей Твои́хъ напра́ви.
Житіе́ нескве́рно, терпѣ́ніе, и кро́тость, и любо́вь нелицемѣ́рну, воздержа́ніе безмѣ́рно, всено́щное стоя́ніе, умиле́ніе боже́ственное, вѣ́ру и наде́жду и́стинну съ ми́лованіемъ, о́тче, стяжа́въ, я́ко а́нгелъ пожи́лъ еси́ на земли́, Паи́сіе блаже́нне.
При́сный е́сть обы́чай святы́хъ, ели́ко приближа́тися и́мъ къ Бо́гу, толи́ко мно́жае глаго́лати: еще́ не оконча́хъ, еще́ не гото́въ е́смь. Та́ко и ты́, о́тче, себе́ при́сно смиря́лъ еси́, а́ще и соверше́нъ бы́лъ еси́.
Жела́ніемъ ду́ха пло́ти жела́ніе увяди́лъ еси́, и себѣ́, блаже́нне, обручилъ еси сожительницу – чистоту́, отъ нея́же ча́да тебѣ́ роди́шася – вся́ добродѣ́тели. Тѣ́мже просвѣща́еши мíра концы́.
Богоро́диченъ: Дѣ́во Честна́я, Неискусобра́чная, Чи́стая, Благослове́нная, низпа́дающихъ исправле́ніе, согрѣша́ющихъ проще́ніе, спаси́ мя́ блу́днаго отъ вѣ́чнующаго пла́мене и осужде́нія.
Пѣ́снь 6.
Ирмо́съ: Возведи́ отъ тли́ мя, Го́споди Бо́же мо́й, – Іо́на вопія́ше. И а́зъ вопію́ Ти: изъ глубины́ изба́ви мя́, Спа́се, мно́гихъ мои́хъ зо́лъ и къ свѣ́ту Твоему́, молю́ся, наста́ви.
Недосто́йна себе́ помышля́лъ еси́ степе́ни свяще́нства, о́тче Паи́сіе, оба́че отъ отце́въ духо́вныхъ увѣща́нъ и моле́нію бра́тіи приклони́вся, прія́лъ еси́ чи́нъ се́й послуша́нія ра́ди, во е́же наста́вити слове́сное твое́ ста́до ко спасе́нію.
Неисхо́дно въ ке́лліи сидя́, умо́мъ же всѣ́хъ обходя́, разсужда́лъ еси́ разли́чныя ра́ны душе́вныя, и всѣ́мъ цѣли́тельный пла́стырь прилага́лъ еси́, о́тче святы́й.
Но́ваго тя́ Моисе́я, о́тче, позна́хомъ, страсте́й побѣди́теля: я́коже бо о́нъ дре́вле Амали́ка побѣди́въ, лю́ди изведе́; ты́ же, о́тче, мно́жество мона́шествующихъ въ зе́млю обѣтова́нія ра́йскаго приве́лъ еси́.
Богоро́диченъ: Но́ва родила́ еси́ Сы́на, Собезнача́льна, Чи́стая, Отцу́ Безнача́льному, и обнови́ла еси́ еди́на обетша́вшее на́ше естество́ лю́тыми преступле́ніи, тѣ́мже согла́сно пое́мъ, Богоро́дице.
Инъ.
Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же, свя́заннаго мре́жами вра́жіими, я́ко отъ тли́ о́наго, спаси́.
Ве́село пріе́мля прося́щія у тебе́ по́мощи, простира́лъ еси́ ру́цѣ на подъя́тіе и́хъ; незло́бивый нра́въ и кро́ткое се́рдце, преподо́бне, имѣ́я, бы́лъ еси́ ста́рецъ ди́вный.
А́ще и ра́ны неду́гъ на тѣлеси́ носи́лъ еси́, но ра́ны душе́вныя исцѣля́лъ еси́ приходя́щихъ къ тебѣ́ благи́ми и кро́ткими словесы́, о́тче Паи́сіе.
Лице́ твое́, о́тче, свѣ́тло бя́ше, я́ко а́нгела Бо́жія, взо́ръ же ти́хъ, сло́во смире́нно и де́рзости чу́ждо. Всѣ́хъ любо́вію привлека́лъ еси́ къ себѣ́.
Богоро́диченъ: Херуви́мъ Превы́шшую Тя́ и серафи́мъ, пое́мъ, Пречи́стая, Его́же бо трепе́щутъ, носи́ла еси́ пло́тію Бо́га на́шего на руку́ Твое́ю.
Конда́къ, гла́съ 8. Подо́бенъ: Взбра́нной.
Отъ ю́ности возлюби́лъ еси́ Христа́, преподо́бне, и па́че всего́ возжелѣ́лъ еси́ съ Бо́гомъ бы́ти, тѣ́мже уклони́лся еси́ мíра и всѣ́хъ, я́же въ не́мъ, за Возлю́бльшаго тя́, посто́мъ же и моли́твою Іису́совою въ пусты́ни пла́меннѣ подвиза́лся еси́, и ча́да въ не́й возрасти́лъ еси́, науча́я и́хъ ко спасе́нію. Сего́ ра́ди зове́мъ ти́: ра́дуйся, моли́твы непреста́нныя учи́телю, Паи́сіе преподо́бне, о́тче на́шъ.
И́косъ:
Въ се́рдцѣ нося́ о́гнь благода́ти, возжига́лъ еси́ свѣти́льники му́дро теку́щихъ въ срѣ́теніе Жениху́ Христу́, попаля́я те́рнія вселука́выхъ страсте́й моли́твою Іису́совою, насажда́я въ сердца́хъ ча́дъ твои́хъ сѣ́мена Боже́ственныя любве́, да принесу́тъ Ду́ха плоды́. Съ ни́миже вопіе́мъ тебѣ́ си́це:
Ра́дуйся, любве́ Бо́жія испо́лненный; ра́дуйся, е́юже согрѣва́еши къ тебѣ́ приходя́щія.
Ра́дуйся, всегда́ ра́дуяйся съ ра́дующимися; ра́дуйся, скорбя́щихъ благодаре́нію науча́яй.
Ра́дуйся, ми́ра душе́внаго стяжа́телю; ра́дуйся, всѣ́хъ о́крестъ себе́ спаса́яй.
Ра́дуйся, сто́лпе долготерпѣ́нія; ра́дуйся, въ ско́рбехъ и печа́лехъ утѣше́ніе.
Ра́дуйся, во бла́гости Христа́ подража́телю; ра́дуйся, милосе́рдіемъ богоподо́бный.
Ра́дуйся, вѣ́ры непосты́дныя пра́вило; ра́дуйся, кро́тости и смире́нія о́бразе.
Ра́дуйся, моли́твы непреста́нныя учи́телю, Паи́сіе преподо́бне, о́тче на́шъ.
Пѣ́снь 7.
Ирмо́съ: Якоже дре́вле благочести́выя три́ о́троки ороси́лъ еси́ въ пла́мени халде́йстѣмъ, свѣ́тлымъ Божества́ огне́мъ и на́съ озари́, благослове́нъ еси́, взыва́ющія, Бо́же оте́цъ на́шихъ.
Уче́ньми святы́хъ оте́цъ насыще́нъ, и́хже переложи́ на слове́нскую рѣ́чь, и тѣ́хъ подража́ти испо́лненъ жела́ніемъ, показа́лся еси́ во вре́мя послѣ́днее орга́нъ согла́сныхъ и́хъ наставле́ній.
Обрѣ́лъ еси́ прему́дрость, сія́ бо честнѣ́йши е́сть ка́меней многоцѣ́нныхъ, е́юже наказу́еши ча́да твоя́ отъ преподо́бныхъ у́стъ: да бу́детъ о Го́сподѣ наде́жда ва́ша, и испо́лнитеся Ду́ха.
Моли́тися, о́тче, не преста́й о ста́дѣ твое́мъ, е́же мно́гими по́ты и труды́ стяжа́лъ еси́, изба́вити всѣ́хъ обстоя́ній, бѣ́дъ же и скорбе́й, да вси́ тебе́, я́ко чадолюби́ва отца́, воспѣва́емъ.
Богоро́диченъ: Неискусому́жно Сло́во па́че сло́ва ро́ждшая, Дѣ́во Неискусобра́чная Чи́стая, напа́стей изми́ на́съ, и вся́кихъ бѣ́дъ, и вре́да душетлѣ́нна и страсте́й.
Инъ.
Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.
Сни́де благода́ть въ ду́шу твою́, преподо́бне, ороша́ющи моли́твы Іису́совы мы́сленныя кри́ны, добродѣ́телей же свѣ́тлая прозябе́нія, восхожде́ніе полага́ющи ти́ къ любви́ соверше́нія, всѣ́хъ вмѣсти́ти въ се́рдцѣ твое́мъ.
И́же де́рзостію покуша́ющимся къ видѣ́нію восходи́ти, въ прельще́ніе си́мъ впа́дати глаго́лютъ отцы́ святíи, сего́ ра́ди внима́лъ еси́ твоему́ ста́ду, преподо́бне, о́бразъ трезве́нія бы́въ.
Те́плымъ жела́ніемъ непреста́нно призыва́лъ еси́ Го́спода Іису́са Христа́ въ се́рдцѣ твое́мъ, идѣ́же всели́ся Свята́я Тро́ица, очища́я, просвѣща́я и освяща́я тя́.
Богоро́диченъ: Госпо́дь изъ Тебе́ пло́тію ражда́ется, всѣ́хъ Госпожу́ Тя́ тва́рей содѣ́лавъ. Его́же моли́, Чи́стая, облада́ющаго изба́вити врага́ ду́ши на́ша.
Пѣ́снь 8.
Ирмо́съ: На престо́лѣ херуви́мстѣ Носи́маго, свяще́нницы, по́йте, лю́діе, превозноси́те во вся́ вѣ́ки.
Ца́рствія Бо́жія вну́трь себе́ взыска́лъ еси́, Ду́хомъ и и́стиною Бо́гу покланя́тися, же́ртву чи́сту принося́ – се́рдце сокруше́нно и смире́нно.
При́снымъ призыва́ніемъ и́мене Іису́сова, би́лъ еси́ неви́димыя супоста́ты. Си́мъ всемо́щнымъ ору́жіемъ низпрове́ргъ тѣ́хъ кова́рствія, обрѣ́лъ еси́ видѣ́нія восхо́дъ.
Моли́тва непоро́чная – исто́чникъ всѣ́хъ благи́хъ: трезве́ніе, очище́ніе, просвѣще́ніе, восхожде́ніе къ Нача́льному Свѣ́ту всѣ́мъ, держа́щимся ея́, отъ преподо́бныхъ же восхва́лится во вся́ вѣ́ки.
Богоро́диченъ: Просте́рши ру́ку благоутро́бія, Богороди́тельнице, вся́каго мя́ изми́ осужде́нія, къ Тебѣ́ прибѣга́ющаго, и Тебѣ́ припа́дающа, и призыва́юща Твою́ по́мощь.
Инъ.
Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.
Смиреному́дріемъ и во́ли своея́ предъ бра́томъ отсѣче́ніемъ, стяжа́лъ еси́ единоду́шіе со все́ю бра́тіею, о́тче Паи́сіе, покрыва́я и́хъ кро́вомъ кри́лъ моли́твы твоея́, да вси́ еди́но бу́дутъ.
Въ вы́шнюю вше́лъ еси́ бра́чную трапе́зу Царя́ Христа́, во оде́жду одѣ́янъ, досто́йно зову́щему. Тѣ́мъ и возле́глъ еси́ вопія́: благослове́нъ еси́, Бо́же оте́цъ на́шихъ.
О́тче Преблагíй, и Сы́не Пресвяты́й, и Ду́ше Святы́й: Тро́ице Свята́я, Нераздѣ́льный Бо́же, спаси́ мя́ грѣ́шнаго! – взы́валъ еси́, Паи́сіе, благословя́ Бо́га оте́цъ на́шихъ.
Богоро́диченъ: Подъ кро́въ, Влады́чице, святы́хъ кри́лъ Твои́хъ вси́ прибѣга́емъ, озло́бленніи лю́тыми согрѣше́ніи. Тя́ бо Предста́тельницу иму́ще, вопіе́мъ: благослове́нъ еси́, Бо́же оте́цъ на́шихъ.
Пѣ́снь 9.
Ирмо́съ: На Сина́йстѣй горѣ́ ви́дѣ Тя́ въ купинѣ́ Моисе́й, неопа́льно о́гнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Іессе́ова.
Егда́ трудо́въ твои́хъ вели́чіе взира́ю и благода́ть, отъ Го́спода да́нную ти́, исчеза́етъ се́рдце мое́: ка́ко ча́сть и́мамъ имѣ́ти съ тобо́ю въ животѣ́ вѣ́чномъ, небрегу́щу ми́ о спасе́ніи свое́мъ?
Мене́, преступи́вшаго твоя́ велѣ́нія, мене́, зави́стливаго и лука́внѣйшаго па́че всѣ́хъ человѣ́къ, прости́, незло́биве о́тче, и моли́ся Бо́гу дарова́ти ми́ вре́мя къ покая́нію.
Жи́знь моя́ иждива́ется, дни́ мои́ преполови́шася, наде́жды окра́даемь е́смь грѣхо́въ мои́хъ ра́ди, и недоумѣ́ю: ка́ко и́мамъ отвѣща́ти о дѣ́лѣхъ мои́хъ? Но молю́ тя́, о́тче: моли́ся вы́ну за грѣ́шное ча́до твое́!
Богоро́диченъ: Лѣ́ностно живо́тъ мо́й изжи́въ и страстьми́ се́рдце оскверни́въ, приступа́ю къ Тебѣ́, Влады́чице, умиле́ніемъ души́, и молю́ся уще́дрити и спасти́ мя́, покая́нія о́бразы мя́ утве́рждши.
Инъ.
Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.
Увы́ на́мъ, такова́го наста́вника иму́щимъ и въ неразу́міи пребыва́ющимъ и въ нерадѣ́ніи! Но яви́ на́мъ любо́вь свою́, блаже́нне о́тче, и исто́ргни на́съ изъ глубины́ уны́нія, мо́лимтися.
Не отчаява́йтеся, о бра́тіе! Печа́ль на ра́дость преложи́те, трубы́ духо́вныя гла́сомъ на бра́нь но́вую со враго́мъ ополчи́теся, богоно́снаго отца́ на́шего Паи́сія призови́те, поуче́ніемъ его́ сердца́ ва́ша укрѣпи́те, сла́вяще Бо́га, Ди́внаго во святы́хъ Свои́хъ.
Житіе́ твое́, рыда́я, при́сно сконча́лъ еси́, жела́ніе бо Боже́ственное тя́, о́тче, вну́трь распали́. И ны́нѣ на небесѣ́хъ обрѣ́лъ еси́ утѣше́ніе, съ преподо́бными ли́ки совокупля́яся, не забу́ди ча́да твоя́, восхваля́ющая па́мять твою́ вѣ́рно.
Богоро́диченъ: Вѣтíйская уста́ не возмо́гутъ досто́йно восхвали́ти Тя́, о Всепѣ́тая, Я́же херуви́мъ Превы́шшая и тва́ри всея́, но моли́ся съ Паи́сіемъ преподо́бнымъ Влады́цѣ всѣ́хъ, спасти́ся рабо́мъ Твои́мъ.
Свѣти́ленъ. Подо́бенъ: Жены́ услы́шите.
Просвѣти́ на́съ повелѣ́ніи Твои́ми, Христе́ Бо́же, моли́твами свѣтоно́снаго нача́льника на́шего Паи́сія, и напра́ви стези́ на́ша, о Спа́се, по словеси́ Твоему́. (Дважды)
Сла́ва, и ны́нѣ, богоро́диченъ:
Отъ мíра взе́мшися ми́ра ра́ди, и́же вну́трь, всели́лася еси́, Пресвята́я, во Свята́я святы́хъ, въ свяще́нномъ молча́ніи, и въ моли́твѣ непреста́ннѣй, и въ поуче́ніи Писа́ніемъ отъ дѣя́нія къ видѣ́нію восходя́щи. Сія́ у́бо навы́че отъ Тебе́ Паи́сій преподо́бный.
Рукопись не имѣетъ послѣдняго листа.
Послѣдующія стихиры приводятся изъ Слу́жбы общей преподобному единому.
На хвали́техъ стихи́ры на 4, гла́съ 6.
Богоно́се преблаже́нне Паи́сіе, все́ плотско́е мудрова́ніе ду́ху повину́лъ еси́, поще́нія страда́ньми утверди́вся, я́ко зла́то, въ горни́лѣ искуше́но, сія́я, яви́вся, прія́телище бы́лъ еси́ Ду́ха Пресвята́го. Собра́въ мона́шествующихъ мно́жества, и уче́ніи твои́ми, я́ко нѣ́коею лѣ́ствицею восхо́дною, на не́бо, на высоту́ добродѣ́телей возве́лъ еси́. Помина́й на́съ, чту́щихъ па́мять твою́ при́сно свяще́нную, и моли́ спасти́ся душа́мъ на́шимъ. (Дважды)
Возсія́ дне́сь пресвѣ́тлая и всепра́зднственная па́мять твоя́, пресла́вне Паи́сіе, созыва́ющи многочи́сленное по́стникъ сосло́віе и преподо́бныхъ ликостоя́нія, а́нгелы же съ человѣ́ки, я́ко вои́стинну къ похвале́нію въ Тро́ицѣ покланя́ема Христа́ Бо́га на́шего. Тѣ́мже притека́юще ко свяще́ннѣй ра́цѣ моще́й твои́хъ, исцѣле́нія да́ры оби́льно пріе́млемъ и тебе́ вѣнча́вшаго Христа́ прославля́емъ, Спа́са ду́шъ на́шихъ.
Богоно́се, преблаже́нне о́тче Паи́сіе, ты́ проро́чески слеза́ми зе́млю омака́лъ еси́ и не да́лъ еси́ сна́ твои́ма очи́ма, ни вѣ́ждома твои́ма дрема́нія, серде́чное жела́ніе ко Христу́ явля́я, Его́же возлюби́лъ еси́, тѣ́мъ мона́ховъ о́бразъ бы́лъ еси́ и вся́кія добродѣ́тели ви́дъ испра́вилъ еси́. Тѣ́мже тя́ ублажа́емъ, велича́юще тебе́ Просла́вльшаго.
Сла́ва, гла́съ 2:
Преподо́бне о́тче, изъ младе́нства добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха и, отъ Него́ пріи́мъ чуде́съ дѣ́йство, увѣща́лъ еси́ человѣ́ки преоби́дѣти сла́дкая. Ны́нѣ же Боже́ственнымъ свѣ́томъ чистѣ́йше осіява́емь, просвѣти́ и на́ша мы́сли, Паи́сіе о́тче на́шъ.
И ны́нѣ, богоро́диченъ:
Все́ упова́ніе мое́ на Тя́ возлага́ю, Ма́ти Бо́жія, сохрани́ мя́ подъ кро́вомъ Твои́мъ.
Славосло́віе вели́кое. Ектеніи́ и отпу́стъ.
НА ЛИТУРГІИ,
Блаже́нна отъ кано́на, пѣ́снь 3-я и 6-я.
Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́.
Сти́хъ: Что́ возда́мъ Го́сподеви о всѣ́хъ, я́же воздаде́ ми?
Апо́столъ къ Гала́томъ, зача́ло 213.
Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.
Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся.
Ева́нгеліе отъ Луки́, зача́ло 24.
Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.
