Молитва, чтомая отъ іерея предъ Воскресеніемъ Христовымъ.
Эта молитва существуетъ въ рукописи и читается Кіевскими священникам и обыкновенно въ Страстную седмицу въ домахъ прихожанъ.
Благословенъ Богъ нашъ: Трисвятое. Пресвятая Троице: и Отче нашъ: Таже Тропарь Храма.
Господу помолимся.
Владыко, Господи Іисусе Христе, Боже, благодаримъ и величаемъ Тя Спаса и Благодателя нашего, яко сподобилъ еси насъ недостойныхъ рабовъ Твоихъ прейти время честнаго и божественнаго поста изображеннаго намъ Тобою, и поданнаго четыредесятми деньми, въ спасительное покаяніе и очищеніе душамъ и тѣломъ нашимъ: и яко въ немъ даровалъ еси намъ, на прогнаніе бѣсовскихъ козней и навѣтовъ, Образу Честнаго Твоего Креста поклонитися, егоже прикосновеніемъ недостойныхъ нашихъ устъ лобзающе цѣловахомъ, славяще Тебе, на крестѣ плотію распятаго Бога нашего: и яко далъ еси намъ дойти друга Твоего Лазаря четверодневное воскресеніе и преславное Твое еже въ Іерусалимъ на жребяти осли вхожденіе и подражательми быти еврейскихъ дѣтей вѣтви Тебѣ принесшихъ, и осанна въ вышнихъ воспѣвшихъ. Сподоби насъ видѣти пресвятыя и спасительныя Страсти Твоя, и достигнути преславное и божественное Твое Воскресеніе: и духовною радостію исполнени суще, съ Архангелы и Ангелы, и со всѣми Святыми, изряднѣе же съ Пречистою Матерію Твоею, Дѣвою Богородицею славити и хвалити Тебе воскрешаго великаго Бога и Спаса нашего Іисуса Христа. И нынѣ смиренно припадаемъ, и прилежно о рабѣхъ Твоихъ сихъ, молимъ: прійми ихъ покаяніе, молитвы, постъ, слезы, стенанія, и колѣнопреклоненія, яже Тебѣ въ сердцѣ сокрушенномъ и дусѣ смиренія о своихъ грѣсѣхъ принесоша. Прійми ихъ исповѣданіе и покаяніе, якоже мытарево воздыханіе, и прости имъ вся согрѣшенія вольная и невольная, и очисти ихъ, якоже блудницу плакавшуюся, и прійми ихъ, якоже и пріялъ еси Петра, отвергшагося Тебе и плакавшагося горько: и вложи въ сердца ихъ страхъ Твой, еже боятися Тебе и любити Тя отъ всего сердца своего, и къ тому не возвратитися къ злымъ и неподобнымъ дѣломъ, но даждь имъ хранити заповѣди Твоя во вся дни живота своего, и ходити въ воли Твоей: и сподоби ихъ быти причастниками небеснаго Твоего царствія со всѣми святыми. Твое бо есть еже миловати и спасати ны, Боже нашъ, и Тебѣ славу и благодареніе, честь и поклоненіе возсылаемъ, съ безначальнымъ Твоимъ Отцемъ, и съ пресвятымъ и благимъ, и животворящимъ Твоимъ Духомъ, нынѣ и присно, и во вѣки вѣковъ. Аминь.
«Руководство для сельскихъ пастырей». 1886. 2. 33. С. 456-457.