АКАѲИСТЪ ВСЕМОГУЩЕМУ БОГУ ВЪ НАШЕСТВІИ ПЕЧАЛИ.
Акафист выложен здесь >>> (PDF)
Кондакъ 1.
Возбранный Воеводо и Господи, радосте и веселіе рабомъ Твоимъ, идѣже Ты, тамо потребляется всякая печаль, идѣже нѣсть Тебе, тамо всякая радость суетна. Призри на мя грѣшнаго, погибающаго въ бѣдѣ сей, и явленіемъ спасенія Твоего посѣти мя, зовуща: Господи мой, Господи, радосте моя, даруй ми, да возрадуюся о милости Твоей.
Икосъ 1.
Ангеловъ Творче и Господи силъ, спасенія ради падшаго человѣка не возгнушался еси Дѣвическаго чрева, послѣди же заплеванія, поношенія и поносную смерть претерпѣлъ еси, Слове Божій, благъ бо еси и Человѣколюбецъ. Сіе помышляя, дерзаю приступити къ Тебѣ и со слезами молитися: Господи мой, Господи, милосердый Спасителю мой, спаси мя погибающаго. Господи мой, Господи, пришедый не праведныя спасти, но грѣшныя, избави мя отъ напасти сея. Господи мой, Господи, недуги наша пріемый и болѣзни понесый, исцѣли болѣзни сердца моего. Господи мой, Господи, крестомъ Твоимъ миръ міру Твоему даровавый, ниспосли миръ Твой смущеннѣй души моей. Господи мой, Господи, Своею смертію смерть упразднивый, упраздни яже на мя козни лукаваго. Господи мой, Господи, радосте моя, даруй ми, да возрадуюся о милости Твоей.
Кондакъ 2.
Видѣвый многія образы человѣколюбія Твоего, явленныя на бывшихъ прежде мене грѣшницѣхъ, дерзнухъ и азъ возвести къ Тебѣ очи мои, живущему на небеси: помилуй мя, Господи, яко немощенъ есмь, избави мя горькія сея печали и сподоби радостію и веселіемъ пѣти Тебѣ: Аллилуія.
Икосъ 2.
Разумную мя тварь сотворилъ еси, Создателю мой, азъ же окаянный приложихся скотомъ несмысленнымъ и уподобихся имъ, прогнѣвахъ бо благость Твою, Спасе: сего ради праведно сею скорбію поразилъ мя еси; еже познахъ и каяйся къ Тебѣ прибѣгохъ, сице моляся: Господи мой, Господи, сохранивый мя въ юности моей, сохрани мя отъ враговъ, нападающихъ на мя. Господи мой, Господи, подкрѣпленіе тѣла моего въ старости моей, укрѣпи мя духомъ и тѣломъ изнемогающаго. Господи мой, Господи, утѣшеніе души моея, утѣши мя оскорбленнаго. Господи мой, Господи, Наставниче мой, настави мя на путь спасенія. Господи мой, Господи, радосте моя, даруй ми, да возрадуюся о милости Твоей.
Кондакъ 3.
Сильный во бранѣхъ, Господи, пріиди въ помощь изнемогающей души моей и буди ми заступникъ отъ врагъ видимыхъ и невидимыхъ, яко отецъ мой и мати моя остависта мя, друзи мои и искренній мои далече отъ мене сташа. Но Ты, Отче сирыхъ и Судіе вдовицъ, буди ми безпомощному помощникъ, поющему Тебѣ: Аллилуія.
Икосъ 3.
Имѣяй престолъ небо и подножіе землю, Страшный, отъемлющій духъ княземъ, не отрини мене, суща прахъ и пепелъ, но дерзающа къ Тебѣ Вездѣсущему и Всевѣдущему сице глаголати: Господи мой, Господи, воздвигни силу Твою и пріиди во еже спасти мя отъ руки сильныхъ и обидящихъ мя. Господи мой, Господи, Его же вся боятся и трепещутъ, пощади мя, яко страхъ и трепетъ пріиде на мя, и покры мя тьма смертная грѣховъ ради моихъ. Господи мой, Господи, одѣяйся свѣтомъ, яко ризою, просвѣти мя омраченнаго печальми житейскими. Господи мой, Господи, простираяй небо яко кожу, простри ми покровъ заступленія Твоего. Господи мой, Господи, миръ Твой даруй смиреннѣй души моей. Господи мой, Господи, радосте моя, даруй ми, да возрадуюся о милости Твоей.
Кондакъ 4.
Бурею многомятежнаго сего житія потопляемь, къ Тебѣ руцѣ мои простираю, Слове Божій: яко же Петра утопающаго спаслъ еси, тако и мнѣ простри крѣпкую руку Твою и избави мя бѣды сея, да съ радостію благодарнымъ сердцемъ вопію Тебѣ: Аллилуія.
Икосъ 4.
Услышахъ, Господи, гласъ Твой пресладкій, яко же реклъ еси: призови Мя въ день скорби твоея, и изму тя, и прославиши Мя; и изъ глубины отчаянія моего со дерзновеніемъ приступити къ Тебѣ дерзаю, глаголя: Господи мой, Господи, согрѣшихъ на небо и предъ Тобою, пріими мя, якоже блуднаго сына пріялъ еси. Господи мой, Господи, мытаря паче фарисея оправдавый, не вниди въ судъ съ рабомъ Твоимъ, яко не оправдится предъ Тобою всякъ живый. Господи мой, Господи, мудрости наставниче, настави мя раба Твоего. Господй мой, Господи, смысла подателю, подаждь ми смыслъ, да возмогу избѣжати хитросплетенія и лукаваго навѣта ненавидящихъ мя. Господи мой, Господи, на Смиренныя призираяй, виждь и скорбь мою и трудъ мой, и яви ми милость Твою. Господи мой, Господи, радосте моя, даруй ми, да возрадуюся о милости Твоей.
Кондакъ 5.
Боготочною кровію возлюбленнаго Сына Твоего Іисуса Христа примирихся Тебѣ, Отче Небесный, но се паки якоже песъ на свою блевотину ко грѣху возвратихся, сего ради праведно сею лютою бѣдою наказуеши мя. Но услыши мя, Господи Боже мой, въ день печали сея, яви мнѣ милость и спасеніе Твое и даждь ми въ наказаніи присно взывати Тебѣ: Аллилуія.
Икосъ 5.
Видя пророкъ Давидъ пророка Наѳана, обличающа его о содѣянныхъ имъ, пріиде въ чувство и исповѣда свой грѣхъ и рече: согрѣшихъ ко Господу, и услыша мя Господь, и отъятъ согрѣшенія моя. Азъ же, окаянный, паче онаго прегрѣшивый, плода покаянія отнюдь не стяжахъ; сего ради пріидоша на мя злая сія. Но милостивъ буди ми, сице молящуся: Господи мой, Господи, укрѣпи мя силою свыше, да не паду подъ тяжестію скорби сея. Господи мой, Господи, на Езекіины слезы милостивно воззрѣвый, воззри окомъ благосердія Твоего и на изліяніе слезъ моихъ предъ Тобою. Господи мой, Господи, Манассіины воздыханія услышавый, услыши мое воздыханіе сердечное. Господи мой, Господи, въ вышнихъ живый и на смиренныя призираяй, призри на мя грѣшнаго. Господи мой, Господи, радосте моя, даруй ми, да возрадуюся о милости Твоей.
Кондакъ 6.
Проповѣдникъ покаянія, Предтеча Твой, Слове Божій, многократно вопіетъ къ совѣсти моей, да покаюся отъ злыхъ дѣлъ моихъ; но азъ, окаянный, пренебрегохъ о семъ. Тѣмъ же постиже мя праведный гнѣвъ Твой, бѣды бо и скорби нападоша на мя, грѣшнаго; но Ты, Господи Боже, Спасителю мой, прежде даже не посѣтиши мя, даруй ми время, да плачуся злыхъ моихъ и Тебѣ вопію: Аллилуія.
Икосъ 6.
Возсія въ скорби моей утѣшительное слово Твое, Спасителю мой, еже реклъ еси: «просите и дастся вамъ». Абіе избѣгнувъ тенетъ отчаянія, съ надеждею на Твое человѣколюбіе прибѣгохъ къ Тебѣ, тако моляся: Господи мой, Господи, утѣшеніе мое, утѣши мя въ печали сущаго. Господи мой, Господи, заступниче мой, заступи мя отъ возстающихъ на мя. Господи мой, Господи, помоще моя, помози ми, яко изнеможе душа моя отъ скорби сея. Господи мой, Господи, памяте предвѣчная, даруй ми имѣти всегда въ памяти благодѣянія Твоя и никогдаже отчаятися милости Твоея. Господи мой, Господи, крѣпосте моя, укрѣпи мя безъ смущенія просити отъ Тебя помощи Твоея. Господи мой, Господи, радосте моя, даруй ми, да возрадуюся о милости Твоей.
Кондакъ 7.
Хотяй иногда злочестивый царь Навуходоносоръ погубити отроки, повелѣ, да ввержени будутъ въ пещь огненную; но Ты, Отче Небесный, послалъ еси Ангела Твоего, да остудитъ пламень горящій. Посли и нынѣ, Господи, утѣшеніе Твое рабу Твоему, и спаси мя ради милости Твоея. Аще бо и согрѣшихъ, но не отступихъ отъ Тебе, и Тебѣ Единому и Истинному Богу покланяюся, поя: Аллилуія.
Икосъ 7.
Дивно прославился еси въ фараонѣ и во всемъ воинствѣ его, Боже Израилевъ, призрѣлъ бо еси на озлобленіе людей Твоихъ, и вопль ихъ услышалъ еси. Услыши убо и мою молитву и спаси мя, сице къ Тебѣ вопіющаго: Господи мой, Господи, избавивый люди Твоя отъ руки враговъ ихъ, изми и мя изъ руки ненавидящихъ мя. Господи мой, Господи, изведай избранныя Твоя изъ земли Египетскія, изведи изъ скорби сея душу мою. Господи мой, Господи, сокрушивый брани, сокруши злыя навѣты мыслящихъ злая мнѣ. Господи мой, Господи, избранныя и всадники потопивый въ Чермнѣмъ мори, потопи множество неправдъ моихъ въ мори милосердія Твоего. Господи мой, Господи, радосте моя, даруй ми, да возрадуюся о милости Твоей.
Кондакъ 8.
Странна сотворихъ себе милости Твоея, Отче Небесный, злыми дѣлы удалихся отъ Тебе и поработихся суетному міру сему. Тѣмже и пожигаюся лютою скорбію, утопая въ глубокихъ дебрѣхъ отчаянія; но Ты, яко милосердъ и человѣколюбецъ, пріими мя, заблудшаго, и спаси мя отъ бѣды сея, Тебѣ вопіюща: Аллилуія.
Икосъ 8.
Весь оскверненъ нечистотою грѣховною, въ безднѣ золъ погружаемь, къ Тебѣ очи мои, живущему на небеси, возвожу; услыши плачевный вопль мой: Господи мой, Господи просвѣтивый день свѣтомъ солнечнымъ, просвѣти душу мою, тьмою суетъ міра сего помраченную. Господи мой, Господи, Преблагій Утѣшителю, исполни божественнаго утѣшенія грѣшную душу мою. Господи мой, Господи, Его же словомъ небеса утвердишася, утверди мя во исповѣданіи святаго имене Твоего. Господи мой, Господи, на Херувимѣхъ носимый и пѣваемый отъ Серафимъ, пріими отъ мене, грѣшнаго, приносимое Тебѣ моленіе. Господи мой, Господи, радосте моя, даруй ми, да возрадуюся о милости Твоей.
Кондакъ 9.
Всякія милости Источниче и смысла Подателю, о, Преблагій Утѣшителю, настави мя, глаголати достойная предъ Тобою; умъ же мой, печалію міра сего смущаемый, и душу мою, помраченную страстьми, исполни божественнаго Твоего утѣшенія, да съ веселіемъ воспою Тебѣ: Аллилуія.
Икосъ 9.
Вѣтія многовѣщанныя не могутъ изглаголати множества благости Твоея и любве къ роду человѣческому, Сыне Божій; смирилъ бо еси Себе до рабія зрака. Не отрини убо и мене, безъ числа согрѣшающа, обаче со страхомъ предстояща предъ Тобою и тако молящася: Господи мой, Господи, Пастырю добрый, душу Твою положивый за овцы, избави мя, заблудшее овча, отъ челюсти душетлѣннаго волка, зіяющія пожрети мя. Господи мой, Господи, насъ ради поруганный и убіенный и ко кресту пригвожденный, тѣхъ ради страданій Твоихъ отъ поруганій видимыхъ и невидимыхъ враговъ сохрани мя. Господи мой, Господи, безгрѣшный, со беззаконными вмѣненный, изми мя изъ рукъ ненавидящихъ мя. Господи мой, Господи, Егоже язвами вси исцѣлѣхомъ, исцѣли уязвленное горестію сердце мое. Господи мой, Господи, радосте моя, даруй ми, да возрадуюся о милости Твоей.
Кондакъ 10.
Спасти хотяй избраннаго Тобою Израиля отъ насилія египетскаго, воззвалъ еси Моисея, раба Твоего, изъ купины огнегорящія, и сія глаголалъ еси ему: «видя видѣхъ озлобленіе людей Моихъ, иже во Египтѣ, и вопль ихъ услышахъ». Призри убо и нынѣ, Господи, на озлобленіе мое, и исцѣли болѣзнь сердца моего, да съ благодарностію вопію Тебѣ: Аллилуія.
Икосъ 10.
Царю Небесный, Утѣшителю, Душе истины, яви милосердіе мнѣ, рабу Твоему, и погруженную въ печаль душу мою посѣти и укрѣпи мя, тако Тебѣ молящася: Господи мой, Господи, Апостолы научивый вѣщати иными языки, научи мя страху Твоему. Господи мой, Господи, мученики предъ мучители дерзновенія исполнивый, даруй ми дерзновенно стати противу грѣха, міра и діавола. Господи мой, Господи, Святый Освятителю вѣрныхъ Твоихъ, освяти душу мою, да будетъ достойна нарещися домомъ Твоимъ. Господи мой, Господи, Свѣте и свѣта Подателю, просвѣти мя, тьмою скорби омраченнаго. Господи мой, Господи, Сокровище благихъ, не лиши и мене даровъ благости Твоея. Господи мой, Господи, радосте моя, даруй ми, да возрадуюся о милости Твоей.
Кондакъ 11.
Пѣніе всеумиленное Тебѣ приносяща и сокрушеннымъ сердцемъ Тебѣ молящася, не презри, о Преблагій Владыко; отврати убо лице Твое отъ грѣхъ моихъ, но не отврати лица Твоего отъ раба Твоего, яко скорблю, скоро услыши мя, поюща Тебѣ: Аллилуія.
Икосъ 11.
Свѣте истинный, Христе Боже, просвѣти омраченную страстьми душу мою свѣтомъ благодати Твоея, да съ благоговѣніемъ молюся Тебѣ, сице глаголя: Господи мой, Господи, не погуби мене окаяннаго, не имуща исправленія жизни, но дерзнувша стати предъ Тобою. Господи мой, Господи, Теплото животворная, согрѣй мя въ скорби сей исчезающаго. Господи мой, Господи, сіяніе славы Отчія, осіяй мя свѣтомъ заступленія Твоего. Господи мой, Господи, творяй Ангелы Своя духи и слуги Своя пламень огненный, посли Ангела Твоего, соблюдавши мя отъ всякаго зла. Господи мой, Господи, радосте моя, даруй ми, да возрадуюся о милости Твоей.
Кондакъ 12.
Благости ради и любве къ роду человѣческому, Отче Небесный, послалъ еси Единороднаго Сына Твоего, Господа нашего Іисуса Христа, иже на земли явися и съ человѣки поживе, послѣди же, безгрѣшенъ Сый, со беззаконными вмѣнися, и Своею Кровію обнови растлѣнное грѣхомъ естество наше, и весь міръ пѣти научи: Аллилуія.
Икосъ 12.
Поюще Твое неизреченное человѣколюбіе, Христе Боже, яко нашего ради спасенія крестъ и смерть претерпѣти изволилъ еси, исповѣдую и провосудіе Твое, яко истиною и судомъ навелъ еси на мя скорбь сію, грѣхъ ради моихъ; но Ты, пришедый призвати не праведныя, а грѣшныя на покаяніе, услыши мя, паче всѣхъ грѣшнѣйшаго, сице молящагося Тебѣ: Господи мой, Господи, Агнче Божій, вземляй грѣхи міра, возьми отъ мене бремя тяжкое грѣховъ моихъ. Господи мой, Господи, яко Агнецъ безгласенъ на закланіе веденный, научи мя терпѣти находящая мнѣ злая безъ роптанія. Господи мой, Господи, Адамово рукописаніе раздравый, раздери рукописаніе безчисленныхъ грѣховъ моихъ. Господи мой, Господи, разбойниче покаяніе пріемый. пріими и мое грѣшнаго покаяніе. Господи мой, Господи, мертвыхъ воскресивый, воскреси душу мою, умерщвленную грѣхми. Господи мой, Господи, падшихъ возстаніе, воздвигни и мя падшаго. Господи мой, Господи, радосте моя, даруй ми, да возрадуюся: о милости Твоей.
Кондакъ 13.
О, Премилосердный и Преблагій Господи Боже мой, Заступниче обидимыхъ и безнадежныхъ надѣяніе, воззри окомъ благоутробія Твоего на озлобленіе и скорбь мою, и спаси мя ради; милости Твоея, поюща Тебѣ: Аллилуія.
(Сей кондакъ глаголи трижды. И паки икосъ 1-й и кондакъ 1-й).
Молитва первая.
Господи, спаси мя погибающаго! Се, кораблецъ мой бѣдствуетъ отъ искушенія волнъ житейскихъ и близъ потопленія есть; но Ты, яко Богъ милосердный и сострадательный немощемъ нашимъ, властію Твоею всесильною запрети волненію бѣдствій, хотящихъ погрузити мя и низвести во глубину золъ; и да будетъ тишина, яко вѣтры и море послушаютъ Тебе. Аминь.
Молитва вторая.
Спаси мя, Спасе мой, по милости Твоей, не по дѣломъ моимъ. Ты хощеши мя спасти. Ты вѣси, коимъ образомъ спасти мя. Спаси убо мене, якоже хощеши, якоже можеши, якоже вѣси. Имиже вѣси судьбами, спаси мя. Азъ на Тя, Господа моего, надѣюся, и Твоей воли святой себе вручаю. Твори со мною, еже хощеши: аще хощеши мя имѣти во свѣтѣ, буди благословенъ; аще хощеши мя имѣти во тьмѣ, буди паки благословенъ. Аще отверзеши ми милосердія Твоего двери, добро убо и благо; аще затвориши ми двери милосердія Твоего, благословенъ еси, Господи, затворивый ми по правдѣ. Аще не погубиши мя со беззаконьми моими, слава безмѣрному милосердію Твоему; аще погубиши мя со беззаконьми моими, слава праведному суду Твоему. Якоже хощеши, устрой о мнѣ вещь. Аминь.
Акаѳистъ Всемогущему Богу въ нашествіи печали. Jordanville 1971.
