Стихира-осмогласникъ «на цѣлованіе» на Успеніе Пресвятыя Богородицы (Твореніе митрополита Кіевскаго Григорія Цамблака).
Данная стихира предназначена для пения во время поклонения образу Успения Пресв. Богородицы в конце утрени, как последняя в соответствующем ряду стихир «на целование». В древности поклонение совершалось перед иконой праздника, но с XV в. на Балканах и на Руси более популярными становятся лицевые плащаницы с изображением почившей Богоматери – в связи с распространением там Иерусалимского устава в обрядах страстного богослужения). В основу данного текста легли стихиры целования Креста (Крестопоклонной недели, Крестовоздвижения и Изнесения Честных Древ Животворящего Креста) и стихира «Приидите, ублажим Иосифа» на целование Плащаницы в Великий пяток – самая известная из них. Стихира на Успение исполняется на все 8 гласов (указаны в скобках), смена которых обусловлена тональным сродством гласов византийской системы. Текст стихиры (Чтения в Импер. Обществе истории и древностей Российских. М. 1846. № 3. С. 4-6.) приводится с минимальными поправками и устранением церковно-славянских архаизмов. Для удобства пения текст разбить на колена и отмечены остановки. Ред.
Мѣсяца Августа въ 15-й день.
На Успеніе Пресвятыя Богородицы,поемъ сей стихъ на цѣлованіе, твореніе киръ Григорія Цамблака. Слава и нынѣ, гласъ 8-й, осмогласникъ:
Гласъ 1-й: Днесь Владычица и Богородица,/ Пресвятая Дѣва Царица,/ преходитъ отъ земныхъ къ премірнымъ,/ къ Царю царствующему, къ Сыну Своему и Богу,/ сопричаститися царствію вѣчному,/ паче же превѣчному и конца не имущему,/ не на колесницѣ рабски, якоже Илья,/ но матерски Царица царски,/ на Сыновнихъ рукахъ со множествы вой херувимскихъ./ И тогда лучшіи апостоловъ предпосылаеми,/ по облакомъ предпоставляеми пресвѣтлыми ангелы/ пречистому Твоему и богопріятному тѣлу,/ преукрашеннѣй церкви Царя Небеснаго,/ въ ней же непостижимый и неприкосновенный написуется Плоть,/ и отъ сосцу животочну доится./ Богъ убо сый, сподоби за милосердіе/ совершенно вообразитися Ею въ человѣчество/ и подати ему Божества достояніе./ И предсташа весь ликъ богословецъ,/ не дванадесятѣхъ, но и седмьдесятѣхъ,/ исходныя пѣсни пояху,/ честь воздающе апостольскаго сословія, глаголюще:/ что Тебѣ речемъ? кіими мѵры проводимъ Тя, Мѵропріемнице Небесная?/ кое кадило принесемъ Ти, златая Кадильнице?/ Недоумѣемся и удивляемся,// како одръ великаго Царя, на малѣ одрѣ мертволѣпно безъ дыханія лежитъ?
Гласъ 5-й: Пріимъ же Петрово воспѣваніе,/ Павелъ, сосудъ избранный,/ весь изступль, весь восхищенъ, весь обожаемь,/ — о чюдеси! глаголавъ,/ како затворишася дѣвственніи очи,/ отъ самѣхъ пеленъ ангелы зрѣти навыкшiя?/ како Питательница жизни смертію объята бысть?/ како и не сохранися безсмертна,/ якоже нетлѣнна по рожествѣ сохранена бысть?/ како небесная Лѣстница, по ней же сниде Богъ ко человѣкомъ,/ затворитися грядетъ?/ како Гора превысокая и великая Божія на малѣ одрѣ лежитъ,/ въ ней же вселися до конца Господь?// како Жезлъ присноцвѣтущій нынѣ увянувъ зрится?
Гласъ 2-й: О, преславнаго зрѣнія!/ О, непостижимаго таинства!/ О, глубина богатства, и премудрости и разума Божія,/ яко не испытаны судьбы Его и не изслѣдованы пути Его!/ Кто разумѣ умъ Господень,// или кто совѣтникъ Ему бысть?
Гласъ 6-й: Почто отлетѣ отъ насъ, отъ Своихъ рабъ,/ голубице неблазненная?/ почто удалися отъ насъ Горлица сладкогласная?/ на кого возримъ прочее? кто намъ провѣщаетъ?/ кто же отъ навѣтъ іудейскихъ печаль нашу утѣшитъ?/ На Тя бо зряще, Онаго зрѣти мнѣхомъ,/ Иже неизреченно изъ Тебе возсіявшаго./ Взнесеся ко Спасу,/ и мы надежду нашу вси на Тя имѣхомъ,/ и сладцѣ терпѣхомъ труды и гоненія// о проповѣди истиннѣй.
Гласъ 3-й: Нынѣ же послѣднее сиротство объятъ насъ./ Како внезапу угасе свѣтильникъ свѣту?/ Но смотрѣніе, еже на Тебѣ бываемое,/ а не одолѣніе смертное,/ ниже возмогла бы, яже единою Твоимъ Сыномъ умертвившися смерти,/ Тебѣ животу привязатися;/ но да не вмѣнится привидѣніе вочеловѣченія истина подобь// и безсмертному Твоему Плоду естества долгъ отдаеши.
Гласъ 7-й: И вся, къ чести ключима,/ исходному времени пѣсни пояху Приснодѣвѣ Божіи Матери,/ Іаковъ, великій Божій братъ,/ со Iоанномъ, сыномъ громовѣмъ,/ и иніи богословесніи мужи,/ достойніи предстояній пречистаго Ти тѣлесе,/ мрежею евангельскою и павлимъ языкомъ уловлени,/ Діонисіе, и Ероѳее, и Тимоѳее, глаголюще:/ поиди, Владычице, поиди,/ яко землю освятила еси Рожествомъ Своимъ,/ тако и воздухъ освятиши пришествіемъ Своимъ./ Поиди, Всецарице, поиди и сцарствуй съ Сыномъ Своимъ// и Богомъ нашимъ.
Гласъ 4-й: Да отверзутся Тебѣ врата небесныя со мнозѣмъ удивленіемъ,/ яко Ева убо врата Эдему затвори,/ Ты же и небесная врата отверзла еси./ Ниже убо достойно есть двери непроходимѣй,/ Еюже Господь единъ вниде и изыде,/ затворенну остави на земли стояти;/ но взятѣй быти ко уготовленному Тоя чертогу./ Да подымутъ Тя, Дѣво, херувими,/ да прославять Тя силы, да предтекутъ Ти престоли,/ зряще Тя престолъ неописаннаго и безтруднаго естества./ Поиди, Невѣсто неневѣстная, въ невѣстникъ небесный!/ Сія богословяху и иная многая, чудніи они мужи,/ якоже никтоже можетъ по достоинству изрещи,// ко гробу провождающе жизни Матерь.
Гласъ 8-й: Мы же что къ Ней речемъ?/ како родъ нашъ почетшую почтемъ?/ како воспоемъ многопѣтую Дѣву?/ како возвеличимъ, Юже вси роди величаютъ, якоже прорече?/ Но возопіемъ съ Гавріиломъ:/ радуйся, Двере жизни, радуйся, Горо присѣнная,/ радуйся, Мосте преводяй всѣхъ,/ иже вѣрою Твое преставленіе чтущихъ, къ вѣчному животу./ Подобаетъ бо Ти, Матери Божіи, яко Царицѣ,/ царскими добротами дорvноситися,/ — преходиши бо къ небеснѣй странѣ, небесная Невѣсто,/ и паки жива преставляешися къ божественнѣй свѣтлости,/ яко отъ чертога населенія Твоего, отъ земли взимаешися/ и совозводиши съ Собою множество ходатайствомъ Своимъ./ Предпосылаются Ти апостоли со ангельскими воинствы,/ и дѣвственіи лици тайно окрестъ одра Дѣвы Богородицы предстоятъ,/ и души праведныхъ, пролѣтѣвши, Царицу славятъ,/ и молятся ови невещественно пѣніе добродѣтелей принесше./ Царице Небесная и многопѣтая Владычице!/ сродна присвоенія не забуди, и не оскудѣй назирающи,/ и не забуди царя, и градъ, и люди, иноцы и простіи./ Мы бо люди Твои и овцы пажити Твоея,/ имя Твое призываемъ// и вѣрно празднуемъ всесвятое Твое Успeніе.