Святитель Димитрій, митрополитъ Ростовскій – Побѣдоносная Защитница (Поученіе на празднество Пресвятыя Богородицы Донскія).
«Взбранной Воеводѣ побѣдительная, яко избавльшеся отъ злыхъ, благодарственная восписуемъ Ти раби Твои, Богородице».
Дня нынѣшняго, въ сей святой обители почитающе соборнѣ празднествомъ икону пресвятыя Владычицы нашея Богородицы и приснодѣвы Маріи, нарицаемыя Донскія, о нарицаніи томъ восхотѣхъ увѣдати, слышателіе мои возлюбленніи; и извѣстихся отъ достовѣрныхъ повѣствователей и лѣтописцовъ, яко егда благовѣрный Великій Князь Димитрій Іоанновичь, имѣ брань съ нечестивымъ царемъ Мамаемъ Татарскимъ межъ Дономъ и Непрядвою рѣкою, тогда тамо бяше сія пречестная чудотворная Икона въ полцѣхъ Христіанскихъ, принесенная отъ Донскаго воинства въ даръ Великому Князю, въ помощь же на сопротивныя. И молитвами Пречистыя Богоматере, чудесною же ея силою отъ иконы сел исходящею побѣждены быша Агаряне: и Великій Князь со Христіанскимъ воинствомъ славно торжествуя, во своя возвратися, и принесе съ собою честную и чудотворную сію икону, нарицаемую Донскую, отъ бывшей тамо за Дономъ побѣды. Еще же и о обители сей, отъ образа пресвятой Богородицы Донской нарицаемой Донскою, увѣдати хотящи, извѣстихся отъ достовѣрныхъ повѣствованій и отъ лѣтописцовъ, яко во дни благовѣрнаго Государя царя и Великаго Князя Ѳеодора Іоанновича, бывшу нашествію Крымскія орды на Московскаго государства державу, егда Татарскій царь Муратъ Кирей приближися подъ царствующій сей градъ, изыде благовѣрный царь и Великій Князь Ѳеодоръ Іоанновичь съ воинствомъ своимъ, и на семъ мѣстѣ ополчися противу Агаряновъ, принесе же въ полки свои и икону сію пресвятыя Богородицы Донской: и побѣди Агарянскіи полки, и прогна я помощію Пречистыя Богородицы, ейже и воздая благодареніе, на семъ мѣстѣ созда церковь каменну, при нейже нынѣ есть трапеза, и списокъ съ чудесныя иконы въ ней постави, и отъ того времени наречена бысть обитель Донская.
Азъ же грѣшный обѣ тыя надъ Агаряны побѣды, всесильною помощію Богородичною бывшія, со усердіемъ разсуждая, — первую напредѣлѣхъ Державы Россійскія, между Дономъ и Непрядвою надъ Мамаемъ побѣду; вторую здѣ надъ Киреемъ Крымскимъ преславно сотворшуюся: обѣ глаголю, тыя разсмотряя побѣды, воспоминаю оную древнѣйшую подъ Греческимъ Царьградомъ побѣду надъ Каганомъ, и глаголю: Пречистая Мати Божія, благодать свою, юже древле являше Греческому царству, туюжде благодать яви и Царству Россійскому. Которою бо силою подъ Константинополемъ побѣди Кагана и прочіихъ Скиѳовъ и Персовъ, и отъ предѣлъ Греческихъ отгна, тоюжде силою подъ симъ царствующимъ градомъ побѣди Агарянъ, и отгна я отъ предѣловъ Россійскія державы: и якоже тогда Греки благодарная пѣнія по Бозѣ Пречистой Дѣвѣ Богородицѣ восписующе, возбранною Воеводою Ю нарицаху, сице и мы нынѣ творимъ, воспѣвающе къ Богородицѣ: «Взбранной Воеводѣ побѣдительная, яко избавльшеся отъ злыхъ, благодарственная восписуемъ Ти раби Твои, Богородице».
Здѣ слышащи воеводскую титлу, Пречистѣй Дѣвѣ отъ Церкве приписанную, хощу видѣти и самый ея чинъ воеводскій, како вооружается на брань? како изводитъ своя воя, и устрояетъ полки? и како побѣждаетъ супостатовъ, не токмо видимыхъ, но наипаче и невидимыхъ? Обратимъ же вси купно умный наши очеса, слышателіе мои, и смотримъ не виданнаго, ни слышаннаго когда Воеводу; кто же онъ есть? Дѣва. Кто когда видѣ или слыша, дабы воеводою была дѣва? Воеводѣ прилично въ руцѣ имѣти мечь: «не безъ ума», рече, «мечъ носитъ» (Рим. XIII, 4), се же на отмщеніе злымъ; а дѣвѣ прилично въ руцѣ имѣти иглу, къ шитію красныхъ взоровъ; воеводѣ прилично копіе, а дѣвѣ вретено; воеводѣ шлемъ желѣзенъ, а дѣвѣ вѣнецъ цвѣтный; воеводѣ прилично броня крѣпко, а дѣвѣ утвари многоцѣнныя; воеводѣ щитъ отъ стрѣлъ вражіихъ, а дѣвѣ сѣновникь отъ зноя солнечнаго; воеводѣ подобаетъ исходити въ поле на брань противу супостатовъ, а дѣвѣ подобаетъ сидѣти въ дому, въ чертозѣ неисходно. Како убо можетъ Дѣва воеводою быти? а тожъ конечно Дѣва воеводствуетъ: кач же Дѣва? Дѣва та, яже сотре главу адскому змію, на весь родъ человѣческій брань воздвижущему. Дѣва возбранная воевода Пречистая Мати Божія, та пріятъ въ руку свою оружіе, и не едино оружіе, но вся оружія Божія, по Апостольскому словеси: «пріимите вся оружія Божія, да возможете противитися въ день лютъ» (Ефес. VI, 13,). Се въ руку ея предусмотрѣ оружіе Соломонъ, глаголяй: «поостритъ же напрасенъ гнѣвъ во оружіе» (Прем. Солом. V, 20). Смотрю, кое то оружіе? Вижду мечь и копіе; ибо въ Еллинской библіи написано, мечь. Поостритъ, рече, напрасенъ гнѣвь въ мечь. Во Іеронимовомъ же преводѣ: въ копіе поостритъ, поостритъ рече, гнѣвъ въ копіе. Обоя убо та оружія въ руку возбранной Воеводы, мечь и копіе: копіемъ убо тѣмъ адскаго седмоглавнаго змія, и его единомысленниковъ крѣпцѣ прободаетъ; а мечемъ главы ихъ напрасно, сіесть внезапу, единымъ удареніемъ отсѣцаетъ. Пріятъ шлемъ спасенія, по Апостолу: «и шлемъ спасенія воспріимите» (Ефес. VI, 17.); пріятъ спасенія шлемъ, еже не точію самой спасенной быти отъ клятвы грѣха прародительнаго, но и всего спасти міра. Тою бо спасительницею міръ спасенъ бысть, якоже и Церковь о ней воспѣваетъ: «спасе Богородицею міръ, Христосъ, имѣяй велію и богатую милость». Облечеся въ броня правды отъ праведныхъ родителей рожденная, и оправданій Господнихъ отъ юности поучившаяся. «Пріятъ щитъ непобѣдимый – преподобіе» (Прем. Солом. V, 19), то слово преподобіе, начало свое имать отъ подобнаго: подобный, преподобный. «Созда Богъ человѣка по образу» своему «и по подобію» (Быт. I, 26), и вси человѣцы душею разумною, отъ Бога созданною, суть Богу подобни: обаче въ грѣшныхъ подобіе то попремногу разногласуетъ, егда человѣкъ грѣхами своими уподобляется не Богу, но «скотомъ несмысленнымъ» (Псал. XLVIII, 13). А въ Святыхъ то подобіе бываетъ преподобіемъ; понеже образъ Божій въ себѣ непороченъ соблюдаютъ. Въ Преблагословеннѣй же Дѣвѣ то образа Божія подобіе не точію надъ подобныхъ преподобно, но и надъ преподобныхъ преподобнѣйшо, яко въ ней паче всѣхъ образъ Божій есть яснѣйшій, свидѣтельствующу о томъ самому Богу, иже къ ней въ Пѣснехъ пѣсней глаголетъ: «уподобихъ тя» близъ мене, якоже лице смотрящее въ зерцало сблизка, аки бы рекущи: вси человѣцы, а наипаче угодницы мои суть мнѣ подобни, ты же мнѣ подобнѣйша, яко близъ мене еси: «уподобихъ тя» близъ мене (Пѣсн. пѣсн. 1, 8). Якоже лице, смотрящее въ зерцало сблизка, лучше въ зерцалѣ показуется паче лица созади издалече стоящаго: сице Пречистая Дѣва, близъ Бога паче инѣхъ Святыхъ сущи; Богови есть подобнѣйша: подобна Богу Отцу, рождши безъ отца Сына его, рожденнаго отъ него предъ вѣки безъ матере: подобна Богу Сыну, носивши того въ Пречистой своей дѣвической утробѣ, и родивши его нетлѣнно: подобна Богу Духу Святому, сотворится тому невѣста и храмъ чистъ и прененороченъ. И якоже есть паче всѣхъ, Святыхъ Богу ближайша: сице паче всѣхъ подобныхъ Богу подобнѣйша, и паче преподобныхъ тому преподобнѣйша. Таковый щитъ пріятъ возбранная наша Воевода, щитъ же той есть непобѣдимый: «пріиметъ», рече, «щитъ непобѣдимый – преподобіе». Кто бо можетъ одолѣти, сіесть святынею своею превзыти тоя святыню, яже и Серафимовъ превзыде?
Сице возбранную воеводу, во вся оружія облеченную, бронями и щитомъ вооруженную, умомъ созерцая, воспоминаю здѣ словеса Духа Святаго о ней реченная «шія твоя яко столпъ Давидовъ, тысяща щитовъ виситъ на немъ, и вся стрѣлы сильныхъ» (Тамъ же, IV, 4), (по иному преводу: и вся оружія сильныхъ). Обычай то древній, на высокихъ столпахъ, сіесть, вежахъ, башняхъ, въ стѣнѣ градстѣй стоящихъ, полагати и хранити вся оружія, ко бранемъ уготованная, И царь Давидъ, по свидѣтельству Амвросія святаго, создалъ бѣ во Іерусалимѣ столпъ превысокъ въ стѣнѣ градстѣй, въ защищеніе, вкупѣ и во украшеніе граду: въ защищеніе, яко мощно бяше издалече усмотрити полки вражія, ко граду приближающіяся, и прогоняти я; во украшеніе же, яко столпъ оный не точно мѣрная, но и высочайшая Іерусалимская зданія высотою своею превосхождаше. Азь же ищу таинства: почто Духъ Святый Невѣсту свою любезнѣйшую и краснѣйшую уподобляетъ столпу тому Давидову? кая красота была бы имѣти ей шію толь высоку, и долгу яко столпъ? Но понеже въ таинствѣ инако глаголется, инако же разумѣется; убо и здѣ разумѣти есть, не высоту вещественную столпную имѣти Невѣстѣ Духа Святаго, но высоту добродѣтельную.
Суть сказующіи, яко столпъ той бяше между Сіономъ, на горѣ высоцѣ стоящимъ, и между Іерусалимомъ, подъ горою положеннымъ, и дщерію Сіоновою именованнымъ; и бѣ столпъ той между има яко шія между тѣломъ и главою, ибо высотою своею Іерусалима превосхождаше, Сіона же досязаше: на столпѣ же томъ извѣшены быша щиты и вся оружія, яже ко брани и защищенію Іерусалима тамо полагахуся. Уподобляетъ же Духъ Святый Пречистую Дѣву столпу Давидову; ибо та, сущи дщи Давидова, посредствуетъ яко шія между главою и тѣломъ, между Христомъ – главою Церкви, и между вѣрными, иже суть тѣломъ Церкве его, превосходящи Церковь, яко воистинну вышніе всѣхъ сущая, Христа же дослжущи, яко плоть ему давшая. Еще же и тою ради уподоби Ю Духъ Святый столпу, или хранилищу оружейному, да покажетъ Ю быти возбранную Воеводу, всѣми оружіи вооруженную: се же на наше отъ враговъ защищеніе. Что бо оный столпъ образуетъ, аще не Дѣвыя крѣпость въ наше спасеніе? Столпъ крѣпости отъ лица вражія. Что тыя щиты знаменуютъ, аще не тоя насъ защищенія? Что суть тыя стрѣлы, аще не враговъ побѣда? Егда врагъ на насъ воюетъ, она щитами молитвъ своихъ насъ защищаетъ: егда же мы на враги воюемъ, она намъ оружіе, стрѣлы сильныя подаваетъ; а егда ослабѣваемъ, та яко столпъ подпираетъ немощь нашу, да не падемся. Тысяща же щитовъ знаменуютъ безчисленныя ея за ны къ Богу молитвы; ибо тысящное здѣ число полагается за безчисленное, понеже безчисленными, яко щитъ же крѣпкими молитвами Богородица насъ защищаетъ. Вся же оружія сильныхъ изъявляютъ то, яко вся тыя благодати Божія и силы, яже имутъ вси Святіи, имиже намъ помоществуютъ, елико имутъ и помоществуютъ Пророцы, елико Апостолы, елико Іерархи, елико Мученики, елико Преподобный и Праведный, и прочіи вси Святіи елико имутъ, вся та имать едина Пресвятая Дѣва, и едина Она толико помоществовати намъ можетъ, елико вси Святіи; и того ради о ней глаголется, яко имать вся оружія сильныхъ.
Увидѣвши, како та возбранная Воевода тысяща щитами, и всѣми сильныхъ стрѣлами, оружіями есть вооруженна, смотримъ еще, како изводитъ и устрояетъ свои полки? Ибо воеводѣ безъ воинства, безъ полковъ быти не прилично: воевода отъ воинства имать свою титлу. Убо и сія возбранная Воевода имать своя воинства, свои полки; како же я изводитъ на брань, смотримъ. Памятствуете ли Іаковлю Лѣствицу, еюже Ангели Божіи восхождаху и низхождаху по ней? Помыслите, чеса ради Ангели Божіи по той лѣствицѣ непрестанно сѣмо и овамо ходятъ, ово восходятъ, ово низходятъ? Вины сего не увѣдаете, донелѣже не исповѣсте быти Тою Лѣствицею Пречистую Матерь Божію, якоже и Церковь къ ней вѣщаетъ: «радуйся мосте, къ небесѣмъ преводяй, и лѣствица высокая, юже Іаковъ видѣ». Аще же вѣсте Ю быти тою Іаковлею Лѣствицею, вѣждьте убо и сіе, яко того ради Ангели не имутъ покоя, восходяще и низходяще, яко Пресвятая Богородица велитъ имъ, да восходяще приносятъ къ Богу человѣческія молитвы, и всякія ихъ нужды, скорби и печали: низходяще же, да приносятъ отъ Бога человѣкомъ Божію милость, помощь и дарованія, се же Лѣствицею, сіесть Богородицею, сродное о насъ промышленіе имущею. Таяжде Лѣствица кромѣ Ангельскихъ вой, еще изводитъ и полки Святыхъ отъ горняго возшествія къ дольнему снизхожденію, къ человѣческому Христіанскому роду, въ помощь воюющей на земли Церкви. Изводитъ полки Святыхъ, ибо Церковь воюющая вопіетъ о томъ къ ней словесы Дамаскиновыми: «молящи пріими лики Архангелъ же и множество вышнихъ воинствъ Зиждителя моего, Апостолъ же и Пророкъ соборы и мученики, и преподобный и священномученики, и молитву сотвори Чистая за насъ къ Богу» (Октоихъ гл. 2, въ понед. на повеч. пѣсн. IX, ст. 5.). Смотримъ, коликія полки изводитъ Пречистая Дѣва, и ополчаетъ ихъ окрестъ насъ, и тѣми всѣми воеводствуетъ сама возбранная Воевода? Како же ихъ ополчаетъ и како тыи полки устрояетъ, внемлемъ. Устрояетъ чинно полки противу супостатовъ нашихъ: елико бо полковъ на ны востающихъ обрѣтается, толико наша Воевода своихъ полковъ противу поставляетъ. Не всуе вѣщаетъ къ ней Духъ Свлтый: «добра еси, ближняя моя, красна яко Іерусалимъ», ужасна же яко полковъ устроеніе чинное (Пѣсн. пѣсн. VI, 3). Кто (внемлемъ Духа Святаго словесамъ, яже на похвалу Невѣсты своея Духъ Святый глаголетъ), яко Іерусалимъ красна, а яко полковъ строй чинный, ужасна? Се уподобляя Ю Іерусалиму красному, изъявляетъ ея прекрасное, пренепорочное дѣвство: уподобляя же Ю чинному полковъ строю, изъявляетъ Ея страшное воеводство. Во Іерусалимѣ Дѣва, въ полцѣхъ Воевода: рѣхомъ же, яко та Воевода чинно полки своя ставитъ противу полковъ вражіихъ. Смотримъ убо того чина.
Три суть полки враговъ нашихъ, во дни и въ нощи воюющихъ на ны: міръ, плоть и діаволъ, а въ началѣ діаволъ, потомъ же міръ, таже плотъ: діаволъ искуситель со всѣми козньми своими, міръ прелестникъ со всѣми суеты своими, тѣло, домашній врагъ, со всѣми страстьми грѣховными и сластьми своими. Tіи три вражіи полчищи коль намъ стужаютъ, коль на ны налегаютъ, и пакости творятъ, не требѣ толковати, всякъ вѣсть. Множество Святыхъ въ торжествующей на небеси Церкви, по согласному всѣхъ Богословцовъ умствованію въ три изряднѣйшія ликостолнія, въ три полки, якоже и Ангелы, въ три Іерархіи суть раздѣлены, по числу тріехъ авреоль, на воздаяніе уготованныхъ: суть раздѣлены въ полкъ учителей, въ полкъ мучениковъ и въ полкъ дѣвственниковъ. Начальствуетъ же надъ тѣми полками Дѣва, воеводствуетъ ими, яко всѣхъ Святыхъ святѣйшая. Воеводствуетъ полку учителей, яко тоюже Сына Божія познакомь, и вѣщаетъ о ней Духъ Святый: тайноучительница есть еже о Бозѣ разумѣнія. Воеводствуетъ полку мучениковъ, яко подъ крестомъ стоявшая, ейже «оружіе душу пройде» (Лук. II, 35). Воеводствуетъ полку дѣвствующихъ яко Приснодѣва, яже предъ рождествомъ, въ рождествѣ и по рождествѣ Дѣва: Дѣва, дѣвическою чистотою Ангеловъ превозшедшая.
Въ тѣхъ же своихъ полцѣхъ сія Воевода устрои быти знаменіямъ таковымъ: въ полку учителей, знаменіе цвѣта небеснаго. Ибо умствованіе ихъ, Богомысленность ихъ къ небеси, а на знаменіи томъ изображенъ вѣнецъ златъ, нареченный авреоля; ибо яко злато въ горнилѣ суть искушенны. О томъ-то вѣнцѣ глаголетъ Апостолъ: «отложимися вѣнецъ, егоже воздастъ ми Господъ въ день онъ» (2 Тим. IV, 8). Въ полку мучениковъ, знаменіе цвѣта червленна, кровію за Христа изліянною обагренное, а на знаменіи томъ изображенъ престолъ Божій, глаголетъ бо: «побѣждающему дамъ стѣсти на престолу моемъ» (Апок. III, 21). Въ полку дѣвствующихъ, знаменіе цвѣта бѣлаго, понеже и они суть непорочны, бѣлы, а на знаменіи томъ изображенъ крестъ; ибо съ каковымъ крестомъ, съ каковымъ, глаголю, терпѣніемъ дѣвство и чистота соблюдается, той вѣсть, иже крестъ той носитъ. Тыя три полки она изведши, ставитъ противу вышереченныхъ тріехъ вражіихъ полчищъ: противу діавола ставить полкъ учителей, изобличающихъ козни діавольскія, поучающихъ же и наставляющихъ, како человѣцы имутъ тыя діавольскія козни упразднити. Противу міра ставить полкъ мучениковъ, побѣдившихъ міръ, и образъ намъ давшихъ, како имамы презирати міръ, по писанному: «не любите міра, ни яже суть въ мірѣ» (Іоан. II, 15). Противу плоти ставитъ полкъ дѣвствующихъ, побѣдившихъ свою плоть, и одолѣвшихъ своя природныя страсти.
Таковымъ чиномъ возбранная Воевода, устроивши полки, повелѣваетъ всѣмъ братися, битися крѣпцѣ съ нашими великими врагами: битися же мечами, копіями, стрѣлами сильныхъ ихъ за ны молитвъ, и уязвляти тѣми супостатовъ, и далече ихъ оть насъ прогоняти, сама же по обычаю воеводскому дѣетъ. Обычно бо воеводамъ съ высокаго мѣста смотрѣти на полки ратующихъ и изнемогающимъ подавати помощь. Сице и она сотвори, ста на высокомъ мѣстѣ, на небеси, по успеніи своемъ съ тѣломъ взята бывши, ста же тамо, якоже Ю Богословъ видѣ: «знаменіе», рече, «веліе явися на небеси, жена облеченна въ солнце» (Апок. XII, 1). Явися же въ самое злое время, въ страшное время, разоренію находящу, и вселеннѣй смущаемой, пишется бо: «быша блистанія, и гласы и громы, и трусъ, и градъ великъ» (Тамъ же VIII, 5). И се «знаменіе на небеси, въ солнцѣ жена» (Тамъ же XII, 1).
Здѣ вyяти требѣ, почто та Богословомъ видѣнная жена, Воеводу нашу образующая, не явися прежде блистанія громовъ и гласовъ, труса и града, внегда еще вся стихіи въ мирѣ бяху и въ покои, но въ самое страшное небесе и земли смущеніе? Того ради, да покажетъ, яко Пречистая Мати Божія въ самой лютѣйшей брани, въ самое злое время, внегда съ супостаты боремся, внегда ратуютъ ны враги наши, ово блистаніемъ похоти очесъ, ово гласомъ гордости живота, ово громомъ внезапныхъ страстныхъ навѣтовъ, ово трусомъ внутреннихъ мятежевъ, ово градомъ различныхъ попущеній на ны Божіихъ: тогда Она, яко солнце, въ помощь намъ восходитъ, да аще кто побѣждается, сего утвердитъ; аще кто уязвляется, сего исцѣлитъ; аще кто падетъ, сего воздвигнетъ; аще уже и умеръ есть кто душею въ брани, лютѣ побѣжденъ бывши, помощи же Ея не отчаявъ, сего воскреситъ, и паки къ подвигу вооружить. Аще же кто добрѣ подвизается, посемь да поборетъ, и за подвигъ мзду уготовитъ: во всемъ же томъ бранномъ времени, да нощь области темныя борющихся не покрыетъ, является въ солнцѣ, просвѣщающи тьму нашу. Тако Тая возбраиная Воевода, непобѣдимая побѣдительница, Пречистая Мати Божія, за ны брань съ супостаты нашими дѣетъ, и побѣждаетъ враги невидимыя, побѣждаетъ же и видимыя, якоже въ началѣ бесѣды нашея речеся, а мы благодарственная ей восписующе, припѣваемъ ей: «радуйся, еюже воздвижутся побѣды, радуйся, еюже врази низпадаютъ»!
Се, слышателіе мои, видѣхомъ чинъ воеводскій возбранной Воеводы, Пресвятой Дѣвы; слышахомъ, како вооружается на брань, како изводитъ своя воя, и устрояетъ чинно полки, и како ратуя, побѣждаетъ супостатовъ. И уже время скончати похвальную о Пречистой Дѣвѣ бесѣду, время аминемъ окончати; но о нѣкоей вещи смущаюся умомъ. Мню бо, яко вся мною грѣшнымъ реченная, безкнижнымъ людемъ не внятна быша, и опасаюся, да не безъ пользы отъидутъ, и да не явлюся, яко велерѣчивъ риторъ, а не яко полезенъ учитель: еще убо маленько нѣчто реку на пользу простѣйшихъ ради. Вѣсте ли, что хощу рещи? Реку вещь страшную, ейже не восхощете яти вѣры, обаче возглаголю, глаголю же сіе: Пречистая Мати Божія не можетъ о насъ умолити Бога, не можетъ конечно. Имете, ли сему вѣру? Аще ли и не имете, обаче азъ слово, сіе утверждаю, яко не можетъ? Вы же вопросите мене: чесо ради не можетъ? Отвѣщаю, того ради, яко мы не хощемъ покаятися грѣховъ нашихъ, и не престаемъ распинающе злобами нашими Сына Ея и Бога нашего; того ради она не можетъ Его умолити. А яко се истина есть, абіе сотворю извѣстіе отъ Писанія.
Согрѣшиша тяжцѣ иногда Израильтяне, ниже восхотѣша покаятися, и глаголетъ Господь ко Пророку Іереміи: «аще станутъ Моѵсей и Самуилъ» предо мною, «нѣстъ душа моя къ людемъ симъ, изрину тѣхъ (отъ лица моего)», да изыдутъ, «иже къ смерти, къ смерти; иже къ мечу, къ мечу; иже къ гладу, къ гладу; иже къ плѣненію, къ плѣненію» (Іерем. XV, 1 и 2). Вѣсте ли, кто бяше Моѵсей? Той, иже съ Богомъ. лицемъ къ лицу бесѣдова; той, иже море Чермное раздѣли, люди Израилевы по суху проведе, и безчисленная чудеса содѣла, и егда воздвизаше руцѣ свои на молитвѣ за Израиля, Израиль побѣждаше Амалика. И Самуилъ не меньшій же его Пророкъ, обаче Богъ глаголетъ: аще станутъ Моѵсей и Самуилъ, и будутъ мене за тѣхъ грѣшниковъ некающихся молити, не послушаю ихъ, не умолятъ Мене. Сице разумѣй всякъ и о Пречистой Дѣвѣ Богородицѣ: донелѣже мы не престанемъ смертнѣ грѣшити, донелѣже не престанемъ тяжцѣ прогнѣвляти и огорчевати Бога нашего, дотоль и Пресвятая Мати Божія не можетъ о насъ умолити Бога. Смотря бо Господь съ высоты славы Своея на наша прескверная и премерзостная дѣла, яко именемъ точію есмы Христіане, а дѣлы погановъ горши, на то смотря Господь, глаголетъ къ Себѣ: убо аще станетъ и любезнѣйшая Моя Мати молитися ко Мнѣ за ожесточенныя сія грѣшники, не послушаю Ея; нѣсть душа Моя къ людемъ симъ, отрину ихъ. Како же и умолити можетъ Бога о насъ Божія Мати, егда мы заграждаемъ Ей уста, налагаемъ молчаніе, не попускаемъ за ны молитмся, аще не словесы и языкомъ заграждаемъ, обаче самыми злыми дѣлы нашими, глаголюще къ Ней: молчи, не молися. Разумѣете ли, яже глаголю, егда грѣшникь убиваетъ Ея Сына, не налагаетъ ли Ей молчаніе, дабы зань не молилася? Въ то время, въ то токмо Богородица сильно о насъ умоляетъ Бога, егда мы съ покаяніемъ и со слезами притекаемъ къ Богу, и къ Богородицѣ, крѣпкое утверждающе намѣреніе, еже ктому не работати намъ грѣху, въ то время поистиннѣ умолити о насъ сильна; а донелѣже мы пребудемъ непокаянны, и яко фараониты ожесточенны, дотоль умолити не можетъ. Не тако ли есть, сами разсмотрите? То вамъ поистиннѣ извѣстивши, окончу, рекши: Аминь.
Сочиненія святаго Димитрія, митрополита Ростовскаго. 7-е изд. Ч. 3. М. 1849. С. 159-172.
