ПОКЛОНЕНІЕ СВЯТОЙ ТРОИЦѢ (Изъ твореній св. Димитрія Ростовскаго).
Вся силы души моея,
пріидите поклонимся Богу, въ Троицѣ единому, Отцу и Сыну и Святому Духу!
Вся мысли сердца моего,
пріидите, поклонимся Троицѣ, во Единицѣ почитаемой!
Вся чувства тѣла моего,
пріидите, поклонимся, и припадемъ, и восплачемся предъ Господемъ, сотворшимъ насъ!
Покланяются Тебѣ, Пресвятая, Единосущная, Животворящая и нераздѣлимая Троице, Отче, Сыне, и Святый Душе: вѣрую въ Тя и исповѣдую, славлю, благодарю, хвалю, почитаю, превозношу Тя и молю: помилуй мя непотребнаго раба Твоего! (Трижды).
Покланяюся Тебѣ, Боже Отче, яко отъ небытія въ бытіе привелъ мя еси, образомъ Твоимъ Божественнымъ украсилъ мя еси!
Покланяюся Тебѣ, Боже Сыне, яко честною Твоею кровію стяжалъ мя еси, отъ законныя клятвы искупилъ мя еси, крещеніемъ святымъ просвѣтилъ мя еси!
Покланяюся Тебѣ, Боже Душе Святый, яко оживилъ мя еси, вразумилъ мя еси, свѣтомъ вѣры облисталъ мя еси!
Покланяюся Тебѣ, Боже Отче, яко далъ ми еси душу Божественнымъ и животворящимъ Твоимъ вдохновеніемъ!
Покланяюся Тебѣ, Боже Сыне, яко душу Твою за мя на крестѣ положилъ еси!
Покланяюся Тебѣ, Боже Душе Святый, яко избавляеши душу мою отъ смерти, очи мои отъ слезъ, и нозѣ мои отъ поползновенія!
Покланяюся Тебѣ, Боже Отче, яко согрѣшающа мя не погубляеши со беззаконми моими, но долготерпиши, ожидая обращенія моего!
Покланяюся Тебѣ, Боже Сыне, яко не хощеши смерти мене грѣшнаго, но милосердно на покаяніе мя призываеши!
Покланяюся Тебе, Боже Душе Святый, яко обращающася мя не презираеши, припадающа не отметаеши, но яко блуднаго сына пріемлеши и обновляеши духъ правъ во утробѣ моей.
Покланяюся Тебѣ, Богу Отцу, очищающему вся беззаконія моя!
Покланяюся Тебѣ, Богу Сыну, исцѣляющему вся недуги моя!
Покланяюся Тебѣ, Богу Духу Святому, избавляющему отъ нетлѣнія животъ мой!
Покланяюся Тебѣ, Богу Отцу, не до конца прогнѣвающемуся, ни во вѣкъ враждующему!
Покланяюся Тебѣ, Богу Сыну, не по беззаконіямъ моимъ творящему ми!
Покланяюся Тебѣ, Богу Духу Святому, не по грѣхомъ моимъ воздающему ми!
Покланяюся Тебѣ, Богу Отцу, ущедряющему мя, якоже щедритъ отецъ сыны!
Покланяюся Тебѣ, Богу Сыну, знающему страстное естество мое и слабость!
Покланяюся Тебѣ, Богу Духу Святому, врачующему немощи моя и очищающему мя отъ всякія скверны!
Покланяюся Тебѣ, Боже Отче, яко падшаго мя возставляеши!
Покланяюся Тебѣ, Боже Сыне, яко погибшаго мя взыскуеши!
Покланяюся Тебѣ, Боже Душе Святый, яко мертваго мя оживляеши!
Покланяюся Тебѣ, Боже Отче милосерде, упованіе мое!
Покланяюся Тебѣ, Боже Сыне долготерпѣливе, прибѣжище мое!
Покланяюся Тебѣ, Боже Душе Святый, незлобиве, покровителю мой!
Сіе падши ницъ на земли глаголи:
Достойно есть яко воистину покланятися, славословити, и благодарити Тя, Троице Святая, Юже вся небесныя Силы, Херувими, Серафими, трисвятыми пѣсньми восхваляютъ, вси святіи благодарятъ, всякое созданіе раболѣпно покланяется, и азъ, бренный червь ползящій, предъ величествомъ неприступныя славы Твоея бездерзновененъ, въ надеждѣ милости Твоея дерзаю, безстудно припадаю и молю: даждь всегда, Тебѣ Создателю моему, неосужденно и нелѣностно кланятися, Тебе единаго знати, Тебе любити и боятися, Твоя повелѣнія хранити, Твоихъ заповѣдей путемъ ходити. Тебе хвалити и славити до послѣдняго моего издыханія, да и по разлученіи отъ бреннаго ми тѣла и паки съ нимъ совокупленіи, не лиши мя съ угодившими Тебѣ радостнѣ, Святъ, Святъ, Святъ, восклицати во вѣки, аминь.
«Церковное слово». Изд. Вологодскаго братства Всемилостиваго Спаса. 1908. № 83. С. 514-516.