ПАСХАЛЬНЫЕ ЧАСЫ.

Подобаетъ вѣдати, яко отъ сего дне Святыя и Великія недѣли Пасхи, даже до субботы, Часы, Полунощница, Повечеріе, Утреннія и Вечернія молитвы сице поются.

Наченшу іерею: Благословенъ Богъ нашъ:

Аще мірянинъ: Молитвами святыхъ Отецъ нашихъ, Господи Іисусе Христе Сыне Божій, помилуй насъ.

Ликъ: Аминь. Христосъ воскресе изъ мертвыхъ: трижды.

Воскресеніе Христово видевше,/ поклонимся Святому Господу Іисусу,/ Единому безгрѣшному./ Кресту Твоему покланяемся Христе,/ и святое Воскресеніе Твое поемъ и славимъ:/ Ты бо еси Богъ нашъ,/ развѣ Тебе иного не знаемъ,/ имя Твое именуемъ./ Пріидите вси вѣрніи,/ поклонимся святому Христову Воскресенію:/ се бо пріиде крестомъ радость всему міру./ Всегда благословяще Господа,/ поемъ воскресеніе Его:/ распятіе бо претерпѣвъ,// смертію смерть разруши (трижды).

Ѵпакои.

Предварившыя утро яже о Маріи,/ и обрѣтшыя камень отваленъ отъ гроба,/ слышаху отъ Ангела: во свѣтѣ присносущнѣмъ Сущаго,/ съ мертвыми что ищите яко человѣка?/ видите гробныя пелены, тецыте и міру проповѣдите,/ яко воста Господь, умертвивый смерть,// яко есть Сынъ Бога, спасающаго родъ человѣческій.

Кондакъ.

Аще и во гробъ снизшелъ еси Безсмертне,/ но адову разрушилъ еси силу,/ и воскреслъ еси яко Побѣдитель, Христе Боже,/ женамъ мѵроносицамъ вѣщавый: радуйтеся,/ и Твоимъ апостоломъ миръ даруяй,// падшымъ подаяй воскресеніе.

Тоже тропарь.

Во гробѣ плотски, во адѣ же съ душею яко Богъ,/ въ рай же съ разбойникомъ, и на Престолѣ былъ еси Христе со Отцемъ и Духомъ,// вся исполняяй неописанный.

Слава. Яко Живоносецъ, яко рая краснѣйшій,/ воистину и чертога всякаго царскаго показася свѣтлѣйшій Христе гробъ Твой,// источникъ нашего воскресенія.

И нынѣ. Вышняго освященное Божественное селеніе, радуйся:/ Тобою бо дадеся радость Богородице, зовущимъ:// благословенна Ты въ женахъ еси Всенепорочная Владычице.

Господи помилуй (40 разъ).

Слава, и нынѣ.

Честнѣйшую Херувимъ: Именемъ Господнимъ благослови отче.

Іерей: Молитвами святыхъ отецъ нашихъ:

Ликъ: Аминь.

И паки глаголемъ подобнѣ: Христосъ воскресе: трижды. Слава, и нынѣ. Господи помилуй, трижды. Благослови. И отпустъ Перваго часа отъ іерея.

Симъ же образомъ поется за Третій, Шестый, Девятый часъ, и за Повечеріе единожды. Такожде и за Полунощницу.

Мірскимъ чиномъ

отпустъ творится тако: по Господи помилуй (40 разъ). Слава, и нынѣ. Честнѣйшую Херувимъ: Господи помилуй, Господи помилуй, Господи благослови.

Молитвъ ради святыхъ Отецъ нашихъ, Господи Іисусе Христе Сыне Божій, помилуй насъ. Аминь.

Христосъ воскресе: трижды.

И отпустъ.

Воскресе изъ мертвыхъ Господи Іисусе Христе, Сыне Божій, молитвъ ради Пречистыя Твоея Матере и всѣхъ ради святыхъ, помилуй и спаси насъ яко Благъ и Человѣколюбецъ. Аминь.

Христосъ воскресе: трижды.

И намъ дарова животъ вѣчный, покланяемся Его тридневному воскресенію.

 

Примѣчанiе: Согласно литургической практикѣ РПЦЗ, симъ же образомъ исполняются Правило ко Причащенiю и Попричастные молитвы.


КАНОН - Свод законов православной церкви



«Благотворительность содержит жизнь».
Святитель Григорий Нисский (Слово 1)

Рубрики:

Популярное:





Подписаться на рассылку: