Молитвословія из зарубежной Службы святымъ Царственнымъ Мученикомъ.

Щелкнув на картинку получите изображение наивысшего качества

 

Царственнымъ Мученикамъ, тропарь гл. 5: Царства земнаго лишеніе, / узы и страданія многоразличныя, кротко претерпѣлъ еси, / свидѣтельствовавъ о Христѣ даже до смерти отъ богоборцевъ, / страстотерпче великій боговѣнчаный царю Никóлае, / сего ради мученическимъ вѣнцемъ на небесѣхъ вѣнча тя / съ царицею, и чады, и слуги твоими Христосъ Богъ, / Егоже моли помиловати страну Россiйскую, // и спасти души наша.

Кондакъ гл. 6: Надежда царя мученика / съ царицею и чады и слуги укрѣпи, / и къ Твоей любви окрыли, будущій имъ покой предвозвѣстивши, // тѣхъ молитвами, Господи, помилуй насъ.

Прмцц. вел. кн. Елисаветѣ и инокини Варварѣ, тропарь гл. 4: Кротость и смиреніе и любовь / вселивши въ душу свою, / усердно послужила еси страждущимъ, / страстотерпице святая книгине Елисавето, / таже съ вѣрою претерпѣла еси страданія и смерть за Христа, / съ мученицею Варварою. // Съ нею же моли о всѣхъ съ любовію почитающихъ васъ.

Кондакъ гл. 4: Отъ славы царственныя, / вземши крестъ Христовъ, / прешла еси къ славѣ небеснѣй, молящися за враговъ, / и обрѣла еси радость вѣчную, / святая мученице княгине Елисавето, / съ Варварою мученицею. / Тѣмже молимъ васъ, // молите о душахъ нашихъ.

ПОКАЯННАЯ МОЛИТВА,

читаемая въ день убіенія Царской Семьи, на литургіи.

Благословенъ еси, Господи Боже отецъ нашихъ, и хвально и прославлено имя Твое во вѣки, яко праведенъ еси о всѣхъ, яже сотворилъ еси намъ, и вся дѣла Твоя истинна и прави путіе Твои, и вси суди Твои истинни: и судьбы истинны сотворилъ еси по всѣмъ, яже навелъ еси на ны. Яко согрѣшихомъ и беззаконновахомъ отступивше отъ Тебе, и прегрѣшихомъ во всѣхъ, и заповѣдей Твоихъ не послушахомъ, ниже соблюдохомъ, ниже сотворихомъ, якоже заповѣдалъ еси намъ, да благо намъ будетъ. И предалъ еси насъ въ руки враговъ беззаконныхъ, мерзкихъ отступниковъ, и человѣкомъ неправеднымъ и лукавнѣйшимъ паче всея земли. И нынѣ нѣсть намъ отверзти устъ: студъ и поношеніе быхомъ рабомъ Твоимъ и чтущимъ Тя. Не предаждь же насъ до конца имене Твоего ради, и не разори завѣта Твоего, и не отстави милости Твоея отъ насъ. Яко, Владыко, умалихомся паче всѣхъ языкъ и есмы смирени по всей земли днесь, грѣхъ ради нашихъ. И нѣсть во время сіе начальника, пророка и вожда. И нынѣ, возслѣдуемъ всѣмъ сердцемъ и боимся Тебе и ищемъ лица Твоего. Не посрами насъ, но сотвори съ нами по кротости Твоей, и по множеству милости Твоея, и молитвъ ради пречистыя Матере Твоея и всѣхъ святыхъ Твоихъ изми насъ по чудесемъ Твоимъ, и даждь славу имени Твоему, Господи. И да посрамятся вси являющіи рабомъ Твоимъ злая, и да постыдятся отъ всякія силы и крѣпость ихъ да сокрушится. И да разумѣютъ вси, яко Ты еси Господь Богъ нашъ, единъ и славенъ по всей вселеннѣй, аминь.

Молитва святому царю мученику Николаю.

О, святый страстотерпче царю мучениче Николае, Помазанника Своего тя Господь избра, во еже милостивно и право судити людемъ твоимъ и хранителемъ царства православнаго быти.

Царское служеніе сіе и о душахъ попеченіе со страхомъ Божіимъ совершалъ еси. Испытуя же тя, яко злато въ горнилѣ, скорби горькія Господь ти попусти, якоже Іову многострадальному, послѣди же престола царскаго лишеніе и мученическую смерть посла ти. Вся сія кротко претерпѣвый, яко истинный рабъ Христовъ. наслаждаешися нынѣ вышнія славы у престола всѣхъ Царя, купно со святыми мученики: святою царицею Александрою, святымъ отрокомъ царевичемъ Алексіемъ, святыми царевнами Ольгою, Татіаною, Маріею и Анастасіею и съ вѣрными слуги твоими, таже со святою мученицею княгинею Елисаветою и со всѣми царственными мученики и святою мученицею Варварою.

Но яко имѣя дерзновеніе веліе у Христа Царя, Егоже ради вси пострадаша, моли съ ними, да отпуститъ Господь грѣхъ народа, не возбранившаго убіеніе твое, царя и помазанника Божія, да избавитъ Господь страждущую страну Россійскую отъ лютыхъ безбожникъ, за грѣхи наша и отступленіе отъ Бога попущенныхъ, и возставитъ престолъ православныхъ царей, намъ же подастъ грѣховъ прощеніе, и на всякую добродѣтель наставитъ насъ, да стяжимъ смиреніе, кротость и любовь, яже сіи мученицы явиша, да сподобимся небеснаго царствія, идѣже купно съ тобою и всѣми святыми новомученики и исповѣдники Россійскими прославимъ Отца и Сына и Святаго Духа, нынѣ и присно и во вѣки вѣковъ. Аминь.


КАНОН - Свод законов православной церкви



«Благотворительность содержит жизнь».
Святитель Григорий Нисский (Слово 1)

Рубрики:

Популярное:





Подписаться на рассылку: