Канонъ Святителю Іоасафу Бѣлгородскому, одобренъ Архіерейскимъ Соборомъ Русской Зарубежной Церкви въ 1951 г.

Ниже помѣщается канонъ Свяителю Іоасафу, еп. Бѣлгородскому, составленный Преосвященнѣйшимъ Іоасафомъ (Скородумовымъ; †1955), архіепископомъ Буэносъ-Айресскимъ и Аргентинскимъ, который былъ постриженъ въ 1912 г. съ именемъ Іоасафа, въ честь новопрославленнаго святителя. Канонъ, составленный въ виду отмѣчаемаго въ 1951 г. сорокалѣтія прославленія святого (въ 1911 г.), былъ одобренъ на Архіерейскомъ Соборѣ Русской Зарубежной Церкви въ 1951 г. Впервые былъ опубликованъ въ № 22 журнала «Православная Русь» за 1951 г. С. 2-3.
 

Канонъ Святителю Іоасафу. Гласъ 8.

Пѣснь 1.

И р м о с ъ : Воду прошедъ, яко сушу, и египетскаго зла избѣжавъ, израильтянинъ вопіяше: Избавителю и Богу нашему поимъ.

Тмою искушеній побѣждаемъ къ Тебѣ, святителю, припадаю. О святителю Христовъ Іоасафе, отъ погруженія въ вѣчную тму избави мя.

Страстьми азъ содержимъ весь, къ твоему предстательству прибѣгаю, святителю Христовъ Іоасафе, твоими молитвами спаси мя.

С л а в а : Ко Спасу Христу дерзновеніе имѣяй, святителю Христовъ, молю тя обращая вся помышленія къ Тебѣ, отъ обдержащихъ грѣховъ свободи мя.

И  н ы н ѣ : Тмою страстей и напастей терзаемую душу мою, исцѣли, Дѣво Богомати, здравіе мнѣ подавающи.

 

Пѣснь 3.

И р м о с ъ : Небеснаго круга Верхотворче, Господи, и Церкве Зиждителю, Ты мене утверди въ любви Твоей, желаній краю, вѣрныхъ утвержденіе, едине Человѣколюбче.

Отче Іоасафе премудре, многихъ спасенія виновникъ, утвержденіе бывъ паствѣ твоей, и мене утверди ко спасенію.

Душевнаго мира стяжатель отъ Бога, о святителю Божій Іоасафе, укроти молитвами твоими и моея души бури и печали.

С л а в а : Отъ Благодѣтеля Господа Христа прощеніе грѣховъ получившій, молитвами твоими и мнѣ испроси отпущеніе грѣховъ даровати.

И  н ы н ѣ : Одержимому безуміемъ страстей, Дѣво Мати, помози, Тя бо вѣмъ, Пренепорочная, отъ страстей исцѣленіе.

 

Сѣдаленъ.

Въ Бѣлградѣ подвизался еси, святителю Христовъ Іоасафе, ученіе Евангельское проповѣдалъ еси, и сего послѣдователь былъ еси истинный, истинную любовь ближнимъ явилъ еси, вшелъ еси во врата царства Христова, яко благодати Божія наслѣдникъ.

 

Пѣснь 4.

И р м о с ъ : Услышахъ, Господи, смотренія Твоего таинство, разумѣхъ дѣла Твоя и прославихъ Твое Божество.

Милосердіе твое къ убогимъ вѣдая, сонаслѣдниче Христовъ, подаждь и мнѣ, святителю, каплю сего милосердія.

Неизреченныхъ благъ у Господа сподобльшійся въ вѣчномъ царствіи Его, святителю, имамъ на тя надежду, да и мене ходатайствомъ твоимъ сихъ сподобиши.

С л а в а : На днѣ пропасти грѣховной низлежащу мнѣ, помози, святителю Христовъ, яко благолюбивъ сый.

И  н ы н ѣ : Имѣя Тя Всепѣтая, ко спасенію руководительницу, всегда въ бѣдахъ и скорбѣхъ, возлагаю на Тя упованіе.

 

Пѣснь 5.

И р м о с ъ : Просвѣти насъ повелѣніи Твоими, Господи, и мышцею Твоею высокою Твой миръ подаждь намъ, Человѣколюбче.

Небеснаго веселія сердце мое исполни, святителю Іоасафе, радость спасенія вѣчнаго подающи ходатайствомъ твоимъ.

Миръ, превосходящъ всякъ умъ, имѣти, милосердне святителю, и мнѣ подаждь нечистому, очищая сердце мое всесовершенно.

С л а в а : Свѣтлости Божественной достигнувый, мракъ души моея, святителю Богомъ возлюбленный, просвѣти лучами свѣта твоего.

И  н ы н ѣ : Недугъ неисцѣльный души моея исцѣли, Пречистая Богоневѣсто, молитвами Твоими, посѣщенія Твоего сподобляющи.

 

Пѣснь 6.

И р м о с ъ : Молитву пролію ко Господу и Тому возвѣщу печали моя, яко золъ душа моя исполнися и животъ мой аду приближися, и молюся, яко Іона: отъ тли, Боже, возведи мя.

Къ Тебѣ, Божію святителю, молитву пролію яко ходатаю, да естество падшее, тлѣніемъ и смертію объятое, отъ тли и смерти свободитъ Христосъ.

Твердаго предстателя тя имамъ, угодниче Христовъ, и злыхъ напастей рѣшителю, всегда усердно призываю, да сихъ мене исхитиши.

С л а в а : Господь-Судія, – блаженное имя твое, святителю отче Іоасафе; Буди ми кроткій судія и милостивый защитникъ предъ милостивымъ Господомъ Судіею.

И  н ы н ѣ : Лежу нынѣ, болѣзную душею и плотію, недугуя за грѣхи, но Ты, Пречистая Богомати, исцѣли душевныя моя недуги, и отъ тѣлесныхъ недугъ возставляющи.

 

Пѣснь 7.

И р м о с ъ : Отъ Іудеи дошедше, отроцы, въ Вавилонѣ иногда, вѣрою Троическою пламень пещный попраша, поюще: отцевъ Боже, благословенъ еси.

Свое спасеніе устроити хотя, дѣвственную чистоту явилъ еси, святымъ отцамъ подражая, богомудре Іоасафе, и якоже отцы наша воспѣлъ еси: Боже, благословенъ еси.

Умоли, святителю, Избавителя Господа, къ Нему теплыми молитвами, да избавитъ насъ отъ вѣчнаго осужденія, да и мы зовемъ съ тобою: Избавителю Боже, благословенъ еси.

С л а в а : Покаяніе всецѣлое и люботрудное показалъ еси, святителю, всѣмъ намъ, да и мы, подражающе житію твоему, достигнемъ сокровища небеснаго, воспѣвающе: Боже, благословенъ еси.

И  н ы н ѣ : Сподоби насъ, Пречистая, родшая Христа, съ любовію поющихъ Тя, избавитися отъ тлѣнія и слабости тѣлесныя.

 

Пѣснь: 8.

И р м о с ъ : Царя небеснаго, Егоже поютъ вои ангельстіи, хвалите и превозносите во вся вѣки.

Слуга Царя небеснаго, ускори молитвами твоими помощи ми, да не отвергнутъ буду отъ Христа Царя.

Ты, предстателю отъ Бога крѣпкій, души моея болѣзни исцѣли, да и тя, отче Іоасафе, прославлю во вѣки.

С л а в а : Богатство милости и исцѣленій ты подаеши всѣмъ, Святителю, вѣрно тя славящимъ.

И  н ы н ѣ : Прилоги вражіи и многія напасти Ты отжени отъ насъ, Пречистая, да величаемъ Тя во вѣки.

 

Пѣснь 9.

И р м о с ъ : Воистину Богородицу, Тя исповѣдуемъ, спасенніи Тобою, Дѣво Чистая, съ безплотными лики Тя величающе.

Не отвратися слезъ моихъ, святителю, покаянія слезъ пролившій токи, предъ Христомъ воплошщимся.

Преисполненъ радости небесныя, видѣній небесныхъ удостоенный, и насъ небесныхъ радостей сподоби молитвами твоими.

С л а в а : Озаренный свѣтомъ невечернимъ, святителю пресвѣтлый Іоасафе, сподоби и насъ озаритися свыше молитвами твоими.

И  н ы н ѣ : Исцѣли, Дѣво, немощи наша, здравіе всецѣлое подающи, и буди намъ стѣна, и покровъ и прибѣжище.




«Благотворительность содержит жизнь».
Святитель Григорий Нисский (Слово 1)

Рубрики:

Популярное: