Канонъ молебный въ скорби и обстояніи.
Пѣснь 1. Гласъ 6.
Ирмосъ: Помощникъ и Покровитель......
Припѣвъ: Помилуй насъ, Боже, помилуй насъ.
Тѣснотою обстояній одержи́мы, къ Тебѣ прибѣгаемъ, Владыко Человѣколюбче, не отвержи насъ въ часъ сей смятенія душъ наши къ, Блаже.
По пятамъ гнаше фараонъ люди Израильтестіи, но не достиже; се и намъ во слѣдъ устремишаея устрашенія адова, – скорбь близь и нѣсть избавляли.
Не погуби насъ со беззаконіями нашими, Спасе, но простри, Владыко, сильную Твою руку во избавленіе наше.
Святіи Первопрестольницы Россійстіи, молите Бога о насъ.
Спаса Христа молите, велиціи чудотворцы и избранніи Петре, Алексіе, Іоно, Филиппе и Ермогене, избавитися намъ отъ бѣдъ и скорбей и варварскаго плѣненія вашими молитвами.
Слава:
Сквозѣ Чермное море преведъ, свободилъ еси люди Твоя Сильне; свободи и насъ, Блаже, отъ облежащихь ны бѣдъ и скорбей.
И нынѣ:
Колесницы фараоновы видѣвъ, Моисей въ тѣснотѣ и скорби къ Богу воззва о людехъ своихъ: о насъ же кто воззоветъ, аще не Ты, Мати чистая?
Пѣснь 3.
Ирмосъ: Утверди, Господи......
Подвигошася сердца наша, Владыко, смутихомся отъ гнѣва лица Твоего, пощади насъ, яко единъ святъ еси и Господь.
Утвердися врагъ на ны, преклонихомся отъ немощи нашея, преклонихомся, не возможемъ стати: воздвигни насъ, Щедре, во упованіи Твоемъ утверждая.
Вознеси рогъ нашъ, Блаже, да не когда будемъ брашно чуждому; Спасе, Самъ насъ помилуй.
Первопрестольникомъ:
Прострите длани ваша, святіи отцы, ко всѣхъ Владыцѣ и устнѣ ваша на молитву утвердите, ускорите на помощь вашу, и отъ находящихъ на насъ бѣдъ и золъ и всякія нужды избавите насъ вашими къ Богу молитвами.
Слава:
Даждь молитву молящимся Тебѣ, Христе; како бо помолимся, не вѣмы, аще не Духъ Твой Святый восходатайствуетъ о насъ ко Отцу.
И нынѣ:
Матервіи рудѣ на моленіе простерши ко Владыцѣ, Сыну Твоему, заступи насъ крѣпко, Дѣво Богородице.
Пѣснь 4.
Ирмосъ: Услыша Пророкъ......
Преклонивый небеса схожденіемъ Твоимъ, Спасе, во еже слышати воздыханія окованныхъ, рязрѣшити сыны умерщвленныхъ, разрѣши и намъ узы скорби, содержащіе ны, Благоутробне.
Се труждающіися въ печали и скорбію обремененніи къ Тебѣ течемъ: помяни слово Твое сладчайшее, еже реклъ еси: „пріидите ко Мнѣ“, Спасе нашъ кроткій.
Пустыню прошедый во еже взыскати овча погибшее, Спасе, взыщи насъ въ пустыни отчаянія нынѣ, да не отъ мысленнаго волка звѣроуловлени будемъ, Пастырю добрый
Первопрестольникомъ:
Надежду имуще васъ, святіи отцы, Петре, Алексіе, Іоно, Филиппе и Ермогене, и, яко стѣну недвижиму къ Богу ваши молитвы, золъ и всѣхъ бѣдъ избавляемся.
Святителю Филиппу:
Новъ явился еси ревностію, яко же вторый Моисей, не знаменіи страшными удивляя, но божественныхъ словесъ ученіи наставляя, къ тихому пристаннищу новаго Израиля отъ страстей Египта изводя.
Слава:
Страшно прещеніе Твое, Царю вышній, Его же трепещутъ небо и земля, но о имени Сына Твоего, подъемшаго бремена наша, вопіемъ: пощади, Многомилостиве.
И нынѣ:
При Крестѣ божественное истощаніе Чада Твоего возлюбленнаго зрѣвшая, Мати, глубину золъ болѣзненно прешла еси, Непорочная; вѣси, каково есть сіе, и на страждущія любовію соскорбящи призираеши.
Пѣснь 5.
Ирмосъ: Отъ нощи утренююще......
Призри на нищету нашу и скорбь нашу, Владыко: се, ниже воззрѣти нынѣ можемъ, къ Тебѣ, Свѣту нашему незаходимому.
Нощь отчаянія обыде насъ, мракомъ золъ облежащая: возведи въ насъ радость Твою, Утѣшителю благій, звѣздою свѣтлою утреннею.
Гдѣ, еси, Господи, вопіемъ? вскую отринулъ еси насъ, Благій? почто забылъ еси насъ, Создателю нашъ? – но николиже возврѣхомь къ богу чуждему Спасе, Самъ нась помилуй.
Первопрестольникомъ:
Исполните, святіи отцы, веселія жизнь нашу, избавляюще насъ варварскаго плѣненія и междоусобныя брани.
Святителю Алексію:
Вскую унываемъ, согнѣтаемы множествомъ печалей, имуще скорбныхъ утѣшителя, святителя Алексія, избавляюща ны отъ бѣдъ и скорбей нашихъ, и оть врагъ видимыхъ же и невидимыхъ?
Слава:
Сыне Божій, миръ Твой неизреченный апостоломъ Твоимъ въ скорби подавый, потаждь и намъ оть сего въ часъ сей смятенія сердецъ нашихъ, Духомъ Отчимъ насъ осѣняя.
И нынѣ:
Заре свѣтлаго дне Господа, Сына Твоего, Мати Чистая, испроси намъ просвѣщеніе душъ нашихъ озареніемъ Духа Святаго.
Пѣснь 6.
Ирмосъ: Возопихъ всѣмъ сердцемъ......
Очисти ны, Спасе, очисти ны, да не покрыетъ главы наша бездна грѣховная и потонемъ въ пучинѣ отчаянія.
Бурею носими непостоянною, съ кораблецемъ малымъ потопляеми, Тебе, тихое пристанище наше и желанное, взыскуемъ: привлецы насъ, Щедре, скоро, да не погибнемъ.
Услыши, Господи, вонми, Владыко нашъ. Спаси, Спасе нашъ: еще мало, и крѣпости ни единыя же будетъ въ насъ.
Первопрестольникомъ:
Смерти и ига, и варварскаго плѣненія избавите, и огненнаго запаленія свой градъ сохраните, къ Богу вашими молитвами.
Святителю Петру:
Храни градъ твой, святителю Петре, отъ безбожныхъ и невѣрныхъ поруганія и отъ междоусобныя рати, моляся непрестанно Владыцѣ Христу еже миръ паствѣ твоей даровати.
Слава:
Въ мори житейстѣмъ обуреваемся, восхожденія волнъ устрашаютъ ны: предстани намъ, Управителю благій, рукою крѣпкою насъ въ тишину наставляя.
И нынѣ:
Въ пучину влечемся погибели, покрыша воды главы наша: како услышанъ сотворимъ гласъ моленія нашего? – Ты возопи по насъ, Благодатная
Вмѣсто сѣдальна стихира, гл. 7: Уязвленную мою душу и смиренную посѣти, Господи, врачу болящихъ и отчаянныхъ, пристанище необурезаемое: Ты бо еси пришедый Избавитель міра еже воздвигнути изъ тли падшаго: и мене припадающа возстави, за великую Твою милость.
Пѣснь 7.
Ирмосъ: Согрѣшихомъ, беззаконновахомъ......
Согрѣшихомъ, беззаконновахомъ, Спасе, предъ Тобою, ниже соблюдохомъ, ниже сотворихомъ, якоже повелѣлъ еси намъ, но не предаждь ны до ковна, отцевъ Боже.
Уязвихомся, смирихомся, приклонихомся до земли, но душею сокрушенною и духомъ смиреннымъ пріяти да будемъ, Боже отецъ нашихъ благоутробне.
Не посрами насъ, Владыко, взыскующихъ Тебе, яви намъ милости Твоя, сотвори намъ по кротости Своей и изьми насъ по чудесемъ Твоимъ, отцевъ Боже.
Первопрестольникомъ:
Сокровище спасенія, и источникъ исцѣленія, и наставницы покаянія вы есте, Божіи угодницы, вопіющимъ: Отецъ нашихъ Боже, благословенъ еси.
Святителю Петру:
Отверзи намъ двери покаянія, преблаженне архіерею Петре, да омыемъ скверну окаянныхъ нашихъ душъ и тѣлесъ, вся чувствія и совѣсть направляя Богу пѣти: отецъ нашихъ Боже, благословенъ еси.
Слава:
Устуди ярость скорби нашея, тихою росою Твоею окропляя насъ, о имени Сына Твоего Духомъ Твоимъ Святымъ, Отче щедре.
И нынѣ:
Праведенъ, Владыко Христе, гнѣвъ прещенія Твоего, еже на насъ, – како дерзнемъ отпущенія просити? но имене ради Матери Твоея Пречистыя преклонися на милость, Блаже.
Пѣснь 8.
Ирмосъ: Его же воинства небесная......
Всея твари Содѣтелю и Владыко, пощади насъ, созданіе Тво: отъ крѣпости бо руки Твоея исчезохомъ.
Се ниже нынѣ можемъ возвести очи наша и зрѣти красоту Твою небесную, но въ персти повержени взываемъ къ Тебѣ: возстави насъ, Щедре, посѣщеніемъ Твоимъ.
Тебе славятъ небесныя силы, о Тебѣ радуется море и земля, къ Тебѣ взираетъ вся тварь, яко къ Господу и Благодетелю своему, – помяни и нашу скорбь, Блаже, въ радость сію претворяя.
Первопрестольникомъ:
Помощи вашея требующихъ не презрите, святіе отцы наставницы православія, поющихъ и превозносящихъ Христа во вѣки.
Святителю Филиппу:
Шатанія и брани междоусобныя укроти и сверѣпѣющія волки на стадо Твое, блаженне, яко истинный пастырь, молитвъ твоихъ палицею далече отжени, да тя, яко предстателя, воспѣваемъ во вѣки.
Слава:
Не остави насъ сирыхъ, пріиди къ намъ, яко же обѣщался еси апостоломъ Твоимъ: безъ Тебе бо сѣнь смертная объяла есть насъ, Владыко.
И нынѣ:
Царю великій и дивный, Его же трепещутъ херувими и серафими, како прогнѣвавше Тебе, на милость Тебе преклонити возможемъ? – но се Матерь Твою на молитву движемъ, Тоя моленіемъ нреклонися.
Пѣснь 9.
Ирмосъ: Безсѣменнаго зачатія......
Любве ради къ намъ неизреченныя искусился еси страстію крестною, Іисусе, да искушаемымъ возможеши помощи.
Врачу болящихъ и отчаянныхъ, исцѣли сокрушенія наша, Спасе, раны наша обвязуя.
Недуги и болѣзни рода нашего понесый за неизреченное Твое благоутробіе, спредстани намъ и нынѣ, Благій, тяготу нашу подъемля.
Первопрестольникомъ:
Теченія слезъ не презрите, молимъ вы, святіи отцы, Петре, Алексіе, Іоно, Филиппе и Ермогене, всѣмъ утѣшеніе подати блажащимъ васъ.
Святителю Іонѣ:
Богопреданную Ти паству, пастыря Тя имущу, тяжкія волки отгоняюща отъ всѣхъ вѣрныхъ и стадо благодатію Христовою соблюдаемо сохрани, Іоно святителю.
Слава:
Благословенный, великій и дивный и милостивый Спасе нашъ, молитвами Матери Твоея Пречистыя яви намъ спасеніе Твое, да радости Твоея исполнившеся, принесемъ Тебѣ благодаренія наша и души наша, Владыко.
И нынѣ:
Утѣшительнице скорбящихъ, радость наша Богородительнице, притецы милосердующи о насъ ко Христу Богу: къ Сыну бо, яко Матерь, дерзновеніе имаши.
«Орловскія Епархіальныя Ведѣмости». 1918. № 22-23. С. 555-560 (Приложеніе).
Коментарии Редакции:
Данный молебный канон был составлен дочерью петербургского протоиерея Екатериной Лебедевой. Поступил из канцелярии Поместного Собора в VII отдел «О богослужении, проповедничестве и храме». Отредактирован иером. Афанасием (Сахаровым) и проф. Б. А. Тураевым. Определением Свят. Патр. Тихона и Свящ. Синода № 644 от 26 июля (8 августа) 1918 г. одобренный текст канона был допущен к богослужебному употреблению в составе «Чина церковного служения в дни всенародного покаяния» и разослан по епархиям. Чин этот совершался в Москве во дни всенароднаго покаяния 2-4 августа 1918 г. Свящ. Синод постановлением № 1296 от 17/30 декабря 1918 г. (РГИА, ф. 831, оп. 1, № 80, л. 123-124.) решил не вводить канона в общеупотребительные богослужебные книги. На это решение повлял отрицательный отзыв митр. Сергия (Старогородского), считавщего что канон: «живет темой общественного бедствия и стремится возбудить общенародное покаяние. В соответствии с этой целью он изобилует сильными, даже слишком сильными выражениями, могущими произвести впечатление на массу. Но в нем нет того тихого благодатного умиления, которого ищет в церковном песнопении душа человека, пережившего какую-либо личную скорбь». (А. Г. Кравецкий, А. А. Плетнева, История церковнославянского языка в России (конец XIX-XX в.). М. 2001. С. 168.).
