Изъ древне-русскихъ поученій на третью недѣлю по Пасхѣ: «Объ Іосифѣ и Мироносицахъ».
Это поученіе приписывается святителю Кириллу Туровскому (Калайдовича, Памятникъ XII в.) и помѣщается въ рукописныхъ и старопечатныхъ Сборникахъ на ряду съ другими поученіями этого святителя, хотя иногда и подъ именемъ Іоанна Златоуста. Сообщаемъ его по старопечатному «Златоустинку» конца XVIII в., – ср. рукоп. Кирилла-Бѣлозер. Библ. № 138-1215 XVI вѣка. – Ред.
Возлюбленніи, солнце красуяся подъ облакомъ любимо бываетъ видящимъ е; – такожде и апостоломъ господнимъ по распятіи и по смерти Христовѣ радостно возсія воскресеніе Господне. Іосифъ же, иже отъ Аримафея, прежде воскресения Христова дерзаетъ, старѣйшимъ ученикомъ бѣжавшимъ, единъ приходитъ къ Пилату дерзая просити тѣла Христова, егоже на крестѣ висяща видѣ. Прежде бо позна его Бога суща: тѣмъ не рече богатъ есмь, еда отпаду богатства, аще испрошу тѣло осужденнаго мученію и буду оклеветанъ къ жидомъ. Ничтоже таково помысли, но все ни во чтоже вмѣнивъ, испроси погребсти тѣло Христово. Пилатъ же дивися, аще уже умре; мняше бо надолзѣ ему живу быти. И вопроси сотника: аще уже умре? Іосифъ же вземъ тѣло Іисусово, и купи плащаницу, и святое тѣло честно положи въ новомъ своемъ гробѣ. Ученикъ бо бѣ Іисусовъ и той, и вѣдяше како чести Владыку говѣйно, благо и пречестно, хотя причастникъ быти небесному Его царствію; совѣтникъ же бѣ саномъ и въ людехъ старѣйшина.
Слышите, богатіи, иже во градскихъ упражняющеся вещахъ и нудящеся о торжищахъ пещися, како Іосифу не возбрани на добродѣтель совѣтничества санъ! Минувши же суботѣ, Марія Магдалина, и Марія Іаковля, и Саломія купиша ароматы, да пришедше помажутъ Іисуса. По обычаю жидовскому се творяху. Разумѣйте же глаголъ евангельскъ: рече бо Матѳей: въ вечеръ суботный пріидоша на гробъ жены; Лука же рече: зѣло рано; Марко же рече: возсіявшу солнцу пріити женамъ на гробъ, – и никтоже разно глаголетъ, о различныхъ бо женахъ рекоша вси. По Матѳееву глаголу: въ вечеръ суботный пріидоша не съ мvромъ жены, но видити гроба; тогда еще трусъ бысть и ангелъ отвали камень отъ дверій гроба и рече женамъ: не бойтеся вы. Бѣже ту Марія сестра Лазарева, а другая Марія Іосіина. Полунощи же инѣ женѣ двѣ, аки испытающе бывшаго иже рече зѣло рано пріидоша жены дозрѣти гроба, и нѣцыи съ ними и тіи видѣша уже гробъ тощь и два ангела во блещащихся ризахъ глаголюща: нѣсть здѣ, но воста. По Іоанну же, предъ зарею пріиде Марія Магдалина, изъ нея же изгна седмь бѣсовъ, и та видѣ два ангела въ бѣлыхъ ризахъ, такоже и самого Христа. Марко же рече, минувши суботѣ, и солнцу возсіявшу, вся вкупѣ пришедша, глаголетъ съ муромъ, и Марію Іаковлѣ Богородицу именуемъ. Рече же имъ явлейся юноша: не ужасайтеся; первіе измѣни ихъ отъ страха, потомъ же и о воскресеніи благовѣствова и глагола имъ: Іисуса ли ищете распятаго, воста, нѣсть Его здѣ. Видиши ли, не срамляется ангелъ распятіемъ, тѣмъ бо спасеніе всему міру бысть. Добрѣ увѣрити я хотя рече: се мѣсто идѣже бѣ положенъ, но идите рцыте ученикомъ Его и Петрови. Петра единаго отъ ученикъ нарече, иже при страсти отверглся бѣ Христа. Аще бо быша пришедше жены рекли: послани есмы повѣдати ученикомъ, то убо реклъ бы Петръ: азъ уже нѣсмь ученикъ Его, отверглъ бо мя есть и возненавидѣлъ. Того ради приложи и Петра, да ся не соблазнитъ. Въ Галилею посылаетъ ихъ, хотя извести ихъ отъ страха жидовскаго, тѣмже ничтоже тогда не рекопа, бояху бо ся. Благодаримъ убо и мы за ны пострадавшаго Господа, и по гребеннаго, и воскресшаго, да пріиметъ яко жертву чисту наше благодареніе и похваленіе и вѣчныхъ благъ сподобитъ насъ, яко благъ и человѣколюбецъ, Ему же слава нынѣ, и присно, и во вѣки вѣковъ. Аминь.
«Странникъ». Духовный учено-литературный журналъ. 1893. Т. 1. С. 547-549.
