Священникъ Александръ Яблонскій – Исторія преображенія Господа нашего Іисуса Христа въ церковныхъ пѣснопѣніяхъ.
Величай, душе моя, на Ѳаворѣ преобразившагося Господа.
Мыслію, вѣрніи, пріидите – пойдемъ къ горѣ святѣй, видѣти преображеніе Христово всесвѣтлое: вся бο просвѣщаетъ славословящія сіе во вѣки (Кан. предпраздн. п. 8). Пріидите – взыдемъ со Іисусомъ, восходящимъ на гору святую, и тамо услышимъ гласъ Бога живаго, Отца пребезначальна, облакомъ свѣтлымъ свидѣтельствующь, Божественнымъ Духомъ, Того свойство присносущнаго сыновства (Стих. предпр. на Госп. воззв. 1)... Готовися нынѣ, Ѳаворе, се бо грядетъ Христосъ, Божества зарю паче ума показати на тебѣ славнымъ ученикомъ, якоже можаху (Сѣдал. предпр.)... Приспѣ день божественнаго веселія: восходитъ на гору Ѳаворскую Владыка, Божества Своего облистати красоту (Троп. предпр.). Знаменіе боголѣпно божества показуетъ (Стих. на стиховнѣ предпраздн.)... Человѣкъ зримый, но Богъ крыемый..., небо создавый и звѣздамъ свѣтъ вложивый, днесь на гору Ѳаворскую возшедъ, освѣщаетъ ученики зарею Божества Своего (Кан. предпр. п. 1; свѣтил. предпр.).
Гора, яже иногда мрачна и дымна, нынѣ же честна и свята есть, на ней же нозѣ Твои стоястѣ, Господи (Стих. празд. на Госп. воззв.)...
Иже прежде солнца свѣтъ, Христосъ, тѣлеснѣ на земли жительствуя и прежде креста вся, яже страшнаго смотрѣнія, совершивъ боголѣино, днесь на Ѳаворстѣй горѣ тайно Троицы образъ показуя, изящныя три ученики, Петра, Іакова и Іоанна, на ню возвелъ еси наединѣ, и мало скрывъ плоти воспріятіе, преобразился еси предъ ними, являя началообразныя доброты благолѣпіе, и то не всесовершенно: ово извѣствуя тыя, вкупѣ и щадя, да не како со зракомъ и еже жити погубятъ, но яко можаху вмѣщатп тѣлесныма очима стерпяще (на литіи празд. стих. 3)... Неодержимое Твоего свѣтолитія и непреступное Божества, зряще апостоловъ лучшіи, на горѣ преображенія, Безначальне Христе, Божественнымъ измѣнишася ужасомъ... Видяху бо ризы Твоя, облиставшія, яко свѣтъ, и лице Твое паче солнца (стих. на стихов., на слава и нынѣ): во исповѣданіе и въ велелѣпоту облеклся еси, одѣяйся свѣтомъ, яко ризою (на литур. антиф. 1).
Слава Тебѣ, Боже нашъ, слава Тебѣ!
Соглаголюще, предстояху раболѣпно Тебѣ, Владыцѣ Христу, къ нимже парою огня и мрака, и тонкимъ хладомъ бесѣдовалъ еси: возвѣщаху славное Креста ради Твоего, на Ѳаворъ пришедше, иже во огни Тя и купинѣ древле предвидѣвый Моисей, и взятый на колесницѣ огненней Илія, Христе (Кан. празд. п. 4). Вѣтíйствующій языкъ Твоего величества не можетъ вѣщати: яко бо, Держай животъ и смертію Владый, представилъ еси на Ѳаворстѣй горѣ Моисея и Илію, свидѣтельствующія Твое Божество (п. 5).
– Прейде убо сѣнь законная, изнемогшая, пріиде же явѣ Христосъ – истина, – Моисей возопи, на Ѳаворѣ видѣвъ Твое Божество (п. 6).
– Се Спасъ, — вопіяху Моисей и Илія, ученикомъ на горѣ святѣй Ѳаворстѣй оглашаемымъ, — Христосъ, Егоже древле провозвѣстихомъ Сущаго Бога (п. 5).
Тебѣ же, Спасе, преобразующуся, Ѳаворская гора свѣтомъ покрывашеся,... Ангели служаху страхомъ и трепетомъ, небеса убояшася (на Госп. воззв. стих. на слава и нынѣ),... освѣтиша молнія Твоя вселенную, подвижеся и трепетна бысть земля (на литур. антиф. 1), – видяще на земли славы Господа (на Госп. воззв. стих., на слава и нынѣ). Тя, присносущное сіяніе, во Отечестѣй славѣ ученицы яко видѣвше возсіявша, Христе, Тебѣ вопіяху: во свѣтѣ Твоемъ пути наша направи (Кан. п. 5):
– Ты безлѣтенъ Свѣтъ еси, Христе, и сіяніе Отчее, аще и волею плоть явился еси, Неизмѣнне (Стих. на хвал.): во свѣтѣ Твоемъ пути наши направи (Кан. п. 5).
Тѣмже Петръ, удивлялся:
– Добро есть здѣ быти, – глаголаше, не вѣдый, еже глаголаеше, Благодѣтелю Многомилостиве (Стих. на хвал.): – добро здѣ есть сотворити три сѣни: едину Моисею, и едину Иліи, и едину Тебѣ, Владыцѣ Христу!
Иже тогда свѣтъ Твой симъ возсіявый, просвѣти души наши (Сѣдал. празд.).
И облакъ свѣтелъ, протязающся, яко сѣнь, апостолы славою покры (Сѣдал. по 2-й стихосл.)... И се гласъ изъ облака глаголющъ:
– Сей есть Сынъ Мой возлюбленный, о Немъ же благоволихъ, Того послушайте (На хвал. стих. на слава – и нынѣ)!
Услышавше, Владыко, отъ Отца свидѣтельствуема и, яко человѣчески твердѣйша зрака, зрѣти лица Твоего блистанія не терпяще, Твои ученицы на землю ницъ падаху (Кан. п. 8),... и къ земли преклоншеся, Тебѣ, Владыцѣ всѣхъ, поклонишася (Кан. п. 9):
– Сей есть, – вопіяху: – Спасъ нашъ (п. 9)!
...Ученицы Твои славу Твою, Христе Боже, видѣша, да егда Тя узрятъ распинаема, страданіе убо уразумѣютъ вольное, мірови же проповѣдять, яко Ты еси воистину Отчее сіяніе (Конд. празд.)... Показавъ ученикомъ Твоимъ славу Твоего Божества, озари и насъ свѣтомъ Твоего разумѣнія, и настави на стезю заповѣдей Твоихъ (На лит. стих. 2)... Да возсіяетъ и намъ грѣшнымъ свѣтъ Твой приспосущный, молитвами Богородицы.
Свѣтодавче, слава Тебѣ (Троп. празд.)!
Свящ. А. Яблонскій.
«Смоленскія Епархіальныя Вѣдомости». 1893. № 15. Отд. Неофф. С. 773-775.
Об авторе. Свящ. Александр Яблонский (22 июль 1861 г., село Дентялово Бельский уезд Смоленская губ. – 4 февраля 1912 г.), законоучитель Смоленского городского женского училища, совершал богослужения на латышском языке в Нижнее-Благовещенской церкви Смоленска для православных латышей. «Смолен. Епарх. Вѣд.». 1912. № 5. Отд. Неофф. С. 276-278.
