О постѣ въ день усѣкновенія главы Іоанна Предтечи.
Составлено въ 1803 г. мѣсяца августа въ 28 день, кажется, въ Ростовѣ, нѣкіимъ боголюбцемъ, по-видимому изъ лицъ духовныхъ, утаившимъ себя подъ иниціалами В. З. Скорописъ XIX в., въ продолговатую 4-ку, на 6 л. Данное поученіе можно прочитать въ качествѣ уставнаго чтенія на день усѣкновенія честныя главы Іоанна Предтечи.
На вопросъ о постѣ въ день усѣкновенія честныя главы Іоанна Предтечи сицевое возотвѣтствованіе дерзнувъ написати азъ, человѣкъ грѣшный, паче же и въ полцѣ искусныхъ людей не причтенный, прошу: да не зазрятъ читающій сіе грубое и не всеизобрѣтенное мое предложеніе, понеже человѣкъ есмь грѣшенъ и ученіемъ не у изобиленъ. Всякому же сіе читающему подобаетъ легкимъ сердцемъ разсуждати и не косно разумѣвати: луче истину въ свѣтъ разсѣевати, нежели тьму въ своемъ сердцѣ полагати. Однако и сіе да будетъ чувствительно всѣмъ, яко ложь сколько противъ правды ни укореняется, но всегда правдою кривда побѣждается; сколько злато въ калѣ ни пометаемо бываетъ, но всегда чистоту свою являетъ; сколько гугнивый учитель людемъ ни запрещаетъ, а младой отрокъ все разоряетъ; сколько старцы Сусанну ни желаютъ, и отъ безстуднаго обличенія не точно умилены (возбуждены) бываютъ, но еще неповинной Сусаннѣ и смерти желаютъ, а истинная правда чрезъ самаго младаго отрока ихъ каменіемъ побиваетъ{1}. Увы! Всѣмъ жестокосердымъ сіе осужденіе, а по смерти вѣчное мученіе!
⸭ ⸭ ⸭
Вопросъ: Како на усѣкновеніе честныя главы Іоанна Предтечи постятся, а иніи не постятся, а друзіи отнюдь и не повелѣваютъ поститися?
Отвѣтъ: Послушайте, трудолюбнѣйшіе читатели; я на сей вопросъ велегласно возотвѣтствую. Сице рцемъ: Церковь наша не постящихся не осуждаетъ, а постящихся болѣе похваляетъ. Сіе и святое Писаніе вкратцѣ вамъ показуетъ. О любимцы и собесѣдницы мои! Ради вашего къ пощенію запрещенія да не уподобимся женамъ симъ безстуднымъ, да не постраждемъ и мы за непощеніе и невоздержаніе наше, паче же за ученіе ваше, якоже и жены оныя.
Страшуся сіе изрещи, якобы ради почести сего великаго пророка и предтечи не подобаетъ поститися; страшуся, да не сообщникъ буду симъ пресквернымъ и блуднымъ женамъ, ихже во Испаніи заточенныхъ сущихъ живыхъ тамо пожре земля{2}. О, зѣло страшнаго суда сего! Слыша сіе, како уста разверзаются глаголати и сицевая хульная вѣщати, еже бы не подобало поститися.
Нынѣ умилися, о человѣче, о пророцѣ семъ, яко нѣсть болій въ рожденныхъ женами, а отъ скверныя жены усѣкается{3}. Которая душа, сицевое кровопроліяніе слыша, не умилится? Кто, смотря сего пречуднаго Предтечу обезглавленнаго, не устрашится? Кто разумѣя, яко на беззаконнѣмъ пиру усѣчеся, душею не смятется и пощеніемъ не укрѣпится? Вотъ, предобрый вопросителю, чего ради желающіе душевнаго присвоенія великому Предтечѣ (освоенія съ нимъ, уподобленія ему) постятся. Того ради сіе, яко отъ піянства и глумленія, и скотскаго яденія, и многоразличныхъ брашенъ поставленія, и пресквернаго блудодѣянія, и всепагубнаго прелюбодѣянія усѣчеся сей Предтеча{4}. Како сіе слыша, мы христіане можемъ съ симъ беззаконнымъ Иродомъ услаждатися? Да не будетъ тако; но паче подобаетъ, елико сила можетъ, постомъ и молитвою укрѣплятися и умиленіемъ услаждатися, – ради сего постнаго и кровопролитнаго праздника, всѣмъ благимъ, паче же постомъ, предочищатися.
Престаните, престаните и умолкните недобрая глаголати; неподобная почувствуйте и уразумѣйте, яко сей великій Предтеча усѣченъ бысть ради скверныя жены за угодіе плясанія. Увы! Вси звѣріе диви убояшася, бѣси устрашишася: усѣкается ради піянства, умерщвляется ради разженія блуднаго и ради всего безмѣрнаго наслажденія{5}. Мы же, сего любящій крестителя Господня, да не насладимся, братіе, со Иродомъ прелукавымъ, но паче тѣлеса своя чисти представимъ; предочистимъ ся, братіе, на всечестный сей праздникъ пощеніемъ, да празднуемъ духовнымъ веселіемъ.
Вотъ, о трудолюбный вопросителю посмотри опасно во икосѣ. О, чудесе! Даже и сей беззаконный Иродъ съ предлежащими на многоразличной трапезѣ ужасеся, яко сего великаго Предтечи постящаяся усѣчена глава узрѣся; и вси сѣдящіи ужасошася и умильно прослезишася{6}. Мы же убо, православніи христіане, слыша сіе слезное пиршество, како не можемъ поститися? Паче же разсуди и самъ, трудовъ взыскателю: аще сего свѣтильника глава отсѣчеся и тѣмъ самъ варваръ умилися: кольми паче ты, христіанская душе, прослезися и постомъ укрѣпися. А кто тѣлеснымъ естествомъ немощенъ къ пощенію явится, то хоша чистымъ исповѣданіемъ надѣйся спасенія не лишитися.
Еще послушай, превосходный вопросителю: чесо ради постятся пророку и предтечѣ крестителю Господню. Того ради, да симъ праздникомъ православніи просвѣтятся. О томъ глаголютъ святіи отцы, яко качество нѣцыихъ снѣдей предаетъ въ невоздержаніе{7}. Вотъ, вопросителю. Кто еще можетъ противъ святыхъ ратоборствовати? О, человѣче! Воистину Писаніе глаголетъ, яко неудобь противъ рожна пратися. Тако и противъ святыхъ ратоборствовати или вооружатися престаните, братіе; престаните, сестры. Сіе не удобь (не способствуетъ) доброе мудрствовати и сего великаго въ постницѣхъ не чествовати. Како святіи поститися повелѣваютъ, а человѣцы, невѣжди суще, запрещаютъ? Сіе не явѣ ли противъ святыхъ вооружаемся? О, пагуба велія неиспытанія Писанія! О, пропасть неудобь излазима: прочитаемое не внимати, но паче косно и противъ святыхъ разсуждати! Луче бы имъ никогда не прочитати, нежели прочитати и не разумѣвати!
Или вы еще сіе речете, яко точію единъ день повелѣно поститися, а не недѣлю. На сіе и мы единогласно со святыми сице глаголемъ: На не постившихся не точію грѣхъ и вѣчная мука, но и въ семъ вѣцѣ разореніе и всегдащнее разграбленіе и неотреченное сухояденіе. А постъ сей недѣльный на произволеніе{8}, по глаголющему: Кто что посѣетъ, то и пожнетъ. Постящемуся не запрещаемъ и не постящемуся не возбраняемъ; а сихъ, повелѣвающихъ не поститися, не похваляемъ. А въ единъ день не повелѣваютъ святіи не точію мясо и сыръ ясти, но ниже вина и масла пити{9}.
Вы же, о возлюбленная братія, аще не хощете поститися, то паче другимъ не возбраняйте, да не пріобщени будете къ нечестивому Ироду и не поревнуйте прелукавымъ Арцыуріемъ{10}.
О, вопросителю вселюбезный и строителю добрый! Како пречудное ваше узаконоположеніе и сицевое реченіе, якобы сей святый не луче другихъ; того ради и не подобаетъ поститися? Вотъ ваше будетъ и другимъ несовершенное разумѣніе, но паче противъ разсудительныхъ отецъ преніе и противъ сего постящагося Предтечи прегрѣшеніе. Какое намъ будетъ тутъ веселіе? Посмотрите вы, о питомцы церковные: кто еще бысть таковъ изъ святыхъ, якоже сей? Самого Владыку своего во струяхъ Іорданскихъ погрузивый, а отъ беззаконнаго Ирода ради плясанія и ради блуженія своего и чревонасыщенія усѣченъ бысть?! О, чудесе! Сей пророкъ и предтеча отъ беззаконныхъ усѣкается: како не можемъ быть унылыи? Сей умре ради различныхъ животныхъ закланія: како не можетъ быти отъ насъ слезнаго рыданія и трапезамъ воздержанія? О, безуміе христіанина онаго, радующаго и всѣми брашнами наслаждающаго утробу свою: а сей великій во пророцѣхъ и предтеча кровопролитіемъ умираетъ!
Нынѣ, о вопросителю, умилися и, зря святыхъ отецъ сицевые глаголы, устрашися. Сице насъ сіи научаютъ: «Како крестителево честное усѣкновеніе почтемъ? Мясо ли хощемъ ясти или отъ иныхъ различныхъ брашенъ и многоцѣнныхъ? А онъ живяше въ пустыни безъ воды и трапезы не имяше. Аще ли винопитіемъ? А онъ не бѣ пилъ николиже вина, ни иного питія коегоже; ни чаши, ничесоже мірскаго имяше; ни въ храмѣ живяше, но подъ каменемъ вкопався живяше. Се ему столъ и трапеза; одръ и постеля земля сія. Развѣ же нужды дѣля естественныя единою въ день вкушаше акриды и медъ дивій; чаша же ему пригорша бяше, а питіе изъ камене текущая вода»{11}.
Тѣмже, о братія и сестры возлюбленныя, почтемъ день сей сухояденіемъ, да не будемъ подъ святыхъ отецъ запрещеніемъ.
О, братія Христоподражающая и сего великаго во пророцѣхъ Предтечу похваляющая! Сіе слыша прежде реченное его пощеніе, кто не умилится или кто во всѣхъ брашнахъ не усомнится, якобы не чувствуя сего святаго страданіе, ниже бысть кровопроливаніе и жестокое пощеніе, о немъ же и Спасителево реченіе: Іоаннъ ни ядя ни пія глаголете?
Нынѣ оставьте, оставьте сіе ваше непохвальное мнѣніе. Но паче сего врачевнаго дни и постнаго времени не предайте на разореніе и не зазрите, возлюбленніи, сіе мое къ вамъ возотвѣтствованіе. Аще и самъ не имѣю сего пощенія, но паче не произношу другимъ запрещенія, понеже и Владыка всѣхъ насъ волею призываетъ. Но нынѣ аще кто не можетъ седмицу препроводити пощеніемъ, но поне хотя единъ день поститеся. Развѣ души умиленія и страхъ Божій приходитъ{12}.
О, насажденіе церковное! О, сынове благочестія, супруги Христови, воини небесніи! Посмотрите, како единаго точію дни бываетъ души умиленіе и страхъ Божій! Кольми паче кто можетъ всю седмицу препроводити въ моленіи и въ пощеніи и во всякомъ благоговѣніи: можетъ всѣхъ сквернъ себя предочистить и причастника тѣлу и крови Христовымъ сотворить, и Духу Святому обитель обновить. Якоже и воинъ на брани: отъ нечаянія нападенія, потомъ бываетъ и граду разрушеніе; аще время бываетъ смотрѣнія, то и стѣнамъ великое утвержденіе и воинству вооруженіе. Тако подобаетъ и христіанину: на всяку брань всѣмъ мыслемъ и чувствамъ укрѣпленіе, а не тѣлесное разженіе, да не будетъ отъ того плотское оскверненіе{13}. Вотъ сицевое и святыхъ отецъ реченіе: «Кій прибытокъ піянство и объюродѣніе и насыщеніе многоцѣнныхъ различныхъ брашенъ? Токмо мотыга, токмо блудная плясавица вертѣніемъ пляса угоди Ироду піянственному, а главу Іоаннову испроси отсѣщи».
Нынѣ еще посмотрите, о, возлюбленная моя братія: чесо ради трудолюбнѣйшая братія постятся? Уразумѣйте сицевое святыхъ отецъ реченіе, сицевое укрѣпленіе. Сице глаголютъ: «Отбѣжимъ, братіе, піянственнаго сего злаго наука. Тѣмже воздержимся постомъ, и молитвами ограждаемся. Аще ли кто, невѣрствіемъ одержимъ, узаконеннаго сего многоразсудительнаго повелѣнія не сохранитъ, таковый злѣ вскорѣ напастми постраждетъ»{14}. О, братіе, убоимся сего святаго глагола, да не на насъ сіе реченіе исполнится. Но паче сподоби насъ, Господи, къ постному сему подвигу; направи и научи ходити молитвами святаго Предтечи. О, глубина страха сего! Кто не усомнится, слыша глаголы сія? Кто не убоится не послѣдовати святымъ симъ? Како? Святіи о себѣ молятъ Владыку и великаго Предтечу, да научитъ сему подвигу постному и всему дѣлу доброму, мы же кто есмы? И быть можемъ ли болѣе святыхъ отецъ? Поститися не хощемъ, но паче восхотѣсте своя мудрствовати и неписанная узаконополагати. А святіи не престаютъ васъ утверждати. Сице рекутъ: «празднество и постъ по уставомъ Эллинскимъ и Словенскимъ»{15}. Преданное отъ святыхъ отецъ хранили всяко подобаеть и проч. – Посмотри, книгочитателю. Не точію о праздницѣ святіи пишутъ, но и о постѣ. Имѣяй слухи да слышитъ. Сицевой ради вины добро есть поститися. Воздержаніе – ради житія святаго и праведнаго (Іоанна) кровепролитія. Его постъ сей, да не сообщницы явимся онаго чревоугодія Иродова. Како се слыша, – о, христолюбцы, – великое святыхъ отецъ запрещеніе самовольно оставимъ и любезное Предтечево пощеніе?
Еще надо намъ и о семъ разсудити: како на Рождество сего Предтечи повелѣно ясти все, а на усѣкновеніе никако{16}. Чесо ради тако? Разсудите, трудолюбцы. Оба праздника единаго святаго и въ единомъ чину; единъ другаго не болѣе Церковь празднуетъ. Чувственно намъ тако разумѣти подобаетъ и чесо ради постъ сей бываетъ.
Онъ сицевую вину намъ являетъ. Тамъ рожденіе, здѣ же усѣкновеніе. Тамъ радость и веселіе, здѣ же рыданіе и пощеніе. Тамо рождается всему міру проповѣдникъ, здѣ же отъ беззаконнаго Ирода бываетъ яко плѣнникъ. Тамо отъ предтечи Спасъ крещается, отъ раба Владыка погружается; здѣ же отъ Ирода піянственнаго въ темницу посаждается и отъ безстудныя жены мечемъ усѣкается. Тамо во истину радость: отъ жены предтеча и креститель Господень рождается; нынѣ воистину слезамъ время, пощенію день, яко иже нѣсть болій въ рожденныхъ женами ради плясанія Иродіады и ради различнаго наслажденія піянственнаго Ирода кровію обагряется. Увы! Отъ скверныя жены всечестная глава на блюдѣ полагается. Увы! Сей свѣтильникъ всея вселенныя отъ беззаконныхъ въ мертвыхъ вмѣняется.
Намъ отъ сего, братіе, лучше поститися разумѣваемъ. Того ради и отвѣтствованіе сіе сокращаю. Отцу и Сыну и Святому Духу честь и слава. Аминь.
«Ярославскія Епархіальныя Вѣдомости». 1894. № 35. Ч. Неофф. Ст. 545-552.
{1} Даніила гл. 13-я.
{2} Зри о семъ свидѣтельство въ Святцахъ и въ лѣтописи на усѣкновеніе главы Предтечи.
{3} Прологъ.
{4} Какъ о семъ свидѣтельствуютъ Евангелія, Канонникъ, Святцы, Патерикъ.
{5} Свидѣтельствуютъ о семъ Евангелія, Прологъ, Номоканонъ, Скитскій патерикъ и прочая вся Божественная Писанія.
{6} Свидѣтельство зри въ канонѣ.
{7} Зри Скитскій уставъ постный.
{8} Зри опасно Скитскій уставъ поствый.
{9} Зри Номоканонъ.
{10} Патерикъ.
{11} До здѣ Патерикъ скитскій и въ Уставѣ постномъ зри опаснѣ.
{12} Скитскій уставъ постный.
{13} Патерика скитскаго свидѣтельство.
{14} Свидѣтельствуютъ Евангелія, Прологъ, Канонникъ, Святцы, Номоканонъ, Скитскій патерикъ, Уставъ постный, Уставы великій и малый, Минея Макарьевская и въ Типицѣ.
{15} Зри Святцы съ лѣтописью.
{16} Номоканонъ.
⸭ ⸭ ⸭
Попразднеству усѣкновенія главы прор. Іоанна Крестителя:
Тропарь, гласъ 4-й:
Я́ко всѣхъ вои́стинну проро́ковъ превы́шшій,/ самови́децъ и Предте́ча прише́ствія Христо́ва, проро́че, яви́лся еси́./ Тѣ́мже и отъ И́рода во главу́ усѣ́ченъ бывъ,/ прите́клъ еси́ во адъ, проповѣ́дати избавле́ніе.// Сего́ ради тя́, Іоа́нне Крести́телю, любо́вію велича́емъ.
Кондакъ, гласъ 3-й:
Чистоты́ Предте́че, небе́снымъ житіе́мъ твои́мъ/ боже́ственныя благода́ти, я́ко зерца́ло, облистава́я,/ беззако́ннующаго царя́ обличи́лъ еси́,/ ме́чную смерть прія́лъ еси́, ра́дуяся./ Сего́ ра́ди вопіе́мъ ти:// Ра́дуйся, Проро́че и Крести́телю Христо́въ.
