Последование канона преподобного Андрея Критского в четверток первой недели Великого Поста.
При чтеніи Великаго канона, въ уставѣ показано: «Творимъ же на кійждо тропарь метанія три, глаголюще настоящій припѣвъ: «Помилуй мя, Боже, помилуй мя». Что разумѣется здѣсь подъ метаніями? Слово μετάνοια, иногда переводимое въ нашемъ Типикѣ словомъ – поклоны, а иногда оставляемое безъ перевода, въ греческомъ Ώρολόγιον-ѣ объясняется такъ: «когда слово μετάνοια стоитъ одно, то оно означаетъ только наклоненіе головы, безъ приклоненія колѣнъ, и называется метаніями малыми. Когда же къ слову μετάνοια прибавляется μεγάλαι, тогда оно означаетъ поклоны, которые мы дѣлаемъ, приклоняя колѣна и припадая лицемъ до самой земли». Поклонъ великій (μεγάλαι μετάνοια) бываетъ въ землю, поклонъ малый – въ поясъ. Ред.
НА ВЕЛИЦѢМЪ ПОВЕЧЕРІИ,
Пое́мъ настоя́щій Вели́кій кано́нъ преподо́бнаго отца́ на́шего Андре́я Кри́тскаго и Іерусали́мскаго.
Твори́мъ же на кíйждо тропарь́ покло́ны три́, глаго́люще и сти́хъ: Поми́луй мя́, Бо́же, поми́луй мя́. Гла́съ 6. Ирмосы́ по два́жды.
Пѣ́снь 1.
Ирмо́съ: Помо́щникъ и Покрови́тель бы́стъ мнѣ́ во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися. [Два́жды.]
Агнче Бо́жій, взе́мляй грѣхи́ всѣ́хъ, возми́ бре́мя отъ мене́ тя́жкое грѣхо́вное и, я́ко Благоутро́бенъ, да́ждь ми́ сле́зы умиле́нія.
Тебѣ́ припа́даю, Іису́се, согрѣши́хъ Ти́, очи́сти мя́, возми́ бре́мя отъ мене́ тя́жкое грѣхо́вное и, я́ко Благоутро́бенъ, да́ждь ми́ сле́зы умиле́нія.
Не вни́ди со мно́ю въ су́дъ, нося́ моя́ дѣя́нія, словеса́ изыску́я, и исправля́я стремле́нія, но въ щедро́тахъ Твои́хъ презира́я моя́ лю́тая, спаси́ мя́, Всеси́льне.
Покая́нія вре́мя, прихожду́ Ти, Созда́телю моему́: возми́ бре́мя отъ мене́ тя́жкое грѣхо́вное и, я́ко Благоутро́бенъ, да́ждь ми́ сле́зы умиле́нія.
Бога́тство душе́вное ижди́въ грѣхо́мъ, пу́стъ е́смь добродѣ́телей благочести́выхъ, гла́дствуя же зову́: ми́лости Пода́телю, Го́споди, спаси́ мя.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Прикло́ньшися Христо́вымъ Боже́ственнымъ зако́номъ, къ сему́ приступи́ла еси́, сла́достей неудержи́мая стремле́нія оста́вивши, и вся́кую добродѣ́тель всеблагоговѣ́йно, я́ко еди́ну, испра́вила еси́.
Сла́ва, тро́иченъ: Пресу́щная Тро́ице, во Еди́ницѣ покланя́емая, возьми́ бре́мя отъ мене́ тя́жкое грѣхо́вное и, я́ко благоутро́бна, да́ждь ми́ сле́зы умиле́нія.
И ны́нѣ, богоро́диченъ: Богоро́дице, наде́жде и предста́телство Тебе́ пою́щихъ, возьми́ бре́мя отъ мене́ тя́жкое грѣхо́вное и, я́ко Влады́чица Чи́стая, ка́ющася пріими́ мя.
Пѣ́снь 2.
Ирмо́съ: Вонми́, не́бо, и возглаго́лю, и воспою́ Христа́, отъ Дѣ́вы пло́тію прише́дшаго. [Два́жды.]
Му́жа уби́хъ, — глаго́летъ, — въ я́зву мнѣ́ и ю́ношу въ стру́пъ, — Ламе́хъ рыда́я, вопія́ше. Ты́ же не трепе́щеши, о душе́ моя́, окаля́вши пло́ть и у́мъ оскверни́вши.
Сто́лпъ умудри́ла еси́ созда́ти, о душе́, и утвержде́ніе водрузи́ти твои́ми похотьми́, а́ще не бы́ Зижди́тель удержа́лъ совѣ́ты твоя́ и низве́рглъ на зе́млю ухищре́нія твоя́.
О, ка́ко поревнова́хъ Ламе́ху, пе́рвому убíйцѣ: ду́шу я́ко му́жа, у́мъ я́ко ю́ношу, я́ко бра́та же моего́ тѣ́ло уби́въ, я́ко Ка́инъ убíйца, любосла́стными стремле́ньми.
Одожди́ Госпо́дь отъ Го́спода о́гнь иногда́ на беззако́ніе гнѣ́вающее, соже́гъ содо́мляны. Ты́ же о́гнь вжегла́ еси́ гее́нскій, въ не́мже и́маши, о душе́, сожещи́ся.
Уязви́хся, ура́нихся: се́ стрѣ́лы вра́жія, уязви́вшія мою́ ду́шу и тѣ́ло, се́ стру́пы, гное́нія, омраче́нія вопію́тъ ра́ны самово́льныхъ мои́хъ страсте́й.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Просте́рла еси́ ру́цѣ твои́ къ Ще́дрому Бо́гу, Марíе, въ бе́зднѣ зо́лъ погружа́емая, и я́коже Петру́ человѣколю́бно, ру́ку Боже́ственную простре́, твое́ обраще́ніе вся́чески ища́й.
Сла́ва, тро́иченъ: Безнача́льная, несозда́нная Тро́ице, нераздѣ́льная Еди́нице, ка́ющася мя́ пріими́, согрѣши́вша спаси́, Твое́ е́смь созда́ніе — не пре́зри, но пощади́ и изба́ви о́гненнаго мя́ осужде́нія.
И ны́нѣ, богоро́диченъ: Пречи́стая Влады́чице, Богороди́тельнице, наде́ждо къ Тебѣ́ притека́ющихъ и приста́нище су́щихъ въ бу́ри, ми́лостиваго и Созда́теля и Сы́на Твоего́ уми́лостиви и мнѣ́ моли́твами Твои́ми.
Пѣ́снь 3.
Ирмо́съ: Утверди́, Го́споди, на ка́мени за́повѣдей Твои́хъ подви́гшееся се́рдце мое́, я́ко еди́нъ Свя́тъ еси́ и Госпо́дь. [Два́жды.]
Ага́рѣ дре́вле, душе́, еги́птянынѣ, уподо́билася еси́, порабо́тившися произволе́ніемъ, и ро́ждши но́ваго Исмаи́ла — презо́рство.
Іа́ковлю лѣ́ствицу разумѣ́ла еси́, душе́ моя́, явля́емую отъ земли́ къ небесе́мъ. Почто́ не имѣ́ла еси́ восхо́да тве́рда — благоче́стія?
Свяще́нника Бо́жія и царя́ уедине́на — Христо́во подо́біе въ мíрѣ житія́ въ человѣ́цѣхъ, подража́й.
Обрати́ся, постени́, душе́ окая́нная, пре́жде да́же не пріи́метъ коне́цъ житія́ торжество́, пре́жде да́же две́рь не заключи́тъ черто́га Госпо́дь.
Не бу́ди сто́лпъ сла́ный, душе́, возврати́вшися вспя́ть, о́бразъ да устраши́тъ тя́ Содо́мскій: горѣ́ въ Сиго́ръ спаса́йся.
Моле́нія, Влады́ко, Тебе́ пою́щихъ не отве́ржи, но уще́дри, Человѣколю́бче, и пода́ждь вѣ́рою прося́щимъ оставле́ніе.
Сла́ва, тро́иченъ: Тро́ице про́стая, несозда́нная, безнача́льное Естество́, въ Тро́ицѣ пѣва́емая Ѵпоста́сей, спаси́ ны, вѣ́рою покланя́ющіяся держа́вѣ Твое́й.
И ны́нѣ, богоро́диченъ: Отъ Отца́ безлѣ́тна Сы́на въ лѣ́то, Богороди́телнице, неискусому́жно родила́ еси́, — стра́нное чу́до! — пребы́вши Дѣ́ва доя́щи.
Пѣ́снь 4.
Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди. [Два́жды.]
Вре́мя живота́ моего́ ма́ло и испо́лнено болѣ́зней и лука́вства, но въ покая́ніи мя́ пріими́ и въ ра́зумъ призови́, да не бу́ду стяжа́ніе, ни бра́шно чужде́му, Спа́се: Са́мъ мя́ уще́дри.
Ца́рскимъ досто́инствомъ, вѣнце́мъ и багряни́цею одѣ́янъ, многоимѣ́нный человѣ́къ и пра́ведный, бога́тствомъ кипя́ и ста́ды, внеза́пу бога́тства, сла́вы, и ца́рства, обнища́въ, лиши́ся.
Аще пра́веденъ бя́ше о́нъ и непоро́ченъ па́че всѣ́хъ, и не убѣже́ ловле́нія льсти́ваго и сѣ́ти. Ты́ же, грѣхолюби́ва су́щи, окая́нная душе́, что́ сотвори́ши, а́ще чесому́ отъ недовѣ́домыхъ случи́тся наити́ тебѣ́?
Высокоглаго́ливъ ны́нѣ е́смь, жесто́къ же и се́рдцемъ, вотще́ и всу́е. Да не съ фарисе́емъ осу́диши мя́, па́че же мытаре́во смире́ніе пода́ждь ми́, еди́не Ще́дре, Правосу́де, и сему́ мя сочисли́.
Согрѣши́хъ, досади́въ сосу́ду пло́ти моея́, вѣ́мъ, Ще́дре, но въ покая́ніи мя́ пріими́ и въ ра́зумъ призови́, да не бу́ду стяжа́ніе, ни бра́шно чужде́му. Спа́се, Са́мъ мя́ уще́дри.
Самоистука́нъ бы́хъ страстьми́, ду́шу мою́ вредя́, Ще́дре, но въ покая́ніи мя́ пріими́ и въ ра́зумъ призови́, да не бу́ду стяжа́ніе, ни бра́шно чужде́му. Спа́се, Са́мъ мя́ уще́дри.
Не послу́шахъ гла́са Твоего́, преслу́шахъ писа́ніе Твое́, Законополо́жника, но въ покая́ніи мя́ пріими́ и въ ра́зумъ призови́, да не бу́ду стяжа́ніе, ни бра́шно чужде́му. Спа́се, Са́мъ мя́ уще́дри.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Вели́кихъ безмѣ́стій во глубину́ низве́дшися, неодержи́ма была́ еси́, но востекла́ еси́ по́мысломъ лу́чшимъ, къ кра́йней дѣя́ньми я́вѣ добродѣ́тели пресла́вно, а́нгельское естество́, Марíе, удиви́вши.
Сла́ва, тро́иченъ: Нераздѣ́льное Существо́мъ, несли́тное Ли́цы, богосло́влю Тя́, Тро́ическое Еди́но Божество́, я́ко единоца́рственное и сопресто́льное. Вопію́ Ти пѣ́снь вели́кую, въ вы́шнихъ трегу́бо пѣсносло́вимую.
И ны́нѣ, богоро́диченъ: И ражда́еши, и дѣ́вствуеши, и пребыва́еши обою́ду естество́мъ Дѣ́ва: Рожде́йся обновля́етъ зако́ны естества́, утро́ба же ражда́етъ неражда́ющая. Бо́гъ идѣ́же хо́щетъ, побѣжда́ется естества́ чи́нъ, твори́тъ бо ели́ка хо́щетъ.
Пѣ́снь 5.
Ирмо́съ: Отъ но́щи у́тренююща, Человѣколю́бче, просвѣти́, молю́ся, и наста́ви и мене́ на повелѣ́нія Твоя́, и научи́ мя, Спа́се, твори́ти во́лю Твою́. [Два́жды.]
Ни́зу снича́щую подража́й, о душе́, пріиди́, припади́ къ нога́ма Іису́совыма, да тя́ испра́витъ, и да хо́диши пра́во стези́ Госпо́дни.
Аще и кла́дязь еси́ глубо́кій, Влады́ко, источи́ ми во́ду изъ пречи́стыхъ Твои́хъ жи́лъ, да, я́ко самаряны́ня, не ктому́ пія́й, жа́жду: жи́зни бо струи́ источа́еши.
Силоа́мъ да бу́дутъ ми́ сле́зы моя́, Влады́ко Го́споди, да умы́ю и а́зъ зѣ́ницы се́рдца и ви́жду Тя́ у́мно, Свѣ́та Превѣ́чна.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Несравне́ннымъ жела́ніемъ, всебога́тая, Дре́ву возжелѣ́вши поклони́тися Живо́тному, сподо́билася еси́ жела́нія; сподо́би у́бо и мене́ улучи́ти вы́шнія сла́вы.
Сла́ва, тро́иченъ: Тя́, Тро́ице, сла́вимъ Еди́наго Бо́га: свя́тъ, свя́тъ, свя́тъ еси́, Отче, Сы́не и Ду́ше, — про́стое Существо́, Еди́нице при́сно покланя́емая.
И ны́нѣ, богоро́диченъ: Изъ Тебе́ облече́ся въ мое́ смѣше́ніе, нетлѣ́нная, безму́жная Ма́ти Дѣ́во, Бо́гъ созда́вый вѣ́ки, и соедини́ Себѣ́ человѣ́ческое естество́.
Пѣ́снь 6.
Ирмо́съ: Возопи́хъ всѣ́мъ се́рдцемъ мои́мъ къ Ще́дрому Бо́гу, и услы́ша мя́ отъ а́да преиспо́дняго, и возведе́ отъ тли́ живо́тъ мо́й. [Два́жды.]
Азъ е́смь, Спа́се, ю́же погуби́лъ еси́ дре́вле ца́рскую дра́хму, но, вже́гъ свѣти́льникъ — Предте́чу Твоего́, Сло́ве, взыщи́ и обря́щи Тво́й о́бразъ.
Воста́ни и побори́, я́ко Іису́съ Амали́ка, плотскíя стра́сти, и гаваони́ты — ле́стныя по́мыслы при́сно побѣжда́ющи.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Да страсте́й пла́мень угаси́ши, сле́зъ ка́пли источи́ла еси́ при́сно, Марíе, душе́ю распала́ема, и́хже благода́ть пода́ждь и мнѣ́, твоему́ рабу́.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Безстра́стіе небе́сное стяжа́ла еси́ кра́йнимъ на земли́ житіе́мъ, ма́ти, тѣ́мже тебе́ пою́щимъ страсте́й изба́витися моли́твами твои́ми моли́ся.
Сла́ва, тро́иченъ: Тро́ица е́смь проста́, нераздѣ́льна, раздѣ́льна Ли́чнѣ, и Еди́ница е́смь Естество́мъ соедине́на, — Оте́цъ глаго́летъ, и Сы́нъ, и Боже́ственный Ду́хъ.
И ны́нѣ, богоро́диченъ: Утро́ба Твоя́ Бо́га на́мъ роди́, воображе́на по на́мъ. Его́же, я́ко Созда́теля всѣ́хъ, моли́, Богоро́дице, да моли́твами Твои́ми оправди́мся.
[Господи, помилуй. [Трижды.] Слава, и нынѣ.]
Конда́къ, гла́съ 6:
Душе́ моя́, душе́ моя́, воста́ни, что́ спи́ши? Коне́цъ приближа́ется, и и́маши смути́тися. Воспряни́ у́бо, да пощади́тъ тя́ Христо́съ Бо́гъ, вездѣ́ сы́й и вся́ исполня́яй.
Пѣ́снь 7.
Ирмо́съ: Согрѣши́хомъ, беззако́нновахомъ, непра́вдовахомъ предъ Тобо́ю, ниже́ соблюдо́хомъ, ниже́ сотвори́хомъ, я́коже заповѣ́далъ еси́ на́мъ, но не преда́ждь на́съ до конца́, отце́въ Бо́же. [Два́жды.]
Исчезо́ша днíе мои́, я́ко со́ніе востаю́щаго, тѣ́мже я́ко Езекíя слезю́ на ло́жи мое́мъ, приложи́тися мнѣ́ лѣ́томъ живота́. Но кíй Иса́ія предста́нетъ тебѣ́, душе́, а́ще не всѣ́хъ Бо́гъ?
Припа́даю Ти́ и приношу́ Тебѣ́, я́коже сле́зы, глаго́лы моя́: согрѣши́хъ, я́ко не согрѣши́ блудни́ца, и беззако́нновахъ, я́ко и́ный никто́же на земли́. Но уще́дри, Влады́ко, творе́ніе Твое́, и воззови́ мя!
Погребо́хъ о́бразъ Тво́й и растли́хъ за́повѣдь Твою́, вся́ помрачи́ся добро́та, и страстьми́ угаси́ся, Спа́се, свѣща́. Но уще́дривъ, возда́ждь ми́, я́коже пое́тъ Дави́дъ, ра́дованіе.
Обрати́ся, пока́йся, откры́й сокрове́нная, глаго́ли Бо́гу вся́ вѣ́дущему: Ты́ вѣ́си моя́ та́йная, еди́не Спа́се, но Са́мъ мя́ поми́луй, я́коже пое́тъ Дави́дъ, по ми́лости Твое́й!
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Возопи́вши ко Пречи́стѣй Богома́тери, пе́рвѣе отри́нула еси́ неи́стовство страсте́й, ну́ждно стужа́ющихъ, и посрами́ла еси́ врага́ запе́ншаго. Но да́ждь ны́нѣ по́мощь отъ ско́рби и мнѣ́, рабу́ твоему́.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Его́же возлюби́ла еси́, Его́же возжелѣ́ла еси́, Его́же ра́ди пло́ть изнури́ла еси́, преподо́бная, моли́ ны́нѣ Христа́ о рабѣ́хъ, я́ко да ми́лостивъ бы́въ, всѣ́мъ на́мъ ми́рное состоя́ніе да́руетъ, почита́ющимъ Его́.
Сла́ва, тро́иченъ: Тро́ице Про́стая, Нераздѣ́льная, Единосу́щная и Естество́ Еди́но: Свѣ́тове и Свѣ́тъ, и Свя́та Три́ и Еди́но Свя́то, пое́тся Бо́гъ Тро́ица. Но воспо́й, просла́ви Живо́тъ и Животы́, душе́, — всѣ́хъ Бо́га.
И ны́нѣ, богоро́диченъ: Пое́мъ Тя́, благослови́мъ Тя́, покланя́емся Ти́, Богороди́телнице, я́ко Нераздѣ́льныя Тро́ицы породила́ еси́ Еди́наго — Христа́ Бо́га, и Сама́ отве́рзла еси́ на́мъ, су́щимъ на земли́, небе́сная.
Пѣ́снь 8.
Ирмо́съ: Его́же во́инства небе́сная сла́вятъ, и трепе́щутъ херуви́ми и серафи́ми, вся́ко дыха́ніе и тва́рь, по́йте, благослови́те и превозноси́те во вся́ вѣ́ки. [Два́жды.]
Сле́зную, Спа́се, сткля́ницу я́ко мѵ́ро истощава́я на главу́, зову́ Ти, я́коже блудни́ца, ми́лости и́щущая, мольбу́ приношу́ и оставле́ніе прошу́ прія́ти.
Аще и никто́же, я́коже а́зъ, согрѣши́хъ Тебѣ́, но оба́че пріими́ и мене́, Благоутро́бне Спа́се, стра́хомъ ка́ющася и любо́вію зову́ща: согрѣши́хъ Тебѣ́ еди́ному, поми́луй мя́, Ми́лостиве.
Пощади́, Спа́се, Твое́ созда́ніе и взыщи́, я́ко па́стырь, поги́бшее, предвари́ заблу́ждшаго, восхити́ отъ во́лка, сотвори́ мя овча́ на па́ствѣ Твои́хъ ове́цъ.
Егда́, Судіе́, ся́деши я́ко Блогоутро́бенъ, и пока́жеши стра́шную сла́ву Твою́, Спа́се, — о, каковы́й стра́хъ тогда́! пе́щи горя́щей, всѣ́мъ боя́щимся нестерпи́маго Суди́ща Твоего́.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Свѣ́та незаходи́маго Ма́ти тя́ просвѣти́вши, отъ омраче́нія страсте́й разрѣши́. Тѣ́мже, вше́дши въ духо́вную благода́ть, просвѣти́, Марíе, тя́ вѣ́рно восхваля́ющія.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Чу́до но́во ви́дѣвъ, ужаса́шеся боже́ственный, въ тебѣ́ воистинну, ма́ти, Зоси́ма: а́нгела бо зря́ше во пло́ти, и у́жасомъ ве́сь исполня́шеся, Христа́ поя́ во вѣ́ки.
Сла́ва, тро́иченъ: Безнача́льне Отче, Сы́не собезнача́льне, Утѣ́шителю благíй, Ду́ше пра́вый; Сло́ва Бо́жія Роди́телю, Отца́ безнача́льна Сло́ве, Ду́ше живы́й и зи́ждяй, — Тро́ице Еди́нице, поми́луй мя́.
И ны́нѣ, богоро́диченъ: Яко отъ оброще́нія червлени́цы, Пречи́стая, у́мная багряни́ца Емману́илева, вну́трь во чре́вѣ Твое́мъ пло́ть истка́ся, тѣ́мже Богоро́дицу вои́стинну Тя́ почита́емъ.
Пѣ́снь 9.
Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ. [Два́жды.]
Умилосе́рдися, спаси́ мя, Сы́не Дави́довъ, поми́луй, бѣсну́ющіяся сло́вомъ исцѣли́вый. Гла́съ же благоутро́бный, я́ко разбо́йнику, мнѣ́ рцы́: ами́нь глаго́лю тебѣ́, со Мно́ю бу́деши въ раи́, егда́ пріиду́ во сла́вѣ Мое́й.
Разбо́йникъ оглаго́ловаше Тя́, разбо́йникъ богосло́вяше Тя́, о́ба бо на крестѣ́ сви́сяста. Но, о Благоутро́бне, я́ко вѣ́рному разбо́йнику Твоему́, позна́вшему Тя́ Бо́га, и мнѣ́ отве́рзи две́рь сла́внаго Ца́рствія Твоего́.
Тва́рь садрога́шеся, распина́ема Тя́ ви́дящи: го́ры и ка́менія стра́хомъ распада́хуся, и земля́ сотряса́шеся, и а́дъ обнажа́шеся, и соомрача́шеся свѣ́тъ во дни́, зря́ Тебе́, Іису́се, пригвожде́на ко Кресту́.
Досто́йныхъ покая́нія плодо́въ не истяжи́ отъ мене́, и́бо крѣ́пость моя́ во мнѣ́ оскудѣ́. Се́рдце мнѣ́ да́руй при́сно сокруше́нное, нищету́ же духо́вную, да сія́ Тебѣ́ принесу́, я́ко прія́тную же́ртву, еди́не Спа́се.
Судіе́ мо́й и Вѣ́дче мо́й! Хотя́й па́ки пріити́ со а́нгелы суди́ти мíру всему́, ми́лостивымъ Твои́мъ о́комъ тогда́ ви́дѣвъ мя́, пощади́ и уще́дри мя́, Іису́се, па́че вся́каго естества́ человѣ́ча согрѣши́вша.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Удиви́ла еси́ всѣ́хъ стра́ннымъ житіе́мъ твои́мъ, а́нгеловъ чи́ны и человѣ́ковъ собо́ры, невеще́ственно пожи́вши и естество́ преше́дши. Имже, я́ко невеще́ственныма нога́ма вше́дши, Марíе, Іорда́нъ прешла́ еси́.
[Припѣ́въ: Преподо́бная ма́ти Марíе, моли́ Бо́га о на́съ.]
Марíи: Уми́лостиви Созда́теля о хва́лящихъ тя́, преподо́бная ма́ти, изба́витися озлобле́ній и скорбе́й, о́крестъ напа́дающихъ. Да, изба́вившеся отъ напа́стей, возвели́чимъ непреста́нно просла́вльшаго тя́ Го́спода.
[Припѣ́въ: Преподо́бне о́тче Андре́е, моли́ Бо́га о на́съ.]
Андре́ю: Андре́е честны́й и о́тче треблаже́ннѣйшій, па́стырю Кри́тскій! Не преста́й моля́ся о воспѣва́ющихъ тя́, да изба́вимся вси́ гнѣ́ва, и ско́рби, и тлѣ́нія, и прегрѣше́ній безмѣ́рныхъ, чту́щіи твою́ па́мять вѣ́рно.
Сла́ва, тро́иченъ: Отца́ просла́вимъ, Сы́на превознесе́мъ, Боже́ственному Ду́ху вѣ́рно поклони́мся — Тро́ицѣ нераздѣ́льнѣй, Еди́ницѣ по существу́, я́ко Свѣ́ту и Свѣ́томъ, и Животу́ и Живото́мъ, животворя́щему и просвѣща́ющему концы́.
И ны́нѣ, богоро́диченъ: Гра́дъ Тво́й сохраня́й, Богороди́тельнице Пречи́стая. Въ Тебѣ́ бо се́й вѣ́рно ца́рствуяй, въ Тебѣ́ и утвержда́ется, и Тобо́ю побѣжда́яй, побѣжда́етъ вся́кое искуше́ніе, и плѣня́етъ ра́тники, и прохо́дитъ послуша́ніе.
Та́же пое́мъ о́ба ли́ка ирмо́съ: Безсѣ́меннаго зача́тія [рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ].
И про́чее послѣ́дованіе повече́рія.
