Молитвословія св. великомученику и цѣлителю Пантелеимону.
Икона из соборного храма Свято-Пантелеимонова монастыря на Афоне.
Молитва 1-я, изъ акаѳиста святому.
О великій Христовъ угодниче и преславный цѣлебниче, великомучениче Пантелеимоне, душею на небеси престолу Божію предстояй и тріѵпостасныя Его славы наслаждаяйся, тѣломъ же и ликомъ святымъ на земли въ божественныхъ храмахъ почиваяй и данною ти свыше благодатію различная источаяй чудеса! Призри милостивымъ твоимъ окомъ на предстоящія люди и честнѣй твоей иконѣ умильно молящіяся и просящія отъ тебе цѣлебныя помощи и заступленія: простри ко Господу Богу нашему теплыя молитвы и испроси душамъ нашимъ оставленіе согрѣшеній. Се бо мы, за беззаконія наша не смѣюще возвести очесъ нашихъ въ высотѣ небеснѣй, ниже вознести гласъ молебный къ Его въ Божествѣ неприступнѣй славѣ, сердцемъ сокрушеннымъ и духомъ смиреннымъ тебе ходатая милостива ко Владыцѣ и молитвенника за ны грѣшныя призываемъ, яко ты пріялъ еси благодать отъ Него недуги отгоняти и страсти исцѣляти. Тебе убо просимъ: не презри насъ недостойныхъ, молящихся тебѣ и твоей помощи требующихъ: буди намъ въ печалехъ утѣшитель, въ недузѣхъ лютыхъ страждущимъ врачъ, напаствуемымъ скорый покровитель, очесы недугующимъ прозрѣнія податель, ссущимъ и младенцемъ въ болѣзнехъ готовѣйшій предстатель и исцѣлитель: исходатайствуй всѣмъ вся, яже ко спасенію полезная, яко да, твоими ко Господу Богу молитвами получйвше благодать и милость, прославимъ всѣхъ благихъ источника и дарователя Бога, единаго въ Троицѣ Святѣй славимаго, Отца и Сына и Святаго Духа, нынѣ и присно и во вѣки вѣковъ. Аминь.
Молитва 2-я, изъ акаѳиста святому.
О преславный мучениче и доблій воине небеснаго Царя, Пантелеимоне всеблаженне, милостиваго Бога преизрядный подражателю, иже Христа на землй дерзновенно исповѣдавъ и многообразныя за Него муки претерпѣвъ, неувядаемый пріялъ еси вѣнецъ на небеси, идѣже вѣчнаго наслаждаешися блаженства и со дерзновеніемъ престолу трисолнечнаго Божества предстоиши! Къ твоему Христоподражательному состраданію по Бозѣ прибѣгаемъ вси мы грѣшніи и всеусердно молимъ тя, теплаго заступника и предстателя нашего: не престай призирати на насъ, сущихъ въ нуждехъ и скорбныхъ обстоящихъ, и твоею молитвенною помощію и цѣльбоподательною силою избавляй насъ присно отъ лютыхъ золъ, всегубительства и всякія иныя бѣды и болѣзни. Ты бо пріялъ еси, святе неоскудную благодать исцѣленій отъ Спаса нашего Іисуса Христа за твердую твою къ Нему вѣру, при чистомъ и непорочномъ житіи, запечатлѣнную мученичествомъ и многопобѣдною твоею кончиною, въ нейже по даннѣй ти благодати и наименованъ отъ Христа Пантелеимономъ, милости тезоименитымъ, милующимъ всѣхъ притекающихъ къ тебѣ въ скорбехъ и болѣзнехъ. Сего ради вѣдуще тя милостиваго ко всѣмъ помощника и цѣлителя, съ вѣрою взываемъ къ тебѣ, услыши насъ и богопріятнымъ ходатайствомъ твоимъ подавай намъ вся благопотребная въ житіи семъ и нужная къ вѣчному спасенію. Мученическимъ же дерзновеніемъ твоимъ умоли милостиваго Бога, да помилуетъ насъ, грѣшныхъ и недостойныхъ, по велицѣй милости Своей, да избавитъ отъ труса, потопа, огня, меча и всякаго праведнаго гнѣва и прещенія, благовременнѣ подвизая насъ къ очистительному и умилостивительному во грѣсѣхъ нашихъ покаянію, ради множества щедротъ Своихъ, да подастъ всѣмъ намъ безбѣдное, тихое и богоугодное житіе, православному же императору нашему Николаю Александровичу на вся враги побѣду и одолѣніе{*}, и всѣхъ насъ отъ врагъ видимыхъ и невидимыхъ да сохранитъ благодатію Своею и непобѣдимымъ ополченіемъ Ангелъ Своихъ, имиже огрождаеми и наставляеми да поживемъ въ вѣцѣ семъ въ покаяніи, чистотѣ и въ твореніи богоугодныхъ дѣлъ: да сподобимся твоимъ теплымъ предстательствомъ христіанскую кончину улучити безболѣзненну, мирну, непостыдну, избавитися отъ козней воздушныхъ князей тьмы и отъ вѣчныя муки, и быти наслѣдниками безконечнаго, всеблаженнаго царствія. Ей, угодниче Божій! не престай молитися за ны грѣшныя, да, твоимъ ходатайствомъ временныхъ и вѣчныхъ бѣдъ избавлени, величаемъ тебе, заступника нашего и молитвенника, и вѣчно прославляемъ общаго Владыку и Господа нашего Іисуса Христа, Емуже подобаетъ всякая слава, честь и поклоненіе со безначальнымъ Его Отцемъ и Пресвятымъ Духомъ, нынѣ и присно и во вѣки вѣковъ. Аминь.
{*} Слѣдуеть читать такъ: православному же роду нашему на вся враги побѣду и одолѣніе.
Молитва 3-я, изъ акаѳиста святому.
Святый великомучениче и цѣлителю Пантелеимоне, Бога милостиваго подражателю! Призри благосердіемъ и услыши насъ, грѣшныхъ, предъ святою твоею иконою усерднѣ молящихтися.
Испроси намъ у Господа Бога, Емуже со Ангелы предстоиши на небеси, оставленіе грѣховъ и прегрѣшеній нашихъ. Исцѣли болѣзни душевныя же и тѣлесныя рабовъ Божіихъ, нынѣ поминаемыхъ, здѣ предстоящихъ и всѣхъ христіанъ православныхъ, къ твоему заступленію притекающихъ.
Се бо мы, по грѣхомъ нашимъ лютѣ одержимы есмы многими недуги и не имамы помощи и утѣшенія, къ тебѣ же прибѣгаемъ, яко дадеся ти благодать молитися за ны и цѣлити всякъ недугъ и всяку болѣзнь.
Даруй убо всѣмъ намъ святыми молитвами твоими здравіе и благомощіе души и тѣла, преспѣяніе вѣры и благочестія и вся къ житію временному и ко спасенію потребная. Яко да, сподобившися тобою великихъ и богатыхъ милостей, прославимъ тя и подателя всѣхъ благъ, дивнаго во святыхъ, Бога нашего, Отца и Сына и Святаго Духа. Аминь.
Молитва 4-я, изъ акаѳиста святому.
(Наединѣ отъ лица болящаго чтомая.)
О великій угодниче Христовъ, страстотерпче и врачу многомилостивый, Пантелеимоне!
Умилосердися надо мною, грѣшнымъ рабомъ, услыши стенаніе и вопль мой, умилостиви небеснаго, верховнаго Врача душъ и тѣлесъ нашихъ, Христа Бога нашего, да даруетъ ми исцѣленіе отъ гнетущаго мя недуга.
Пріими недостойное моленіе грѣшнѣйшаго паче всѣхъ человѣкъ. Посѣти мя благодатнымъ посѣщеніемъ. Не возгнушайся грѣховныхъ язвъ моихъ, помажи ихъ елеемъ милости твоей и исцѣли мя: да, здравъ сый душею и тѣломъ, остатокъ дній моихъ, благодатію Божіею, возмогу провести въ покаяніи и угожденіи Богу и сподоблюся воспріяти благій конецъ живота моего.
Ей, угодниче Божій! умоли Христа Бога, да предстательствомъ твоимъ даруетъ ми здравіе тѣлу и спасеніе души моей. Аминь.
Молитва 5-я, изъ акаѳиста святому.
(Благодарственная, по исцѣленіи отъ болѣзни.)
Святый великомучениче, цѣлителю и чудотворче Пантелеимоне, всеизрядный угодниче Божій и молитвенниче присный христіанъ православныхъ! Достойно нареченъ еси Пантелеимономъ, еже есть всемилостивый, – яко, пріявъ отъ Бога благодать молитися за ны и болѣзни цѣлити, ты богатно подаеши всѣмъ, къ тебѣ притекающимъ, различная исцѣленія и вся къ жизни временнѣй и ко спасенію потребная: сего ради и мы, недостойніи, сподобившеся твоея милости, паки предъ святою твоею иконою прибѣгаемъ къ тебѣ, и прославляюще тя, яко искренняго угодника Божія, нашего же вѣрнаго молитвенника и исцѣлителя, усерднѣ благодаримъ тя и подателя всѣхъ благъ Господа Бога нашего о великихъ благодѣяніяхъ, отъ Него тобою намъ бывшихъ.
Пріими убо милостивно малое сіе молитвенное благодареніе наше, зане не иманы ино что по достоянію воздати тебѣ, и прочее время живота нашего не лиши насъ, немощныхъ и грѣшныхъ, твоея помощи и молитвеннаго ходатайства у Господа Бога нашего, Емуже подобаетъ всякая слава, благодареніе и поклоненіе, Отцу и Сыну и Святому Духу, нынѣ и присно и во вѣки вѣковъ. Аминь.
Тропарь, гласъ 3. Страстотерпче святый и цѣлебниче Пантелеимоне,/ моли милостиваго Бога,// да прегрѣшеній оставленіе подастъ душамъ нашимъ.
[Кондакъ, гласъ 5-й: Подражатель сый Милостиваго,/ и исцѣленій благодать отъ Него пріемъ,/ страстотерпче и мучениче Христа Бога,/ молитвами Твоими душевныя наша недуги исцѣли,/ отгоня присно борца соблазны отъ вопіющихъ вѣрно:// спаси ны, Господи.]
Величаніе: Величаемъ тя, страстотерпче святый, великомучениче и цѣлебниче Пантелеимоне, и чтимъ честная страданія твоя, яже за Христа претепѣлъ еси.
Полный сборникъ молитвъ Спасителю, Пресвятой Троицѣ, Божіей Матери, Святымъ Угодникамъ Божіимъ и Безплотнымъ силамъ, читаемыхъ предъ святыми иконами на молебняхъ и всенощныхъ бдѣніяхъ, съ присоединеніемъ тропарей и величаній. Изд. 2-е. Составленъ Протоіереемъ А. Ставровскимъ. Спб. 1914. С. 212-216.
Моленіе ко св. Великомученику и Цѣлителю Пантелеимону.
Составленію преосвященнѣйшимъ Епископомъ Іереміею Отшельникомъ.
Святый Великомученице и Цѣлебниче Пантелеимоне, моли Бога о насъ, и не допусти долѣе оставаться въ насъ тѣмъ болѣзнямъ, коими болимъ душею и тѣломъ! Исцѣли тѣ язвы и струпы, кои причинены намъ страстями нашими... Болимъ мы лѣностію и разслабленіемъ: исцѣли ны. Болимъ влеченіемъ и пристрастіемъ къ земнымъ предметамъ: исцѣли ны. Болимъ, о св. Пантелеимоне! болимъ забывчивостію о дѣлѣ спасенія, о нашихъ грѣхахъ и немощахъ, о нашихъ обязанностяхъ: исцѣли ны. Болимъ злопомнѣніемъ, гнѣвливостію, ненавистничествомъ: исцѣли, о Цѣлебниче свято-Аѳонскій и всемірный. Болимъ завистію, гордостію, надменностію, превозношеніемъ – при всей скудости и непотребствѣ: исцѣли ны. Болимъ многими и разными припадками плотоугодія, чревоизлишествомъ, невоздержностію, многояденіемъ, сластолюбіемъ: исцѣли ны. Болимъ сонливостію, многословіемъ, празднословіемъ, осудливостію: исцѣли ны, о святый Пантелеимоне. Болятъ наши очи грѣховными воззрѣніями; болятъ наши уши слушаніемъ пустословія, злорѣчія, навѣтовъ: исцѣли ны. Болятъ руки нерасположеніемъ къ молитвенному воздѣянію и къ подаянію милостынп: исцѣли ны. Болятъ наши ноги – нежеланіемъ поспѣшно идти въ храмъ Господень и стремленіемъ къ хожденіямъ по стогнамъ и къ посѣщенію домовъ мірскихъ: исцѣли ны. Болитъ, зѣло болитъ языкъ нашъ, уста наши, пустословя, празднословя, злорѣча, – отвращаясь отъ молитвословій и славословій божественныхъ, или произнося ихъ небрежно, разсѣянно, безъ вниманія, безъ понятія: исцѣли ны, о Милостиве. Отъ главы до ногъ болимъ мы: болитъ въ насъ разумъ непонятливостію и неразумностію, безуміемъ; болитъ въ насъ воля, отвращаясь отъ святыхъ занятій и стремясь къ дѣламъ вреднымъ и Богопротивнымъ; болитъ въ насъ память, забывая наши прегрѣшенія и содержа въ себѣ неутратно согрѣшенія и оскорбленія ближнихъ нашихъ. Болитъ въ насъ воображеніе, не умѣя и не желая живо представить намъ нашу смерть, вѣчную муку грѣшныхъ, блага царствія небеснаго, Божій гнѣвъ, крестныя страданія Христовы, Его распятіе... исцѣли ны, о святый Пантелеимоне!
Все во мнѣ болитъ. Немоществуетъ и душа моя вся со всѣми ея силами и способностями. Немоществуетъ и тѣло мое – все со всѣми его членами. Исцѣли мя, о св. Пантелеимоне, Цѣлебниче безмездный и любвеобильный Врачеватель, слуга Пресвятыя Богородицы, и не оставь мое окаянство въ толицѣхъ недугахъ и въ толицѣй немощи, да исцѣлюсь Твоею благодатію, прославлю Пресвятую Троицу Отца и Сына и Св. Духа и Пресвятую Богородицу, Тебе на служеніе болящимъ посылающую, и возблагодарю Твою, о св. Пантелеимоне, цѣльбоносную святыню во вѣки. Аминь.
«Душеполезныя размышленія», издававшіяся выпусками въ 1885 г. Изд. 2-е. М. 1901. С. 145-146. Отд. отт.: М. 1889.
Сост. Ред.
