Епископъ Іеремія (Соловьевъ), въ схимонасѣхъ Іоаннъ – Келейный покаянный канонъ на Страстную седьмицу.
Чтомый съ Лазаревой субботы. Составленъ по св. Евангелію покойнымъ преосвященнымъ Іереміею, бывшимъ епископомъ Нижегородскимъ, въ схимонасѣхъ Іоанномъ, скончавшимся отшельникомъ 6 декабря 1884 г. Рукопись писана полууставомъ на 23 листахъ, въ ¼ долю листа; находилась въ Ставропольской Іоанно-Маріинской женской обители (основаной въ бытность его епископомъ Кавказскимъ, въ молитвенную память о своихъ родителяхъ чтецѣ – Іоаннѣ и матери – Маріи). Канонъ сей былъ напечатанъ впервые лишь въ 1893 г. въ аѳонскомъ журналѣ «Душеполезный Собесѣдникъ». Ред.
Келейный покаянный канонъ на Страстную седьмицу.
Пѣснь 1. Ирмосъ:
Спасителю Богу, въ мори люди не мокрыми ногами наставльшему, и фараона со всевоинствомъ потопльшему, Тому единому поимъ: яко прославися.
Душе моя, душе моя! грядый Господь на вольную страсть, нашего ради спасенія, реклъ возлюбленнымъ Своимъ ученикомъ: се восходимъ во Іерусалимъ, и предается Сынъ Человѣческій: гряди и ты въ слѣдъ Его, неся ко кресту Его всѣ беззаконія твои, и каяся въ нихъ, взывай:
Помилуй мя, Боже, помилуй мя. (Съ поклоны).
Душе моя, душе моя! грядый Господь на вольную за тя смерть, на пути въ Іерусалимъ, въ Виѳаніи, воскреси четверодневнаго смердящаго Лазаря. Припади, о душе, ко Господу и моли, да воскресить Онъ отъ смерти грѣховныя и тя, вопіющую съ Давидомъ:
Помилуй мя, Боже, помилуй мя.
Душе моя, душе моя! глаголетъ Христосъ и тебѣ, якоже Марѳѣ и Маріи, сестрамъ умершаго Лазаря: Азъ есмь воскрешеніе и животъ: вѣруй въ Мя, аще и умретъ, оживетъ. Вѣруй убо во всемогущую силу Христа Спасителя, уповай на безпредѣльную благость Его и съ непоколебимою вѣрою взывай:
Помилуй мя, Боже, помилуй мя.
Душе моя, душе моя! объ умершемъ и во гробѣ лежащемъ Лазарѣ плакаше Марѳа, плакаше другая сестра его Марія, плакаху его друзья, плакаше – Самъ Господь. Ты ли не восплачешь о твоемъ Лазарѣ – объ умѣ, во гробѣ страстей и чувственности погребенномъ? Ты ли до конца пребудешь окамененна, не научившися молитися Христу и взывати:
Помилуй мя, Боже, помилуй мя.
Господи, рекла Марѳа и Марія Господу, аще бы еси былъ здѣ, не бы умерлъ братъ нашъ. Тоежде слово и мы съ тобою, душе моя, рцемъ Господу: не низверглся бы въ сѣнь смертную умъ нашъ, не изнемогла бы наша воля, не уснула бы совѣсть: не бы возобладали сердцемъ страсти, аще бы, Ты Господи, былъ съ нами, аще бы мы не удалили Тебе своими грѣхами и безстрашіемъ, аще бы въ нераскаянности своей не престали взывать:
Помилуй мя, Боже, помилуй мя.
Душе моя, душе моя! По глаголу Христа Бога: Лазаре, гряди вонъ, изыде умерый, обязанъ руками и ногами. О, аще бы дѣйствіемъ и силою всемогущія благодати Христовой, и твой умъ исторглся отъ связующихъ Его страстныхъ помысловъ и сатанинскихъ обвязаній, дабы нелѣностно взывалъ:
Помилуй мя, Боже, помилуй мя.
Душе моя, душе моя! воскресшему Лазарю Господь повелѣ абіе ити: разрѣшите его, рекъ Жизнодатель, и оставите ити. Не буди и ты, по обновленіи твоемъ въ таинствахъ крещенія и покаянія, не буди недвижима и бездѣйственна, но доброшествуй по пути спасенія, не преставая и примѣромъ своимъ другихъ наставляя взывати:
Помилуй мя, Боже, помилуй мя.
Слава: Болѣзнь Лазаря нѣсть къ смерти, вѣщаше Господь ученикомъ Своимъ, но къ славѣ Божіей, и воистину не токмо самъ воскресшій Лазарь и сестры его со Апостолы, но и тьмы вѣрующихъ прославили и славятъ Христа воскресителя, и Его единосущнаго Отца и Духа Святаго. – О, дабы къ славѣ Пресвятыя Троицы послужили твои, о душе моя. немощи, и твои смертніи недузи, объ ихъ же исцѣленіи молиши ты, взывая Отцу и Сыну и Святому Духу:
Помилуй мя, Боже, помилуй мя.
И нынѣ: О Пресвятая Дѣво Богородице! О друже Христовъ Лазаре, о другини Христа и Пресвятыя Матери Его Марѳа и Марія! помолитеся Христу Богу, да отвалитъ отъ духа моего камень нечувствія и да даруетъ ему жизнь и силу ити и принести посильныя плоды покаянія, умильно взывая:
Помилуй мя, Боже, помилуй мя.
Пѣснь 2. Ирмосъ:
Видите, видите, яко Азъ есмь Богъ, воплотивыйся отъ Пресвятыя Дѣвы и распятіемъ Своимъ на крестѣ помиловати и спасти васъ пришедый.
Грядый Христосъ на вольную нашего ради спасенія смерть торжественно благоволилъ внити въ Іерусалимъ. Многія тысящи народа, срѣтая Его, взывали: Осанна! Благословенъ грядый! ты же, о душе моя, помышляя о согрѣшеніяхъ твоихъ и всего міра, вопій съ Давидомъ:
Помилуй мя, Боже, помилуй мя.
Іудеи, сопровождая Господа съ горы Елеонскія во градъ Іерусалимъ – градъ, уже обагренный кровію многихъ пророковъ и имѣющій обагритися кровію Самого Богочеловѣка, постилаху ризы своя по пути. Ты же, о душе моя, воспомянувъ предреченное пророками и Господомъ, сама повергнися въ страхѣ и трепетѣ, взывая:
Помилуй мя, Боже, помилуй мя.
Великое усердіе, великую честь оказаху Господу іудеи, при вшествіи Его въ Іерусалимъ на жребяти осли. Мнозіи изъ нихъ рѣзаху вѣтви отъ древъ, дабы цвѣтами и листвіемъ ихъ украсити мѣста, по нимже шествова Господь ко храму Іерусалимскому, ты же, о душе моя, отсѣцы то жестокосердіе и тѣ страсти, яже возвели Господа на крестъ, и не престани взывати:
Помилуй мя, Боже, помилуй мя.
Въ вѣроломномъ христоубійственномъ градѣ Господь вступилъ въ церковь Божію, и изгналъ изъ нея продающихъ и купующихъ и трапезы торжниковъ ниспровергъ. О, коликое множество неприличныхъ и недостойныхъ помысловъ, чувствованій и желаній гнѣздится въ тебѣ, душе моя; изгони ихъ, испровергни и взывай:
Помилуй мя, Боже, помилуй мя.
Храмъ мой – храмъ молитвы наречется, рекъ Господь, вразумляя священниковъ и старѣйшинъ іудейскихъ, вы же сотвористе его мѣстомъ купли и вертепомъ разбойниковъ. О, коль праведно укоръ сей во всей силѣ многажды падалъ и падаетъ и на насъ съ тобою, страстная душе моя! возскорби о таковомъ страстномъ извращеніи и взывай:
Помилуй мя, Боже, помилуй мя.
По изгнаніи отъ храма купующихъ и продающихъ, безпрепятственно возмогоша приступити къ Господу хроміи, слѣпіи и прочіи болящіи. И они приступиша и абіе удостоишася получити исцѣленіе. Приступи ко Господу и ты, душе моя, душе слѣпотстпующая, хромлющая и разслабленная, приступи, и воззови къ Нему:
Помилуй мя, Боже, помилуй мя.
Узрѣвъ славу вшествія Твоего, Господи, во градъ и чудеса, совершенныя Тобою подобало всѣмъ и каждому повергнутся къ стопамъ Твоимъ и благоговѣйно исповѣдати Тебя Христомъ Божіимъ и обѣтованнымъ Спасителемъ. Но слѣпіи вожди народа ожесточишася и негодоваху на тѣхъ, кои воспѣвали Тебѣ: Осанна! Хранись и блюдись, о душе моя, отъ таковыя злобы и ожесточенія, часто вѣщая:
Помилуй мя, Боже, помилуй мя.
Слава: Чистыя и невинныя уста отроковъ іудейскихъ возглашаху Тебѣ, на пути и въ храмѣ, Христе, осанна! Азъ же грѣшный моими нечистыми устами вечеръ и утро взываю Тебѣ и Отцу Твоему и Святому Духу:
Помилуй мя, Боже, помилуй, мя.
И нынѣ: Въ вечеръ днесь (сегодня), Господь вышедъ изъ града, остави его. Мене же, о Христе Іисусе, за маловѣріе мое и за многіе грѣхи не остави въ вечеръ моего житія, буди со мною при смерти и по смерти, молитвами Пресвятыя Богородицы и Святаго Ангела Хранителя моего, да якоже нынѣ тогда умиленно взываю:
Помилуй мя, Боже, помилуй мя.
Пѣснь 3. Ирмосъ:
Силою креста Твоего, Христе, утверди мое помышленіе, во еже пѣти и славити спасительное Твое распятіе.
О блаженная весь Виѳанія! ибо въ ней жительствоваху святіи друзи Господа: Лазарь, Марѳа и Марія, въ ней многажды витаху и упокоевахуся Богочеловѣкъ, Его Пречистая Матерь и Апостолы. Она удостоися видѣти величайшее изъ чудесъ Христовыхъ воскрешеніе Лазаря. Въ ней благоволилъ Господь проводити послѣднія нощи до нощи Геѳсиманскія. Душе моя, душе моя! Стояй при дверехъ сердца и толкій внидетъ Онъ и къ тебѣ и водворится у тебе, какъ въ Виѳаніи, аще услышимъ гласъ Его, аще покаемся и усердно начнемъ взывати:
Помилуй мя, Боже, помилуй мя.
На утро Господь, возвращаясь въ Іерусалимъ, Владыка, даяй пищу всякой плоти, взалка. Сія тѣлесная алчба Господа, яко человѣка, да оживитъ въ памяти твоей, душе моя, ту духовную Божественную алчбу Христову, коею выну алчетъ Онъ твоего обращенія и сего покаяннаго гласа:
Помилуй мя, Боже, помилуй мя.
Не обрѣтѣ Господь ни единаго плода на стоявшей при пути смоковницѣ и осуди ю на вѣчное безплодіе: да николиже отъ тебе будетъ плода во вѣки, рекъ Господь. Чего ожидати и тебѣ, душе моя, яко не сего страшнаго гласа, аще не пріидеши въ чувство и не принесеши плодовъ покаянія, взывая:
Помилуй мя, Боже, помилуй мя.
Имѣйте вѣру Божію, вѣща Господь Петру, изумленному при видѣ абіе (тотчасъ), по глаголу Христову, изсшей смоковницы, – аминь глаголю вамъ: вся елика сице молящеся просити, вѣруйте, яко пріимете. Не унывай убо, душе моя, усматривая въ себѣ нѣкія останки отъ плода онаго древа познанія добра и зла. Единымъ мановеніемъ Господа они изсшутъ и исторгнутся, если вѣру Божію стяжемъ и не престанемъ взывати:
Помилуй мя, Боже, помилуй мя.
Многое множество словъ изрекоша Господу въ храмѣ книжники и фарисеи: коею властію сіе твориши, то есть, изгоняеши торжниковъ? Достоитъ ли дань даяти кесарю? и проч. Ты же, о душе моя, ничтоже мысли, ничтоже глаголи, развѣ сіе Давидово слово:
Помилуй мя, Боже, помилуй мя.
Человѣкъ нѣкій имѣ два сына, рекъ Господь, изъ коихъ единъ прежде оказа отцу непослушаніе, но потомъ раскаявся иде на повелѣнное ему дѣло; другой обѣщався исполнити волю отца, не исполни. Сему вѣроломному сыну послѣдовала ты, душе моя, ибо безстрашно нарушала ты обѣты, данные при крещеніи и, обратясь къ покаянію, лѣностно молишися и съ нерадѣніемъ взываеши:
Помилуй мя, Боже, помилуй мя.
Душе моя, душе моя! и тебѣ ввѣренъ былъ для храненія и воздѣланія вертоградъ, вертоградъ Богонасажденный и оплотомъ Евангелія и благодати огражденный: но ты, окаянная, уподобилася злымъ дѣлателемъ, кои не только не представили Владыкѣ плодовъ, но и преогорчили Его дерзостно; кайся убо и плача взывай:
Помилуй мя, Боже, помилуй мя.
Слава: Въ царствіе небесное – въ царство свѣта и блаженства – призываетъ насъ грѣшныхъ и Богъ Отецъ и Богъ Сынъ и Богъ Духъ Святый. Ты же, душе моя, подобно онымъ званнымъ въ притчѣ Господней, дерзостно отрѣваешь небесный зовъ Пресвятыя Троицы подъ разными предлоги, не вступаеши на путь, ведущій въ царствіе Божіе, не каешися и не взываеши:
Помилуй мя, Боже, помилуй мя.
И нынѣ: Страшный глаголъ изрекъ Домовладыка, узрѣвъ за трапезою Своею человѣка, необолченна въ одѣяніе прилично, по безстрашію и презорству: возьмите его и вверзите во тьму кромѣшюю. О Пресвятая Дѣво Богородице! да не услышу за мою наготу и безобразіе сего страшнаго суда, даждь, да день и нощь каюся и взываю:
Помилуй мя, Боже, помилуй мя.
Пѣснь 4. Ирмосъ:
Услышахъ слухъ силы креста Твоего, яко рай отверзеся имъ, и возопихъ: слава распятію Твоему, Господи.
Грядый Господь на вольную всеспасительную страсть и смерть, рекъ, смиряя іудеевъ: воздадите Божія Богови, кесарева кесареви. Ты же, душе моя, не послужила достодолжно ни Богу ни ближнему. Кайся убо и взывай:
Помилуй мя, Боже, помилуй мя.
Грядый Господь на вольную нашего ради спасенія смерть, законнику вопросившему: кая есть заповѣдь больши въ законѣ? Отвѣтствовалъ: возлюбиши Господа Бога твоего всѣмъ сердцемъ твоимъ и всею мыслію твоею, сія есть первая и большая заповѣдь. Ты же, о душе моя, не токмо всею полнотою мысли и сердца, но ниже частію ихъ не возлюби и не любиши Господа Бога Создателя, промыслителя и искупителя твоего; воздохни о семъ нечувствіи и окамененіи твоемъ и воззови:
Помилуй мя, Боже, помилуй мя.
Вторая, первой подобная, заповѣдь есть, по глаголу Господа: возлюбиши ближняго твоего, яко самъ себе, ты же, душе моя, вмѣсто чистой любви къ ближнему самолюбствуеши, корыстолюбствуеши, похотствуеши, завиствуеши. О, удвой убо и утрой покаянный вопль твой:
Помилуй мя, Боже, помилуй мя.
Грядый Господь на вольную страсть и смерть, повелѣ слушати и тѣхъ наставниковъ, кои глаголютъ, но не творятъ: ты же, душе моя, не послушала и не слушаешь богодохновенныхъ и духоносныхъ учителей – пророковъ, апостоловъ, отцевъ и пастырей Церкви богомудрыхъ. Кайся о семъ и взывай:
Помилуй мя, Боже, помилуй мя.
Грядый Господь на вольную страсть и смерть, грозно возгласи: горе тѣмъ книжникамъ лицемѣрамъ, кои очищаютъ внѣшнее сткляницъ и блюда, внутрь же суть полны хищенія и неправды. Горе, горе и тебѣ, душе моя, нерадящей о очищеніи своихъ мыслей, языкомъ токмо, а не сердцемъ купно взывающей:
Помилуй мя, Боже, помилуй мя.
Грядый Христосъ на вольную страсть и смерть возвѣсти и изобрази ученикомъ Своимъ второе пришествіе Свое, всемірный судъ, кончину міра. Помышляя о сихъ, ужаснися душе моя, бодрствуй, кайся и взывай:
Помилуй мя, Боже, помилуй мя.
Юродивымъ, а не мудрымъ дѣвамъ уподобилася ты, душе моя, и не имѣя елея благихъ дѣлъ, лишена будеши царствія небеснаго, если не пріидеши въ чувство покаянія и не воззовеши воплемъ крѣпкимъ:
Помилуй мя, Боже, помилуй мя.
Слава: Не поревновала ты, душе моя, рабу вѣрному и доброму, добрѣ умножившему ввѣренный ему отъ Господина талантъ; но уподобилась рабу лѣнивому, скрывшему данный ему талантъ въ землю, и яко неключимая ввержена будеши во тьму кромѣшнюю, аще не поспѣшиши останокъ житія твоего провести въ трудахъ и покаяніи, выну взывая:
Помилуй мя, Боже, помилуй мя.
И нынѣ: О Пресвятая, и Преблагословенная Приснодѣво Маріе! да не услышу съ дѣвами юродивыми страшнаго слова: не вѣмъ васъ, – даждь мнѣ и усты и сердцемъ непрестанно взывати:
Помилуй мя, Боже, помилуй мя.
Пѣснь 5. Ирмосъ:
Просвѣщеніе во тьмѣ лежащихъ, спасеніе отчаянныхъ, Христе Спасе мой, къ Тебѣ утреннюю, Царю міра, просвѣти мя сіяніемъ Твоимъ, иного бо развѣ Тебе Бога не знаю.
Грядый Христосъ на вольную страсть и смерть предъизобрази, како пріидетъ Онъ въ концѣ вѣковъ въ славѣ Своей и вси святіи Ангели съ Нимъ, како сядетъ на престолѣ славы Своея; како соберутся предъ Нимъ всѣ народы, како разлучитъ всѣхъ человѣковъ, и праведныхъ поставитъ одесную, а грѣшниковъ ошуюю. Услыша, душе моя, сіи послѣднія вѣщанія Господни, ужаснись суда сего и въ покаяніи взывай:
Господи! прежде даже до конца не погибну, спаси мя.
Взалкахся, речетъ Господь сущимъ одесную, и дасте Ми ясти; ты же, о душе моя, напитала ли Христа въ лицѣ меньшихъ братій?... Кайся убо и вопій:
Господи! прежде даже до конца не погибну, спаси мя.
Возжадахся, речетъ Господь праведнымъ, призывая ихъ въ царствіе Свое, и напоисте Мя, страненъ бѣхъ, и введосте Мя; ты же, грѣшная душе моя, ни чаши воды студеныя, ни пріюта и упокоенія не предложила съ Авраамовымъ усердіемъ Господу, жаждущему и странну въ лицѣ нищихъ и убогихъ. Сокрушайся убо, болѣзнуй и взывай:
Господи! прежде даже до конца не погибну, спаси мя.
Нагъ бѣхъ, и одѣясте Мя, боленъ, и посѣтисте Мя, въ темницѣ бѣхъ, и пріидосте ко Мнѣ, скажетъ Господь наслѣдникамъ вѣчнаго блаженства, ты же, о душе моя, ни единаго изъ сихъ благихъ дѣлъ сотворила ecи меньшей братіи Христовой. Чего за твое жестокосердіе ожидати тебѣ, яко не геенны, аще не припадеши къ Человѣколюбцу со слезами и моленіемъ:
Господи! прежде даже до конца не погибну, спаси мя.
Грядый Господь на вольную страсть и смерть, благоволи внити въ домъ Симона, отъ проказы исцѣленнаго, и вечеряти у него со святыми ученики Своими и со Пресвятою Матерію Своею. Здѣ нѣкая жена, пріявъ сосудъ многоцѣннаго мѵра, возлила оный на главу Господа, купно съ нимъ изливая слезы любви и благодарности къ Нему. И ты, грѣшная душе моя, проливая слезы покаянія и орошая ими ноги Господа, взывай:
Господи! прежде даже до конца не погибну, спаси мя.
Грядый Господь на вольную страсть приблизися ко Іерусалиму, и воззрѣвъ на него, плакася о немъ, плакася объ ожесточенномъ ослѣпленіи его и о предстоящемъ ему бѣдствіи. Плачи и ты, душе моя, помышляя о злыхъ дѣлѣхъ твоихъ, и о страшномъ наказаніи за нихъ, – плачи, взывая:
Господи! прежде даже до конца не погибну, спаси мя.
Душе моя, душе моя, слышала ты сердобольное, но и страшное послѣднее слово Господа къ Іерусалиму и всему народу іудейскому: Іерусалиме, Іерусалиме! коль краты восхотѣхъ собрати чада твоя, якоже кокошь собираетъ птенцы своя подъ крылѣ, – и не восхотѣсте. Се оставляется домъ вашъ пустъ! устрашися, убойся, да не оставитъ и тебе благодать Божія за противленіе твое, и воплемъ веліимъ воззови:
Господи! прежде даже до конца не погибну, спаси мя.
Слава: Всѣ силы твои, о душе моя, да пріидутъ и поклонятся Богу Отцу, Богу Сыну и Богу Духу Святому, и да воззовутъ: Троице святая, единосущная и единодержавная! прежде даже до конца не погибну, спаси мя.
И нынѣ: Грядетъ, грядетъ воплотивыйся отъ Тебе, Пресвятая Дѣво, единородный Сынъ Божій волею пострадати и распятися на крестѣ, да спасетъ мя вопіюща:
Господи! прежде даже до конца не погибну, спаси мя.
Пѣснь 6. Ирмосъ:
Молитву пролію ко Господу и Тому возвѣщу печали моя: яко золъ душа моя исполнись и животъ мой аду приближися, и молюся яко Іона: отъ тли Боже возведи мя.
Сія нощь – нощь, въ нюже Христосъ нашъ преданъ отъ злонравнаго ученика Своего и былъ истязуемъ, біемъ, поруганъ, судимъ и осужденъ, – есть отъ вѣковъ предопредѣленная, великая и страшная нощь, юже сотвори Господь, да не во снѣ и дреманіи проводимъ ю, душе моя, но въ бодрствованіи, въ умиленіи и въ слезномъ взываніи:
Помилуй мя, Боже, помилуй мя.
Душе моя, душе моя! приникни въ Сіонскую горницу и виждь, како воплотившееся Слово, Богочеловѣкъ, предъ тайною вечерію, преклоняется ницъ и умываетъ ноги учениковъ, да сокрушитъ гордыню твою и научитъ тя смиренію. Ты же не уразумѣла сего, ты не послѣдовала примѣру Господа твоего; покайся убо и взывай:
Помилуй мя, Боже, помилуй мя.
Душе моя, душе моя! Петру, иже весь былъ чистъ, надлежало быть лишеннымъ части со Христомъ, аще не умыются ноги его отъ Господа. Како убо можеши ты наслѣдовати царствіе небесное, аще благодать Духа не очиститъ твое сердце и мысли нечистыя, скверныя, слезами покаянія неомовенныя, и аще не воззовеши къ Очистителю:
Помилуй мя, Боже, помилуй мя.
Святіи Апостоли Петре, Іоанне, Іакове, Андрее и вси, кромѣ Іуды предателя! лобызаю ваши нозѣ, омытыя пречистыми руками Господа, лобызаю ваши руцѣ, пріявшія отъ Господа на тайной вечери, подъ видомъ хлѣба Тѣло Его и подъ видомъ вина самую Кровь Его. Молю васъ научите мя пріимати сіе чудное брашно и питіе со страхомъ и любовію и съ покаяннымъ моленіемъ:
Помилуй мя, Боже, помилуй мя.
О, блаженны и преблаженны ушеса ваши, слышавшія вѣщавшаго вамъ Господа: пріимите, идите, сіе есть Тѣло Мое, еже за вы ломимое во оставленіе грѣховъ; пійте отъ нея вси, сія есть Кровь Моя, яже за вы и за многія изливаемая, во оставленіе грѣховъ! Вашими молитвами, святіи Апостоли, да причтуся къ тьмочисленному множеству спасительно и животворно пріемлющихъ Тѣло и Кровь Христову – да причтуся къ нимъ и азъ вопіющій и взывающій:
Помилуй мя, Боже, помилуй, мя.
Грядый Господь на вольную страсть велію любовь къ вамъ святіи Апостоли и ко всѣмъ Своимъ, сущимъ въ мірѣ, показа Христосъ, и умывъ нозѣ ваши, и отерши ихъ лентіемъ, неизреченно вящшую и большую любовь и благодать Свою яви Онъ, преподавъ въ пищу и въ питіе Тѣло и Кровь Свою. О, дабы ты, душе моя, уразумѣла широту, долготу, высоту и глубину сея любве Христовой, дабы благонадежно и со дерзновеніемъ возмогла взывати:
Помилуй мя, Боже, помилуй мя.
По тайной вечери, рекъ Господь Симону Петру: Симоне, Симоне! се сатана проситъ, дабы сѣялъ васъ, яко пшеницу, Азъ же молихся о тебѣ. Душе моя, душе моя! если Петру угрожала таковая опасность, то не паче ли тебѣ? Молись убо, да не оскудѣетъ вѣра твоя никогда, а паче при исходѣ твоемъ изъ міра сего; молись ко Христу Богу и взывай:
Помилуй мя, Боже, помилуй мя.
Слава: Къ Отцу Моему гряду, глаголетъ Господь, утѣшая учениковъ Своихъ предъ исходомъ изъ Сіонской горницы въ Геѳсиманію и потомъ на Голгоѳу, – и Азъ умолю Отца, и иного Утѣшителя дастъ вамъ – Духа Святаго, Духа истины. Къ ходатайственному моленію Сына Божія, присоедини и ты, душе моя, свою покаянную молитву и взывай къ Нему и Его Отцу и Духу Святому:
Помилуй мя, Боже, помилуй мя.
И нынѣ: Болящую душу мою исцѣли Рождшая всѣхъ Вземлющаго недуги и научи мя благопріятно на всякое время и на всякій часъ, паче же въ часъ смерти взывати:
Помилуй мя, Боже, помилуй мя.
Пѣснь 7. Ирмосъ:
Согрѣшихомъ, беззаконновахомъ, неправдовахомъ предъ Тобою: ниже соблюдохомъ, ниже сотворихомъ, якоже заповѣдалъ еси намъ, но не предаждь насъ до конца, отцевъ Боже.
Грядый Господь по тайной вечери въ Геѳсиманію, глагола ученикомъ Своимъ: Азъ есмь лоза истинная, и Отецъ Мой дѣлатель есть, всяку розгу о Мнѣ нетворящую плода Онъ отсѣкаетъ. Ты, о душе моя, ни въ юности, ни въ лѣта мужа, ниже въ старчество не принесла плода угоднаго Отцу Небесному. Страшись убо, да не отсѣчена будеши отъ живоносной лозы – Христа и взывай:
Помилуй мя, Боже, помилуй мя.
На пути Своемъ отъ Сіона въ Геѳсиманію вѣщалъ Христосъ: Аще кто во Мнѣ не пребудетъ, извергнется вонъ якоже неплодная вѣтвь, и изсхнетъ, и во огнь ввергнется. Ты, о душе моя, аще и сочеталася со Христомъ во святомъ крещеніи, но не пребыла въ союзѣ съ Нимъ и вѣроломно нарушила обѣты твои. Чего же ожидать тебѣ, какъ не изверженія вонъ изъ чертога небеснаго, если, каяся и плача о вѣроломствѣ своемъ, не умилостивиши Господа слезнымъ воплемъ:
Помилуй мя, Боже, помилуй мя.
Духъ Святый, Котораго обѣщалъ Господь послати отъ Отца, для возлюбленныхъ учениковъ Христовыхъ, выну будетъ утѣшителемъ и миродателемъ, для невѣрующихъ же Онъ будетъ обличитель. И пришедъ Онъ, рекъ Господь, грядый на подвигъ Геѳсиманскій, – обличитъ міръ о грѣсѣ и о правдѣ и о судѣ. Недостойная утѣшенія Духа Утѣшителя, грѣшная душе моя, пріими смиренно Его обличительное вразумленіе и не престань взывати:
Помилуй мя, Боже, помилуй мя.
Приникни, о душе моя, и виждь, какъ Христосъ Господь, приближась къ Геѳсиманіи, преклоняетъ колѣна Свои, возводить очи Свои на небо, и молится Отцу Своему о Себѣ Самомъ: Отче! пріиде часъ – страданій Моихъ за спасеніе міра; молится объ Апостолахъ: Отче Святый! Соблюди ихъ во имя Твое, да будутъ едино, якоже и Мы; молится о всѣхъ вѣрующихъ: Не о сихъ же молю токмо, но и о вѣрующихъ въ Мя словесе ихъ ради. Дабы и ты, душе моя, была общницею силы и плодовъ сей великой первосвященнической молитвы Христовой, вѣруй въ Него, исповѣдуй Его, кайся въ согрѣшеніяхъ своихъ и взывай:
Помилуй мя, Боже, помилуй мя.
Прискорбна есть душа моя даже до смерти, рекъ Господь въ саду Геѳсиманскомъ. О чемъ только скорбитъ и печалуетъ Всеблаженный, Вседовольный, Всесовершенный? О томъ, что мы – неблагодарная тварь – преступиша всѣ заповѣди Божіи, о томъ, что оскорбиша Его правосудіе, и не каемся, не чувствуемъ гнѣва Божія и не взываемъ:
Помилуй мя, Боже, помилуй мя.
Сынъ Божій, Богочеловѣкъ, въ саду Геѳсиманскомъ скорбитъ, тоскуетъ, падаетъ ницъ, молится столь крѣпко, что во время моленія бѣ потъ Его, яко капли крове, на землю падающія. Мы же, о душе моя, въ нечувствіи, мы дремлемъ, спимъ и не взываемъ:
Помилуй мя, Боже, помилуй мя.
Что спите, рекъ Господь Петру и двумъ сынамъ Зеведеевымъ, воставше молитеся, да не внидете въ напасть. Востань, воспряни и ты, душе моя, молись и взывай:
Помилуй мя, Боже, помилуй мя.
Егда Христосъ, ходатай нашъ, въ саду Геѳсиманскомъ скорбѣ скорбію смертельною, молися до кроваваго пота и предаваше всего Себе въ волю Отца небеснаго, взывая: Отче, аще волиши мимо нести отъ Мене чашу сію, обаче не Моя воля, но Твоя да будетъ; тогда явися къ Нему Ангель и укрѣпляше Всесильнаго. Послется Ангелъ и ко всякой душѣ, предающей себе въ волю Божію, кающейся и крѣпко вопіющей:
Помилуй мя, Боже, помилуй мя.
Слава: Въ часъ, егда Господь сладостно бесѣдова съ ученики на пути въ Геѳсиманію, егда молися Онъ предъ входомъ въ садъ и внутри его, – въ часъ сей – несчастнѣйшій изъ архіереевъ Каіафа совѣщася со Іудою – несчастнѣйшимъ изъ всѣхъ земнородныхъ, о томъ, како бы успѣшнѣе взяти Господа; вручи буйную толпу вооруженной стражѣ, и сія толпа, дабы не обратить общаго вниманія Іерусалимлянъ, иде извилистыми, глухими стогнами Святаго Града; Ангелы и Архангелы ужасахуся и трепетаху, видя сіе лукавое богоубійственное шествіе. Мы же, о душе моя, въ сокрушеніи сердца не престанемъ взывати:
Помилуй мя, Боже, помилуй мя.
И нынѣ: О, увѣдайте и уразумѣйте сію страшную тайну отряда, Іудою предводимаго, тайну, тщательно сокрываемую отъ васъ и отъ всего народа, – уразумѣйте ю святыя жены: Марія Магдалина, Саломія и другія, и Пречистая Дѣва Матерь Господа, и взывайте со мною вкупѣ:
Помилуй мя, Боже, помилуй мя.
Пѣснь 8. Ирмосъ:
Ужаснися бояйся небо, и да подвижатся основанія земли: се бо въ мертвецѣхъ вмѣняется въ вышнихъ Живый, и во гробъ малъ страннопріемлется.
Вопроси нѣкогда Господь пророка Іеремію: что видиши? – вопрошу и азъ тя, грѣшная душе моя, что ты видиши, взирая на Господа и слѣдуя за Нимъ въ нощь сію? – Вижду Господа моего Іисуса Христа въ саду Геѳсиманскомъ ятаго, связаннаго, чрезъ потокъ Кедрскій ведомаго наглою прислугою Каіафы; вижду Его однимъ изъ учениковъ преданнаго, всѣми прочими оставленнаго, ужасаюся и взываю:
Помилуй мя, Боже, помилуй мя.
Вижду Господа моего, единороднаго Сына Божія Іисуса Христа, приведеннаго къ Аннѣ, тестю Каіафину истязуемаго здѣсь объ ученіи его, удареннаго въ ланиту; вижду сіе и ужасаюся, помышляя, что грѣхи наша виною толикаго уничиженія Христова, и вопію:
Помилуй мя, Боже, помилуй мя.
Вижду Господа моего связаннаго, окровавленнаго и ведомаго отъ Анны къ Каіафѣ первосвященнику, слышу здѣ многіе ложныя на Него свидѣтельства и доносы; вижду, како Онъ, яко агнецъ безгласный не отверзаетъ устъ Своихъ въ защиту Свою, вижду сіе и, окаявая свою нетерпѣливость и малодушіе, взываю:
Помилй мя, Боже, помилуй мя.
Вижду, како Господь мой всесвятый Іисусъ Христосъ отъ Каіафы первосвященника и отъ несмысленнаго соборища іудейскаго обвиненъ, како оглашенъ богохульникомъ и законопреступникомъ; како осужденъ на смерть; како послѣ многихъ наругательствъ и біенія, вверженъ въ темницу до утрія; вижду сіе и ужасаюся, памятуя, что за мои грѣхи страждетъ Господь, и взываю:
Помилуй мя, Боже, помилуй мя.
Вижду, како въ первые часы утра Господь связанный и стрегомый изведенъ изъ темницы, како представленъ Каіафѣ для послѣдняго допроса въ общемъ присутствіи судей іудейскихъ, и како, послѣ рѣшительнаго, яснаго отвѣта Господня, что Онъ точно Мессія, всѣ единогласно изрекли: повиненъ есть смерти. Вижду сіе и вѣдая, что за мои беззаконія Отецъ предалъ Сына Своего на смерть, слезно взываю:
Помилуй мя, Боже, помилуй мя.
Вижду, како многочисленная стража въ сопровожденіи самыхъ судей іудейскихъ повлекла Господа, измученнаго во дворѣ Каіафы, къ Понтійскому Пилату, дабы онъ предалъ его на крестную смерть; како сей Римскій военачальникъ, не смотря на обвинительныя вопли, ни единыя не обрѣлъ вины въ небесномъ Осужденникѣ и како іудейскія власти непреклонно извергски жаждали видѣть Господа на крестѣ. Вижду сіе и, ужасаяся о толикой злобѣ и ослѣпленіи сердца человѣческаго, съ плачемъ вопію:
Помилуй мя, Боже, помилуй мя.
Вижду, како Господь мой Іисусъ Христосъ, не смотря на очевидную невинность Свою, влачимъ былъ по стогнамъ Іерусалима отъ одного судилища въ другое, – отъ Пилата къ Ироду Галилейскому; како Онъ во дворѣ сего убійцы Іоанна былъ уничиженъ, осмѣянъ, къ безумнымъ причтенъ; како въ уничижительной одеждѣ, паки приведенъ въ преторію Пилата. Вижду сіе, стыждуся дѣлъ моихъ, навлекшихъ такой позорь Господу славы, и не престаю взывати:
Помилуй мя, Боже, помилуй мя.
Слава: Вижду, како молодуншый Пилатъ, желаніе укротить звѣрскую неистовую злобу враговъ Господа, предаша Его безчеловѣчнымъ воинамъ на разныя мученія. Како они обнажиша пречистое тѣло Его, како привязаху Его къ позорному столбу, како бичами и терновыми розгами ударяху по главѣ и раменамъ Его; како по отвязаніи отъ столба увѣнчаху Его терновымъ вѣнцемъ; како наругахуся, преклоняясь предъ Нимъ, ударяху Его по лицу и закрываху очи Его. Вижду сіе, ужасаюся и поелику за мое окаянство тако страждетъ Господь, повергаюся ницъ и тысящекратно взываю:
Помилуй мя, Боже, помилуй мя, Боже Отче, помилуй мя, Боже Слове, помилуй мя, Боже Душе Святый, помилуй мя.
И нынѣ: О Пресвятая и Преблагословенная Дѣво Маріе. Хотя и преданъ въ руки враговъ сладчайшій Іисусъ, превожделѣннѣйшій Сынъ Твой, хотя и поруганъ, измученъ и какъ злодѣй осужденъ – обѣтованный Искупитель міра, но Онъ есть Божій Сынъ: Господь небесе и земли. Помяни мя во царствіи Его и въ Твоемъ съ Нимъ соцарствіи, помяни и спаси душу мою, вопіющую къ Нему:
Помилуй мя, Боже, помилуй мя.
Пѣснь 9. Ирмосъ:
Не рыдай Мене Мати, зряще во гробѣ, Его же во чревѣ безъ сѣмене зачала ecи Сына: востану бо и прославлюся, и вознесу со славою непрестанно, яко Богъ, вѣрою и любовію Тя величающія.
Вопрошенъ былъ пророкъ Іеремія вторицею отъ Господа: что ты видиши? Вопрошу и азъ тебе, многогрѣшная душе моя, что ты видиши? что видиши днесь въ шестый день страстныя и страшныя седмицы? Вижду Господа Іисуса Христа, долготерпѣливо и безмолвно выслушавшаго съ лиѳостротона Пилатова приговоръ, да распять будетъ на крестѣ: вижду Его грядущаго на Голгоѳу и изнемогающаго подъ тяжестію несомаго Имъ креста Своего: сопровождаю Его, покланяюся Ему и моля взяти и моя вся согрѣшенія на всеочистительный крестъ, взываю:
Помилуй мя, Боже, момнлуй мя.
Вижду пречистое, пресвятое отъ пречистыя и пресвятыя Дѣвы Маріи неизреченно рожденное Христа моего тѣло за спасеніе міра на крестѣ вознесенное, все окровавленное, все уязвленное, отъ ногъ до главы цѣлости не имущее; вижду и въ трепетѣ исповѣдуя распятому Богочеловѣку грѣхи юности и невѣдѣнія моего, взываю:
Помилуй мя, Боже, помилуй мя.
Вижду тѣ пресвѣтлыя очи, кои на всѣхъ благопривѣтливо и любезно взираху, отъ воззрѣнія которыхъ печальные утѣшахуся, унылые ободряхуся, грѣшніи къ покаянію обращахуся; вижду сіи радостотворныя очи Христовы за мои нечистыя и лукавыя воззрѣнія потемненными, кровію залитыми; и, каясь о многомъ отъ мене злоупотребленіи чуднѣйшаго изъ всѣхъ чувствъ тѣлесныхъ, вопію и не престану вопити:
Помилуй мя, Боже, помилуй мя.
Вижду пречистыя уста, изъ коихъ непрестанно струися неизсякаемый потокъ небесныя сладости, кои изрекаху сладчайшіе глаголы жизни, свѣта и премудрости; вижду сіи уста Христа моего, за празднословіе, буесловіе, злословіе, кощунство моихъ устенъ, оцтомъ и желчію напоенными, жалѣю о всѣхъ грѣхахъ языка моего и взываю:
Помилуй мя, Боже, помилуй мя.
Вижду пречистыя къ молитвѣ нашей преблагопослушливыя ушеса Господа моего Іисуса Христа, за грѣхи моихъ ушесъ, за мое слышаніе клеветъ и навѣтовъ на ближняго, за участіе въ пересудахъ и осужденіи начальства, за отвращеніе къ слышанію Божія слова; вижду ушеса Господа, за сіи и иныя мои грѣхи преогорченными и наполненными многихъ поношеній, ругательствъ и злѣйшихъ обвиненій. Повергаюсь предъ распятымъ Господомъ моимъ Спасителемъ и взываю:
Помилуй мя, Боже, помилуй мя.
Вижду руцѣ, пречистыя руцѣ, отъ прикосновенія которыхъ смерть содрогалась, кои всецѣлебнымъ были врачевствомъ для всякаго недуга и всякой болѣзни, въ коихъ малые хлѣбы до преизобилія умножались для насыщенія многихъ тысячей, – вижду сіи руцѣ Господа моего за беззаконныя дѣянія моихъ рукъ острыми желѣзными гвоздьми пронзенными, отъ вязанія посинѣлыми, кровь обильною струею истощающими; вижду ихъ и жалостію истаеваю и, въ сокрушеніи о содѣянномъ мною во всемъ житіи моемъ, взываю:
Помилуй мя, Боже, помилуй мя.
Вижду нозѣ, кои шествоваху по водамъ, яко по суху, кои грѣшница омы слезами своими и прія отпущеніе грѣхомъ своимъ; нозѣ, у коихъ если кто сподобится быти подножіемъ, будетъ выше всего міра, – вижду сіи пречистыя нозѣ моего Господа Іисуса Христа, за богопротивное хожденіе моихъ ногъ по разнымъ путямъ неправдъ и нечестія, яко и руцѣ Его, ко кресту пригвожденными, потоки крови ліющими; вижду ихъ, содрогаюсь, воспоминая хожденія и исхожденія моя и въ покаяніи взываю:
Помилуй мя, Боже, помилуй мя.
Слава: Вижду Господа моего, на крестѣ для спасенія моего страждующаго, жаждою палимаго, слышащаго поношеніе, насмѣшки и ругательства, вижду солнце померкшее, землю трясущуюся, каменіе распадающіеся; слышу послѣднее слово Распятаго: Отче, въ руцѣ Твои предаю духъ Мой. Вижду Жизнодавца бездыханна и умерша, трепещу, ужасаюся и бія въ перси моя многогрѣшныя, всѣмъ существомъ моимъ взываю:
Помилуй мя, Боже, помилуй мя.
И нынѣ: Вижду Пресвятую, Пречистую Дѣву Марію у креста Господа и Сына Своего предстоящую, оружіемъ жалости и скорби матерней пронзенную; вижду, како единъ отъ воинъ ребра Ему прободе и абіе изыде кровь и вода; вижду Никодима и Іосифа, трепетными руками снемлющихъ со креста пречистое Тѣло Его, облекающихъ оное въ плащаницу чистую и во гробѣ новѣ полагающихъ. Покланяюся Ему, лобызаю живоносныя язвы Его и, ницъ повергшися, усты и всѣмъ сердцемъ взываю и пою:
Помилуй мя, Боже, помилуй мя.
МОЛИТВА.
О Пресвятая Дѣво, Мати распятаго за мя Господа моего! О святый Ангеле Хранителю мой! О святый Предтече Господень Іоанне и святая Маріе Магдалино! О святіи Апостоли Петре и Павле, Іоанне и прочіе. О святіи Святителіе Христовы Димитріе, Митрофане и Тихоне! О преподобніи отцы Антоніе и Ѳеодосіе Кіево-печерстіи, Сергіе и Никоне Радонежскіи! О святая великомученице Варваре и прочіи мученики и мученицы! Явите мнѣ грѣшному совокупную, соборную небесную милость вашу, имиже вѣсте судьбами, благоустройте, да не будетъ отриновенъ сей покаянный вопль мой, но да пріимется и да вознесется къ престолу Пресвятыя Троицы Отца и Сына и Святаго Духа, и да низведетъ въ душу мою свѣтъ мира и успокоеніе, сладость и вѣчное неотъемлемое радованіе о Дусѣ Святѣ, Ему же со Отцомъ и Сыномъ буди слава и поклоненіе во вѣки. Аминь.
«Душеполезный Собесѣдникъ». Изд. Аѳонскаго Русскаго Пантелеимонова Монастыря. 1893. Вып. 3 (Мартъ). С. 71-86.
