Житіе святаго и благовѣрнаго князя Романа Владиміровича, Угличскаго чудотворца (Мѣсяца октября въ 1 день).
∻ Житіе святаго и благовѣрнаго князя Романа Владиміровича, Угличскаго чудотворца. ⸭ Похвала святому благовѣрному князю Роману Угличскому, новому чудотворцу. ⸭ Положеніе мощей благовѣрнаго князя Угличскаго Романа отъ 1485 г. до 1612 г. и пропажа древняго житія его. ⸭ Повѣсть о чудесахъ благовѣрнаго князя Угличскаго Романа. ∻
Житіе благовѣрнаго князя Угличскаго Романа{1}.
Святый и благовѣрный князь Романъ Владиміровичъ, рожденіе{2} и воспитаніе имѣя въ велицѣмъ и пресловущемъ градѣ Угличѣ, отца имѣя благовѣрнаго же и христолюбиваго князя Владиміра Константиновича Угличскаго, матерь же такоже благовѣрную и христолюбивую великую княгиню именемъ Фотинію{3}, внукъ бысть великаго князя Константина Ростовскаго, правнукъ же великаго князя Димитрія-Всеволода Георгіевича сына Долгорукаго Кіевскаго, внука великаго князя Владиміра Мономаха Всеволодовича, Ярослава правнука великаго князя Владиміра, крестившаго Россійскую землю святымъ крещеніемъ, – 11-ть отъ него степеній. И тако крещенъ бысть святый князь Романъ въ градѣ Угличѣ боголюбивымъ игуменомъ Пименомъ{4}. Бысть же святому благовѣрному князю Роману Владиміровичу и еще большій ему братъ благовѣрный князь Андрей Владиміровичъ{5} родный. Итако оба сіи благовѣрніи и блаженніи князи Андрей и Романъ Владимірови воспитаеми бяху и въ наказаніи, и во уничиженіи, и во ученіи книжномъ. И княжаху со отцемъ своимъ благовѣрнымъ и христолюбивымъ княземъ Владиміромъ Константиновичемъ въ славнѣмъ и велицѣмъ градѣ Угличѣ даже до лѣта 6746 (1238) г. въ велицѣй чести и красотѣ, паче инѣхъ князей Россійскихъ цвѣтяху и яко душевною добродѣтелію, тако и внѣшнею премудростію и богатствомъ украшахуся и славою преспѣваху; но искони бѣ мятежная злоба, общій нашъ врагъ, ему же нарѣчіе авводонъ, сирѣчь, вводящій въ преисподній тартаръ бусурманскихъ, како не даетъ благовѣрнымъ и благочестивымъ въ Рустѣй земли державцомъ на долзѣ лучъ православія христіанскія вѣры простирати, но якоже и древле на первобывшихъ благочестивыхъ царей, нечестивыхъ агарянъ возмущаше бранію наступати и кровь христіанскую яко текущую реку непрестанно проливати, тако и въ лѣто 6746 (1238) вниде сатана въ нечестиваго агарянскаго и безбожнаго царя Батыя, иже бысть отъ страны восточныя и возмути его, увы, Божіимъ попущеніемъ за грѣхи наша, на Русскую землю. И толико окаянный собра на Россійскихъ князей бусурманскаго своего войска, яко копіи и щиты покрыти могуще, якоже мрачный облакъ, всю Россійскую землю. И тако наскочи и на Россію, яко всепрелютѣйшій дикій мужный вепрь, или истѣе рещи звѣрообразный, поядательный агнецъ Божіихъ, огнедыхающій левъ. И тако окаянный пріиде въ лѣто 6746 (1238) г. и вся Россійскіи грады вмалѣ не въ единъ годъ поплѣни, и многое множество христіанскія крови пролія; но да не достанетъ ми о семъ повѣствовати времени, но на предлежащее да возвращаюся. Тогда и богоугодно княжившій благовѣрный князь Владиміръ Константиновичъ со благовѣрными сынми своими Андреемъ и святымъ Романомъ, видя себе облежаща въ градѣ Угличѣ вельми агарянскими безбожными войски, и совѣтовавъ съ сынми своими, и боляры, и многими гражданы, во еже бы оставити престолъ своего княженія въ Угличѣ на время, бояще бо ся со агаряны творити брани, яко же видѣвъ толикое тмотысящное облеганіе града и брань ради возстающихъ, и того ради не укосни во градѣ, да не его ради градъ раззорится и кровь христіанская проліется, напоминаше реченное святымъ Евангеліемъ: укрыйтеся вмалѣ, да мимо идетъ гнѣвъ Божій. Итако въ лѣто 6746 (1238) уступи тѣмъ безбожнымъ безъ кровопролитія свой княжескій престолъ и изъ града Углича съ своими благовѣрными сынами, и многими боляры, и боголюбивыми христіаны, выйде въ мѣсяцѣ февралѣ, и нѣгдѣ тогда крыяся, даже до дву лѣтъ, не смѣяше во градъ возвратитися. Итако послѣди благовѣрнаго Владиміра градъ Угличъ вскорѣ и безъ кровопролитія взята безбожніи и данію годовою обложиша. И отъ него пошли и въ прочіе предѣльные и державные грады, и тѣ всѣ подъ себе покориша, точію единъ Всероссійскій великій Новъ-градъ стояше и не плѣненъ быть. И оттолѣ и Угры плѣниша, и паки возвратися безбожный Батый во свою землю. А въ Россіи оставляше нѣкія Агарянскіе по градомъ военачальники. И тако, по прошествіи дву лѣтъ плѣненія своего отечества, града Углича, благовѣрный князь Владиміръ и съ чады и со всѣми боляры и христіаны возвратися паки на свой престолъ въ лѣто 6748 (1240). Не вѣмъ, аще отъ обладающихъ Агарянскихъ военачальникъ сіе тогда ему попустися, паки престолъ княженія своего въ Угличѣ пріявшу, но обаче дань богомерзкому Батыю даяше. И егда симъ златолюбнымъ правомъ Батый не насытися и многою проліявшеюся христіанскою яже въ Россіи кровію, и паки возбѣсися, паки возъярися злобѣсный сердцемъ на благовѣрныхъ оставшихся державцевъ Россійскихъ, и посылаетъ посланія въ лѣто 6753 (1245) во вся Россійскіи грады, паки съ великимъ страхомъ и смертною казнію: да, хотящіи княжити Россійстіи благовѣрніи князи въ Россіи, прежде приходятъ къ нему и покланяются, яже онъ безумный Батый чтяше богомъ, сиречь идоломъ, огню и кусту, и тако потомъ да пріемлютъ себѣ державство Россійское. И егда дойде сицевое посланіе даже и до благовѣрнаго и великаго князя Владиміра, въ тое же лѣто повелѣвающее идти во Орду къ безбожному Батыю, тогда сей благовѣрный князь увѣдавъ, яко приходящіи въ Орду покланяются вышереченнымъ богомъ поганскимъ, не изволи идти къ Батыю и сотворити богомерзкую его волю. И паки оставляетъ градъ Угличъ и вручаетъ судьбамъ иже надъ всѣхъ владущему держателю Христу Богу и пресвятѣй Его Матери Госпожѣ всѣхъ, Царицѣ Дѣвѣ Маріи. Оставляетъ тогда и престолъ своего княженія и славу маловременную ни во что вмѣняетъ, конечно и безвозвратно и тай, со благородными чады, изъ града исходитъ. И яко гонимый отъ враговъ православныя вѣры, Агарянъ, исповѣдникъ благочестія и страстотерпецъ является, и даже до лѣта 6757 (1249) по градомъ Россійскимъ и весемъ тайно крыется, бѣгающій своего отечества. И наконецъ пріиде во градъ Владиміръ, и ту конецъ житія себѣ въ тоже лѣто{6} пріемлетъ. Послѣди же{7} и безбожный Батый убіенъ бысть подъ градомъ Вардиномъ, Угорскимъ благовѣрнымъ королемъ Владиславомъ, братомъ святаго Саввы, архіепископа Сербскаго. И тогда паки по лютой сей землѣ наста весна хладна и доброзрачна, и паки Россійской земли пріиде миръ, паки крыющіися благовѣрніи Россійстіи державцы свои невозбранно пріймаху престоли. Тогда и благовѣрнаго князя Владиміра мощи пренесены быша изъ Владиміра во отчину свою, градъ Угличъ, благовѣрными его дѣтьми Андреемъ и святымъ Романомъ. И пѣвше надгробная пѣнія надъ отцемъ своимъ блаженнымъ княземъ Владиміромъ и погребоша его на Угличѣ въ церкви Преображенія Господня соборней. И потомъ въ тоже лѣто, тогда и престолъ, яко и по жребію и достоянію отца своего, княженія въ Угличѣ пріемлетъ благовѣрный Андрей князь, братъ святаго Романа (большій), – и княживъ въ градѣ Угличѣ зѣло добрѣ и богоугоднѣ, глаголютъ бо: яко бяше вельми милостивъ и нищелюбивъ, и къ церквамъ Божіимъ и къ священникомъ зѣло подателенъ{8}. И тако княживъ во градѣ Угличѣ 12 лѣтъ и блаженно преставися съ миромъ, якоже и отецъ его благовѣрный князь Владиміръ, въ лѣто 6769 (1261), и погребенъ бысть подлѣ отца своего въ той же соборней церкви. Тогда, по смерти брата своего, преемникъ бываетъ престола княженія Угличскаго, яко наслѣдникъ святый благовѣрный и христолюбивый сей князь Романъ Владиміровичъ, о немъ же намъ и слово сіе надлежитъ. Аще бо и не хотяше зѣло того (престола княженія) пріяти, понеже яко со отцемъ своимъ и братомъ, егда быша отъ безбожныхъ въ гоненіи, извыкъ бяше безмолвствовати и единому всѣхъ Богу въ постѣхъ и молитвахъ непрестанныхъ единствовати; ибо не завидяще сей святый и благовѣрный князь Романъ и брату своему благовѣрному князю Андрею, въ его прежде княженіе, но живяще съ нимъ обще въ Угличѣ и княжаше. Аще и доволенъ бѣ внѣшнею хитростію и ученіемъ, во еже бы ему княжити единому грады и веси многими совершенно, но онъ все сіе правленіе возлагая промыслу Божію и брату своему Андрею, а самъ бяше въ великомъ безмолвіи и страсѣ Божіи, и всегда и выну хваляше Бога сердцемъ и устнами, непрестано, чистоту душевную и тѣлесную толико возлюби, яко не ходяше ни на потѣху со благовѣрнымъ братомъ своимъ, ниже на каковый звѣриный ловъ, ни на пиршество со благородными хождаше, но яко обрѣтши нѣкій драгій камень, бисеръ святопросвѣщеннаго житія, тако оный и храняше въ сердцы своемъ, яко пресіяющій солнцевидный зракъ, и зѣло богоугодне течаше, и, яко въ ковчезѣ Ноевомъ, всегда въ дому Божіи пребываше, по пророческому словеси, выну приметашеся въ дому Божіи, и ни о чемъ же ему бысть попеченія, точію яко о церкви Божіи, всегда бо печатеся ю украсити благолѣпіемъ, яко невѣсту Божію, и представити Царю Богу, яко нескверную и чистую голубицу, за что и блаженный его Божій гласъ возвеличилъ сіе: блаженни, рече, чистіи сердцемъ, яко тіи Бога узрятъ. Тако блаженный сей Божій гласъ на блаженнемъ выну почиваніе, и его не точію здѣ, но и въ будущемъ вѣцѣ зрѣти всегда лице Божіе сподоби, тако же и въ животѣ его всякою славою и красотою и внѣшнихъ силъ одаряше. Ибо по смерти брата его благовѣрнаго князя Андрея, пріидоша вси боляре и граждане ко двору княжескому и молиша благовѣрнаго князя Романа пріяти престолъ княженія отца своего и брата совершенно. Онъ же зѣло того ради прискорбенъ бысть, яко пресецается его безмолвіе и выну пребываніе въ Бозѣ, и зѣло моляше боляръ и славныхъ гражданъ, да на княженіе Угличское изберутъ себѣ изъ благородныхъ княжити, его же Богъ имъ подастъ. Они же, яко едиными усты и единемъ сердцемъ, вси единодушно рекоша: «Богъ намъ тебе даде днесь въ великое княженіе, и кого имамы паче тебе другаго, кого наслѣдника отеческаго твоего престола стяжахомъ? Но нѣсть инаго, нѣсть наче тебе! И не отступимъ отъ тебе, дондеже не сотвориши воли нашея, и не обѣщаешися престолъ пріяти совершенно». И таковая глаголюще, нача вси плакати и привѣтствовати сице: «Кому дадимъ сей Угличскій престолъ? Отъ инаго ли племени князю? Но сего не вѣмы, яковъ добродѣтеленъ намъ будетъ. Отъ благородныхъ ли боляръ на таковую княженія высокую степень возведемъ? Но сего вѣдаемъ, яко имать гордитися нами. И не имамъ инаго, не имамъ паче, яко же тебе, благовѣрнаго нашего государя, житіе бо твое богоугодное свѣмы; милость же и любовь и доброхотѣніе твое, еже къ намъ повсечасно изливаеши, сія вся въ рукахъ нашихъ, яко многоцѣнный даръ, имѣемъ и обогащаемся, – и тобою и спастися вси хощемъ, яко учителемъ нашимъ и наставникомъ». И таковая словеса съ рыданіемъ благоговѣйно боляре и славніи граждане, пришедши ко благовѣрному, изливаху. И не може сей благовѣрный и христолюбивый князь Романъ отрещися престола княженія Угличскаго, зѣло бо убѣдися толикаго множества гражданъ сицевыми словесы. И пріемлетъ моленіе ихъ и преклоняется ихъ волѣ. И въ лѣто 6769 (1261), по смерти брата своего, и престолъ отца своего и брата княженія въ Угличѣ пріемлетъ совершенно. Отъ владыки святаго Ростовскаго Кирилла{9} Архіепископа благословенъ бываетъ въ Угличѣ княжити преименованно и вѣчнымъ и блаженнымъ вѣнцемъ отъ Святаго. Святый князь Романъ тогда прознаменованъ въ святости будущаго вѣка и честь отъ Вседержителя пріяти. Ибо святый Кириллъ, егда вѣнецъ княжескій на благовѣрнаго главу возлагаше, тогда видѣ превыше на главу его сходящъ отъ небесъ свѣтъ необыченъ и, яко молнія, окружающъ, и лице его тогда аки солнце просвѣтися. И прорече владыка, яко будетъ сей благовѣрный великій князь граду сему и вѣчный держатель. И тако потомъ державствуя благовѣрный и великій князь Романъ семью грады: первымъ княжества Угличскаго державнымъ градомъ Угличемъ, вторымъ Романовымъ и съ предѣлы и славными ту слободами, третіимъ Кашиномъ, четвертымъ Бѣжецкимъ, пятымъ Желѣзно-Устюгомъ, шестымъ Дмитровымъ, седмымъ Звенигородомъ и различными пристоящими тѣхъ предѣловъ и прочими многими слободы и веси владяше, и зѣло въ велицѣй славѣ и красотѣ княженіе свое простираше. И тако живущу ему во градѣ Угличѣ и богоспасающими дѣланьми украшающуся, во всякомъ благочестіи и въ законѣ Господни пребывающу, и день отъ дне красотою добродѣтелей преспѣвающу, такожде и супругу себѣ имѣ{10} отъ благородныхъ именемъ Александру, красну же и зѣло боголюбиву и ко всѣмъ милостивну, еже къ нищимъ же и убогимъ, и къ страннымъ же и больнымъ руцѣ выну въ милостыню простирающю и цѣломудріемъ украшающуся. Тако же и благовѣрный ея князь Романъ зѣло бяше милостивъ, созда бо во градѣ своемъ многія больницы, и нищихъ и больныхъ ту собираша, и отъ сокровищъ государства своего тыя питаше и всякими потребами ихъ наполняше. Вельми же любя чинъ священническій, яко Божія слуги, и попремногу же почиташе иноковъ, яко присныхъ Божіихъ рабовъ и заповѣдей Божіихъ дѣлателей, не зряше бо на красоту вѣка сего, ниже величашеся благородіемъ и величествомъ господства своего, но зѣло смиреніе любяше, и любовь нелицемѣрну ко всѣмъ стяжаше, гордыню же толико возненавиде, яко врага своего, и суетныхъ тоя плевелъ до конца отвращаяся, и прелести всякія въ державѣ своей изъ корене исторгаше. И яко добрый пастырь выну паствѣ своей внимаше, и сего ради вельми въ мирѣ и тишинѣ престолъ свой управляти печашеся, и всѣхъ пріемляше, и яко братію свою привѣтствованіе, и судъ праведный всегда имяше, и обидѣти боляромъ гражданъ и сиротъ въ чемъ-либо не попущаше, и насильниковъ зѣло не любяше, и ниже до княжескаго своего двора приходити тѣмъ попущаше, но и узы на таковыхъ всеяростно возлагаше, и обиду сотворшихъ отмщая. И тако зѣло престолъ княженія своего благодѣланьми уясняше, помышляте бо всегда во умѣ своемъ, яко имать о стадѣ своемъ воздати слово въ день судный. И тако добрѣ и богоугоднѣ живяше, яко прослыти добродѣтельному его житію во всѣхъ Россійскія державы градѣхъ; и того ради всѣми благовѣрными князи любимъ и почитаемъ бѣ вельми, яко великій Угличскій князь и державецъ седмоградный. Тако же и своея ему державы подданными людми и боляры всѣми зѣло почитаемъ бѣ, и всегда тыя во всякихъ службахъ своихъ покорныи себѣ зѣло имѣя благовѣрны. Тіи же, яко таковаго себѣ не точію во внѣшнихъ храбростѣхъ благовѣрнаго князя имуще преизящна и премудра, но и житіемъ видяще его чудна и святопросвѣщенна, того ради радовахуся сердцы своими, и въ мирѣ и благоденствіи велицѣмъ живуще многая лѣта. И тако сей святый и благовѣрный князь Романъ многія въ преименитомъ и пресловущемъ градѣ Угличѣ церкви Божіи и монастыри во славу Богу воздвигну и иконами и книгами и всякимъ благолѣпіемъ церковнымъ тыя зѣло украси и, вкратцѣ рещи, во всемъ подобяся древнимъ благочестивымъ царемъ и сродникомъ своимъ, и даже толико державный свой градъ Угличъ украси славою же и богатствы и благолѣпіемъ прежде его бывшихъ князей преудовли, яко рещи, и обновитися тогда при его державѣ граду Угличу сотвори, толико жительми гражданъ распространи, величествомъ же и красотою удобри, яко вмалѣ не сравнитися и великодержавному тогда, нынѣ же царствующему граду Москвѣ, и оттолѣ и пресловущее себѣ имя, яко стольный и вторый по великодержавному стяжа. И аще бы тая града красота, сокровища же благовѣрныхъ державецъ и доброта не бы отъ безбожныхъ и зловѣрныхъ Польскихъ войскъ раззореніемъ града потреблена и сожжена была, въ лѣто убіенія благовѣрнаго и христолюбиваго царя Василія 7119 (1611) отъ безбожнаго короля Польскаго Жигимонда (Сигизмунда) и плѣнившаго тогда грѣхъ ради нашихъ всю Россію, то бы тая и до днесь красота Углича града порфироносно цвѣтяше. Но грѣхъ ради нашихъ отъя Богъ отъ насъ таковую пресловущую древле градовіяршества нашего славу, ибо вся грады Россійстіи, аще тогда и плѣнени бяху, но раззоренія такого не пострадаша ни единъ, яко же градъ Угличъ законно пострада отечества своего ради, – и славоцвѣтущую свою красоту на будущую горнюю премѣни высоту; но на предлежащее да возвратимся. И тако въ таковѣмъ славнѣмъ и богоспасаемѣмъ градѣ Угличѣ богоугоднѣ всѣми прочее заповѣдьми Спаса Христа сей святый и благовѣрный князь Романъ во всякомъ благочестіи и цѣломудріи съ супругою своею Александрою много лѣтъ поживе. И преставися{11} его супруга блаженная благовѣрная и великая княгиня Александра во блаженный покой съ миромъ о Господѣ. Благовѣрный же ея господинъ, святый князь Романъ, послѣ ея, не изволи себѣ пояти вторыя супружницы, аще и безчаденъ бѣ остася. Но тогда наипаче возлюби хранити дѣвства и цѣломудрія чистоту, и на большій воздержанія подвигъ простреся, и всегда готовъ на будущая горняя преселенія, достизаніе и вседарованный себѣ вѣчный покой. Но отсюду отшествія пріятіи извѣщенъ бысть, ибо не многимъ лѣтомъ послѣ супруги своея прошедшимъ, тогда разболѣся святый конечною болѣзнію и прія извѣщеніе отъ Бога преити отъ здѣшнихъ въ будущая селенія. И призываетъ къ себѣ всѣхъ благородныхъ боляръ и славныхъ гражданъ и поучаетъ ихъ мирно жительство между собою имѣти, и любовь непреложну, такожде бѣдныхъ и сиротъ не обидѣти, и не насиловати сильнымъ немощныхъ неправды ради; и къ тому рече и сіе: «Днесь уже любимая братія моя, яко же мя видите въ велицѣй скорби и болѣзни одержима, и не надѣюся уже прочее къ тому отъ сего одра и болѣзни моея востати; вы же прочее отсюду, аще Богъ мя отъ васъ возметъ, поживите въ любви и совѣтѣ; наипаче же православную вѣру цѣлу и непорочну храните. И аще по моемъ отшествіи Богъ вамъ дастъ благовѣрнаго князя, то ему повинуйтеся во всемъ, яко же и мнѣ повиновахуся, и престолъ его правите нелицемѣрно, и души свои за него полагайте, и отъ всякихъ враговъ градъ и державу нашу охраняйте», – и по семъ прочее умолче, – и отпусти я въ домы своя вельми сѣтованныи и плачевныи по государѣ своемъ. По семъ призываетъ къ себѣ духовника своего священно-игумена Іоасафа{12} и ему исповѣдь сотворяетъ, и пріемлетъ отъ руку его пречистыхъ и животворящихъ Христовыхъ таинъ тѣла и крови Христовы, и завѣщеваетъ ему яже отъ сокровища имѣніи государства своего, по его отшествіи издати на святыя церкви и удовлити и нищихъ. И тако отпусти его во обитель свою. И послѣ него нача наипаче болѣзнь его умножатися, и въ мало дни святый преставися къ Богу въ мирѣ, въ старости маститѣ, яко же лѣтописецъ сказуетъ: вящши пятидесяти всѣхъ лѣтъ отъ рожденія своего имѣ святый, – а на престолѣ въ Угличѣ княженіе свое 23 лѣта содержавъ и зѣло добрѣ и богоугоднѣ вся дни живота своего препроводи безъ порока, успе же вѣчнымъ и блаженнымъ сномъ въ лѣто 6793 (1285) мѣсяца февраля 3 дня, на память святаго и праведнаго Сѵмеона Богопріимца и Анны пророчицы. Ему же краеграненъ стихъ: «Вознесеся отъ Углича въ небеса Романъ князь благовѣрный, и днесь является сіятельно вседневный». По семъ слышано же быть святаго князя Романа преставленіе по всему граду Угличу. И стечеся весь градъ ко двору княжескому: мужіе, и жены, и малыя дѣти, и видяху его на одрѣ лежаща, и вѣчнымъ покоемъ уснувша, и не яко умерша, но яко бесѣдующа къ нимъ словесы нѣкими (въ) поученіи, и лице его яко солнце свѣтящеся сіяніи и честнѣйшими сѣдинами яко свѣтлѣйшими звѣздами крашасеся, – зряху – и восплакашеся вельми (ради) разлученія своего со блаженнымъ. Боляре и граждане и вси людіе пришедши тамо веліимъ гласомъ горько вопіющи и жалостно рыдаху, и многая уминьная плачевная словеса и ино струйно вѣщаху. И потомъ благородніи боляре одръ съ тѣломъ блаженнаго князя Романа на рамена своя взяша, послѣдующе же ту и вси священницы, и игуменіи, и архимандриты{13} и многи граждане града соборнѣ, и надгробная пѣнія, несуще блаженнаго, пояху; съ ними же и вси граждане идуще зѣло чинно, и множайшее ихъ число, яко пять темъ. И принесоша честное тѣло святаго въ соборную Преображенія Господня церковь изъ двора княжескаго. И пѣвше надъ нимъ надгробное пѣніе соборнѣ, и погребоша въ томъ же пречеснѣмъ соборнѣмъ храмѣ святолѣпно, поблизъ благопочившихъ отца своего и брата. И тако честное тѣло святаго и благовѣрнаго князя Романа земли святолѣпно предадеся, святая же его душа, яко голубица преудобренная, въ небесная селенія возлетѣвъ, вселися. Но не остави же Богъ своего угодника надолзѣ подъ спудомъ лежати, и насъ не лиши своего призрѣнія: и подаде намъ сего крѣпкаго адаманта и незыблемаго столпа, святаго и благовѣрнаго князя Романа, нерушимаго заступника и молитвенника и ходатая къ Богу о градѣ нашемъ и о всѣхъ вѣрныхъ, яви Богъ честные мощи его нетлѣнны, много лѣтъ землею бывши сокровенны. Ибо, на основаніи старыя каменныя соборныя церкви, въ лѣть 6993 (1485) г. при державѣ благовѣрнаго и христолюбиваго, святаго и великаго князя Андрея{14} въ Угличѣ, и при его благородныхъ и святыхъ чадѣхъ великихъ князѣхъ Іоаннѣ и Димитріи Угличскихъ обрѣтены быша святьи мощи его нетлѣнныи и поставлены въ соборнѣй той же каменной церкви, и многія чудеса источахуся отъ святыхъ мощей его: слѣпіи прозираху, хроміи хождаху, нѣміи сладкоглаголивіи бываху, и всякими недуги одержиміи прикосновеніемъ гробу святаго исцѣлеваху. И отъ того времени почитаеми бяху святаго князя Романа мощи въ велицѣй чести и славѣ отъ всѣхъ гражданъ и отъ окрестныхъ весей, яко же подобаетъ святымъ. Но свидѣтельства (мощей) не бысть, зане тогда вскорѣ благовѣрнаго и христолюбиваго князя Андрея, и съ его благородными чады, братъ его Московскій князь Іоаннъ Васильевичъ, въ зависти ему во княженіи Угличскомъ, многосильною своею рукою съ княженія Угличскаго свергъ. Тогда и благовѣрнаго князя Романа честнымъ мощемъ на долго время, небреженіемъ державныхъ, во свидѣтельство произвестися отста. Аще и посади сына своего Димитрія{15} на княженіе въ Угличѣ князь Іоаннъ Московскій, но неправедне. И того ради и Богъ ихъ чудотворца мощей зрѣти лиши. Ибо святый благовѣрный князь Романъ, яко же при животѣ княженія своего, ни близъ княжескаго двора насильниковъ не пущаше приходити, тако и по преставленіи своемъ преславно тыя устрашаше. Ибо ни единожды сей Димитрій князь восхотѣ открыти гробъ святаго и, аще и со благоговѣніемъ приступаше, яко же лѣтописецъ сказуетъ – бяше бо зѣло благонравенъ и богобоязливъ благовѣрный князь Димитрій, – но не допусти его Божія сила видѣти мощи святаго князя Романа, зане, яко же речеся, неправедно его княженіе въ Угличѣ и насильное бяше: ибо дядю его роднаго и съ его чады отецъ его не точію съ престола Угличскаго согна, но и заточи его и съ чады въ темницу въ Угличѣ; да и не се токмо, но и тяжкая узы на блаженныхъ яко на осужденниковъ наложи, – еже ту и преставися святый благовѣрный князь Андрей Васильевичъ, нужнѣ уморенъ бѣ въ лѣто 7002 (1494) г. мѣсяца ноября въ 6 день. И не даша его, гнѣвъ имуще нань, погребсти съ прочими благовѣрными Угличскими князи въ соборнѣй церкви, но у западныхъ вратъ тоя церкви, на выходѣ въ паперти, да и то зѣло убогимъ погребеніемъ честное его и страстотерпческое тѣло погребоша. Но послѣди благовѣрными мужи со святыми равнѣ сей блаженный князь Андрей Угличскій почтеся, ибо по смерти вышеявленныхъ насилующихъ князей, оградиша оное мѣсто, идѣже погребенъ бысть святый князь Андрей, и надъ нимъ устроена бѣ гробница и образъ его яко же и святаго князя Романа. И аще не бы раззореніе Угличское (яко же выше речеся) отъ Литовскихъ зловѣрныхъ людей, тая гробница святаго князя Андрея, яко же и святаго князя Романа и честныя мощи сожженіемъ потреблена была, то бы и до днесь ясно зряшеся. Іоанна же и Димитрія благородныхъ его чадъ, по смерти его, сосла дядя ихъ вышереченный Іоаннъ Московскій въ заточеніе изъ отечества своего въ Переславль, потомъ на Бѣлоозеро и паки на Вологду. И тамо блаженныхъ до кончины живота ихъ заточи въ темницѣ и въ тяжкихъ узахъ, и даже двадцать девять лѣтъ, по умореніи блаженнаго отца ихъ, томяше. И тако умори и сихъ блаженныхъ. Іоаннъ на исходѣ души своея, въ темницѣ и во узахъ сидя, прія святый, великій ангельскій образъ и схиму, и нареченъ бысть Игнатій, и успе въ лѣто 7031-е (1523) г. мѣсяца маія въ 19 день. Димитрій же, не успѣвъ пріяти иноческій образъ, рыдаше по братѣ своемъ сѣдя во узахъ и темницѣ лѣтъ семнадесять (до 1540 г.) и повелѣно бысть съ него тягость сняти; но не на долзѣ тако бысть, поелику, едва минувшу году, и отъ печали и томленія вышереченныхъ внезапу нача кончатися, и едва успе причаститися страшныхъ и святыхъ таинъ тѣла и крове Христовы. И тако и душу свою въ руцѣ Богу съ миромъ предаде въ лѣто 7049 (1541) мѣсяца іюнія въ 23 день, ихъ же купно тѣлеса тамо и погребоша у Спаса въ Димитріевѣ монастырѣ, иже на Прилуцѣ. И тако отселѣ продолжися свидѣтельство (мощей) святаго благовѣрнаго князя Романа даже до лѣтъ приснопамятнаго и христолюбиваго царя Ѳеодора Іоанновича Московскаго и всея Россіи, и до убіенія святаго брата его царевича князя Димитрія Іоанновича Угличскаго. Егда бо убіенъ бысть святый царевичъ князь Димитрій въ Угличѣ повелѣніемъ Московскаго властолюбца Годунова Бориса, и тогда бывши нѣцыи благородніи посланныи боляре и священніи лица отъ царя Ѳеодора Іоанновича на погребеніе святаго благовѣрнаго царевича Димитрія въ Угличъ, и тогда мощи святаго князя Романа, Божіимъ изволеніемъ, открывше гробъ его и видѣвше нетлѣнныи лежащи и благоуханія воню испущающи въ соборнѣй церкви, и чудеса его слышавшіи, – и возвратишася въ Москву и царю о святомъ возвѣстиша. Той же Боговѣнчанный Государь зѣло христолюбивъ сый, посла свой царскій указъ ко отцу своему духовному Святѣйшему Патріарху Іову Московскому и всея Россіи, да пошлетъ отъ своего лица духовныхъ въ Угличъ и да освидѣтельствуютъ мощи святаго князя Романа совершенно, и сотворятъ ему каноны и стихиры, яко же подобаетъ святымъ. Той же такоже (бѣ) боголюбивъ и чудотворцорачителенъ, вскорѣ, въ лѣто 7103 (1595 г.), царское желаніе исполняетъ, вкупѣ же и свое патріаршеское благословеніе подаваетъ, и съ совѣтомъ всего священнаго собора посылаетъ отъ своего лица новопосвященнаго митрополита граду Казани Гермогена во градъ Угличъ и съ нимъ много священныхъ, да освидѣтельствуютъ святыя мощи благовѣрнаго князя Романа Угличскаго совершенно. Той же шедъ соборнѣ въ преславный градъ Угличъ, со всѣми священными мужи, освидѣтельствова мощи святаго благовѣрнаго и великаго князя Романа въ Угличѣ. И по семъ со благословеніемъ святѣйшаго Іова Патріарха Московскаго и всего освященнаго собора сотворша свѣтлое празднество, яко же подобаетъ святымъ, составивше бо стихиры и каноны святому, и уставивше праздновати въ лѣто 7103 (1595) г. мѣсяца октября въ 1 день, дважды въ годъ: первое на память святаго Романа пѣвца вышереченнаго мѣсяца октября въ 1-й день – рожденіе святаго, – второе же на память святаго и праведнаго Сѵмеона Богопріимца и Анны пророчицы мѣсяца февраля въ 3-й день, преставленіе святаго. Но нѣкій лѣтописецъ сказуетъ сему несходно; ибо пишетъ, яко свидѣтельство бѣ мощемъ святаго въ лѣто 7113 (1605) г. и при Патріархѣ же Іовѣ Московскомъ; но недостовѣрно сей пишетъ, ибо въ сіе лѣто уже царствова въ Московскомъ государствѣ лестію Разстрига Григорій, а святѣйшій Патріархъ Іовъ отъ него согнанъ бысть съ престола патріарша, и заточенъ, и очей лишенъ бысть, зане не вѣнча его съ Маринкою некрещеною, сущею отъ Польскія вѣры, и тогда отъ него бысть на престолѣ сильно посаженный избранный сосудъ Разстригинъ, неправильный, не реку, патріархъ, но бискупъ (епископъ) Латинолюбивый Игнатій, того ради и недостовѣрно свидѣтельство того лѣтописца; но на предлежащее да возвратимся. И тако тогда, по немнозѣмъ прошествіи времени, егда, грѣхъ ради нашихъ, яко выше речеся, попусти Богъ Московскому государству плѣнену отъ зловѣрныхъ латинниковъ и новыхъ отступниковъ быти, а преславному граду Угличу раззоритися, всему сожженну быти отъ тѣхъ, тогда безбожніи и до конца богоотступни полякове не убояшася всемогущаго Бога, ни святаго Его угодника устрашишася, но яко же и прочихъ града Углича всѣхъ людей сожигаху и главопосѣкаху, тако и на святаго адобѣсніи руцѣ свои скверніи возложиша, ибо святаго князя Романа честныя мощи нѣгдѣ христіаны скрыты обрѣтши, и видѣвше ихъ лежими въ драгосребряно-позлащенной и бисеромъ и каменіемъ украшенной рацѣ, и нача тое отъ чудотворцевой раки, аки пси хапающе скверными руками, рвати; наконецъ же и въ послѣдняя пришедши злая, яко же и днесь видимъ тѣхъ злобѣсныхъ не почитающихъ угодниковъ Божіихъ, ни ихъ честныхъ и чудотворныхъ мощей, но и ругающихся. И тогда, – о долготерпѣнія ти Христе Боже, – и тимъ попущеніемъ, увы мнѣ, тебѣ пресвятаго отца моего многочудесныя, святыя мощи вонъ изъ сребряно-позлащенной многочудотворной раки опровергши выкинуша на лице земное зѣло безстуднѣ, и яко же Христа моего убившіи преокаянніи, увы мнѣ, жидове начаша на тебе святаго отца моего пресвятыя мощи плевати, и ругающими словесы досаждати, и скверными ногами попирати, и по земли влачити зѣло на болѣзновидное зрѣніе ту мучимымъ христіаномъ града; и потомъ аки пси ухватиша изъ очію болѣзновидящихъ и въ нѣкоемъ тайномъ мѣстѣ собраша множество хврастія и запалиша, и святыя мощи ту повергоша и сожгоша. Но Богъ тѣмъ (въ) отмщеніе и Господь! Ибо тѣхъ преокаянныхъ ругателей вскорѣ постиже Божій судъ: живыхъ земля, подъ ними разступившися на нѣкомъ мѣстѣ, пожре. Другіи же лѣтописи сказуютъ, яко въ церкви мощи святаго князя Романа сожгоша.
Послѣди же Божіимъ откровеніемъ явися въ нощи столпъ огненъ на мѣстѣ, идѣже сожжены быша святыя мощи благовѣрнаго князя Романа. И тако нѣцыи богоугодни то знаменiе видѣвшіи, и пріидоша тамо и видѣвши свѣтъ оный надъ кости святаго сожженніи сходящъ и оныя просвѣщающъ, и тако тѣ кости святаго Романа въ нѣкій сосудъ яко многоцѣнніи бисеріе или, истѣе рещи, яко небесный благовонный ароматъ собравши и принесше въ домъ свой и поставиша въ мѣстѣ честнѣ тѣ мужи, и не вѣдуще долгое время, чія то сожженніи кости.
И послѣди Божіимъ изволеніемъ явися тѣмъ мужемъ святый князь Романъ, повелѣвая имъ, да несутъ тіи его благовонніи сожженіи кости въ соборную церковь, и устроятъ попрежнему его честную и священную раку, и положатъ въ ней, и честнѣ ихъ почитаютъ, яко же и прежде. Онѣмъ же мужемъ все сіе повелѣніе святаго усерднѣ сотворшимъ и священную раку паки устроившимъ, и святыя кости благовѣрнаго князя Романа въ ню вложивше, и паки въ соборную церковь принесоша со псалмы и пѣснми духовными, и поставиша на правой сторонѣ, идѣже и прежде чудотворная его и многоцѣльбоносная рака стояше, поблизъ царскихъ вратъ, яже нами и до днесь выну зрима есть и покланяема его честная и многоцѣлебная всегда рака святаго; и яже и до днесь всѣмъ приходящимъ съ вѣрою и молебная пѣнія святому совершающимъ подаются отъ святыхъ мощей его изобильная благая, и недужнымъ всѣмъ здравіе источается и донынѣ неоскудное, во славу Христа Бога нашего и Его угодника и чудотворца святаго благовѣрнаго князя Романа во вся вѣки. Аминь.
«Ярославскія Епархіальныя Вѣдомости». 1876. Ч. Неофф. № 48. Стб. 753-768; № 49. Стб. 771-775.
⸭ ⸭ ⸭
ПОХВАЛА
Святому Благовѣрному Князю
РОМАНУ УГЛИЧСКОМУ,
новому чудотворцу.
Сія, братія, слышавше, – таковое страстотерпческое и подвижническое житіе святаго благовѣрнаго князя Романа Угличскаго чудотворца и яже по обрѣтеніи честныхъ мощей его таковая содѣявшаяся дивная чудеса, – како воспишемъ или что возглаголемъ или кое хваленіе бренными нашими усты великому отцу принесемъ, кое ли же приложеніе славѣ его содѣлаемъ или кому уподобимъ и (его), твердаго сего адаманта и страстотерица Христова? Обаче пріидите, братіе, днесь, пріидите, любимицы, аще и недостаточніи есмы къ похваленію святаго отца сплести словесный свитокъ. Но поелику насъ коегождо просвѣти благодать Святаго Духа, и тако стецемся вси на радостотворное сіе духовное пиршество и восхвалимъ сего святаго отца, его же Богъ прослави, благовѣрнаго князя Романа Угличскаго чудотворца. И мы того, елика возможно, сице восхвалимъ: О достохвальный и славоцвѣтущій князе Романе! Что тя наречемъ и чему уподобимъ? Ангела ли тя наречемъ? Зане во плоти яко ангелъ на земли пожилъ еси. Человѣка ли тя наречемъ? Но выше человѣческаго естества дѣло добродѣтелей совершилъ еси. Страстотерпца ли тя или исповѣдника и мученика наречемъ? Ей, страстотерпческій подвигъ прошелъ еси и исповѣдническій, во изгнаніи трудился еси и мученическое натрижненіе (натружденіе) въ сожженіи честныхъ мощей твоихъ претерпѣлъ еси. Сего ради со страстотерицы равна тя вмѣняемъ, и со исповѣдники обща исповѣдника прославляемъ, и съ мученики же яко истиннаго мученика вѣнчаемъ. Съ постники ли же тя восхвалимъ или со преподобными? Съ подвижники ли исповѣдуемъ или пастыри? Съ дѣвственники ли тя ублажимъ или милостивіи? Но како по достоинству твоя неисчетныи и приснотекущіи труды и подвиги житія твоего сказати возговѣемъ, ихъ же исчести нѣсть возможно, ниже по единому описати. Сего ради, отцы и братія моя, пріидите и вкупѣ торжество святаго съ нами восхвалите и въ день памяти его души ваши просвѣтите, всякая времена мирскихъ вещей далече отъ себе отвергше; пріидите, и яко новорасленныя отрасли винограда Христова отъ неистощимаго источники даръ благихъ почерпите; пріидите, и очиститеся всякія душевныя и тѣлесныя грѣховныя неисцѣльныя проказы; днесь молитвами чудотворца исцѣленіе совершенное душамъ нашимъ и тѣломъ пріимите и духовно возвеселимся. Пріидите, вси чудотворца любящіи, христоименитіи людіе, днесь псалмы и пѣсньми духовными празднуемъ съ похвалами. Пріиди же и ты, граде Угличе, въ день памяти святаго ти отца благовѣрнаго и великаго князя Романа и возвеселися и восхвали отъ тебе прозябшаго предивнаго сего отца. Пріидите же и вси людіе, соберитеся во святую церковь и почтите день святаго отца духовными торжествы и насладитеся духовнаго сего пиршества, отвергше отъ себе всякъ мракъ грѣховный, и, изъ корени его исторгнувши, далече отъ себе отвержемъ, днесь бо намъ исцѣленіе страстей отъ вседаровитаго сего отца мощей чудотворно возсія. Сего ради, братіе, припадающе ко многоцѣлебнѣй и священнѣй рацѣ его, души и тѣлеса наша покаянія свѣтомъ очистимъ отъ всякія грѣховныя скверны, и умъ и очи сердечніи щедротами отца просвѣтимъ, хощетъ бо намъ днесь святый нашъ отецъ дати отпущеніе грѣховъ и обновити души наша первымъ достоинствомъ, ибо и трапезу духовную днесь намъ торжества пѣсней предпостави, ея же благоговѣйно насыщшеся тѣло наше духовно питаемъ и душу свѣтлѣйшу содѣловаемъ. Се бо истинная трапеза исполнена духовныхъ брашенъ; се хлѣбъ негиблющія пищи; се цѣломудрія пшеница; се божественный огнь, святаго отца гробъ, всякое наше грѣховное терніе попаляющій. Сей убо Углича славна града святый отецъ, паче же и всея Россіи боголѣпное украшеніе, князь преславнословущій Романъ Владиміровичъ изъ младыхъ ногтей Христа возлюби и пречистую Его Матерь и ихъ угодшихъ святоживущихъ отецъ и житіе ихъ въ себѣ совершенно воображаше. Церковь же Христову толико преукраси, яко же преудобренную цареву невѣсту всякимъ благолѣпіемъ уясни пресвѣтло; и православіемъ тую яко свѣтоблистающее солнце огради твердо, и всякое еретическое и Агарянское зловѣріе златоглаголивыхъ устенъ твоихъ ученьми, яко острыми ногты, орудія тая до конца растерзаше и православную вѣру, во изгнаніи отъ Агарянъ, терпѣнія своего, во вся земныя концы уясняше, неправду же всякую изъ корене самыхъ тоя страстей исторгаше, и обидимыхъ заступаше, вдовъ и сиротъ и алчущихъ всѣхъ питаше, и нагихъ одѣваше, и паче, бяше всѣмъ отецъ и пастырь, и учитель, и заступникъ благоприступенъ и милостивъ до конца. Тако и днесь явися граду нашему Угличу твердый и крѣпкій и непреоборимый отъ всякихъ бѣдъ хранитель и заступникъ и молитвенникъ ко Христу Богу за люди своя теплый и непрестанный, и вся недуги и болѣзни наша душевныя и тѣлесныя явися врачъ безмездный и скорый исцѣлитель. Тѣмъ же убо молю тя: О благовѣрный великій княже Романе, болѣзни моя телѣсныя и струпъ души моея грѣховныя губою милосердія твоего, тыя очистивъ, исцѣли, преблаженне, и мирное житіе подаждь ми до конца имѣти, и пріими малое сіе отъ недостойныхъ моихъ устенъ тебѣ принесшееся хваленіе, яже дерзнухъ азъ многогрѣшный тебѣ принести; и милостію своею и щедроты неистощимыми отъ всѣхъ врагъ видимыхъ и невидимыхъ покрый мя до конца нерушима и непреодоленна; и подаждь благовѣрному царю нашему на враги побѣду и одоленіе; и молися за державу сродникъ своихъ и за всю Россію и за вся христіаны о еже сохранитися намъ отъ безбожныхъ Агарянъ и междоусобныя брани, вся христіаны до конца избави, и миръ и тишину церквамъ подаждь и всѣмъ вѣрнымъ единомысліе. И поотсюду отшествіи вѣчныхъ и блаженныхъ не лиши насъ рабовъ твоихъ покоевъ о Христѣ Іисусѣ Господѣ нашемъ, Ему же слава купно со Отцемъ и со Пресвятымъ и Животворящимъ Духомъ нынѣ и присно и въ безконечныя вѣки. Аминь.
⸭ ⸭ ⸭
Сіе житіе святаго благовѣрнаго князя Романа Угличскаго сотворено въ пречестнѣмъ храмѣ его (съ мѣсяца октября 1 дня) съ древнѣйшихъ лѣтописцевъ и достовѣрныхъ географическихъ исторіописателей, понеже собственнаго его житія, написаннаго прежде съ февраля мѣсяца 3-го числа, списати гдѣ, послѣ Угличскаго отъ Литовскихъ людей раззоренія, не обретохомъ, и того ради сія вновь, чрезъ многая лѣта прешедше, написахомъ, понеже многимъ россійскимъ жителѣмъ о святомъ уже и извѣстія не бяше, и не вѣмы, аще кто нѣгдѣ тое нынѣ обрящетъ. И аще неединообразно съ симъ въ нечесомъ узритъ, и да не позазритъ сему творенія нашего слову, ниже да речетъ яко лжу нѣкую на святаго сего отца здѣ сплетше написахомъ, но мы не того ради еже бы въ чесомъ на святаго отца солгати сія написавше вашему православію преподахомъ, но дабы святѣй церкви и угоднику Божію, сему святому отцу, въ прославленіе и хваленіе вѣчное озарихомъ, и невѣдущимъ въ почтеніе вѣдѣнія святаго отца и въ честь сія отъ писаній достовѣрныхъ сооружихомъ во вся вѣка. Аминь.
«Ярославскія Епархіальныя Вѣдомости». 1876. № 49. Ч. Неофф. Стб. 771-775.
⸭ ⸭ ⸭
КЪ ЖИТІЮ
благовѣрнаго князя Угличскаго Романа.
Положеніе мощей его съ 1485 до 1612 г.
Въ дополненіе къ открытому и напечатанному теперь житію благовѣрнаго князя Романа остается добавить еще нѣкоторыя свѣдѣнія о положеніи мощей его отъ 1485 г. до 1612 г., т. е. свыше чѣмъ за 120 лѣтъ. Опубликованное житіе святаго сообщаетъ нѣкоторыя подробности (см. стобцы 765, 767, 769). Но онѣ могутъ быть пополнены еще нѣкоторыми чертами изъ житія препод. Паисія Угличскаго и изъ лѣтописцевъ г. Углича (см. Яр. еп. вѣд. 1867 г. №№ 13-22). Въ связи съ этими свѣдѣніями дѣло нужно себѣ представлять такъ.
Не по мнозѣхъ лѣтѣхъ, благовѣрный князь Андрей (Васильевичъ Большой) начатъ строити каменную соборную церковь во имя боголѣпнаго Преображенія Господа нашего Іисуса Христа въ крѣпости града своего Углича. И на томъ основаніи соборныя церкви дарова ему Богъ мощи обрѣсти святаго благовѣрнаго князя Романа. И поставлены быша въ соборной каменной церкви по правую руку въ придѣлѣ Бориса и Глѣба. И многія чудеса источахуся отъ святыхъ мощей его: слѣпіи прозираху, хроміи хождаху, нѣміи сладкоглаголивіи бываху, и всякими недуги одержиміи прикосновеніемъ гробу святаго исцѣлеваху. И отъ того времени почитаеми бяху святаго князя Романа мощи въ велицѣй чести и славѣ отъ всѣхъ гражданъ и отъ окрестныхъ весей, якоже подобаетъ святымъ. И тѣ мощи святаго князя Романа цѣлы и нетлѣнны лежали въ той соборнѣй каменной церкви вящши ста двадцати лѣтъ даже до польскаго нахожденія на Россію и на градъ Угличъ. И тогда Божіимъ попущеніемъ грѣхъ ради нашихъ дерзнуша окаянніи Полякове на святаго князя Романа: раку его со святыми мощами опровергоша, честныя же мощи извергоша на полъ церковный, раку же всю ободраша и положиша въ нее нѣкоего убіеннаго литвина своего, мощи же святаго извлекоша на нѣкое мѣсто и собраша хворосту и сожгоша ихъ. Егда же граждане, по плѣненіи и разореніи Углича, начаша стекатися и разселятися въ Угличѣ, плачуще размышляли въ себѣ, како бы Богъ явилъ кости князя Романа. И умилосердися Господь на ихъ слезы и обрати плачъ ихъ въ радость и веселіе духовное, благоволи во утѣшеніе ихъ явити святыя мощи, сожженныя отъ литвы, благовѣрнаго князя Романа. Бысть обрѣтеніе сіе сице. Идѣже сожжены быша мощи благовѣрнаго князя Романа, въ нощи столпъ огненнъ явися на мѣстѣ томъ, и изъ гражданъ нѣцыи богоугодни видѣша знаменіе то и видѣша, яко и на мѣстѣ томъ свѣтъ надъ костьми святаго свѣтящъ лучами ко взятію дотолѣ, пока возмутъ тѣ изъ громады прочихъ. И тако тѣ кости собравше яко многоцѣнный бисеръ и благовонный ароматъ принесоша въ домъ свой и поставиша на мѣстѣ честнѣ, благоговѣйно служаху, не вѣдуще сего, чіи то кости. Божіимъ же изволеніемъ послѣ того явися тѣмъ мужемъ святый благовѣрный князь Романъ повелѣвая, да несутъ его кости во храмъ Преображенія Господня и положатъ по прежнему въ раку и поставятъ на деснѣй странѣ у сѣверныхъ вратъ и почитаютъ ихъ якоже и прежде. А мощей князя Романа только кости одни составовъ его, глава, костей и ребръ преднихъ и заднихъ, и обѣихъ рукъ и ногъ длинныя кости и свирѣли собраны отъ вѣрныхъ человѣкъ и паки во гробницу честно положены и донынѣ всѣми почитаеми суть и чудеса паки творятъ съ вѣрою ко святому приходящимъ.
⸭ ⸭ ⸭
Житіе сего благовѣрнаго князя, по свидѣтельству «повѣсти о чудесахъ святаго», погибло въ Углицкое литовское разоренье въ 1609 г., когда, по житію препод. Паисія, «многи писанія потреблены отъ тѣхъ злыхъ человѣкъ и сожжены быша», а по свидѣтельству нѣкоего «Лѣтописца о началѣ града Углича» (выдержки въ Яросл. епарх. вѣд. 1867 г. №№ 13-22), оно послѣ свидѣтельства мощей митрополитомъ Казанскимъ и Свіяжскимъ Гермогеномъ «взято въ патріаршу ризницу». Уже изъ противорѣчивыхъ сихъ показаній открывается посему, что сказаніе о гибели житія въ польскій разгромъ – изобрѣтенія позднѣйшаго и что древняго житія князя Романа никогда и не существовало. Мощи благовѣрнаго князя открыты чрезъ 200 лѣтъ послѣ его кончины; тогда же конечно время пришло и составленію житія. Но безъ письменныхъ документовъ о человѣкѣ жившемъ назадъ тому 200 лѣтъ немногое напишешь.
«Ярославскія Епархіальныя Вѣдомости». 1876. № 52. Ч. Неофф. С. 827-829.
{1} Житіе благовѣрнаго князя Романа Угличскаго, составленное по рукописному «Лѣтописцу города Углича» Н. Ѳ. Лавровымъ, напечатано въ 19-мъ № Яросл. епарх. вѣд., части неоффиціальной, за 1880 годъ. – Повѣсть о чудесѣхъ святаго благовѣрнаго великаго князя Романа, Угличскаго чудотворца, напечатана въ неоф. части Яросл. епарх. вѣд. №№ 46, 47 и 48 за 1873 годъ. Нынѣ г. Лавровымъ, изъ библіотеки мѣстнаго купца Ѳ. Гр. Кочурихина, сообщено намъ сіе житіе благовѣрнаго князя. Оно содержится въ рукописи XVIII вѣка, писанной полууставомъ и составлено нѣкогда вѣроятно мѣстнымъ протоіереемъ.
{2} Октября 1-го 1235 г.
{3} Въ иночествѣ Евдокія, † 1278 г. и погребена въ Угличѣ.
{4} Воскресенскаго Угличскаго монастыря.
{5} Род. 1233 г. 4 іюля.
{6} 27 декабря.
{7} Въ 1255 г.
{8} Въ супружествѣ имѣлъ блажен. княг. Іустину; она † 1278 г., вмѣстѣ съ княгинею Фотиніею-Евдокіею (см. выше); память блаж. княг. Іустины Угличской 2 октября.
{9} Кириллъ II, 1230-1262 гг.
{10} Съ 1245 г.
{11} † 1281 г.; память 21 апрѣля.
{12} Воскресенскаго Угличскаго монастыря.
{13} По повѣленію св. Игнатія I, епископа Ростовскаго и Ярославскаго.
{14} Кн. Андрей Васильевичъ Горяй родился 19 августа 1446 г. въ г. Угличѣ; въ Угличѣ княжилъ съ 1462 г. по сентябрь 1492 г.; въ супружествѣ имѣлъ съ 27 мая 1470 года княгиню Елену Романовну, урожд. княжну Мезецкую; имѣлъ отъ нея двухъ сыновей Ивана и Димитрія и двухъ дочерей; умеръ въ заточеніи 6-го ноября 1494 года.
{15} Кн. Димитрій Ивановичъ Жилка, родился 1482, † 1521 г.
⸭ ⸭ ⸭
ПОВѢСТЬ
о чудесѣхъ
святаго благовѣрнаго великаго князя РОМАНА,
Угличскаго чудотворца.
(Списана вкратцѣ)
Чудо 1-е.
Бысть въ лѣто 7113 (1605) мѣсяца марта во 2-й день человѣкъ нѣкій, именемъ Іоаннъ, Ярославскаго уѣзда, села Сѣры земледѣлецъ, жена же ему бѣ Гликерія именемъ и на сей женѣ показа Богъ чудо преславно, угодника своего молитвами. Случися женѣ той болѣти внутреннею и щепотною болѣзнію, и толико пострада отъ болѣзни тоя, яко главѣ ея къ ногамъ прикорченнѣй быти и продолжися болѣзнь ея съ пять лѣтъ тако томима и живота своего отречеся, пищи же и сна мало пріемля, и врачемъ много имѣнія раздавши, пользы не обрѣте; пріиде же благій помыслъ въ сердце ея, повелѣ мужу своему на Углечъ отвезти себе ко святѣй соборнѣй церкви Преображенія Господа нашего Іисуса Христа и поставити въ придѣлѣ святыхъ страстотерпецъ Бориса и Глѣба, идѣже мощи благовѣрнаго князя Романа, онъ же съ радостію сотвори тако, и еже къ молебному пѣнію всякая приготовивъ, притече ко святому и мольбу совершивши, и цѣловавши раку святаго и воду священную пивши, и въ томъ часѣ исцѣленіе получи и благодаряще Бога отыдоша въ домъ свой, радующеся, и святаго прославляюще, и обѣщавшееся на всякое лѣто приходити на память его.
Чудо 2-е.
Того же дни 2 марта инъ нѣкто, слуга болярина нѣкоего князя Ѳеодора Іоанновича Мстиславскаго, воинъ Игнатій, нарицаемъ Лихачевъ, живый въ предѣлахъ града Ярославля, въ Юхотской волости, и сему отъ рожденія издѣтска случися отъ нечистаго духа мучиму быти, на новый мѣсяцы нападаше нань, и того ради злаго недуга, боляринъ пусти его отъ себе; онъ же много пострада, пребысть тако мучимъ отъ духа лукаваго даже до 20 лѣтъ. И увѣда о чудесѣхъ святаго, яко многа исцѣленія подаетъ приходящимъ къ нему съ вѣрою и пріиде на Углечъ въ соборную церковь, и ста у раки святаго въ вечернее время, со слезами моляся о исцѣленіи своемъ и пребысть всю нощь у раки святаго и по заутреннемъ пѣніи молебная совершивъ и цѣлова образъ святаго и отъ воды священныя испивъ и разумѣ, яко молитвами святаго отъ нечистаго духа свободися, и оттолѣ начатъ часто приходити ко святому, молебная совершая.
Чудо 3-е.
Того же дни нѣкая жена Іоакинфова, нарицаемая Коробкова, Ирина именемъ, съ посаду Алексѣевскаго монастыря слободы страждущи ей костоломнымъ недугомъ лѣтъ 14, томима рукама и погама изнемогаше, живота отрицаяся, и моляшеся стоящи у раки святаго отъ вечерня пѣнія, и молебная совершивши, и въ третьемъ часу нощи молитвами святаго чудотворца благовѣрнаго князя Романа, преславно исцѣленіе пріятъ и бысть здрава, яко николиже пострада отъ болѣзни и повѣда всѣмъ исцѣленіе свое и вси людіе видѣвшею здраву, и прославиша Бога и угодника Его.
Чудо 4-е.
По семъ же ино чудо хощу вамъ повѣдать, еже содѣяся мѣсяца марта въ 3-й день. Бѣ въ предѣлѣхъ града Углеча нѣкій иноземецъ родомъ литвинъ, Іоаннъ именемъ, Христофоровъ нарицаемъ, и у сего жена бѣ именемъ Мавра, и сей случися въ недугъ лютъ впасти яко всѣмъ удомъ ея разслабитися и корченою болѣзнію томима бѣ и продолжися болѣзнь ея даже до 20 лѣтъ, и живота отчаявся, ожидая кончины своея; услышавъ же мужъ ея святаго чудотворца благовѣрнаго князя Романа чудеса, яко многа исцѣленія творитъ Богъ его ради приходящимъ съ вѣрою и поятъ жену свою, и со тщаніемъ пріиде ко святому и яко начаша пѣти молебная, абіе возста жена, приближися къ рацѣ святаго и сотворивше молебная и приложися къ мощемъ святаго и въ томъ часѣ исцѣленіе получи; мужъ же ея подаде потребная церкви, и отыдоша въ домъ свой, славяще всесильнаго Бога и угодника его похваляюще чудеса, яко молитвами его отъ таковаго злаго и многолѣтняго недуга вскорѣ свободися и вмѣсто смерти животъ ей дарова.
Чудо 5-е.
Того же дни, человѣкъ нѣкій Кайдала Головина, именемъ Фотій, и сему случися впасти въ недугъ лютый, и лежаще безъ памяти осмь дней, и людей не познаваше и отъ болѣзни тоя духъ лукавый прикоснуся ему и много ему пострадавшу даже до 20 лѣтъ и принесоша его къ рацѣ, и пѣша молебная и водою священною окропивше его, и въ томъ часѣ цѣльбу пріятъ и возставъ приближися къ рацѣ святаго, и цѣлова мощи его и повѣда всѣмъ исцѣленіе свое, людіе же видѣвше и прославиша Бога о чудеси семъ.
Чудо 6-е.
Мѣсяца марта въ 4-й день сіе содѣяся. Нѣкій христіанинъ бѣ Ярославскаго уѣзда, Юхотскія волости, села Никольскаго, именемъ Кондратъ; у сего жена бѣ Ирина именемъ, и сей случися впасти въ болѣзнь люту зѣло, чревомъ изнемогаше и ломотною болѣзнію, и пребысть въ болѣзни той 16 лѣтъ страждущи и услыша о чудесѣхъ святаго чудотворца благовѣрнаго князя Романа и взявъ потребная, со тщаніемъ пріиде ко святому, моляся о исцѣленіи своемъ, и яко начаша пѣти молебная, и въ томъ часѣ разумѣ, яко облегчися болѣзнь ея, исповѣда всѣмъ исцѣленіе свое, и совершивъ молебная и цѣлова мощи святаго, и отыде въ домъ свой здрава, хваля Бога и угодника Его.
Чудо 7-е.
Мѣсяца марта въ 5-й день человѣкъ нѣкій пріиде изъ Пошехонья Княжича городка, Симеонъ Сергѣевъ именуемъ и приведе къ рацѣ святаго бѣснаго человѣка, именемъ Андрея, нарицаема Богданова, злѣ мучима отъ нечистаго духа 15 лѣтъ; и начаша пѣти молебная въ придѣлѣ святыхъ страстотерпецъ Бориса и Глѣба, идѣже мощи святаго, и во время святыя литургіи въ соборнѣй церкви преславно исцѣленіе получи, и бысть смысленъ яко николиже пострада, и цѣловаше мощи святаго и отъ воды священныя испивъ, и отыдоша въ домы своя, благодаряще Бога и угодника Его о преславномъ чудеси.
Чудо 8-е.
Того же дня пріиде нѣкій священникъ Бѣжецкаго Рерху горы Кесовы, церкви Іоанна Предтечи, съ женою своею Ѳеклою именемъ, бѣ бо жена его больна очима, страждущи 30 лѣтъ, мало видѣ свѣта, слезы безпрестани текоша изъ очію ея, и ставши у раки святаго и молебная совершивше и цѣловавше мощи святаго и водою священною окропившеся, и абіе цѣльбу пріяша молитвъ ради святаго чудотворца благовѣрнаго князя Романа; въ томъ часѣ слезное теченіе преста и болѣзнь облегчися, и помолившеся отыдоша въ домъ свой, благодаряще Бога и святаго прославляюще.
Чудо 9-е.
Того же мѣсяца въ 6-й день инъ нѣкто пріиде отъ предѣлъ града Ростова, Курышкинскіе волости, веси Гаврищъ нарицаемы, христіанинъ Стефана Сабурова, именемъ Никита, одержимъ болѣзнію грызущею 17 лѣтъ и тако пострада, яко ногамъ и рукамъ его скорчитися, послѣдиже и вся составы его сокрушишася, и тако ему страждущу еще два лѣта бывшу раслабленну; и сего принесоша къ рацѣ святаго и молебная совершивше и по заутреннемъ пѣніи на 1 часу дни прикоснуся къ рацѣ святаго, и абіе исцѣленіе получи, возставъ и помолися довольно и отыде здравъ, хваля Бога и угодника Его святаго чудотворца благовѣрнаго князя Романа.
Чудо 10-е.
Того же дни приведе къ рацѣ святаго Угличскаго уѣзда нѣкій сынъ болярскій, именемъ Іоаннъ, Курбатовъ нарицаемъ, жену свою, именемъ Ирину, одержиму различными недуги нутреннею и главною болѣзнію, руцѣ же и нозѣ ея сокрушишася отъ грызущія болѣзни и вся уды ея послабѣша отъ различныхъ болѣзней. Тако страждущей ей три лѣта, разслаблена лежащи и пѣвше молебная у раки святаго съ водоосвященіемъ, по совершеніи же молебнаго пѣнія приложиша ю къ рацѣ святаго, и воды священныя испивъ, и въ томъ часѣ исцѣлѣ отъ болѣзни, и вся уды ея исправишася, и бысть здрава, яко николиже болѣвъ. Людіе же, видѣвше чудо преславное, хвалу воздаша Богу и угоднику Его святому князю Роману.
Чудо 11-е.
Того же дни въ 7 часу, по отпущеніи святыя литургіи предстояще у раки святаго Угличскаго уѣзду, Королевичевы вотчины, села Балакирева нѣкоего христіанина дѣвица Гликерія именемъ, отъ рожденія бѣ двадесяти лѣтъ, бѣ больна очима и отъ великія болѣзни ослѣпѣ, и не видѣ свѣта, совершающей же ей молебная, сію святый прозрѣти сотвори.
Чудо 12-е.
Того же мѣсяца въ 7 день человѣкъ нѣкій Суздальскаго уѣзда, государева дворцоваго села Лопати, именемъ Іоаннъ, и у сего бѣ на правой нозѣ его язва люта зѣло, и отъ великія болѣзни прикорчися нога его къ стегну его, и тако страждущу ему дній двадесять. И по заутреннемъ пѣніи стоя у раки святаго на единой нозѣ, и нача пѣти молебная. Святый же на молебномъ пѣніи по 3-й пѣсни цѣльбу ему дарова, человѣкъ же той возопи веліимъ гласомъ, повѣда всѣмъ исцѣленіе свое, и преже бывшее ему отъ святаго явленіе: живущу ему въ Суздалѣ, издѣтска обѣма ногама болѣнъ бѣ, яко не могущу ему ни мало поступити, и тамо явленіемъ святаго благовѣрнаго князя Романа, во снѣ ему приснвашася здравіе ему подадеся и правѣ ходити того сотвори; и совершивше молебная отыде благодаря Бога и чудеса святаго прославляя.
Чудо 13-е.
Того же дни пріиде къ рацѣ святаго мужъ нѣкій отъ дальнихъ странъ изъ поморія именемъ Василій, бѣ деснымъ окомъ слѣпъ 7 лѣтъ, лѣвымъ же окомъ два лѣта скорбя, и беспрестани слезы текоша, и сего на молебномъ пѣніи святый деснымъ окомъ прозрѣти сотвори и лѣвое око отъ болѣзни исцѣли и теченіе слезъ устави. Онъ же совершивъ молебная, и цѣлова раку святаго и хвалу воздавая всесильному Богу, даровавшему такую благодать угоднику своему, и церкви потребная подаде и отыиде здравъ восвояси.
Чудо 14-е.
Того же дни пріиде Углечскаго Покровскаго монастыря слуга именемъ Симеонъ, скорбя лѣвою ногою, не приступая нимало на ногу свою лѣтъ тридесять. И во время святыя литургіи обрѣте себе здрава, яко николиже пострадавша отъ болѣзней и совершивши молебная и цѣлова раку святаго, и отыде пѣшъ въ домъ свой, хваля Бога и угодника Его.
Чудо 15-е.
Еще и сіе подобаетъ намъ повѣдати въ томъ же часѣ на святѣй литургіи содѣявшеся. Бѣ нѣкоего иноземца Антонія именемъ, родомъ нѣмчина, прапорщика нарицаема христіанинъ именемъ Михей, одержимъ нутреннею грызущею болѣзнію, имѣя на обою лону своею вредъ великъ зѣло, и пребысть въ болѣзни той лѣтъ пятьдесятъ страждущи и живота отчаявся. Сей пріиде къ рацѣ святаго благовѣрнаго князя Романа, и во время святыя литургіи совершающу ему молебная, внезапу обрѣтеся здравъ, славу Вседержителю воздавше Богу, дивяся изрядному чудеси, и сродникомъ своимъ писаніемъ здравіе свое повѣдаше и ужасе слышавшихъ, яко отъ такова лютаго вреда многими лѣты закоснѣвша, вскорѣ исцѣлѣніе получи молитвами святаго; онъ же помолився довольно, и церкви потребная подаде, и отыде здравъ восвояси.
Чудо 16-е.
Того же числа, въ 1-мъ часѣ дни, Углечскаго уѣзду, села Зеленцова, Рождественскій попъ Іоаннъ приведе жену свою Мавру именемъ, мучиму зѣло отъ нечистаго духа, яко всѣмъ удомъ ея сокрушитися отъ мученія лукаваго духа; и тако страждущи ей десять лѣтъ: и сію держаще у раки святаго молебная совершающи, ее же святый преславно исцѣли, и вся уды ея оздравишася, и отъ духа нечистаго свобожденіе дарова, и бысть здрава, яко николиже пострада, и сіе видѣвше люди воздаша хвалу Богу и угоднику Его.
Чудо 17-е.
Съ нею же бѣ ина нѣкая вдова, того же села Зеленцова, Анна именемъ, ушима неслыша, и сію святый слышати сотвори.
Чудо 18-е.
Тоя же нощи человѣкъ нѣкій Бѣжецкаго Верху горы Кесовы съ посаду Прокопій именемъ, приведе жену, Домнику именемъ, очима вельми страждущу щепотною болѣзнію, и отъ тоя великія болѣзни ослѣпѣ, не видѣ свѣта 30 лѣтъ, сію святый благовѣрный князь Романъ сотвори прозрѣти.
Чудо 19-е.
Тоя же нощи бѣ нѣкто отъ предѣлъ Кашинскихъ, Колязина монастыря, Городецкіе волости, именемъ Кондратъ и сей приведе жену свою, Дарію именемъ, къ рацѣ святаго, костоломнымъ недугомъ одержиму и очима страждущу, и власомъ растущимъ изъ очію ея и сія стояще на томъ же молебномъ пѣніи у раки святаго и въ томъ часѣ отъ недуга свободися и очима святый преславно исцѣленіе дарова.
Чудо 20-е.
На томъ же молебномъ пѣніи стояще слуга Кириллова монастыря Василій именемъ; страждущу ему главною болѣзнію и ушима не слыша, и отъ великія болѣзни выя его на сторону искривися и тако ему страждущу лѣтъ 12 и сего святый благовѣрный князь Романъ преславно исцѣли, выю его правѣ устрои и ушима слышати сотвори.
Чудо 21-е.
Инъ нѣкто съ Углеча съ посаду Захарій именемъ Аврамовъ нарицаемый и у сего жена, Евлампія именемъ, одержима бѣ различными болѣзнями, главою и чревомъ изнемогаше, руками же и ногами боляше и тако ей страждущи 4 лѣта, деснымъ же окомъ мало свѣта видѣ, 6 лѣтъ скорбяше, безпрестанни слезы течаху изъ очеси ея, и сію святый въ третіемъ часѣ нощи на молебномъ пѣніи отъ различныхъ болѣзней исцѣли, и правымъ окомъ чисто зрѣти устрои.
Чудо 22-е.
Ниже сему чудеси хощу потаену быти, еже содѣя святый мѣсяца марта въ 8-й день. Нѣкій христіанинъ отъ предѣлъ града Углеча, села Чюрьякова, Владиміръ именемъ, нарицаемъ Дружининъ, и сему нѣкогда случися на лѣсу сѣщи дрова и повреди руку десную, и нача скорбѣти и продолжися болѣзнь его 18 лѣтъ, яко не владѣти ему рукою, и сей пріиде къ рацѣ святаго, молебная совершая въ часъ 7-й дни; по совершеніи же пѣнія цѣлова мощи святаго и абіе утвердися рука его здрава яко другая и отыде въ домъ свой, славя Бога и угодника его благовѣрнаго князя Романа.
Чудо 23-е.
Того же дни инъ нѣкто отъ предѣлъ града Ярославля, христіанинъ князя Данила Пиховскаго, Антоній именемъ, болѣ очима три лѣта и отъ великія болѣзни ослѣпѣ, и не видѣ свѣта лѣто едино и 3 мѣсяцъ; и сего приведоша къ рацѣ святаго, и молебная совершивше и цѣлова раку святаго, и водою священною окропивше его и въ томъ часѣ святый прозрѣти того сотвори.
Чудо 24-е.
Еще же ино чудо повѣдати хощу того же дни содѣявшееся. Бѣ нѣкій священникъ съ Углеча, съ посаду заволжскіе стороны, церкви всѣхъ святыхъ, Викулъ именемъ, и сему нѣкогда случися впасти въ недугъ лютъ зѣло, отъяся десная рука его и двѣми перстомъ къ ладони прикорченнымъ, и пребысть въ недузѣ томъ не владѣя рукою 10 лѣтъ и пришедъ къ рацѣ святаго и молебная совершивъ. Пребысть въ церкви у раки святаго, въ нощи моляся о исцѣленіи своемъ до 3 часа нощи и въ томъ часѣ молитвами святаго исцѣлѣ и утвердися рука его здрава и персты исправишася, и бысть здравъ, яко николиже пострада, и пребысть въ церкви и до утренняго пѣнія и паки соверши молебная, и хвалу воздавъ Богу и угоднику его и отыде въ домъ свой повѣда всѣмъ бывшее.
Чудо 25-е.
Въ томъ же часу и сіе чудо преславно содѣяся. Въ предѣлѣхъ града Углеча, Покровскаго монастыря, села Олелена еже есть близъ монастыря, и ту бѣ вдова именемъ Антонида Ивановская жена Турскаго, одержима бѣ нутреннею болѣзнію и костоломнымъ недугомъ, и пребысть тако страждущи 30 лѣтъ, живота отречеся и за три седьмицы до чудеси сего рука ея десная отъяся съ первыя недѣли святаго великаго поста, помысли же о чудесѣхъ святаго благовѣрнаго князя Романа, яко слыша отъ многихъ бывшая отъ него исцѣленія и пріиде къ вечерней службѣ, и ста у раки святаго, ожидая особно моленіе сотворити святому и совершивъ молебная и прикоснувся къ рацѣ святаго съ великою вѣрою, и объятъ ю теплота и явися потъ на тѣлѣ ея, и разумѣ яко исцѣлѣ отъ болѣзни, и повѣда всѣмъ бывшее; они же слышавше и прославиша Бога и угодника его святаго чудотворнаго князя Романа.
Чудо 26-е.
Того же мѣсяца въ девятый день сотвори святый чудо сіе. Бысть нѣкій священникъ именемъ Кипріанъ, иже служаще въ вотчинѣ Кириллова монастыря въ селѣ Кобановѣ, и у сего жена бѣ Аполлинарія именемъ, обѣщася ко святому ити во вторую недѣлю святаго великаго поста, и молебная совершити и но обаче солга святому и не пойде, и отъ того дни во огненный недугъ впаде, и трясавицею мучима, и рука десная у нея отъяся, яко не владѣти ею; и тако страждущи ей время не мало и внезапу явися ей святый князь Романъ во снѣ и повелѣ ей ѣхати на Углечъ и молебная совершити; она же отъ сна возставъ и легчайши бысть ей, и повѣда мужу своему явленіе святаго и исцѣленіе; онъ же возставъ и скоро пойде съ нею ко святому, и пришедше и сотворивше молебная и прощенія просяще о согрѣшеніи, еже ко святому лѣности ради не пріидоша, и злая пострадавше; цѣловавше же раку святаго, и воду священную пивше, и до конца исцѣленіе получиша, и отыдоша, сдавяще Бога и святаго чудесемъ дивящеся.
Чудо 27-е.
Того же дни по вечернемъ пѣніи, отъ предѣлъ града Углеча, вотчины князя Михаила Петровича Катырева села Краснаго, Кайдала Головина человѣкъ нѣкій Фокій именемъ, мучимъ отъ нечистаго духа вторицею по первомъ исцѣленіи своихъ ради согрѣшеній и неисправленій, яже ко святому, и паки пришедшу ему и сотворившу молебная и по 3-й пѣсни святый вторицею цѣльбу ему дарова.
Чудо 28-е.
Хощу же да и сіе не утаено будетъ, еже содѣя святый мѣсяца марта въ 19 день. Человѣкъ нѣкій отъ предѣлъ града Суздаля, государева дворцоваго села Лопатичъ, именемъ Кириллъ, бѣ боленъ: ногами не владѣлъ 8 лѣтъ яко не могущу ему ни мало возстати, и сего привезоша на Углечъ, и посадиша у раки святаго къ молебному пѣнію: онъ же со слезами моляся о исцѣленіи своемъ, и по 6-й пѣсни чтущу іерею святое евангеліе, абіе возста больный и ста у раки святаго, людіе же видѣвше и прославиша всесильнаго Бога и угодника его святаго благовѣрнаго князя Романа; онъ же, совершивъ молебная, цѣлова раку святаго, и, подавъ церкви потребная, отыде здравъ во свояси.
Чудо 29-е.
Того же числа въ нощи пріиде къ рацѣ святаго нѣкоторый человѣкъ Отланъ нарицаемъ, слуга Покровскаго монастыря, съ женою своею Евдокіею именемъ, яже бѣ правымъ окомъ слѣпа и не видѣ свѣта, и въ 7 часѣ нощи на молебномъ пѣніи молитвами святаго чудотворца благовѣрнаго князя Романа прозрѣ, и совершивше молебная и цѣловавше раку святаго, и отыдоша въ домъ свой, радующеся и благодаряще Бога и угодника Его похваляюще чудеса
Чудо 30-е.
Того же числа часу нощи бѣ у раки святаго иноземецъ нѣкій, именемъ Димитрій, родомъ гречанинъ; съ нимъ же христіанинъ его именемъ Ѳеодоръ, и сей приведе жену свою къ рацѣ святаго слѣпу очима и пострадавшу отъ болѣзни лѣто едино и шесть мѣсяцъ и ослѣпѣ, и сію святый на молебномъ пѣніи прозрѣти сотвори
Чудо 31-е.
Сіе сотвори святый мѣсяца марта въ 11 день. Бѣ нѣкто Бѣжецкаго Верху сельца Золоткова, князя Андрея Морткуна христіанинъ именемъ Василій и сей приведе дщерь свою, Дарію именемъ, къ рацѣ святаго, лѣвымъ окомъ слѣпу, три лѣта пострадавшу отъ болѣзни, сей святый на молебномъ пѣніи прозрѣніе дарова.
Чудо 32-е.
Того же часа нѣкая вдова отъ предѣлъ града Углеча сельца Порѣчья, вотчины Алексія Нагова, именемъ Антонида, хрома бѣ правою ногою 17 лѣтъ, не приступая нимало на ногу свою, и сія предстоящи у раки святаго на единой нозѣ, на томъ же молебномъ пѣніи молитвами святаго чудотворца, благовѣрнаго князя Романа, исцѣленіе получи.
Чудо 33-е.
Инъ нѣкто отъ предѣлъ Углецкихъ Кадской волости, нѣкоего Захаріи, нарицаемаго Терпигорева, христіанинъ именемъ Владиміръ, и сей приведе жену свою Марію именемъ связану, лютѣ мучиму отъ нечистаго духа, рукамъ же и ногамъ ея скорчившимся отъ томленія лукаваго духа, и не могущи ей бити руками человѣки и зубами изъядаше, кричаше же и лаяше ихъ же видѣ, сію святый на томъ же молебномъ пѣніи преславно исцѣли: отъ лукаваго духа свободи и бысть здрава яко николиже пострада, и вси людіе видѣвше, славу Вседержителю воздаша Богу и угодника его прославляюще чудеса.
Чудо 34-е.
На томъ же молебномъ пѣніи предстояше у раки святаго, отъ предѣлъ Углецкихъ, съ Мологи съ посаду, дѣвица нѣкая именемъ Ирина, слѣпа очима, не видѣ 7 лѣтъ, отецъ же ея, Савелій именемъ, держащею у раки святаго, и сію святый прозрѣти сотвори.
Чудо 35-е.
Инъ нѣкій христіанинъ села Котова, Аѳанасій именемъ, приведе къ ракѣ святаго дщерь свою Марію именемъ, слѣпу сущу очима, пострадавшу 5 лѣтъ отъ болѣзни и ослѣпшу: не видѣ свѣта, и сей святый на томъ же молебномъ пѣніи прозрѣніе дарова.
Чудо 36-е.
Того же часа бѣ нѣкто отъ предѣлъ града Ярославля села Сѣры именемъ Андрей и сей приведе жену свою Стефаниду именемъ, различными недуги одержиму, яко руками и ногами не владѣти ей, и ушима не слыша, и тако страждущи ей 10 лѣтъ, сію святый на молебномъ пѣніи отъ различныхъ болѣзней исцѣли и ушима слышати сотвори.
Чудо 37-е.
Ниже и сія чудеса святаго забвенію предати лѣпо, ихъ же исцѣли святый марта въ 12 день. Бѣ нѣкто Бѣжецкаго Верху именемъ Димитрій Толмачовъ и у сего бѣ дщи дѣвица Евѳимія именемъ, главною болѣзнію одержима, и оть великія болѣзни ушима не слыша и пребысть въ болѣзни той 4 лѣта, отецъ же ея врачевъ призываше и много имѣнія раздавъ и не возмогоша ю исцѣлити; услышавъ же о святомъ благовѣрномъ князѣ Романѣ, иже содѣя чудотвореніе, яко многимъ бываютъ отъ него исцѣленія и поятъ дщерь свою, и приведе ю къ рацѣ святаго къ молебному пѣнію, по совершеніи же пѣнія къ рацѣ святаго приложиша ю и отъ воды священныя испивъ, и въ томъ часѣ святый исцѣли ю отъ болѣзни, и ушимать слышати сотвори.
Чудо 38-е.
Еще же и сему чудеси не подобаетъ умолчану быти, но паче проповѣдати. Бысть того же дни отъ предѣлъ Кашинскихъ, села Полежнева, нѣкоего Іоанна именемъ, прозваніемъ Голоченова, человѣкъ Фома именемъ, сей приведе жену свою, Ксенію именемъ, къ рацѣ костоломнымъ недугомъ одержиму, и лѣвую руку суху имущи, и персты ея къ ладони прикорчены, и пострада въ недузѣ томъ 12 лѣтъ; держащи ю у раки святаго, молебно пѣніе совершиша, и къ рацѣ святаго приложиша ю и водою священною окропиша и вредная мѣста ея, и въ томъ часѣ святый отъ костоломнаго недуга исцѣли, и сухую руку здраву сотвори; видѣвше же людіе удивишася о преславномъ чудеси, славу и благодареніе воздаша Богу, прославляющему угодника своего.
⸭ ⸭ ⸭
Лѣта 6763 преставленіе святаго благовѣрнаго
князя Романа Владиміровича Углецкаго новаго чудотворца.
А обрѣтены чудотворныя мощи его на основаніи соборныя церкви, Боголѣпнаго Преображенія Господа Бога и Спаса нашего Іисуса Христа
Рожденіе святаго мѣсяца октября въ 1-й день на память преподобнаго отца нашего Романа, пѣвца кондакареви.
И явленіе преславныхъ чудесъ его бысть въ лѣто 7113 мѣсяца февраля въ 3 день.
Свидѣтельствованы же чудеса его святыя того же лѣта Казанскимъ митрополитомъ Гермогеномъ и по благословенію святѣйшаго киръ Іова патріарха Московскаго и всея Россіи сотворены стихиры и каноны святому благовѣрному князю Роману, тщаніемъ и труды воеводы Симеона Романовича Олферьева, да инока Сергія честныя обители пресвятыя Троицы, Сергіева монастыря, Переславля Залѣсскаго.
Житіе же святаго и первыя чудеса его февраля съ третьяго числа написаны были съ житіемъ его вкупѣ и послѣ Углецкаго литовскаго раззоренія житія и первыхъ чудесъ его не обрѣтохомъ гдѣ списати, точію мало нѣчто здѣ отъ чудесъ его написахомъ того же году марта со втораго числа.
«Ярославскія Епархіальныя Вѣдомости». 1873. Ч. Неофф. № 46. С. 374; № 47. С. 377-382; № 48. С. 385-388.
⸭ ⸭ ⸭
Тропарь, гласъ 4-й:
Измла́да яви́лся еси́, Богому́дре,/ кня́же Рома́не всеблаже́нне,/ Боже́ственный сосу́дъ избра́нъ Бо́гови,/ и ны́нѣ то́чиши намъ мно́гая исцѣле́нія,/ и вся неду́ги потопля́еши,/ и спаси́ градъ свой У́глечъ,/ и всѣ́хъ вѣ́рныхъ сохраня́й отъ неви́димыхъ и ви́димыхъ врагъ,/ вѣ́рою, мо́лимъ, блаже́нне кня́же Рома́не,/ моли́ Христа́ Бо́га спасти́ся душа́мъ на́шимъ.
Кондакъ, гласъ 8-й:
Красоту́ мíра сего́, княже́ніе и сла́ву/ я́ко вре́менно помышля́я,/ и сего́ ра́ди благоче́стно въ мíрѣ пожи́лъ еси́,/ блаже́нне кня́же Рома́не,/ ми́лостынею и моли́твами Бо́гу угоди́въ,/ и по преставле́ніи свое́мъ чуде́съ даръ пріи́мъ отъ Христа́ Бо́га,/ и свѣти́льникъ яви́ся пресвѣ́тлый,/ просвѣща́я свои́ми чудесы́, приходя́щимъ къ тебѣ́ съ вѣ́рою здра́віе подае́ши и отъ бѣ́дъ избавля́еши./ Тѣ́мъ же Христо́ва Це́рковь пѣ́сньми сла́витъ тя,/ благочести́вый кня́же Рома́не,/ гра́ду своему́ У́глечу вели́кій побо́рниче.
