Поклоненіе Пресвятой Богородицѣ – Преосв. Іустина (Полянского), Епископа Уфимскаго и Мензелинскаго

Пріидите, поклонимся Царицѣ нашей Богородицѣ. Пріидите, поклонимся Дѣвѣ Маріи, Царицѣ нашей Богородицѣ. Пріидите, поклонимся и припадемъ къ самой Госпожѣ Дѣвѣ Маріи, Царицѣ нашей Богородицѣ!

Покланяемся Тебѣ, Пресвятая Богородице, Твоимъ Рождествомъ явльшая намъ свѣтъ истинный, Царице Небу и земли, Надеждо ненадежныхъ, Помощнице немощнымъ, Ходатаице всѣмъ грѣшнымъ; Ты насъ покрый и заступи отъ всѣхъ бѣдъ и нуждъ, душевныхъ и тѣлесныхъ, и буди намъ, молимся, Заступница святыми Твоими молитвами!

Покланяемся Твоему свыше предвозвѣщенному зачатію и благословенному рожденію, отъ святыхъ Ти родителей Іоакима и Анны; молимъ Тя, Госпоже наша: даждь намъ житіе безгрѣшно зачати и родити покаяніе!

Покланяемся Введенію Твоему въ церковь Господню, трилѣтствовавшая Отроковице, и молимъ Тя, Свѣте нашъ: церковь насъ содѣлай Святому Духу молитвами Твоими!

Покланяемся Благовѣщенію Твоему, Пречистая Дѣво, егда дѣйствіемъ Святаго Духа, со гласомъ Архангельскимъ зачала еси Слово Отчее, и молимъ Тя, Свѣте нашъ: намъ отчаяннымъ благовѣсти спасеніе!

Покланяемся Рожденію Твоему, егда воплотила и родила еси Христа – Спаса міру, и была если Мати Богу, отъ всея твари славима и превозносима, и молимъ Тя, Свѣте нашъ: являй себе Матерь милосерду, нынѣ и во вѣкъ будущій!

Покланяемся законному очищенію Твоему, нескверная, неблазная, нетлѣнная, Пречистая, и молимъ Тя, Свѣте нашъ: очисти насъ отъ всякія скверны плоти и духа молитвами Твоими!

Покланяемся и почитаемъ болѣзни Твоя, яже претерпѣла еси во время вольныя страсти Сына Твоего, егда сбыстся Симеоново прореченіе — Тебѣ же Самой оружіе душу Твою пройдетъ, — и молимъ Тя, Свѣте нашъ: болѣзни душевныя и тѣлесныя избави насъ!

Покланяемся Тебѣ, Госпоже, воспоминающе радость Твою, юже имѣла еси во время Воскресенія Сына Твоего, и молимъ Тя, Свѣте нашъ: радости духовныя не лиши насъ!

Покланяемся честному и славному Успенію Твоему, и молимъ Тя, Свѣте нашъ: успи страсти наша плотскія помощію Твоею!

Пресвятая Владычице Богородице! Пріими сіе малое поклоненіе и моленіе Тебѣ, принеси къ Сыну Твоему и Богу нашему, да спасетъ и насъ грѣшныхъ, да просвѣтитъ и спасетъ Тебе ради души наша.

О Пресвятая Владычице Богородице, милосердія сущи Источникъ, Покрове, Упованіе и Прибѣжище христіанъ! Вѣрою сердечною и любовію отъ души припадаемъ и покланяемся Тебѣ, всесисильной Предстательницѣ и Споручницѣ поканія и спасенія нашего: Тебѣ мы грѣшніи раби Твои предаемъ души и тѣлеса наша, входы и исходы наша, вѣру и жительство наше, кончину и число дней нашихъ, глаголы и помышленія наша, дѣла и начинанія наша. Святолѣпно почитаемъ и молимъ Тя со слезами: воздвигни насъ изъ глубины грѣховныя, просвѣти сердечныя очи наши къ зренію спасенія, оживотвори сердца наша духомъ благочестія и страха Божія, духомъ чистоты и правды, духомъ любви и милосердія! О Пречистая Дѣво! Не возгнушайся нами недостойными, покрый насъ покровомъ Твоимъ отъ враговъ видимыхъ и невидимыхъ; буди намъ Помощница, Заступница и Руководительница во всемъ житіи нашемъ, во исходѣ нашемъ и по кончинѣ нашей не остави насъ Своею милостію, да немолчно – до послѣдняго издыханія нашего взываемъ Ти: Радуйся, Невѣсто Неневѣстная! Святая Святыхъ большая! Пресвятая Богородице, спаси насъ!

Сочиненія Іустина, епископа Рязанскаго и Зарайскаго, позднѣе Уфимскаго и Мензелинскаго. Томъ XII. Рязань 1897. С. 253-255.


Рубрики:

Популярное:

Церковный календарь:

© Церковный календарь



Подписаться на рассылку: