Память преподобнаго Авраамія, архимандрита и основателя Ростовскаго Богоявленскаго монастыря (Пространное житіе, Явленіе Его, Чудо Его и Похвала Ему).
Для просмотра изображения кликните по нему.
ПРОСТРАННОЕ ЖИТІЕ
Преподобнаго Авраамія, Ростовскаго Чудотворца.
Введеніе.
Житіе преподобнаго Авраамія встрѣчается въ трехъ редакціяхъ, которыя отличаются одна отъ другой въ разсказѣ о жизни Авраамія до прибытія его въ Ростовъ. Первая редакція, которую Преосвященные Макарій, Филаретъ и проф. В. О. Ключевскій признаютъ древнѣйшею, отличается краткостью и неопредѣленностью извѣстій; въ ней разсказывается, что Авраамій былъ сынъ благочестивыхъ родителей, съ дѣтства отличался добродѣтельною жизнью, поступилъ въ монахи и сдѣлался начальникомъ монаховъ. Гдѣ и когда это происходило, въ житіи не указано. Въ дальнѣйшемъ повѣствованіи о сокрушеніи Аврааміемъ въ Ростовѣ идола Велеса и о борьбѣ съ діаволомъ въ нѣкоторыхъ спискахъ, при упоминаніи о великомъ князѣ, князьяхъ Ростовскихъ и епископахъ, не сообщается ихъ именъ; въ другихъ же спискахъ встрѣчаются имена князей тѣ же, что и во второй редакціи. Житіе по первой редакціи напечатано въ первоначальномъ видѣ въ «Памятникахъ Старинной Русской Литературы», изд. Кушелевымъ-Безбородко (в. I, стр. 221-224, Спб. 1860 г.), и перепечатано оттуда въ Яросл. еп. вѣд. 1874 г. No 45 и отдѣльной брошюрой подъ заглавіемъ «Преподобный Авраамій архимандритъ, Ростовскій чудотворецъ». Ярославль. 1880 г. Оно же помѣщено и въ печатномъ прологѣ. Съ дополненіями же именъ, согласно со второй редакціей, житіе напечатано въ «Великихъ Минеяхъ-Четіихъ митр. Макарія, издаваемыхъ Археограф. Коммиссіей, подъ 29 октября. Рукописи житія этой редакціи не древнѣе XVI вѣка.
По второй редакціи житія Авраамій родился въ градѣ Чухломѣ отъ благочестивыхъ родителей, путешествовалъ по святымъ мѣстамъ Новгородской области, постригся на Валаамѣ и только послѣ этого явился въ Ростовъ. О пребываніи Авраамія въ Ростовѣ разсказывается здѣсь тоже, что и въ первой редакціи, съ прибавкою однако именъ Ростовскихъ епископовъ: Ѳеодора, при которомъ Авраамій основалъ Богоявленскій монастырь, и Иларіріона, возведшаго монастырь этотъ еще при Аврааміи въ архимандритію, послѣ совѣщанія съ великимъ княземъ Владиміромъ и съ княземъ Борисомъ; въ разсказѣ объ искушеніи и преслѣдованіи Авраамія діаволомъ великій князь, вызывающій Авраамія на судъ въ г. Владиміръ на Клязмѣ, названъ Владиміромъ. Житіе Авраамія по этой редакціи сполна не напечатано; варіанты изъ него приведены въ указанныхъ выше изданіяхъ по первой не дополненной редакціи; подробное изложеніе содержанія можно читать въ «Исторіи Русской церкви» проф. Голубинскаго т. I, 2-я полов., стр. 642-645. По мнѣнію проф. Голубинскаго первоначальною должна быть признана эта вторая редакція, только она дошла до насъ въ интерполированномъ видѣ, именно неудачно дополнена была вставкою именъ князей и епископовъ. Изъ содержанія житія видно, что преподобный Авраамій жилъ въ такое время, когда въ Ростовѣ была «цѣлая семья удѣльныхъ князей» (конецъ XIII-го и XIV-й вѣкъ), когда существовалъ уже Валаамскій монастырь (основанъ въ первой половинѣ XIV вѣка), когда великій князь жилъ уже на сѣверѣ, а не въ Кіевѣ. Этого не могло быть при Владимірѣ святомъ; имя послѣдняго, равно какъ и князя Бориса и первыхъ Ростовскихъ епископовъ Ѳеодора и Иларіона вставилъ, по мнѣнію проф. Голубинскаго, какой-либо невѣжественный редакторъ позднѣе. Профессоръ Голубинскій полагаетъ, что преп. Авраамій жилъ въ XIV вѣкѣ и готовъ отождествить его съ Аврааміемъ Низкимъ, игуменомъ Ростовскимъ, спутникомъ митрополита Пимена въ Царьградъ въ 1385 году. Что касается краткаго житія, то оно, но мнѣнію проф. Голубинскаго, есть сокращеніе изъ подробнаго, считаемаго другими учеными второю редакціею; списки краткаго житія безъ собственныхъ именъ князей и епископовъ доказываютъ, что сокращеніе сдѣлано было еще до интерполяціи нормальнаго житія; списки же краткаго житія съ именами князей и епископовъ свидѣтельствуютъ о вліяніи на краткое житіе интерполированной редакціи нормальнаго житія.
Что касается пространнаго житія или третьей его редакціи, то оно доселѣ было извѣстно только по отрывку, сообщенному митр. Макаріемъ въ Исторіи Русской церкви (т. I, изд. 2, стр. 260) и по изложенію проф. Голубинскаго (I, 2, 651) по полному списку (рукопись 1745 г. Костромскаго Богоявленскаго монастыря). Всѣми изслѣдователями эта редакція, содержащая новыя свѣдѣнія о первоначальной жизни Авраамія, признается позднѣйшею переработкою второй редакціи, или, по Голубинскому, нормальнаго житія. Печатаемый ниже текстъ третьей редакціи житія заимствованъ изъ рукописи второй четверти XVIII вѣка, принадлежащей наставнику-руководителю классической гимназіи при Нѣжинскомъ Историко- Филологическомъ институтѣ И. Н. Михайловскому; въ изложеніи житія этотъ текстъ сходенъ съ тѣмъ, которымъ пользовался проф. Голубинскій. Но въ рукописи И. Н. Михайловскаго въ слѣдъ за житіемъ помѣщено «Слово о явленіи чудотворца Авраамія и о снисканіи родословія его и о чудесѣхъ, нынѣ бывшихъ, и о трости Богословли». Это «слово» доселѣ не было извѣстно, а между тѣмъ оно сообщаетъ любопытныя свѣдѣнія о судьбѣ Аврааміева житія въ Богоявленскомъ монастырѣ и о составленіи третьей редакціи житія. Изъ него узнаемъ, что житіе преп. Авраамія въ третьей редакціи составлено девяностолѣтнимъ старцемъ Богоявленскаго монастыря въ 1649 году. Въ основу переработки положено среднее житіе, въ которомъ говорилось уже о происхожденіи Авраамія изъ Чухломы и о постриженіи на Валаамѣ; списокъ этого «древняго чудотворцева житія» старецъ получилъ отъ монастырскаго уставщика священномонаха Козмы; матеріаломъ для дополненія послужили свѣдѣнія «о родословіи» Авраамія, собранныя архимандритомъ Богоявленскаго монастыря Іоакимомъ въ царствованіе Іоанна Грознаго (до 1553 года), и разсказы ученика Іоакимова, уставщика старца Гурія, слышанныя нашимъ авторомъ еще въ дѣтствѣ. Старецъ-авторъ разсказываетъ занимательную исторiю сохраненія въ смутное время собранныхъ архим. Іоакимомъ матеріаловъ для пополненія житія преподобнаго Авраамія. Переработка прежняго житія на основаніи этихъ матеріаловъ коснулась разомъ начала житія: Авраамію приписано языческое происхожденіе; сообщено его языческое имя Иверкъ и по крещеніи мірское имя Аверкій; подробно разсказана исторія обращенія Иверка въ христіанство. Въ разсказѣ о жизни Авраамія въ Ростовѣ никакихъ перемѣнъ не сдѣлано противъ прежняго житія, которое было извѣстно автору уже съ именами князей и епископовъ Ростовскихъ Ѳеодора и Иларіона; авторъ прибавилъ только, на основаніи житія св. Леонтія, извѣстіе о безуспѣшности Ѳеодора въ дѣлѣ распространенія христіанства и объ удаленіи его въ Грецію. Въ нашемъ спискѣ поставленъ также годъ преставленія Авраамія (1010) и открытія его мощей (1175). Замѣтка въ концѣ житія о судьбѣ вотчины Аврааміева монастыря, сельца Угоднаго, заимствована авторомъ, вѣроятно, изъ записей архимандрита Іоакима и можетъ служить доказательствомъ, что авторъ нашъ дѣйствительно имѣлъ подъ руками кой-какія записи, касавшіяся Аврааміева монастыря. Помѣщенное въ слѣдъ за «словомъ» «чудо св. Авраамія» свидѣтельствуетъ о томъ, что въ половинѣ XVII вѣка, какъ и въ XVI вѣкѣ, не имѣли точныхъ свѣдѣній о преп. Аврааміи въ самомъ Богоявленскомъ монастырѣ. Архимандритъ Гермогенъ, прочитавши написанное старцемъ житіе, сказалъ, что «не повелѣно сего житія въ церковь пріимати, чудотворецъ бо бѣ во дни Владиміра Мономаха, и поверже житіе». Но старецъ защищаетъ свою хронологію и въ послѣдовавшемъ затѣмъ сумасшествіи или юродствѣ Гермогена видитъ чудесное наказаніе за непочтительное отношеніе его къ пространному житію Авраамія. Какъ «слово», такъ и «чудо» весьма интересны по живымъ чертамъ монастырскаго быта XVII в. и по историческимъ указаніямъ. Изъ содержанія «слова» и «чуда» можно также заключать, что нашъ авторъ, принадлежавшій къ служилому сословію, служившій въ концѣ XVI в. въ посольскомъ приказѣ и командовавшій отрядомъ войска во время самозванщины, по принятіи на старости лѣтъ монашества, носилъ имя Григорія. Въ нашемъ спискѣ вслѣдъ за «чудомъ» помѣщено пространное похвальное слово преподобному Авраамію, встрѣчающееся также въ спискахъ второй редакціи и доселѣ еще не напечатанное.
Профессоръ М. Соколовъ.
Москва
15 марта 1890 г.
⸭ ⸭ ⸭
Мѣсяца октовріа въ 29 день.
Преставленіе преподобнаго и Богоноснаго отца нашего
АВРААМІЯ,
Архимандрита Богоявленскаго, Ростовскаго Чудотворца.
Еже удивитися святыхъ трудомъ добро, а еже ревновати спасенію ходатайственно; похваляти же и писати чюдное ихъ по Бозѣ житіе и еже отъ Святаго Духа дарованіемъ дѣйствуемая въ нихъ чюдеса благоугодно и полезно, понеже и древле Духомъ Святымъ речено бысть пророкомъ: Память праведнаго съ похвалами; и: Похваляему праведнику возвеселятся людіе. Не убо требуютъ отъ насъ святіи нѣкія похвалы, но и удаляются отъ нихъ, возненавидѣша бо міръ и яже въ мірѣ суть лестная; но мы себѣ, похвалами святыхъ вразумляеми, преднапутіе спасенія творимъ. Святіи же ничесоже отъ міра возлюбиша и сего ради свѣтъ міру явишася; возлюбиша бо Господа Бога отъ всего сердца своего, естественная презрѣвше, цѣломудренне и праведне пожиша, страхомъ Господнимъ уклонишася отъ всякаго зла и сего ради быша отъ ангелъ славни и бѣсомъ страшни, яко же рече Господъ: Прославляющія мя прославлю, понеже всякъ человѣкъ званіе отъ своихъ дѣлъ пріемлетъ, или прославится или постыдится; и всякъ любяй Бога ненавидитъ зла и возлюбленъ будетъ Богомъ, а любяй неправду ненавидитъ свою душу и возненавиденъ будетъ Богомъ. И сія вся вѣдяще святіи десная убо возлюбиша, шуяя же презрѣша, отъ нихъ же есть и сей великій Авраамій, о немъ же намъ нынѣ слово предлежитъ.
Сей убо блаженный Авраамій чюдотворецъ отъ предѣлъ Галицкихъ, града нарицаемаго Чюхлома, богату родителю сынъ, еще бо бѣ не крещенъ ту, имя же ему бѣ почухломски Иверикъ. И той бѣ отъ рожденія своего разслабленъ неисцѣлною болѣзнію и лежа на одрѣ осмьнадесять лѣтъ. Приходяще же ко отцу его купцы изъ далнихъ странъ изъ Новограда, изо Пскова и изъ Нѣмецъ торгуя со отцомъ его и отрока же того въ болѣзни суща посѣщая и утѣшая и съ нимъ бесѣдуя и сказуя о вѣрѣ Господа нашего Іисуса Христа, како исперва сотвори Богъ небо и землю и море и вся, яже въ нихъ, и человѣка Адама въ раи созда и за преступленіе Адамле изгнанъ бѣ изъ рая, и позна Адамъ жену и роди сыны и дчери, и умножишася людіе зѣло и со Адамомъ вси помирая; и Творецъ всея твари, въ Троицѣ славимый Богъ нашъ, Отецъ и Сынъ и Святый Духъ, явился Аврааму и Саррѣ у дуба Маврикійска и по вѣрѣ Авраамовѣ и Сарринѣ благослови ихъ. И воспомянувъ свое созданіе родъ человѣческій отъ адовыхъ узъ свободити и спасти, посла Сына своего единороднаго Спасителя въ міръ и отъ отческихъ нѣдръ не отступль преклонь небеса сниде и свое созданіе матерь себѣ избра, преславную сущую истинную Дѣву Богородицу Марію и родися изъ нея отъ Духа Свята единъ сый отъ Святыя Троицы плотію человѣкомъ Богъ, естество человѣческое воспріятъ кромѣ грѣха и на земли съ человѣки поживе 33 лѣта, болныхъ и разслабленныхъ исцѣлялъ и слѣпыхъ просвѣщалъ, мертвыхъ воскрешалъ и за Адамле преступленіе и за наша прегрѣшенія отъ жидовъ страсть волную претерпѣлъ, на крестъ пригвоздися и смерть пріятъ и тридневно воскресе и весь родъ человѣческій отъ адовыхъ и вѣчныхъ узъ свободи и всему міру спасеніе дарова намъ, по воскресеніи же своемъ женамъ и апостоломъ явися и съ нима ядый и посла ихъ въ міръ проповѣдати и крестити во имя Отца и Сына и Святаго Духа, и паки со славою Іисусъ Христосъ Спасъ нашъ взыде на небеса и сѣде одесную Бога Отца и паки пріидетъ судити живымъ и мертвымъ и воздати комуждо по дѣломъ его, праведнымъ царство небесное, грѣшнымъ же и не прощенымъ мука вѣчная. Слышавъ же той отрокъ Иверикъ отъ Новогородцовъ и отъ Псковичъ о Христѣ Бозѣ нашемъ удивися зѣло и отпусти ихъ съ миромъ. Самъ же лежа на одрѣ своемъ размышляя и удивляяся глаголя въ себѣ: «Како отецъ мой и мати мнози имутъ бози и требы имъ творятъ велія, помощи же мнѣ въ толико лѣтъ никоея нѣсть; у Новогородцовъ же единъ Богъ въ Троицы славимый и токмо вѣрою отъ нихъ славится и такова многа человѣкомъ исцѣленія подаетъ и мертвыхъ воскрешаетъ? И аще бо той Новогородцовъ единъ Богъ Вседержитель въ Троицы славимый далъ мнѣ облегченіе по ихъ извѣщенію нынѣ, то пошелъ бы въ ту ихъ страну и нашелъ бы ихъ Бога Іисуса Христа и вѣровалъ бы въ Него, яко же и они». И по словеси семъ той отрокъ Иверикъ, лежа на одрѣ своемъ, много помышляхъ и недоумѣвахуся, глаголя: «Да аще и помилуетъ мя»! И внезапу той отрокъ почухъ въ себѣ силу, нашедшую нань, и нача превращатися семо и овамо и рукама и ногама пресмыхаяся владѣти и воста здравъ и обозрѣвая въ дому отца своего, изыде тай и поиде на западъ и иде много дни. И егда той отрокъ дошедъ вѣрующихъ во Христа, возрадовася зѣло и ту къ нимъ помалу пріобщаяся труды своими и послушаніемъ; да и гдѣ въ трудѣхъ его и подвизѣхъ начнутъ похваляти и почитати, и оттуда избѣгая во ину весь и во обитель и труды къ трудомъ прилагая и книжному ученію вниманіе. Они же и наипаче любляше и во всѣхъ святыхъ обителѣхъ новогородскихъ преходя седмьнадесять лѣтъ и книжному ученію зѣло извыче и пріиде въ великій Новъ градъ, и видѣвъ многонародное множество и церковное украшеніе, удивися и рече: писано бо есть: Се удалихся бѣгая и водворихся въ пустыню, чаяхъ Бога спасающаго мя. И изыде изъ града, ища обители, дабы отъ градовъ и весей удалено, и поиде подлѣ Ладожскаго езера и обрѣте обитель Пресвятыя Троицы, иже суть на Валаамѣ, и пріиде ко игумену Ѳеогносту и ко братіи, падъ поклонися и плакася зѣло и каяся, яко не крещонъ бѣ, и вся поряду и подробну о себѣ повѣда. Игуменъ-же и братія видѣвъ такова благопріятна и смышленна мужа, пріятъ его съ радостію и крести во имя Отца и Сына и Святаго Духа и нарече имя ему во святомъ крещеніи Аверкій. И служаху имъ и труждахуся и угодная имъ во всемъ творяще, они же его любляше. Видѣвъ же Аверкій иноческое пребываніе, яко ангельское житіе, умоли игумена, дабы его постриглъ. Игуменъ же и братія видѣвъ его несумнѣнное желаніе и постриже и нарече имя ему Авраамій и причте его къ прочіи братіи. Преподобный же порадовася, яко бысть монахъ, и чистоте пріятелпще бысть Святаго Духа, покори убо плотская духови и обладая страстьми душевными и тѣлесными и жестокому пребыванію себѣ вдавъ, труды къ трудомъ прилагая, и бысть искусенъ монахъ и во всѣхъ тяжкихъ службахъ и пребысть ту лѣта доволна. И видѣвъ игуменъ и братія преподобнаго Авраамія трудившася доволно и искусна во всемъ, начаша почитати его и честь велію воздавати ему, инѣмъ же яко и пастыря того нарицати. Преподобный же сего никакоже восхотѣ слушати, ниже чести нѣкія взыскати, по абіе отыде въ незнаемыя страны и по благоволенію Божію пріиде близъ града Ростова и ту обита при езерѣ, малую колибицу себѣ подткнувъ.
Видѣвъ же благоразумніи и богобоязнивіи человѣцы начаша приходити къ нему, иніи же и сожительствовати съ нимъ произволяюще. Преподобный же пріимаше и учаше когождо ихъ отъ божественнаго писанія и совѣтованіе комуждо ихъ полезная и печатеся ими, отселѣ и не хотя бысть монахомъ печальникъ большимъ трудомъ касашеся и житіе наче ангельское подражая и чюдесъ обогатився благодатію, яко всѣмъ приходящимъ исцѣляти страсти неисцѣлныя. Преподобный же о семъ паче умилися и теченіемъ слезнымъ непрестанно душу омывая.
Видѣвъ же блаженный еще въ то время прелесть идольскую въ нечестивыхъ душахъ единаче растущу, не убо бѣ пріяли еще вси въ Ростовѣ святое крещеніе, но чюдскій конецъ единаче поклонятеся идолу каменну, омрачени бо суть сердца ихъ дѣяніемъ бѣсовскимъ. Вѣ же во идолѣ бѣсу живущу и мечты творящу христіаномъ и страшилища злымъ своимъ омраченіемъ, яко близь его не смѣяше никтоже путемъ тѣмъ ходити. Преподобный же Авраамій видѣвъ сицеву прелесть въ несмысленныхъ человѣцѣхъ и огорчися духомъ и возревнова по Господѣ, якоже древле Илія пророкъ, помолися Господеви, глаголя: «Господи Боже Вседержителю, призри съ высоты святыя своея на раба Твоего и даждь ми силу и благодать Твоего Святаго Духа, еже раззорити многокозненнаго сего идола, и настави человѣки прельщенныя, во еже творити волю Твою святую». И сія рекъ тщашеся жилище бѣсовское разорити и не можаше, не дадяше бо близъ себе пріити окаянный той волшебствомъ своимъ, и недоумѣвашеся о семъ. И се по смотрѣнію Божію бысть не яко презрѣ Господь милость святаго, но да усерднѣйша покажетъ его и прославится въ нихъ, вся бо возможна суть Богу. И бѣ святый скорбя сѣдяше, видѣ нѣкоего старца къ себѣ грядуща, благоговейна образомъ суща. Преподобный же срѣте его, и оба поклонистася между собою и взяста другъ отъ друга благословеніе, сѣдоста. И по молитвѣ начатъ блаженный Аврааамій къ старцу глаголати: «Откуду, отче, грядешь и коея страны еси, святче Божій»? И глагола ему старецъ: «Азъ есмь, отче, Царяграда родомъ и пришлецъ страненъ на вашей земли; рцы же ми и ты, отче: чесо ради скорбя сѣдиши близъ многострашнаго сего идола окаяннаго Велеса»? Глагола же блаженный Авраамій къ старцу: «Тщаніе мое ко Господу Богу, яко да подастъ ми помощь, еже разорити многострашнаго сего идола, нечестиваго Велеса, и не возмогаю, презрѣ бо Господъ моленіе мое; и се скорбя сѣдохъ». И глагола старецъ къ преподобному Авраамію: «Аще хощеши, отче, желаемое получити, иди къ Царюграду и тамо взыщи во градѣ домъ Іоанна Богослова и вниди въ домъ его и да помолишися образу его и не изыдеши оттуду тощь, но все желаемое тобою получиши. Аще ли же не идеши въ домъ Іоанна Богослова, не можети желаемое получити». И печаленъ бысть блаженный Авраамій и исполнися Духа Свята и вземъ благословеніе отъ старца и нача тещи путемъ и яко забы долготу пути и преиде Ишню рѣку, стрѣте человѣка страшна благоговѣйна образомъ, плѣшива, взлыса, брадою круглою великою и зѣло благолѣпна суща, имѣюща въ руцѣ трость. И паде предъ ногама его блаженный, поклонися ему. И глагола ему страшный онъ мужъ: «Камо грядеши, старче»? И повѣда ему блаженный все поряду коея ради вины и камо грядетъ и чесо ради на взысканіе дому Іоанна Богослова. Глагола ему страшный мужъ: «Иди, возвратися, старче, вземши трость мою и приступи ко идолу Велесу, и избоди его тростію сею во имя Іоанна Богослова, и будетъ ти въ прахъ окаянный». И абіе невидимъ бысть. Преподобный же Авраамій, страхомъ и радостію одержимъ, возвратися вспять и пріиде абіе ко идолу безъ возбраненія и избоде тростію во имя святаго Іоанна Богослова. И абіе идолъ Велесъ въ прахъ бысть окаянный. Святый же Авраамій чюдотворецъ о семъ прослави Бога, давшаго ему побѣду на всю силу вражію, и святаго апостола и евангелиста Іоанна Богослова, иже бысть ему помощникъ на діавола и на дѣйство его. И повѣда въ то время епископу сущу Ѳеодору. Той бо бѣ первый епископъ, присланный съ мученикомъ Борисомъ отъ князя Владиміра, крестившаго всю россійскую землю. И по благословенію постави на томъ мѣстѣ блаженный, идѣже срѣте святаго апостола и евангелиста Іоанна Богослова, церковь во имя Іоанна Богослова, иже суть и до сего дне. И паки, вземше благословеніе у епископа, возгради церковь малу на томъ мѣстѣ, идѣже бѣ прежде идолъ Велесъ въ славу Христа Бога нашего во имя святаго Богоявленія, и келіи поставивъ и монахи призвавъ, печатеся ими, и сотвори обитель свою общую. Людіе же окрестъ сущіи, елицы зломысліемъ одержими и елицы древлѣ невѣріемъ погруженіи, сіи вооружахуся на святаго, паче же самъ сатана, иже древлѣ чтимъ бяше ими и дѣйствоваше въ нихъ и нынѣ же отъ святаго попераемъ. И много зла подъятъ святый отъ невѣрныхъ: овогда убо разорити хотяше святыню его, вогда же и сожещи хотяше, но Богу не попустившу ихъ молитвами и терпѣніемъ преподобнаго. Елико бо они злобою вооружахуся на святаго, толико онъ молитвою подвизатеся о нихъ. Епископъ же Ѳеодоръ не возможе терпѣти злобы ихъ и отыде, въ его же мѣсто присланъ бысть другій епископъ Иларіонъ и не по мнозѣ времени всѣхъ ко Христу приведе благоразуміемъ, и крестишася отъ мала и до велика и начаша вкупѣ славити Бога и къ пѣнію ходити на словословіе Божіе во дни и въ нощи и жены ихъ и отроцы. Преподобный же почитаніемъ книжнымъ и поученіемъ духовнымъ наслажданіе сердца ихъ паче меда и сота сладчайши, и толико тщаніе и благочестіе въ нихъ процвѣте преподобнаго Авраамія молитвами и поученіемъ и духовною любовію, яко и юныя отроки на ревность подвиже къ добродѣтели, мнози бо отроцы оставльше родители своя и тай прихождаху ко святому и быша монаси. Преподобный же безъ возбраненія вся приходящія съ вѣрою пріимаше и съ разсужденіемъ духовнымъ постризаше, яко виноградъ благоплоденъ садяше при водахъ воздержанія и напояше ихъ поученіемъ божественныхъ словесъ и умножи монахи и наипаче молитвою украси ихъ, и церковь велію созда и украси ю, яко невѣсту Христову чюдными иконами и святыми книгами и въ ней день дне преспѣвающе, наипаче множашеся пѣніе святое и славословіе.
Князи же Ростовстіи начаша вѣру велику имѣти ко отцу своему Авраамію и къ монастырю его и ко всѣмъ монахомъ и имѣнія многа даяху монастырю и всѣмъ монахомъ на потребу и нищимъ на прокормленіе. Видѣвъ же преподобный епископъ Иларіонъ множащуся братію во обители святаго и монастырю всякими потребами обилну сущу, и благослови ихъ и любовію помогаше имъ и совѣтъ дая о всемъ ко спасенымъ стезямъ. Послѣди же совѣтъ сотвори епископъ Иларіонъ съ великимъ княземъ Владиміромъ и съ княземъ Борисомъ, дабы сотворили архимандритію ту обитель и съ совѣтомъ абіе понудиша святаго и святивши поставиша преподобнаго архимандритомъ и тако запечатлѣвше любовію и утвердивше благословеніемъ. И нача святый большими подвиги подвизатися и труды къ трудомъ прилагати и согубеи молитвѣ и посту себе вдавъ и прочимъ добродѣтелемъ образъ бысть всѣмъ, смиреніе и цѣломудріе стяжавъ и любовь нелицемѣрную ко всякому приходящему, равно къ велику и малу, и къ велможамъ не тщеславіемъ и къ нищимъ не презорствомъ, но и всѣмъ подобающая исправляше, якоже рече апостолъ: Никому же ничимъ должни бывайте. Старый же ненавистникъ добру діяволъ всячески многими (и) искусы воображаяся на преподобнаго и пакости ему творяще въ нощи и во дни, но никакоже устраши преподобнаго мечты своими, огражденъ бо бѣ благодатію Христовою и силою честнаго и животворящаго креста. Бысть же нѣкогда хотящу святому по обычаю литоргисати во святей Божіей церкви и обычныя молитвы уже соверши ко святому причащенію и яко хотящу ему умыти руцѣ, діаволъ вниде во умывалницу въ воду, хотя преподобному спону сотворити водою. Разумѣвъ же преподобный лукаваго духа въ сосудѣ, вземъ честный крестъ положи наверхъ сосуда и окрестъ сосуда огради крестнымъ знаменіемъ и тако оставивъ сосудъ и не врежданіе его на многи дни. Бѣсъ же, крестною силою жегомъ въ сосудѣ, не могій изыть. Бысть же обычаи ту сущимъ княземъ на поле ѣздити по вся дни ловъ дѣющи и паки возвращаяся во градъ вхождаху въ монастырь покланятися церкви и отъ святаго благословеніе пріимаху. Паки же по обычаю пріидоша князи въ келію къ преподобному благословенія ради. Случижесеся въ то время не обрѣстися преподобному въ келліи, бяше бо въ пекалницѣ мывше власяницы на братію, обычай бо имѣяше преподобный по вся дни на братію труждатися, овогда убо въ поварню дрова сѣкій, овогда же власяницы на братію мыяше, иногда же воду нося въ поварню и въ пекалницу. Слышавъ же преподобный о князехъ, яко поидоша въ келію его и хотяше благословити ихъ. Еще же преподобному не дошедшу своея келіи, князи же суть въ келіи, ждуще преподобнаго, и видѣша сосудъ крестомъ покрытъ, недоумѣвахуся о семъ. Единъ же отъ нихъ дерзну восхитити крестъ съ сосуда, да знаменается имъ, и абіе изыде бѣсъ изъ сосуда чернъ, аки дымъ, и злосмраденъ, яко устраши ту всѣхъ сущихъ мрачнымъ своимъ привидѣніемъ. И устрѣте лукавый духъ преподобнаго, въ келію грядуща, нача зла словеса износити на преподобнаго, глаголющи: «яко ты мнѣ сотвори, окаянне, мучитися силою невидимаго Бога и палиму быти ми силою крестною во убоземъ твоемъ сосудѣ, тако и азъ тебѣ спону сотворю начинанію твоему и одолѣю ти въ маломъ времени, яко поострю на тебе лютѣйшій ковъ и сотворю ти раны многи въ укоръ всѣмъ видящимъ тя и муки злы наведу на тя и на пѣзѣ ослятицѣ всажденъ будеши безъ сѣдалища и въ сандалія женская червлены обувенъ будеши и ина многа зла сотворю тебѣ противу твоему злому неистовству, яже пріяхъ отъ тебе». Преподобному же оградившуся крестнымъ знаменіемъ, и абіе бѣсъ изчезе и невидимъ бысть. Княземъ же вопрошающимъ преподобнаго о бывшемъ, яко дымъ злосмраденъ изыде изъ сосуда; преподобному же ничто же имъ о томъ повѣдавшу; пріяша же князи благословеніе отъ святаго, преподобный же поученія духовная предложивъ отъ Божественнаго писанія, яко да саномъ княженія не возвышаются и рабомъ и подручнымъ имъ милостиви будутъ и не вознося на нихъ, яко же Господь рече: Блажени милостиви, яко ти помиловани будутъ; и ино рече: Блажени нищи духомъ, яко тѣхъ есть царство небесное, и ино рече: «Блаженъ градъ отъ благочестивыхъ царей царствуемъ и корабль отъ искусныхъ направляемъ; нечестія же ради градъ плѣнится и корабль, отъ неискусныхъ направляемъ, погибаетъ; дондеже душа любитъ славу человѣчю, еже есть тщеславіе, отвращеніе отъ Бога, еже къ меншимъ себе презорство, отъ сего бо раждается безмѣстныхъ дерзость, любовь же истинная вся наставляетъ къ свѣту богоразумія, и апостолъ рече, яко любы покрыетъ множество грѣховъ. Сія же и ина такова рече имъ и отпусти ихъ съ миромъ. Князи же благодаряще Бога о сихъ и ко святому вѣру наипаче простираху.
Не по мнозѣ же времени преобразися той бѣсъ лукавый, иже глагола ко святому развращенная, во образъ воина и пріиде къ великому князю Владимиру во градъ Владимиръ и начатъ на преподобнаго тяжки и злы словеса износити, рекъ: «Господи царю, хощу ти тайну повѣдати, твоему державству достойну. Есть во твоей державѣ, царю, во градѣ Росвовѣ монахъ нѣкій, Авраамій зовомъ, волхвъ сый, образомъ творяся яко свѣтъ, прелщаше люди, смиренъ ся творя. Сей обрѣте влагалище веліе въ земли, сосудъ мѣдянъ, полонъ злата, достоинъ твоему господству; имъ же бо сосудомъ златымъ и поясомъ златымъ и ченемъ не мощно цѣнѣ предати, сребру же и инымъ нѣкимъ вещемъ драгимъ не мощно исповѣдати; и тѣмъ сокровищемъ монастырь созда и церковь велію постави, а твоему господству не повѣда». Князь великій Владимиръ разжегся гнѣвомъ веліимъ на преподобнаго и посла воина люта зѣло по блаженнаго Аврамія, глаголющи тако: «Гдѣ обрященіи того монаха, то не глаголи ни единаго слова, но въ чемъ паки обрящени его, тако и постави его предо мною». Сія же суть вся по наученію злаго того оболгателя, оболгавшаго его воина, иже суть лукаваго бѣса. И яко приспѣ воинъ, посланный отъ князя по блаженнаго, святому же Авраамію въ то время на келеиной молитвѣ стоящу послѣ соборнаго пѣнія во единой власяницѣ и не обувенъ въ сандалія; приде же въ то время злый той и свирѣпый воинъ, не имый милости ни единыя о преподобнемъ, и тако вниде ко святому и обрѣте его сице не оболчена. ни обувена, и тако восхити его, ничего же не даяше къ себѣ глаголати преподобному, ни ризами облещися, ни обувенія ногамъ (тако бо сатана ему обуя сердце). Видя же преподобный вражду вражію, бывшую на него, ничто же усумнѣся, ни убояся, но паче благодаряше Бога о приключившейся на немъ бѣдѣ. И вземъ его воинъ, посади на свой конь съ собою и варяше скоро ко граду Владимиру. И яко бысть на оной странѣ езера, обрѣтъ селянина, ѣздяща на пѣзѣй ослятицѣ и въ руцѣ имый сандалія женская червленая, и всади преподобнаго Авраамія на ослятицу и червленая сандалія возложи на ногу его и абіе тако постави его предъ державнымъ великимъ княземъ Владимиромъ во единой власяницѣ безчествуема; и не бѣ на преподобнемъ ничегоже развѣ единыя власяницы, яже на тѣлѣ ношаше и червленая сандалія. Князь же великій Владимиръ повелѣ поставити воина соперника его предъ собою. Ставъ же мнимый воинъ предъ великимъ княземъ и начатъ тѣ же глаголы злы износити на преподобнаго Авраамія о обрѣтеніи влагалища велія, яко же преди рекохъ. Преподобный же Авраамій, воздѣвъ руцѣ на небо, запрети духу лукавому, глаголя: «Запрещаю ти именемъ Господа нашего Іисуса Христа; повѣждь ми, кто еси ты, иже таковыми глаголы оболсти на мя великому князю Владимиру»? Бѣсъ же, не могій святаго запрещенія стерпѣти, абіе вострепеша и нача трепеща глаголати: «Азъ есмь бѣсъ Зефеусъ, искони ненавидяй добра роду человѣческому, паче же и монахомъ, боящимся Бога; се же увѣсть, калугере: яже ти глаголахъ прежде, то и сотворихъ о первемъ твоемъ неистовствѣ, яже мя еси мучилъ во убозѣмъ твоемъ сосудѣ». И се рекъ, абіе исчезе и невидимъ бысть. Князь великій Владимиръ видѣ прелесть вражію и чюдо сіе, еже сотвори святый, яко не стерпѣ діаволъ запрещенія отъ святаго, но абіе исчезе и безъ вѣсти бысть, и преподобнаго святаго чудотворца, стояща поругана и странна очима зрѣти, и абіе страхъ объятъ всѣхъ ту сущихъ, иже суть съ великимъ княземъ Владимиромъ. И нача князь великій Владимиръ со слезами молити преподобнаго чудотворца Авраамія, прося отъ него прощенія, о немъ же согрѣши, и слезамъ текущимъ глаголаше: «Азъ, отче, повиненъ есмь твоему нужному приходу и люте оскорбихъ тя зѣло. Отдай же ми, отче, о немъ же тя прогнѣвахъ, се бо врагъ озлоби ми сердце и разъяри мя и вверже мя въ сей грѣхъ, его же ты, чюдодѣйствовавъ, прогналъ еси и безъ вѣсти сотворилъ ecи его. По истинѣ бо отъ сего разумѣю, яже отъ пророка Святымъ Духомъ реченное, яко дивенъ Богъ во святыхъ своихъ, Богъ Израилевъ; умы не вѣмы и отъ невѣденія неначаянно впадаемъ въ согрѣшенія». Преподобпый же Авраамій глаголя: «Господь проститъ тя, самодержавный царю, се бо дѣло древняго врага діаволе суть, понеже, царю, не дивися сему, искони бо сатана боряся съ человѣки, паче же боящимся Бога и спону творити». Князь же великій Владимиръ, видѣвъ преподобнаго обычаи и смиреніе и благое разсужденіе, понеже тихими словесы и смирными глаголы глаголюща къ нему, яко ничтоже зла воспріимши, но паче умилися о семъ, и начатъ ублажати преподобнаго Авраамія и честь велію воздаяти, глаголющи къ преподобному: «Что ти воздамъ, отче, яко много тебѣ долженъ есмь»? Преподобный Авраамій глагола: «Благій царю! Мы вся оставихомъ и во слѣдъ Христа идохомъ; что убо хотѣхомъ пріяти? Точію надеждами будущихъ веселимся. Аще что произволяеши дати, то церкви Божіи; подобаетъ же тебѣ со благимъ предложеніемъ, яже къ Богу, и разсужденіе имѣти благое, вамъ бо дано бысть по Бозѣ правити міръ. Праведенъ Господь во всѣхъ путехъ своихъ; сего ради рече: Блаженіи милостивіи, яко тіи помиловани будутъ. Клеветы скоро не пріимати и на повиннаго судомъ яро не нападати, понеже и Божественный апостолъ рече: Хвалится милость на судѣ. Такожде и о иныхъ добродѣтелехъ, да не како здѣ въ суетныхъ упражняяся, тамо будущихъ погрѣшимъ». Князь же великій Владимиръ въ сладость послушая словесъ преподобнаго Авраамія чудотворца и велми почте и многа имѣнія вдаде ему на строеніе церкви и на строеніе монастырю, и домы и села и водныя угодія многа монастырю подаде и устрои его своимъ монастыремъ и учини его вышша всѣхъ обителей, иже суть въ Ростовѣ, и многи рабы подаде въ домъ святому Богоявленію, и грамоты многи подаде жалованные, иже суть и до сего дне, и отпусти преподобнаго Авраамія съ великою честію во свой ему монастырь. И слышаше братія отца своего приходъ архимандрита Авраамія чудотворца и иже о немъ въ повѣстехъ, како Бога прослави и діавола посрами и великаго князя возвесели и како одарованъ бысть, и абіе съ радостію срѣтоша его. Онъ же благодаривъ Бога и братію благословивъ, вниде въ келію свою и паки труды къ трудомъ прилагая, образъ бысть всѣмъ въ добродѣтелехъ. И поживе преподобный архимандритъ Авраамій чудотворецъ въ своемъ монастырѣ въ велицѣ смиреніи, труды и поты и слезныя капли безпрестанно источая, тѣло убо труды, душу же слезами омывая изрядне и въ глубокихъ сѣдинахъ въ старости добрѣ ко Господу отъиде, Его же измлада возлюби, и погребенъ бысть во своей ему обители отъ своихъ ученикъ въ лѣто 6518 (1010) году мѣсяца октоврія въ 29 день.
Помолимъжеся и мы, да и насъ сподобитъ Господь Богъ молитвами святаго чудотворца Авраамія вѣчныхъ благъ получити о Христѣ Іисусѣ Господѣ нашемъ, Ему же слава и держава со безначалнымъ Его Отцемъ и съ пресвятымъ и благимъ и животворящимъ Духомъ нынѣ и присно и во вѣки вѣковъ. Аминь.
Въ лѣто 6518 октоврія въ 29 день святыя же его мощи положены быша подлѣ олтаря на правой странѣ. Гробъ же его со святыми мощми явися и обрѣтены святыя мощи нетлѣнны во дни великаго князя Всеволода Юрьевича Владимерскаго внука Мономахова въ лѣто 6683 (1175) октоврія въ 27 день, (и) быша чюдеса и исцѣленія многа въ людяхъ и до днесь съ вѣрою приходящихъ и предстоящихъ Господеви со всѣми святыми, молящеся о утверженіи вѣры христіанскія и о благостояніихъ святыхъ Божіихъ церквей и о спасеніи всего міра христіанскія вѣры и о избавленіи отъ нахожденія иноплеменныхъ въ славу и похвалу Христу Богу нашему со Отцемъ и со Святымъ и благимъ и животворящимъ Твоимъ Духомъ нынѣ и присно и во вѣки вѣковъ. Аминь.
Въ лѣта 6981 (1473) году, егда князь великій Іоанъ изъ Риму царевну взялъ дочь деспоты Аммареискаго Ѳомы, и та чудотворцова вотчинка, селцо Угодное, взято на время и у иныхъ у многихъ; и потомъ сынъ его князь Іоанъ женился у волоскаго воеводы у Стеѳана на Еленѣ. И въ томъ замолчали, а изъ монастыря не били челомъ. И въ 34 году (т. e. 7034 или 1526), какъ сынъ его князь Василій Іоанновичъ княгиню свою Соломаниду Сабурову постригъ, а взялъ Глинскихъ Елену, и тою вотчиною завладѣли Глинскіе.
⸭ ⸭ ⸭
СЛОВО
о явленіи чюдотворца Аврамія и о снисканіи родословія его
и о чюдесѣхъ нынѣ бывшихъ и о трости Богословли.
Иже исперва святіи отцы и братія о родословіи чюдотворца Авраамія въ прежде написанномъ житіи его токмо возвѣщено отъ предѣлъ Галицкихъ града нарицаемаго Чюхлома и обители постриженъ Валаамовы. Потомъ же во многовременныхъ днѣхъ и въ древнихъ лѣтѣхъ о родословіи чюдотворцевѣ списканіе бѣ тогоже монастыря архимандрита Іоакима, иже бѣ и церковь каменну съ четырма предѣлы постави повелѣніемъ царя Іоанна Василіевича его царскою казною; ко освященію же святыхъ церквей со святыми иконы корсунскими и со всею церковною утварію самъ царь пріиде со образы и книгами, и божественными службами церковь Божію украси яко невѣсту Христову и молебная совершивъ и у чюдотворца Авраамія изъ гроба Богословлю трость взя на одолѣніе Казанскаго царства, да тако и бысть взята Казань въ 61 (7061 – 1553) году октоврія въ « » день.
О родословіи чюдотворцевѣ у архимандрита Іоакима снисканіемъ его къ прежде написанному житію не вписано, не вѣмъ, чесо ради: церковнаго ли ради строенія и совершенія или царскаго ради пришествія въ забвеніе улучися; и преставися 63 (1555) году, та же его о чюдотворцевѣ родословіи снисканія остася у ученика его у уставщика Гурія. И той о чюдотворцовѣ и о пребываніи и о преставленіи и о обрѣтеніи мощей его многимъ совершеннымъ юнымъ людемъ повѣда, къ древнему же чюдотворцову житію не вписа, понеже старъ зѣло, за сто лѣтъ, и другому уставщику Савѣ писцу не отда, мню, яко зависти ради, жестокъ бо бѣ и въ 79 (1571) году преставися. Та же Іоакимова снисканія и всякія писмена остася въ келіи у ученика его у Никифора, и той не вня, и собра его вся писмена, положи сокровенно. И той Никифоръ въ 99 (1591) году преставися. Старецъ же его Тарасій вся его писмена и Гуріева собра во едино мѣсто и запечатавъ посла къ Москвѣ къ сыну его въ посолской приказъ. Сынъ же его пріимъ и взя своя и царскія грамоты и наказы и крѣпости избра къ себѣ, монастырскаго же не внимахъ и вся вонъ метахъ и въ свяскѣ повелѣ въ простѣ поврещи. И егда въ Московскомъ государствѣ наста мятежъ и крамола, и той Никифоровъ сынъ посланъ бѣ на Бѣло езеро и въ Галицкія и въ Поморскія городы и бѣ тамо управляяся съ чернью надъ воровскими и надъ литовскими людми, засѣками промышлялъ и многихъ побивалъ молитвами чюдотворца Аврамія. А съ нимъ было московскихъ 15 князей, да семьдесятъ человѣкъ дворянъ, и тѣхъ людей всѣхъ отъ себе въ Великій Новъ градъ отослалъ. И услышавъ то, яко многія городы отъ прелести вражія къ Богу и Государю обратилися и съ повинными на Бѣло езеро пришли и стали за единъ, и собрався съ великими людьми подъ Москвою былъ и надъ царствующимъ градомъ спасеніе Божіе и Царя царствующаго видѣли. Потомъ себе повергъ по обѣщанію своему ко иночеству во 149 (1641) году и пріиде къ чюдотворцу Аврамію зъ грамотою. И его на монастырь не пустили. Онъ же отыде печаленъ велми. И потомъ паки пріиде ко другому архимандриту во 159 (1646) году, и той отказа ему, онъ же отыде скорбя въ весь свою печаленъ, зѣло тужа и глаголя, яко много работахъ дому чюдотворцову и давалъ вклады великіе, а въ монастырь мене не пустили, и съ печали впаде въ недугъ лютъ и много скорбя и моляся чюдотворцу Аврамію, глаголя: «Чимъ тебе, государя, прогнѣвахъ или кое зло твоей святой обители сотворихъ? За что мене отъ своея обители отлучи»? И скорбя зѣло и плачася и мало успе, и видѣвъ пришедша ко мнѣ Аврамія чюдотворца во святемъ сану со многими и посохомъ мя удари, глаголя: «Востани и отдаждь списканіе Іоакимово родословія моего». Азъ же падая и вопія, моляся: «Никако же, господи, не вѣмъ». Онъ же рече ми: «Идѣже рабская хранилищная мѣста отъ невѣрныхъ». И показа ми въ дебри три древа и коснумися тягостно и невидимъ бысть. Азъ же воспрянувъ трепеща и бывъ въ недоумѣніи о вопрошеніи его и ощутився, яко здравъ бѣ. И созвавъ рабовъ своихъ и вопроси ихъ о хранилищахъ. Они же рѣша ми, яко и мѣстъ не обрѣстися, землею наполнилося, лѣтъ есть 50. Азъ же повелѣ себе въ дебрь вести ко хранилищнымъ мѣстамъ; и много ми показали мѣстъ, и не бѣ. И внезапу узрѣ древа три, показанная ми чудотворцемъ, и обрѣте мѣсто хранилищное и повелѣ мотыками землю копати и вонъ носити, и три дни копахъ до подошвы и обрѣте связокъ велій писанія: вся истлѣ; и на рѣцѣ въ мучныхъ плетеныхъ сосудехъ съ того писма землю омывая и лоскутки избирая и вспоминая слышанная во младенчествѣ отъ уставщика Гурія и помалу вся помощію чудотворца Авраамія исписа и поиде во святую обитель. И у чюдотворца молебная совершивъ и пріиде ко архимандриту и ко братіи. Они же мя любовно пріяша и постригоша и учителю вручиша мя. И пребывая въ келіи и помышляя, како бы сіе Іоакимово снисканіе къ прежнему написанному чюдотворцеву житію присовокупивъ вписати по достоинству. И у (у)ставщика священномонаха Космы испроси книгу древняго чюдотворцова житія и помоляся Богу и Пречистей Богородицѣ и преподобному Аврамію чюдотворцу и по малу памятуя Гуріева сказанія о семъ и сіе Іоакимово списканіе присовокупивъ къ прежнему чюдотворцову житію и нача дѣлу касатися и вписа, давшему ми помощь чюдотворцу Аврамію. Молю же васъ, святіи отцы и братія, чтущіи и послушающіи: аще что вашему преподобнству о присовокупленіи къ преждеписанному чюдотворцову житію не угодно явится, Господа ради благословите, а не клените, и своимъ благочестіемъ исправляйте, понеже бо состарѣхся, лѣтъ ми девяносто и въ дряхлости обеспамятствовахъ, а не присовокупивъ и не вписати не смѣ, но по явленію чюдотворца Авраамія и наказанія его тако сотворихъ.
⸭ ⸭ ⸭
Чудо святаго Авраамія чудотворца.
Въ лѣта 7157 (1649) году августа 22 день той же обители архимандритъ Ермогенъ, пришедъ къ пишущему сіе чюдотворцево житіе, и вземъ прочте его и глагола, яко «не повелѣно сего житія въ церковь пріимати, чюдотворецъ бо бѣ во дни Владимира Мономаха», и поверже житіе. Азъ же повѣда ему, яко чюдотворецъ чюдодѣйствова и сотвори въ Ростовѣ чюдо, идола Велеса сокруши, и съ каменіемъ въ бездну посла, при первыхъ епископѣхъ Ѳеодорѣ и Ларіонѣ, и діавола обличи предъ великимъ княземъ Владимиромъ, крестившему Россійскую землю, а Монамахъ еще въ тыя дни и не родился и во Володимерѣ не бывалъ, кромѣ его внучатъ. Слышавъ же сія, Ермогенъ нача быстро зрѣти сѣмо и овамо, и лицу его премѣншуся и потече исъ келіи скоро за монастырь и повелѣ мску привести и всѣдше поиде московскимъ путемъ и преѣха Ишню рѣку и вся отврати слуги и взя единаго отъ отрокъ и поиде къ западу въ дебрь и два дни да нощь глумихся. Келарь же и братія многихъ по немъ слугъ послаша и едва его изыскахъ и возвратихъ во обитель. Видѣвъ же его келарь и братія премѣнна зракомъ и повелѣ у него быти четыремъ слугамъ. И въ другій день той Ермогенъ отъ нихъ скрыся и о немъ во обители бывшу звону и вси людіе збѣгошася и ту во обители и около монастыря искахъ и не обрѣтохъ. Келарь же и братія зѣло въ печали быша и внезапу обрѣте его въ дымной трубѣ и едва оттуду извлекли. Аще бы мало время умедлено, то бы тутъ и скончался. Келарь и братія повелѣ быти со слугами казначею да конюшему, и бѣ два дни утѣшая его и изыде за нимъ за монастырь и поиде въ поле, дабы хлѣба дозрить, и по малу доиде до дебри и избѣже отъ нихъ и утече отъ нихъ въ дебрь и невидимъ бысть. И бысть о немъ звону и всю дебрь людми обступиша, и той день искахъ его и не обрѣтохъ его. Келарь же и братія повѣда о немъ митрополиту, митрополитъ же со гнѣвомъ отрече имъ: «Врази есте, яко во блатѣ погрузили его». Келарь же и братія по всѣмъ путемъ послаша многихъ людей на взысканіе его. Калугеръ же той, пушущій чюдотворцево житіе, созва въ церковь всю братію къ чюдотворцу Аврамію и священникамъ повелѣ молебенъ пѣти и молити Бога и Пречистую Богородицу и преподобнаго Аврамія чюдотворца, дабы избѣгшаго обрѣсти и отъ таковаго слова святительскаго избыти и святую обитель отъ укоризны избавилъ и оправдалъ. И единому слузѣ, именемъ Григорію, женяше къ Ярославлю и вопрошахъ многихъ и на Сотмѣ, но никакоже вѣдѣ, и паки отъ Воскресенія Сотмы поиде путемъ своимъ и отыде поприща съ три, и нанесе ему гласъ въ дебри сѣкущаго «тутъ, тутъ». Онъ же ста и нача слушати: егда древодѣль по древу сѣчивомъ ударить и гласу бывшу къ нему «тутъ, тутъ» и еще пожда по томужъ гласу бывшу и тому Григорію возвращьшуся на той гласъ въ дебрь сѣкущаго и найде его и вопрошахъ его, онъ ли той гласъ испущалъ «тутъ, тутъ», древодѣль же отречеся: «ни», и повелѣ ему сѣщи, той же бѣ гласъ. Онъ же походя и узрѣ храмину заметану древесы и призва ту близь живущихъ и вопроси ихъ: «Что есть въ дебри храмина замкнута и древесы двери завалены»? Они же повѣдаша ему, яко ту пустынникъ пребываетъ, нынѣ же онъ въ царствующемъ градѣ Москвѣ. Той же Григорій, пришедъ ко дверемъ, нача двери очищати. Въ келіи же той нача пресмыкатися и отверзе двери и взя его и вопрошахъ: «Кто его ту посади»? Онъ же ему отвѣща: «Не вѣдѣ», и приведе его во святую обитель. Келарь же и братія возда хвалу Христу Богу и чюдотворцу Аврамію и обрадовася и пріяхъ его честно и съ нимъ поиде къ митрополиту объявить, яко здравъ бѣ. Онъ Ермогенъ архимандритъ билъ челомъ митрополиту, дабы его отпустилъ къ Москвѣ.
Митрополитъ же благословилъ и изъ обители его отпустилъ и на Москвѣ билъ челомъ святѣйшему патріарху на обѣщаніе, и отпущенъ въ Переславль.
⸭ ⸭ ⸭
ПОХВАЛА
преподобному Авраамію,
Богоявленскому архимандриту, Ростовскому чудотворцу.
Радуйтеся праведніи о Господѣ! Правымъ подобаетъ похвала! Се бо свидѣтель на небеси вѣренъ, яко помяну Господь слово святое свое, еже ко Аврааму робу своему, и изведе люди своя въ радости и избранныя своя въ веселіи, яко да сохранятъ оправданія Его и закона Его взыщутъ. Праведенъ Богъ Господъ во всѣхъ словесѣхъ своихъ и преподобенъ во всѣхъ дѣлѣхъ своихъ и близъ Господъ всѣмъ, призывающимъ Его, благоволитъ же на всѣхъ, боящихся Его. Блажени вси, боящіися Господа, ходящіи въ путѣхъ Его. По истиннѣ блаженъ еси, Аврамій, и добро тебѣ будетъ, труды бо плодовъ твоихъ снеси, понеже сѣющіи слезами радостію пожнутъ; пріялъ бо еси отъ Бога зачало премудрости, страхъ Господень, понеже страхомъ Господнимъ уклоняется всякъ человѣкъ отъ зла. Ты же бысть и инѣмъ учитель и спасенію ходатай явися, со святители святъ, съ преподобными преподобенъ, со избранными избранъ, якоже рече Господь: Вознесохъ избраннаго отъ людей моихъ, елеомъ святымъ благодати моея духовныя помазахъ его, яко вѣсть Господь путь праведныхъ. И вси увѣдѣша, яко удиви Господь преподобнаго своего. Сего ради пророкъ рече: Дивенъ Господь во святыхъ своихъ, Богъ Израилевъ; праведникъ яко финиксъ процвѣтетъ и яко кедръ, иже въ Ливанѣ, умножится, насажденъ въ дому Господни, во дворѣхъ Бога нашего процвѣтетъ, понеже праведницы наслѣдятъ землю и вселятся въ вѣкъ вѣка на ней. Уста праведникъ поучатся премудрости и языкъ его возглаголетъ судъ, яко Господь въ родѣ праведныхъ боящіяся Его славитъ, аще и удалются и бѣгаютъ, водворяяяся въ пустыню, но Господеви воспѣваютъ. Азъ же возрадуюся во вѣкъ, пою Богу Іаковлю: Вознесется рогъ праведнаго. Ты бо, отче Авраміе, со дерзновеніемъ рече Богови: Сохрани душу мою, яко преподобенъ есмь; спаси раба Твоего, Боже мой, уповающаго на Тя. И возрадуюся заутра милости Твоеи и отъ Господа реченное: Въ души твоей услышавъ и вознесохъ избраннаго отъ людей Моихъ и елеомъ святымъ благодати Духа Моего помазахъ, и ничто же успѣетъ врагъ на него и сынъ беззаконія не приложитъ озлобити его, яко совѣтъ нечестивыхъ потребится; святымъ, иже суть на земли Его, удиви Господь вся хотѣнія своя въ нихъ, яко же русло бысть Духомъ Святымъ, Божественный отче чудоносне Аврааміе, и сія богоугодне долы совершилъ еси, еже рече: Пойте Господеви, преподобныи Его, и не повѣдайте память святыни Его и паки возлюбите Господа вси преподобныи Его, яко истинны взыскаетъ Господь и воздаетъ излише творящимъ неправду; (и здѣ рече спасаемымъ): мужайтеся и да крѣпится сердце ваше, вси уповающіи на Господа, яко помолится Господеви всякъ преподобный, во время благопотребно веселитеся о Господѣ и радуйтеся, праведніи, и хвалитеся вси правіи сердцемъ, яко Господь любитъ судъ и не оставитъ преподобныхъ своихъ, во вѣки сохранятся. Беззаконницы же изженутся и сѣмя нечестивыхъ потребится. И узрятъ праведніи и убоятся и о нечестивыхъ возсмѣются и возвеселятся; праведникъ, егда видитъ о Бозѣ отмщеніе, и паки возвеселится праведникъ о Господѣ и уповаетъ на Него. И похвалятся вси правіи сердцемъ, таже въ память вѣчную будетъ праведникъ и честна предъ Господемъ смерть преподобныхъ Его, яко Господь любитъ праведники и хранитъ ихъ милостію, и души ихъ во благихъ водворятся, праведный же аще и не яве, но чюдесы вѣщаетъ, уста моя возглаголютъ премудрость и поученіе сердца моего разумъ; соберите ему преподобныя его въ послушаніе, яко праведницы возвеселятся и возрадуются предъ Богомъ; понеже хранитъ Господь души преподобныхъ своихъ, яко сѣмя Авраамле раби его; возвеселитеся, праведніи, о Господѣ и исповѣдайте память святыни его. Преподобный же Аврааміи егда о благочестіи подвизашеся, нечести віи убо злобою вооружахуся на него, онъ же молитвою о нихъ подвизашеся, глаголя: Господи, услыши молитву мою и вопль мой къ Тебѣ да пріидетъ; не отврати лица Твоего отъ мене, но скоро услыши мя. Милость же Твоя отъ вѣка и до вѣка на боящихся Его. И благоволитъ Господь въ боящихся Его и вознесетъ рогъ людей своихъ молитвами ихъ, пѣсньми и хвалами всѣхъ преподобныхъ Его, воспѣваніемъ хваленія въ церкви преподобныхъ, вознесетъ кроткія во спасеніе, и да восхвалятся вси преподобніи во славѣ Господа своего, съ ними же и блаженный Авраамій чудотворецъ, сотворити въ нихъ судъ написанъ. Слава сія будетъ всѣмъ преподобнымъ Его. Сей Авраамій смиреніемъ и любовію Христови угодникъ бысть, чистотою и цѣломудріемъ ангеломъ подражатель, дерзновеніемъ пророкомъ, ревнитель ученіемъ, апостоломъ наслѣдникъ, мученикомъ сострадалецъ и преподобнымъ единоспожитель. Блаженный Аврааміи чудотворецъ Христовъ, угодникъ во всѣхъ добродѣтелехъ, праведенъ и преподобенъ, непороченъ же и святъ, яко же сказа о семъ блаженный Максимъ исповѣдникъ: кто праведенъ (сіе письмо пишетъ и во градскихъ законѣхъ), яко своя держай и чюжихъ не желая, судяй по правдѣ, а не по лицу, той праведенъ есть. Сей Божественный Авраамій исполни Христовы заповѣди: аще кто ударитъ тя въ ланиту, обрати ему и другую; аще кто восхощетъ взяти ризу твою, не возбрани ему и срачицы взяти; поемлющему тя поприще иди съ нимъ два; лишаемъ не скорби, гонимъ претерпи, укоряемъ благодари, умертвися грѣху, сраспнися Христу; возлюби искренняго своего яко самъ себе. Кто же непороченъ, яко же праведный Іовъ, о немъ же Господъ Богъ похвалися, глаголя: Внятъ ли на раба Моего Іова, яко не обрѣтеся подобенъ ему отъ сущихъ на земли сый? Аще бо и отъ Исава, но праотца Авраама наслѣдникъ бысть. Якоже бо Авраамъ отческое нечестіе остави и къ Богу присвоися, тако и Божественный Авраамій чудотворецъ отчество свое остави и въ чюжихъ странахъ яко солнце просія, чудотворецъ бо именовася, званіе отъ дѣлъ пріемъ. Кто же убо святъ, сей въ сыновство Божіе причтеся, яко же бо Господь Богъ праведники любяй и грѣшныя милуяй, и солнце свое сіяетъ и дождитъ на праведныя и на неправедныя. Сыновство же сіе приведе Григорій Нисскій, ростолкова «Отче нашъ»; аще кто глаголетъ: «Отче нашъ, иже еси на небеси, да святится имя Твое, и остави намъ долги наша», а самъ жестокосердъ, сей не небеснаго Отца призываетъ, но преисподняго; той бо жестокосердъ, а Господь Богъ боящіяся Его славитъ. Уничиженъ есть предъ нимъ лукавый; тако и Божественный Авраамій всѣхъ милуяй и всѣмъ чудотворенія подая, независтно ангеломъ сподражатель, яко безплотныхъ житіе поживе въ чистотѣ и цѣломудріи, дерзновеніемъ же пророкомъ ревнитель, яко же Илія пророкъ Ахава и Іезавель посрами и жерцы Вааловы закла и попали и идола сокруши: тако и Божественный Авраамій нечестивыхъ посрами и идола сокруши; апостоломъ же наслѣдникъ, яко люди отъ нечестія свободи и крещеніемъ ко Христу приведе; мученикомъ же сострадалецъ, яко нечаянно и безмездно пострада, аще и отъ вѣрнаго, но врага посрами; преподобнымъ единосожитель, яко множество братіи собра, велію обитель совокупи и своимъ ученіемъ и любовію въ страхъ Божій всѣхъ утверди. Како же тя нынѣ прославимъ, Божественный Авраамій чюдотворче, или кія похвалныя вѣнцы сплетемъ мы, убозіи ученицы твои, житіе твое почитающе и отъ честныя твоея раки и отъ святаго и честнаго твоего многоцѣлебнаго твоего тѣла, иже есть Духа Святаго сосудъ, чюдеса видяще и память твою празднующе, а сами нерадиве живуще? Но обаче аще и не красна похвала отъ недостойныхъ устенъ, но дерзновеніемъ, на любовь твою уповающе, глаголати: Радуйся, преподобне, чудоносне, пріемый вѣнецъ трудовъ твоихъ, и потовъ, и духовныхъ подвигъ отъ Вседержителя Бога! Радуйся, преподобне отче Аврааміе, яко послѣдова ученіемъ, чюдесы же и подвиги преблагому пастырю, иже во святителехъ, великому Леонтію, его же Господь Богъ отъ востокъ къ западу посла, яко свѣтило великое, да просвѣтитъ сущія во тмѣ невѣдѣнія! Радуйся, яко пріемый сугубъ даръ исцѣленіемъ отъ Святыя Троицы, Отца и Сына и Святаго! Радуйся, яко наперсника Христова, спомощника и споспѣшника стяжавъ по Бозѣ ревности твоей! Радуйся, яко идолы сокрушилъ еси и невѣрныя люди окрестъ града къ Богу привелъ еси святымъ крещеніемъ! Радуйся, пресвятая главо, яко храмъ Господеви и обитель по Бозѣ живущимъ воздвиглъ еси! Радуйся, яко собралъ еси ученикъ множества, страхомъ Божіимъ и твоимъ ученіемъ наставляеми! Радуйся, учителю монахомъ и правило духовное! Радуйся, яко отъ чистыя твоея раки и духоноснаго чудотворнаго ти тѣла источаеми различныя исцѣленія вѣрою приходящимъ! Радуйся, отче святый, имъ же избыхомъ тмы и свѣтъ познахомъ! Радуйся, дѣлателю вѣрѣ Христовѣ и садителю въ сердца просвѣщаемыхъ душамъ! Радуйся, древо честнаго рая, отъ него же израсте монаховъ множество, отъ нихъ же нынѣ человѣцы, насыщающеся поученій духовныхъ и кающеся, пріемлютъ грѣховъ прощеніе! Радуйся, яко твоимъ поученіемъ отъ Божественныхъ книгъ насѣялъ еси въ душахъ духовнаго дѣланія, отъ нихъ же жнутъ монаси полезная рукояти покаяніе! Радуйся, яко твоимъ подвигомъ мнози пріяша неоскудную пищу во царствіи небеснемъ, ея же трапезы тайныя да сподобимся и мы грѣшніи получити, кающеся грѣховъ своихъ молитвами преподобнаго чюдотворца Авраамія. О преблаженный отче Богоносне Авраміе, не остави насъ!
«Ярославскія Епархіальныя Вѣдомости». 1890. Ч. Неофф. № 14. Стб. 209-222; № 15. Стб. 225-239.
⸭ ⸭ ⸭
Тропарь, гласъ 1-й:
Просвѣти́вся Боже́ственною благода́тію, невѣ́рныя лю́ди наста́вилъ еси́ къ свѣ́ту богоразу́мія: и по сме́рти сія́я свѣ́тлостію житія́ твоего́, источа́еши исцѣле́нія притека́ющимъ съ вѣ́рою къ ра́цѣ моще́й твои́хъ, Авра́міе о́тче на́шъ, Христа́ Бо́га моли́ дарова́ти на́мъ ве́лію ми́лость.
Кондакъ, гласъ 2-й:
Иго Христо́во пріе́мъ, Авра́міе, и Того́ кре́стъ на ра́мо взе́мъ, послѣ́довалъ еси́ Ему́, насажде́нъ бы́въ въ дому́ Госпо́дни и процвѣ́лъ еси́, я́ко фи́никсъ, и я́ко ке́дръ, и́же въ Лива́нѣ, умно́жилъ еси́ ча́да твоя́, му́жъ жела́ній духо́вныхъ: отъ возлю́бленнаго же апо́стола Іоа́нна Богосло́ва благода́ть воспріи́мъ, жезло́мъ сокруши́лъ еси́ и́дола и разсы́палъ еси́ его́, я́ко пра́хъ, и чудотво́рецъ у́бо ве́лій яви́лся еси́, преподо́бне. Тѣ́мже Христа́ Бо́га моли́ непреста́нно о всѣ́хъ на́съ.
