МОЛИТВЫ ВЪ НАЧАЛѢ ПОСТА СВЯТЫЯ ЧЕТЫРЕДЕСЯТНИЦЫ.

Яже іерей своимъ парохіаномъ въ понедѣльникъ первый Святаго Великаго Поста, или въ иный день первыя постныя седмицы въ церкви по утрени, или по часѣхъ.

Вземъ на себе епитрахиль, чтетъ молитвы сія со великимъ умиленіемъ:

Господу помолимся!

Надѣяніе всѣмъ концемъ земли, и сущимъ въ мори далече, Боже, пронарекій святыя дни сія постныя закономъ, и пророки и Евангелисты! Сподоби всѣхъ въ чистотѣ теченіе постнее прейти, вѣру неразлучну соблюсти, и заповѣди Твоя сохранити во вся дни живота нашего. Ангелу мирну заповѣждь соблюдати входы наша и исходы на всякое дѣло благое, и спослущающу, и соугождающу къ совершенному причащенію пречистыхъ Твоихъ таинъ. Пріими же, Владыко, колѣнное поклоненіе и постъ рабовъ Твоихъ, подая имъ благословленіе духовное, и всѣмъ намъ, о Христѣ Іисусѣ, Господѣ нашемъ, съ Нимъ же благословенъ еси, съ пресвятымъ, и благимъ, и животорящимъ Твоимъ Духомъ, нынѣ и присно, и во вѣки вѣковъ, аминь.

Молитва вторая.

Господу помолимся!

Благословенъ еси Господи Вседержителю, Боже отецъ нашихъ, Авраамовъ, и Исааковъ, и Іаковль, сотворивый небо и землю, и вся сущая въ нихъ; положивый человѣкомъ покаяніе во спасеніе, и презираяй ихъ прегрѣшенія, и пріемый слезы раба Твоего Давида пророка, и давый ему оставленіе грѣховъ кающемуся. Манассію узами желѣзными связаннаго, покаяніемъ же исповѣдавшагося Тебѣ, молитву пріимый, и грѣхи его оставивый; блудницу (Раавъ) познавшую милость Твою, исходники пріимшую, съ миромъ пустившую, спасый: услыши нынѣ моленіе мене недостойнаго раба Твоего, и презри вся согрѣшенія сихъ рабовъ Твоихъ, въ покаяніи къ Тебѣ прибѣгающихъ: и даждь имъ сердечное сокрушеніе, и болѣзнь о грѣсѣхъ, имиже Тебе Творца своего прогнѣваша, могущую ихъ отъ грѣховъ очистити. Даждь имъ благодать Твою, яко да тою возбуждаеми и подкрѣпляеми, въ память злая своя дѣла приведутъ, и сія вся во страсѣ Твоемъ, духовному своему отцу, отъ Тебе же уставленному судіи истинно исповѣдать, и сами на себе яко на винныхъ въ сердцѣ сокрушенномъ и смиренномъ поимствовати (брать) и каятися и жалѣти себе о нихъ, и совершеннаго прощенія, и отъ нихъ, разрѣшенія Твоимъ милосердіемъ чрезъ ихъ духовника, Твоего же судію, по неложному Твоему обѣщанію сподоби. Ты бо реклъ еси: «еже аще разрѣшите на земли, будетъ разрѣшено на небесѣхъ». Ей, Бладыко, Господи Іисусе Христе, Боже нашъ, пріими рабы Твоя, кающіяся о своихъ грѣсѣхъ, вѣдомыхъ и невѣдомыхъ, вольныхъ и невольныхъ, и сія исповѣдати по Твоему повелѣнію предложившихъ, и Твоею силою и благодатію пріимъ ихъ милостивно, укрѣпи еже къ тому не возвратитися имъ ко грѣху, и къ злымъ и неподобнымъ дѣломъ, въ нихъ же многажды впадоша; но воздвигни и заступи ихъ отъ козней діавольскихъ и отъ всѣхъ сѣтей непріязненныхъ, яко да безъ препятія послужатъ Ти въ преподобіи и правдѣ во вся дни живота своего. Ты бо еси Богъ нашъ, въ міръ пришедый, не праведныхъ призвати, но грѣшныхъ на покаяніе; и семьдесятъ кратъ седмерицею впадающимъ во грѣхъ оставляти согрѣшенія повелѣвый. Якоже убо жену въ прелюбодѣяніи ятую Фарисеями, искушающими Тя, приведенную, не осудилъ еси, но милостивно реклъ еси: «иди, и отселѣ ктому не согрѣшай»; и сихъ не осуждай, но человѣколюбно помилуй! И якоже и другую блудницу плачущуюся, и слезами нозѣ Твоя омывшую, и главы своея власы отершую, помиловалъ еси милости Твоея ради, подаждь и симъ рабомъ Твоимъ невозбранныя и теплыя во истинномъ покаяніи слезы. Утверди ихъ умъ и сердце, знати Тебе Единаго Истиннаго Сына Божія, вземлющаго грѣхи міра. Пріими ихъ, якоже Петра отвергшагося Тебе, и покаяніемъ и горькими слезами обращшагося пріялъ еси; простри десницу Твою, и пріими ихъ, яко же того въ мори утопающаго пріялъ еси, и укрѣпи ихъ на борющаго ихъ діавола, очисти ихъ душу и тѣло отъ всякія скверны. Самъ бо реклъ еси благій Господи: не требовати здравымъ врача, но болящимъ, и пришелъ еси не спасаемыхъ спасти, но погибающихъ. Даждь убо, Господи Іисусе Христе, Боже нашъ, рабомъ Твоимъ симъ скончати безъ порока начатый се святый постъ, и въ немъ Твоя заповѣди исполняти, въ молитвахъ же прилежати, и всѣми добродѣтельми Тебѣ во вся дни живота своего благоугождати, яко да въ чистой совѣсти причаститися неосужденно Твоему Божественному тѣлу и Животворящей крови, изліянной за весь міръ во оставленіе грѣховъ, сподобятся, и да побѣдятъ и посрамлять діавола на нихъ воюющаго. Ты бо еси Боже, Богъ кающихся, не хотяй смерти грѣшнаго, но еже обратитися, и живу быти ему. Не хощеши бо, Владыко, созданіе Твоихъ рукъ погубити, ниже благоволиши о погибели человѣчестѣй; но хощеши всѣмъ спастися и въ разумъ истинный пріити. Тѣмъ же и нынѣ, Владыко, не отврати лица Твоего отъ рабъ Твоихъ сихъ, но даждь имъ истинное отъ грѣховъ къ Тебѣ обращеніе, и отъ всѣхъ дѣлъ лукавыхъ избавленіе, и сподоби всѣхъ насъ въ мирѣ исполненныхъ дѣлъ благихъ доити, и поклонится спасительнымъ Твоимъ страстемъ, и святому Воскресенію, и на кончинѣ живота нашего радости вѣчная со всѣми Тебѣ благоугодившими получити, въ Тебѣ Бозѣ и Спасителѣ нашемъ! Ты бо еси Богъ милостей и щедротъ и человѣколюбія, и Тебѣ славу возсылаемъ, со безначальнымъ Твоимъ Отцемъ, и съ пресвятымъ, и благимъ, животворящимъ Твоимъ Духомъ, нынѣ и присно, и во вѣки вѣковъ, аминь.

По семъ благословляетъ ихъ десницею, глаголя:

Благословеніе Господне на васъ, Того благодатію и щедротами и человѣколюбіемъ, всегда, нынѣ и присно, и во вѣки вѣковъ, аминь.

Книга молебныхъ пѣній Православной Каѳолической Восточной Церкви. Нѣмецкій переводъ съ параллельнымъ славянскимъ текстомъ, провѣреннымъ по греческимъ оригиналамъ, протоіерея Алексѣя Мальцева, mag. theol., Наcтоятеля церкви при Императорскомъ Россійскомъ Посольствѣ въ Берлинѣ. Берлинъ 1897. С. 557-567.


КАНОН - Свод законов православной церкви



«Благотворительность содержит жизнь».
Святитель Григорий Нисский (Слово 1)

Рубрики:

Популярное:

Церковный календарь:

© Церковный календарь



Подписаться на рассылку: