«Успенская стихира на цѣлованіе Пресвятыя Богородицы» (твореніе киръ Григорія Цамблака)

«БЛАГОСЛОВЛЯЮ» введение в богослужебную практику «Успенской стихиры на цѣлованіе Пресвятыя Богородицы (твореніе киръ Григорія Цамблака)», как прекрасное душеполезное наследие нашей Западно-Русской Церкви.

+ Епископ Неманский и Европейский ПЕТР

«Успенская стихира на цѣлованіе Пресвятыя Богородицы»

(твореніе киръ Григорія Цамблака)

Осмогласникъ, слава, и нынѣ, гласъ осмый:

Днесь Владычица и Богородица, Пресвятая Дѣво Царица, преходитъ отъ земныхъ къ небѣснымъ, ко Царю царствующему, къ Сыну Своему и Богу, сопричаститися Царствію вѣчному, паче же превѣчному и конца не имущему, не на колесницѣ рабски, якоже Илья, но матерьски Царица царски, на Сыновнихъ рукахъ со множествы войев херувимьскихъ.

(Гласъ 1-й:) И тогда лучшіи апостоломъ предпосылаеми, по облакомъ предпоставляеми пресвѣтлыми ангелы пречистому Твоему и богопріятному тѣлу, преукрашеннѣй Церкви Царя небеснаго, въ ней же непостижимый и неприкосновенный написуется плотию, и отъ сосцу животочну питается.

Богъ убо сый, сподоби за милосердіе совершенно вообразитися Ею во человѣчество и податися ему Божества достояніе.

И предсташа весь ликъ богословецъ, не дванадесятѣхъ, но и седмьдесятѣхъ, исходныя пѣсни пояху, честь воздающе апостольскаго сословія, глаголюще: «Что Тебѣ речемъ? Кіими мѵры проводимъ Тя, Мѵропріемнице небесная? Кое кадило принесемъ Ти, Златая кадильнице? Недоумѣемся и удивляемся, како Одръ великаго Царя, на малѣ одрѣ мертволѣпно безъ дыханія лежитъ?».

(5-й:) Пріимъ же Петрово воспѣваніе, Павелъ, сосудъ избранный, весь изступль, весь восхищенъ, весь обожаемь, – «О, чудесе!» глаголавъ, како затворишася дѣвственніи очи, иже отъ самѣхъ пеленъ ангелы зрѣти навыкоша? Како Питательница Жизни смертію объята бысть? Како и не сохранися безсмертна, якоже нетлѣнна по Рождествѣ сохранена бысть? Како Небесная лѣствице, по ней же сниде Богъ ко человѣкомъ, затворитися грядетъ? Како Гора превысокая и великая Божія на малѣ одрѣ лежитъ, въ ней же вселися до конца Господь? Како Жезлъ присноцвѣтущій нынѣ увянувъ зрится?

(2-й:) О, преславнаго зрѣнія! О, непостижимаго таинства! О, глубина богатства, и премудрости и разума Божія, яко не испытаны судьбы Его и не изслѣдованы пути Его!

Кто разумѣ умъ Господень, или кто совѣтникъ Ему бысть?

(6-й:) Почто отлетѣ отъ насъ, отъ Своихъ рабъ, Голубице неблазненная? Почто удалися отъ насъ Горлица сладкогласная? На кого возримъ прочее? Кто намъ провѣщаетъ? кто же отъ навѣтъ іудейскихъ печаль нашу утѣшитъ?

На Тя бо зряще, Онаго зрѣти мнѣхомъ, Иже неизреченно изъ Тебе возсіявшаго.

Вознесеся ко Спасу, и мы надежду нашу вси на Тя имѣхомъ, и сладцѣ терпѣхомъ труды и гоненія о проповѣди истиннѣй;

(3-й:) Нынѣ же послѣднее сиротьство объятъ насъ. Како внезапу угасе Свѣтильньче Свѣту?

Но смотреніе, еже на Тебѣ бываемое, а не одолѣніе смертное, ниже возмогла бы, яже единою Твоимъ Сыномъ умертвившися смерти, Тебѣ животу привязатися. Но да не вмѣнится привидѣніе вочеловѣченія истина подобь и безсмертному Твоему плоду естества долгъ отдаеши.

(7-й:) И вся, къ чести ключима, исходному времени пѣсни пояху Приснодѣвѣй Божіей Матери, Іяковъ, великій Божій братъ, со Иоанномъ, сыномъ Громовѣмъ, и иніи богословесніи мужіи, достойніи предстояній пречистаго Твоего тѣлеси, мрежею Евангельскою и Павлимъ языкомъ уловлени, Діонисіе, Ероѳее, и Тимоѳее, глаголюще: «Поиди, Владычице, поиди, яко землю освятила еси Рождествомъ Своимъ, тако и воздухъ освятиши пришествіемъ Си.

Поиди, Всецарице, поиди и сцарьствуй съ Сыномъ Своимъ и Богомъ нашимъ.

(4-й:) Да отверзутся Тебѣ врата небесныя со мнозѣмъ удивленіемъ, яко Ева убо врата Едему затвори, Ты же и небесная врата отверзе. Ниже убо достойно есть Двери непроходимѣй, еюже Господь Единъ вниде и изыде, затворенну остави, на земли стояти, но взятѣй быти ко уготовленному Тоя чертогу.

Да подымутъ Тя, Дѣво, херувими, да прославять Тя силы, да предтекутъ Ти престоли, зряще Тя – Престолъ неописаннаго и безтруднаго естества.

Поиди, Невѣсто неневѣстная, въ невѣстникъ небесный!»

Сія богословяху и иная многая, чудніи они мужи, якоже никтоже можетъ по достоинству изрещи, ко гробу провождающе Жизни Матерь.

(8-й:) Мы же что къ Ней речемъ? Како родъ нашъ Почетшую почтемъ? Како воспоемъ многопѣтую Дѣву? Како возвеличимъ, Юже вси роди величаютъ, якоже прорече?

Но возопіемъ съ Гавріиломъ: «Радуйся Древе жизни, радуйся Горо приосѣнная, радуйся Мосте преводяй всѣхъ, иже вѣрою Твое преставленіе чтушая, къ вѣчному.

Подобаетъ бо Ти, Матери Божіи, яко Царицѣ, царскими добротами дориноситися, – преходиши бо къ небеснѣй странѣ, небесная Невѣсто, и паки жива преставляешися къ Божественнѣй свѣтлости, яко отъ чертога населенія Твоего, отъ земли взимаешися и совозводиши съ Собою множество ходатайствомъ Си.

Предпосылаютъ Ти ся апостоли со ангельскими воинствы, и дѣвственіи лици тайно окрестъ одра Дѣвы Богородицы предстоятъ, и души праведныхъ, пролѣтѣвши, Царицу славятъ, и молятся ови невещественно пѣніе добродѣтелей принесше.

Царице небесная и многопѣтая Владычице! Сродна присвоенія не забуди, и не оскудѣй назирающи, и не забуди царя, и градъ, и люди, иноцы и простіи. Мы бо люди Твои и овца пажити Твоея, имя Твое призываемъ и вѣрно празднуемъ всесвятое Твое Успеніе!

В. Ундольскій. Замѣчанія для исторіи церковнаго пѣнія въ Россіи. // Чтенія въ Императорскомъ Обществѣ исторіи и древностей Россійскихъ при Московскомъ Университетѣ. М. 1846. № 3. С. 4-6.


КАНОН - Свод законов православной церкви



«Благотворительность содержит жизнь».
Святитель Григорий Нисский (Слово 1)

Рубрики:

Популярное:

Церковный календарь:

© Церковный календарь



Подписаться на рассылку: